十月初四 動物日　　老師紹介 誠詳細

生態維護 靠逐家 　美麗傳予 後一代

烏白放生 是殺生　　功德變做 了失德

汫水魚入 鹹水港　　這款代誌 毋通綴

流浪動物 𠢕生湠　　掠龜走鱉 閣僫揣

往擺攏有 安樂死　　這馬廢除 十二暝

寵物毋是 𨑨迌物　　尊重性命 莫買賣

袂使無愛 就放捒　　莫作虎頭 鳥鼠尾

　　2017年咱全國的收容所已經實行「零安樂死」政策，嘛佇仝年ȇ四月份閣通過《動物保護法》的修正草案，以後遐刁工虐待動物的人，攏會判重刑，參較早毋相。

　　老師講，逐家毋通共人綴時行，佇夜市仔抑是寵物店買動物來展風神！性命是袂當做精牲仔來買賣矣，飼伊著愛有才調佮責任。

　　佇咱新北市有一寡收容所，攏有足濟貓仔佮狗仔咧予人分。關佇𤲍甲密喌喌ȇ籠仔內，敢若監囚仝款，需要有人共𤆬出來！

　　五股流浪動物之家的阿姨講，遮有規岫貓仔囝拄仔好斷奶，恁看覓咧，敢有佮意佗一隻？

　　彼兩蕊目睭圓輾輾佮阮相對siòng，予人看著是真毋甘。猶毋過阿母講：「元仔，你干焦會當飼一隻爾爾喔！」。煞尾……

　　獸醫共注痟狗症ȇ預防射，閣thāu虼蚤，

吩咐阮另日等飼大隻了後，著愛抱去動物病院hóng閹起來，遮的攏會當來申請補助。

　　伊看阮毋捌飼過，閣教講毋但食食以外，嘛要啉清氣的水較袂破病，蔥頭、蒜茸佮花粉遮的物件攏是袂當磕得，尤其是『巧克力』。

　　阿母講，飼貓仔若親像咧飼囡仔，家己愛上網看冊揣資料喔！做貓奴嘛是愛擔責任矣。

　　阮查落才知影，貓仔嘛是會食草仔。若是欲栽麥仔草進前，著先愛共麥仔子浸一對時的水，按呢較𠢕暴穎嘛較好種！

　　貓咪泄尿是臭薟薟，毛嘛真𠢕落。日時攏咧盹龜哈唏，暗時就軁來軁去、懸低，家具嘛予扒甲花巴哩貓，規間厝是舞甲挐氅氅，予人看著是氣怫怫！

　　定定䖙佇阿爸的腹肚頂拍翸，猶會倚佇伊的肩胛頭司奶。莫怪阿爸見擺下班轉來，攏會守佇伊的跤後肚按呢礪來礪去，等阿爸共擽下頦佮拍尾椎，誠心適呢！

　　阿爸文文仔笑講：「一點也貓，百點也貓。元仔，你看敢是佮當初時仝款，遐爾á古錐呢？你千萬著毋通頭仔興興，尾仔杜定喔！」。