Na nosa aula (5ºC), a metade nacemos aquí, a outra metade nacemos fóra de Galicia porque os coruñeses nacemos onde nos peta. Mais con todo, todos sen excepción notamos un fenómeno curioso...

Os maiores que se dirixen a nós cambian de lingua, pensan que por ser da cidade non  entendemos o galego, mais están equivocados. Na nosa aula conviven o galego da Coruña co galego de Cali, o galego de Cabana de Bergantiños co galego da Habana, o galego da montaña co galego tropical. É unha mágoa, porque así os maiores non aprenden nin deixan que lles ensinemos.

A ti tampouco che falan galego? Es un adulto disposto a aprender o galego máis internacional? Non te preocupes! Os expertos lingüístas de 5ºC puxémonos mans á obra nos obradoiros secretos do colexio para crear un novidoso complexo vitamínico con todo o que precisa a túa lingua... a Vitamina G! 

A Vitamina G debe tomarse seguindo unhas coidadas instrucións de uso. Tras traballar na aula coa nosa mestra Mariña sobre lingua, cultura e identidades, reflexionamos a respecto de como poderíamos actuar nós para transformarmos a realidade inmediata da nosa contorna. 

Entre todos e todas concluímos que podíamos falar máis galego, que debíamos crear contidos nesta lingua que tamén nos constrúe, e que estes puidesen ser do interese dos nosos compañeiros e compañeiras. Ademais, queríamos que puidesen ser vistos dentro e fóra dos muros do noso centro. Pero, é que tamén decidimos outra cousa: que os protagonistas seríamos nós: os nenos e nenas! 

E así creamos Vitamina G, o "suplemento vitamínico" para activar a túa lingua.