månadscup sundag 27.09 kl. 18

September tuslar av garde og det er klart for ny månadscup i Øystese. Cupen er no ein miks med lisensierte og ulisensierte spelarar. Ikkje at det gjer nokon forskjel, det einaste er at dei med lisens får registrert seriane sine i Norges bowlingforbund.

FAKTA:

- Tid: Sundag 27. september kl. 18-21

- Stad: Hardanger bowling, Øystese

- Pris: kr. 150,-

- Deltakartal: maks 16 stk

- Påmelding: tlf: 41573625 eller på bowlingres

- Premiering: 1/8-del (kr. 100 per deltakar)

- Speleform: 4 seriar europeisk m/hcp
- Deltakarkrav: Ingen krav om lisens

- Hcp: Diff. mellom internt snitt og 200 - maks 75 (sjå tabell under)

Handicap til månadscup 27. sep. (klikk for liste)

Kvam - Sølvkula2 (veteranliga) 2-2

21. september 2026 kl 22:40

Då kom dei første poenga i veteranligaen. I ein jamnspelt kamp mot Sølvkula2 frå Kongsberg vart det poeng i serie 1 og 3 for kvemmingane, men i serie 2 spelte Sølvkula så bra at dei også fekk poenget for totalscoren.

To nye på laget i fohold til sist runde, og dei glei fint inn i veteranlagsflyten vår. Bestemann på laget i kveld var Olav med 163,7 i snitt.

Veteranliga 4. divisjon

Reidar i kanonform i lokalligaen

Måndag kveld skulle andrelaget vårt retta opp miseren frå opningsrunden. Kvam2 tok imot Døve på vår heimebane og bytta ut Finn med Reidar. Reidar har ikkje akkurat vore den mest aktive klubbspelaren, men fy flate som han trillar når han er i flyten. Olav og Terje trong berre å støtta litt oppunder og vipps så vart det 4 poeng til Kvam og 1 til Døve. To av seriane var rimeleg jamne, men i sisteserien var avstanden på over 80 pinnar. Olav var den einaste som brukte seriane til Q-spel utan at det løfta strandebermingen til nye høgder :)

Tabell 2. divisjon

På Vestkanten skulle Frank, Tore og Finn prøva seg mot førstelaget til Mascot, og det vart som forventa. Ikkje berre knusing, men nedsabling 5-0 med eit lagsnitt for Mascot1 på 230!. Og, - det fortel meir om kor bra Mascot spelte - kvemmingane spelte faktisk ein bra kamp med eit kampsnitt på 185.5. Tore fekk testa ei av sine to nykjøpte kuler og var godt nøgd med resultatet. Finn kjøpte også ny kule av hr. Torgersen, men den var for heftig for profilen på Vestkanten.

Tabell 1. divisjon

Martin vinnar av månadscup på Voss

Ein heftig kortprofil på 34 fot gjorde det vanskeleg for dei elleve deltakarane i dagens månadscup på Voss. Det vart eit drøss av splittar og endå fleire enkle sparemiss stort sett over heile linja. Martin var den som takla forholda best og ungikk dei heilt katastrofale seriane. At han toppar etter fire seriar på denne profilen er særs imponerande sidan han er ein av dei med lågaste hcp. Men jamt godt sparespel samt nokre strikerekker gjorde susen.

Sonja låg retteleg godt an halvvegs, men eit par tøffe avslutningsseriar øydela. Andreplassen gjekk til formann Gert som delte seriane sine i blokker på to og to; først to seriar på 143 og så to avslutningsseriar på 174. Månadscup-grossisten Tom hanka inn tredjeplassen på Voss. Tom var også den som organiserte turneringa. Den største variasjonen i spel stod underteikna for med seriar frå 125 til 225.

Takkar Voss bowlingklubb for atter ein kjekk månadscup sjølv om resultatet ikkje heilt vart det store.

Veteranlaget vart feid av banen

Kvam opna sesongens veteranliga med kamp mot Røros onsdag kveld. Kampane i veteranligaen går som såkalla telefonkampar. Det vil seia at begge laga spelar på sin eigen heimebane. Kampane må spelast innan ein gitt tidsfrist og det oppsette heimelaget får ansvaret med å leggja inn resultata når dei føreligg.

Kvemmingane gjorde i alle fall ein OK og veldig jamn kamp, men det vart altfor svakt til å trua Røros. Røros er nyopprykka frå 5. divisjon, men høyrer heime eit par/tre divisjonar oppover. Snittet deira i fjor var på vel 183 over 16 kampar. Det er 2. divisjonstakter over det spelet.

Kvam hadde eit snitt på 158 i onsdagens kamp. Røros spelte sin kamp torsdag og hadde eit snitt på 193, så våre veteranar vart satt skikkeleg på plass i denne kampen. Vår bestemann Olav nådde nesten opp til Røros sitt svakaste kort. Dette var nok ein av dei tøffaste kampane i årets serie og me får berre ynskja Røros lukke til vidare i si divisjonsklatring.

Resultatlister finn du etter kvart på bowling.no

Nokon som hugsar desse?

Kvam bowlingklubb har arrangert Månadscupen trufast sidan 2009. I løpet av desse åra har klubben levert ut 14 vandrepokalar. Den siste vandrepokalen vart hanka inn av meg i mai i 2024. Etter det har me fortsatt å arrangera månadscupen, men slutta med pokalen. Eit søk på nettsidene til klubben viser at det ville blitt to pokalar til fram til i dag; ein til Olav Ludvig som ville hatt 14 oppføringar og ein til Tom med 10 oppføringar.

Må jo seia at eg saknar litt den ekstra kampen det var mellom dei som hadde to napp og var klare til å sikra seg pokalen i neste cup. Men alt har ei tid og alt har ein ende. Olav Ludvig er vel sjølve pokalgrossisten. Hugsar ikkje kor mange han har, men mange er det.

Voss i fokus i veke 37

Håkon Trettenes på topp i septemberkvarten

Det har vore mildt sagt forsiktig aktivitet første veka av septemberkvarten. Tre deltakarar har spelt 4 startar. Men eg har lært at ein skal ikkje sutra over dei som ikkje er med, men heller skryta av dei som er det, - og det kan eg absolutt gjera. For Håkon Trettenes fyrte av garde ein kanonstart på Voss sundag og leiar kvarten med solide 677 pinnar inkl. hcp.

Voss startar opp 1. og 2. div. i bedriftsserien måndag

Kanskje nokre av deltakarane i kveldens opningsrunde av bedriftsserien vel å kombinera spelet med kvarten? Sosialserien starta opp sist torsdag og i kveld er det altså duka for full runde i toppdivisjonane. Resultat frå alle kampane finn du under menyvalet bedriftsserien.

Tom Aasen debuterer i approbert turnering på Stord

Tom vert tredje vossing som løyser lisens i Norges bowlingforbund. Tidlegare har Olav Olde og Martin Istad spelt offisielle NBF-turneringar. Turneringa Åsane Long & Short vert arrangert komande helg og Tom har kasta seg med i andre laurdagspulja. Me ynskjer ungdomen lukke til!

Voss med månadscup sundag

Sesongens første månadscup på Voss går sundag 13. september kl 1030. Turneringa er open for alle, men har rabattert påmelding for medlemer av vossaklubben.

Ein æra er over

Mascot har trekt laget sitt frå eliteserien i haust. Dermed er ein lang epoke med spel i toppdivisjonen over for gjengen frå Vestkanten. Årsaka til at laget vart trekt er mangel på spelarar som ynsjer å delta. Mascot har som sagt vore heilt i norgestoppen i ei årrekke, men klubben lir litt under det same som mange andre klubbar - særs lite nyrekruttering. Eg reknar med at veteranane i klubben etter kvart er rimeleg mette av heider og ære, så dermed enda det diverre slik. Åsane trekte også sitt lag, men det var klart før sesongstarten.

Bilete:
Ei noko yngre utgåve av mascotspelarar med daljer frå lokalligaen i 2013 kring halsen. Kenneth Haukås, Bjarte Lygre og Stefan Palmèr.

Bedriftsserien på Voss i menyen

3. september 2026 kl. 2100

Sidan Mona har sendt meg kampoppsettet for alle divisjonane i haustens bedriftsserie på Voss og eg likevel må henta inn snittet på spelarane via Lanetalk, så drar eg det litt lenger. Eg har oppretta ei side for kvar serie og oppdaterer resultata etter kvart som dei vert spelt. Du finn sidene som eigne menyval i toppmenyen over her. No har nok Mona ei facebook-side eller noko ala det der spelarane kan sjå status, men for oss andre kan det jo vera litt kjekt å sjå kven som gjer kva der oppe.

Under ser du kampresultata frå første runde i sosialligaen som starta i dag. Slik vil eg visa alle tre divisjonane på dei aktuelle bedriftssidene. Den med høgste scoren i kampane var Hans Erik Bjerkelund (?) med 525 (175 i snitt). Hadde han brukt dette som start i Septemberkvarten ville dette gitt solide 705 😀.

Eg har slett ikkje sansen for facebook og har forlate staden, men sjølvsagt er det ein del bra der også. For oss bowlarar så er det ei bra side som heiter noko så snodig som "Alt innom norsk bowling" (svorsk?). Der er det mykje kjøp og salg, diskusjonar om aktuelle tema + marknadsføring av diverse turneringar.

Tøff start i lokalligaen

Andrelaget vårt opna sesongen borte mot Vestkanten måndag 31. august. Det vart ein tøff batalje - både mot laget Vestkanten og mot banetilhøva på Vestkanten. I ein kjapp prat med formann Terje i etterkant skildra han banane som knusktørre. Scoren med 9 av 12 gullseriar (under 150) indikerer også at det her var noko som ikkje heilt stemte. Men gjengen på Vestkanten såg ut til å trivast og høvla over fortvila kvemmingar i fire seriar.

I dei to andre kampane i 2. divisjon vart det siger 4-1 borte for Ove Fonn sitt Mascot2 mot Døve og 3-2 til Åsane2 mot Fyllingen2.

I 1. divisjon vart Mascot3 knust av Mascot1 som var einaste laget over par (200 i snitt) denne runden. Fyllingen1 vant 3-2 over BBC1 og Åsane sitt førstelag, som har hatt mannefall sidan forrige sesong, imponerte med siger 4-1 borte mot Stord.

Om 14 dagar er det akkurat Mascot1 førstelaget vårt skal duellera mot borte på Vestkanten. Det blir nok ein vrien kamp. Andrelaget vårt har heimekamp mot Døve, så der er det håp om poengfangst.

Bedriftsligaen på Voss klar for oppstart

Jan Kåre Trettenes klar for kamp

Mona og staben hennar på Voss bowling er klare til å fyra i gang haustens bedriftsspel, men med litt færre lag enn tidlegare. I staden for 28 lag blir det no 20, men ho håpar at det vert 28 lag til vinteren. I haust vert det seks lag i 1. og 2. divisjon og åtte lag i sosialserien. Det blir heime- og bortekampar med 3 seriar på kvart 3-mannslag (som tidlegare).

1. og 2. divisjon spelar måndagar frå kl 18-20 og kl 20-22 på seks banar og startar opp 7. september. Torsdagen går sosialserien som spelar på fire banar kl 18-20 og kl 20-22. Oppstart for sosialserien vert 3. september.

Serien blir avslutta med Vossabyggmesterskap i veke 50 eller 51 og forhåpentlegvis med Tore Torgersen på plass.

Tom Aasen med ny månadscupsiger

Tom Aasen har verkeleg fått dreisen på månadscupane i Øystese. Sjølv med redusert hcp sneik vossingen seg inn på topp. Finn fekk problemer med gnagsår og måtte gje seg før sisteserien. Dette var første utgåva av den kombinerte månadscupen der spelarar med lisens vert registrert via bowlingres. I dag var halve heatet lisensspelarar.

Lydløs Livestream

NM for ungdom i Trondheim 24. - 27.09

Trondheim BK og Norges Bowlingforbund ynskjer velkomen til NM Ungdom SGL/DBL i Centrum bowling, Trondheim frå 24. – 27. september 2026.

FAKTA:

To aldersklassar: U26 og U21
Speleform: 6 seriar amerikansk
Pris: kr. 550
Påmeldingsfrist: 7. september (klubbvis påmeld.)
Puljer: Tor kl. 17, fre (kl. 14) og kl. 17, lau kl. 09

Det vert Hardangercider i 2026

Etter å ha vore i tenkeboksen stort sett heile sommaren har me enda på at me arrangerer Hardangercideren i år. Turneringa går samstundes som frukt- og siderfestivalen vert arrangert i Øystese. Me har puljer frå torsdag 1. oktober til og med sundag 4. oktober. Det er fire seriar og ingen finalar, men høve til gjenstartar. Og diverre kjære vossingar så er det krav om lisens i NBF for å delta i denne turneringa.

Klar for nytt østlandsraid

Fredag 21. august stuar eg MG'en full av kulebagar og legg turen over Haukeli mot Larvik og Mestern Open. Der vert det ein start fredag kl 1430 og ein laurdag kl 10. Vert kjekt å prøva seg i ein hall eg aldri har spelt i. Profilen me skal spela på er High Street, ein profil på 44 fot som me har brukt ein del i Øystese. Men røynslene rundt om er at den same profilen oppfører seg ulikt frå hall til hall. Turneringa i Larvik er på seks seriar utan finale, men med høve til reentry.

Etter spelet laurdag vert det nok ein tur til Flisa der eg truleg skal spela tre seriar i mellomspel 1 i Sesongstarten 2026 sundag kl. 10. Klarar eg å karra meg inn topp 8 i det første mellomspelet ventar det tre nye seriar i det andre mellomspelet kl. 12. Sjølve finalen mellom dei seks beste er også på tre seriar der pinnefallet for mellomspel 2 vert med vidare. Finalen startar kl. 15, men då er nok gamle Tangen på god veg attende til regnlandet.

Hallen i Larvik (Mester'n bowling) har åtte banar og er å finne på Lanetalk: Livescoring - Lanetalk

Foto: Lars Archer

Dag 1 - Mestern open

Avreise frå eit regntungt Einarhaug kl 0515 i dag med kurs for første ferja frå Tørvikbygd kl. 0550. Så snart eg hadde passert Røldal så skein sola opp og det har den gjort heilt til no i kveldinga.

Men eg har ikkje vore ute og nytt sola. Klinkekuleligaen trivst best i ein bunkers og det må eg seia at bunkersen i Larvik er luftig og tiltalande. Men kva så med spelet.

Under oppvarminga prøvde eg litt kant, men både mine og alle andre sine kuler suste rett over på Jondal. Difor starta eg spelet på flis13 og skrådde svakt ut mot flis 10, men då skjedde det ingen verdens ting. Opningsserien enda i total katastrofe med tre washout på dei fem første rutene.

No var gode råd dyre. Dei små grå fekk kjørt seg og eg valgte å spela trangt nedover pil 2 (flis 10). Det fungerte mykje betre og eg fekk luka vekk washouten, men fekk nokre splitt i staden. Med litt spissing og konsentrasjon henta eg ein del strikerekker og dei tre siste seriane var faktisk på 200+. Totalscoren på 1168 og 194,7 i snitt er innafor - og absolutt godkjent med den starten.

Så får me sjå om eg kan starta litt betre i morgon, eller om eg går på tryne igjen.

Resultatliste

Detaljar start 1

Tot. 1168 - snitt: 194,7
7 splitt, 6 miss og 30 strike

Dag 2 - Mestern open

Ooooops!

God avslutning i går og bra start i dag, men så var det jamt slutt. 1056 i rein score gjev 176 i snitt og gubben har det ikkje bra. Har tenkt at denne sesongen skal eg prøve det beste eg kan i kvar serie - ikkje gje opp fordi om det buttar imot, men i dag klarte eg rett og slett ikkje det. Og det er særs skuffande. Fire (4!) enkle sparemiss i sisteserien og gullserie seier det meste.

No har eg forflytta meg til Mjøsas bredder der eg har funne meg eit krypinn, - eller krypinn er det slett ikkje. Soverom, bad/toalett og stor stove med kjøkenkrok. Nesten som heime. Dette vert basen i natt før eg dumpar ned på Flisa for mellomspel i morgon kl 10. Når det står ei pulje igjen i det innleiande spelet ligg eg på 9. plass, så eg er rimeleg sikker på mellomspelsplassen.

Detaljar start 2

Tot 1056 - snitt: 176
9 splitt, 7 miss og 21 strike

Dag 3 - sluttspel på Flisa

Waoow - barneskirenn? Det var refleksjonane som suste forbi dei avdanka og slitne små grå under 1. serien i mellomspelet på Flisa. Med rett ball og rett linje var dette så bra at eg spurte spelemakker Geir Ståle om me verkeleg skulle halda på i 7 oppvarmingsminutt til med strikelemping?. Og linja heldt seg bra for oss begge. Eg spelte 234 og han 257 og alt var såre vel.

Kva som skjedde vidare er eg slett ikkje sikker på. Geir Ståle spelte nesten same linja som meg og fortsatte med 259 i serie 2 medan eg sleit meg til 162 med ei høne i tiarruta. Vel, vel. Då var det ikkje barneskirenn likevel. Med par etter to seriar hadde eg rett og slett ein jobb å gjera i sisteserien for å karra meg inn topp 8 og semifinalespel.

Detaljar mellomspel 1

Tot 510 - snitt: 170
5 splitt, 6 miss og 14 strike

Og det kan ein jo seia at eg gjorde. Truleg var jobben svart, for det var jaffal heilsvart det som skjedde med spelet mitt. Til slutt var det berre komisk å sjå den eine washouten avløyst av ein Jondal, for så å setja ein ny washout miksa opp med elendig sparespel. 114 stod det på tavla og 510 totalt når eg slukøyra pakka ned kulene og sette nasa heimover.

Heimefavorittane Jonas Dammen og Jenny Mathiesen vart vinnarar av årets Sesongstart på Flisa.

Bowlingres

Lokalligaoppsett 26/27

31. august startar lokalligaen i Bergen bowlingkrets opp igjen. Det fell stadig lag ut av denne ligaen. No er det berre 14 lag igjen; sju lag i 1. divisjon og sju i 2. divisjon. Kvam deltek med eit lag i kvar divisjon.

I opningsrunden vert det "walk over" for førstelaget vårt medan andrelaget tar turen til Loddefjord for å møta Vestkanten. Det vert spanande å sjå kor mange av klubbens medlemer som tar eit nytt år med lisens og lokalligaspel. I skrivande stund er me seks stk. som har lisens.

Bergen bowlingkrets har lagt ut ny versjon av håndboka med informasjon om styre og stell i kretsen, samt turneringar og ligarundar. Du finn håndboka på Bergen bowlingkrets sine nettsider:

https://bergenbowlingkrets.no/handboken/

Suksess på FLisa og misere i Kongsvinger

Sesongstarten (Flisa)
- - Streaming
  - Livescore
Glåmdalstrippelen (Kongsvinger)
- - Streaming
  - Livescore

Helga frå 31. juli til 2. august fekk elbilen køyrt seg når eg bestemte meg for å spela eit par/tre turneringar litt austom. Planen var å få med meg Grenland Cup i Porsgrunn, Sesongstarten på Flisa og Glåmdalstrippelen i Kongsvinger. Diverre gjekk ikkje kabalen opp, så eg skippa Grenland denne gongen. Tenker også å ta turen til Larvik og Mestern Open rundt 21. og 22. august - kanskje det kan kombinerast med finalespel på Flisa 23. august viss eg klarar kutten der? Under ser du døgnrapport frå turen :)

Fredag 31.07 kl 22:
Dei to første startane i Sesongstarten er unnagjort og begge enda over par, så det må eg seia meg godt nøgd med. Spelte halvanna serie trangt over flis 13, men etter fire opne ruter på fem forsøk i serie to flytta eg ut på kant på flis 6 og fekk betalt for det. I morgon får eg to startar til på Flisa (kl 1200 og 1345) før eg beveger meg sørover til Kongsvinger for ein start der kl. 1715.

Laurdag 01.08. kl 17
Dei to første dagane av mi bowlingweekend er unnagjort. Planen var å ha ein start i Kongsvinger kl 17 i dag, men eg var den einaste påmeldte så pulja vart kanselert. Forsåvidt heilt greit, for kroppen treng litt kvile etter mange reisetimar og fire puljer på eitt døger. Dermed vert det berre tre startar på meg på Glåmdalen sin heimearena. Eg har aldri spelt i den hallen, så det gler eg meg til. Faktisk er oljeprofilen her identisk med den som er på Flisa, men banane oppfører seg ulikt, så eg må nok på leit. Kika litt på eine pulja i dag og det varierer stort frå bane til bane.

Førstestarten min på Flisa i dag var bra. Atter ein start over par, men eg hadde litt håp om ein kanonstart med 245 i opningssereien. Med 613 i den starten pluss 623 og 609 i går så har eg 1890 inkl 45 i hcp. Det er over all forventning og kanskje godt nok til topp 19 og mellomspel. Men som sagt så er det lite truleg at eg reiser til Flisa om 3 veker for å kanskje berre få spelt 3 seriar... Siste starten på Flisa var ikkje bra. Me var berre 4 stk og spelte ein på kvar bane, - med andre ord speedbowling. I førsteserien såg det ut som om eg spelte amerikansk med strike i annakvar rute. Ein dobbel løfta serien over par. Dei to neste seriane er ingenting å skriva heim om - heilt utan strike i serie 2 og masse rot i serie 3, men lurte no inn 541 på starten (180 i snitt) sjølv om tempoet absolutt gjekk ut over konsentrasjonen.

Måndag 03.08 kl 01
Då var miniturneen unnagjort og gubben trygt på plass i heimen igjen. Tre dagar med bowling og 120 mil på vegen er historie og ein er klar til å sjå fram mot neste sprell. Men korleis gjekk dette då?

På Flisa gjekk det jo veldig bra. Der spelte eg fredag og laurdag. I Kongsvinger byrja eg bra med ein start rundt par, men så gjekk rullegardina ned. Litt snodig eigentleg, for under oppvarminga til dei to neste startane hagla strikane inn og eg følte meg trygg på linjevalet. Men det virka som om sporet ikkje heldt så lenge og når eg mista det så vart eg straffa hardt med splitt eller washout. Når eg i tillegg bomma som ei blind høne på enkle kjegler så vart det tøft. Men summa summarun må eg seia at det var kjekt med litt avveksling frå vestlandsbygene og ikkje minst kjekt å prøva seg i andre hallar enn der ein normalt klinkar kuler.

Hallane:
Både hallen på Flisa og i Kongsvinger (nederst) er romselge. På Flisa er det 10 banar medan Kongsvinger har 8.

____________________________________________

Oljeprofil både på Flisa og Kongsvinger

Oppdalstreffet 2026

Sommartreffet i Oppdal er eit av dei største bowlingtreffa i kongeriket. Den dyktige arrangørklubben samlar spelarar frå heile landet år etter år. Særs mange av spelarane er gjengangarar som brukar denne turneringa som ein del av sommarferien. I år var det 102 deltakarar med smått og stort, gamalt og ungt, og det vart spelt 819 innleiande startar à 3 seriar fordelt på 10 dagar. Ein kjempejobb av arrangørane som det verkeleg står respekt av. Kjekt då at deltakarane også viser dette ved å koma igjen år etter år.

Frå vår klubb var det Olav Ludvig og eg som kasta oss med dette året. Turneringa er ei 3x3-turnering. Det vil seia at ein må ha minst tre starar à 3 seriar for å vera med. Så kan ein kjøpa nye treseriar (gjenstartar) til lommeboka eller plassmangelen seier stopp. For meg og Olav Ludvig stoppa det på 8 startar kvar.

Når det gjeld spelet vårt, så er jaffal eg særs nøgd. Profilen passa mitt spel godt og eg mangla berre 2 pinnar på å karra meg til finalespelet som nestbeste veteran. Godt nøgd med at eg klarte å halda nesten alle startane på eit bra nivå. Om forholda passa mitt spel, så var det tvert om for Olav Ludvig. Det vart altfor tørre forhold samt at han ikkje følte seg komfortabel med å spela så langt ut på kant som profilen inviterte til.

Men det aller viktigaste på Oppdalstreffet er det sosiale, og der scora både Olav Ludvig og eg bra. Dette er kanskje den beste turneringa reint sosial, på nivå med turneringane på Gol.

Dei fleste puljene vart streama og du finn dei på denne lenka:
https://www.youtube.com/@OppdalBowlingklubb
Resultatliste finn du på bowlingres

Olav Ludvig in action

Frank (70) og Evald (15) i lik positur

God plass i månadscupen 🤣

Olav Røyrvik vinnar av månadscup i juli

Tre deltakarar i dagens månadscup. Reknar med at det er den utfordrande oljeprofilen som vart valgt som er årsaka til den noko slunkne deltakinga. Og det kan ein jo skjøna når ein ser på kva score desse tre ivrige sjelene stod for. Det var meir enn tøft nok å karra seg over 150. Eigentleg var det vel ingen av oss som fortente sigeren, men ein meister måtte me jo ha og i kveld vart det Olav.

Kven er Kvam bowlingklubb?

Sommaren drar med seg mange rare tankar. Den siste som rullar rundt i hovudet er kva eller kven er Kvam bowlingklubb. Sidan eg byrja med denne kuletrillinga tidleg på 2000-talet så har eg tenkt at klubben, det er den aktive delen som løyser lisensar og deltek på tevlingar både lagsmessig og individuelt. Det har liksom aldri vore noko tvil i mitt hovud om akkurat det. I tillegg har klubben hatt ei sosial gruppe med pensjonistar som har kost seg år etter år onsdags føremiddag. Dei er trufaste og trillar sine to seriar kvar onsdag med ein kaffidrøs i midten. Dette har eg tenkt har vore ei kjekk bieffekt av det at klubben held hallen i drift.

Som sagt så rotar sommaren ofte til mine tankar. So også i dag. Kanskje er det heteslag eller kanskje er det rein fornuft. Dei siste to åra og spesielt det siste har eg prøvd fånyttes å få dei som eg trudde var Kvam bowlingklubb sine aktive medlemer med på organiserte treningar. Men så i dag - rett før me fyrer i gang ein ny månadscup, så slår det meg at det er jo onsdagspensjonistane som er Kvam bowlingklubb. Dei er trufaste og møter opp mann- og kvinnesterke anten det er varmt eller kaldt, vått eller tørt.

På den varmaste dagen i manns minne stilte onsdagsklubben med 12 spelarar som trilla ein serie, drakk kaffi og trilla så ein ny serie. På våre kveldstreningar trur eg ikkje me har vore 12 stykker på trening på mange år - viss me nokon gong har vore det. Så kvifor ikkje slå seg saman med onsdagspensjonistane og bruka kvelden til andre ting.

Det kan jo bli litt artig å sjå korleis uttak til lokalligaen vert gjort når grunnlaget er to seriar pensjonistbowling.

Frank nr. 3 i Åsane sommertreff

Titt, titt - :)

Sundag 5. juli
Etter ein ok reentry i går sikra eg plassen i siste finalesteget i dag (topp 4). I finalen var det dei fire beste frå semifinalen + dei fire beste frå innleaiande som skulle avgjera alt over tre seriar. Dei to første seriane gjekk ok, men heilt utan strikerekker og eg låg midt i heatet på 4. plass nesten 40 pinnar bak Stefan som heldt 3. plassen før sisteserien. Der fant eg strikelinja og avslutta med 238 i rein score og gjekk forbi Stefan, men 26 pinnar bak Per Frode Sterud frå Briskebyen. Vinnar vart Thomas Hodel-Olsen Ørevik som i år spelar for Løkka.
BowlingRes

Måndag 29. juni
Eg tykkjer det har vore så lite speling i det siste, så eg reiste til Vestkanten for å delta i Åsane sommertreff. Tevlingsforma er 3x3 seriar og eg tok like godt alle 9 seriane i kveld. Dei første seriane gjekk litt trått før eg fant ut kvar eg skulle spele, men så gjekk det over all forventning. Ligg førebels på 3. plass bak Hodel jr. og sr. med 1773 på 9 seriar (194 i snitt + 27 i hcp).

Tom med ny siger

Bra deltaking i juni-versjonen av månadscupen i Øystese. Både vossingar og oddingar entra parketten saman med ein del lokale heltar. Tom Aasen la seg i tet frå 2. serien av og tviheldt på den heilt inn. Brage gjorde eit forsøk på å henta han inn i 4. serien, men kom 33 pinnar for kort.

Med ti deltakarar vart det kr. 700 til Tom og kr. 300 til Brage.
Me gratulerer!

Reisebrev frå Roma

Torsdag 18. juni stikk eg av til Roma for å delta på den årlege ESBC-turneringa - tidlegare kalla veteran-EM. Norge stiller med 26 spelarar som skal duellere i singel, dobbel og trios frå måndag til torsdag.

Mine startar er (lenker til livescore):
- Singel: måndag 22.06 kl. 1245
- Trios: onsdag 24.06 kl. 1330 m/ Stein R. Holdal og Roar Haugan (foto)
- Dobbel: torsdag 25.06 kl. 1245 m/ Rolf Erik Nyseter

Torsdag 25. juni

Flott stinging av underteikna i ESBC i Roma. Når både singel, dobbel og trios er unnagjort ligg eg faktisk på 1. plass i "all event" i klasse C. Men det manglar ein del spelarar som berre har fullført to av øvingane. Dei seks beste i all event skal spela finalar. Ut frå snittet på mine konkurrentar så endar eg truleg topp 20, men håpar på topp 10.

I dobbel i dag spelte Rolf Erik Nyseter og eg 2464 på 6 seriar (1234 + 1230), men makkeren er berre ungdomen så dermed er me i klasse B i dbl. der me førebels er nr. 5.

Laurdag 27. juni
Siste dag i Roma med Master-finalar og bankett i kveld. Berre Roger Lindstad kom seg til masterfinalane frå vår tropp. Han gjekk ut i andre runden i karusellfinalen og enda dermed på 5. plass i klasse A.

Er elles rimeleg bra førnøgd med turneringa:
- Singel: Nr. 51 av 119 i klasse C med 179 i snitt
- Dobbel: Nr. 7 av 91 i klasse B med 200 i snitt
- Trios: Nr. 26 av 130 (ingen klassedeling) med 186 i snitt
- All Event (samla): Nr. 11 av 119 i klasse C med 188 i snitt

Trist dag i dobbelthallen i går då ein av dei finske spelarane omkom i første serien av siste dobbelpulja. Kjenner ikkje detaljane, men resten av pulja vart spelt i dag nesten utan finske spelarar.

Heimreise sundag 28. juni tidsnok til månadscupen i Øystese før det vert 3 startar á 3 seriar i Åsane sommertreff på Vestkanten måndag 29. juni. Så mildt sagt ein aktiv bowlingperiode for underteikna på tampen av juni.

ESBC - Roma

-Frank

Trond med storeslem på Voss

Trond Johansen har verkeleg tatt av den siste veka. Vel har karen spelt bra før, men no toppar han alt han er med på. SIst onsdag sette han ny personleg rekord med 278 på Voss. Serien var teljande i den pågåande vekespotto og Trond er dermed sikra premie sidan han passerte 300-grensa inkl. hcp. Om det vert han som tar heile potto eller om det vert deling vil dei to neste dagane visa.

I dag var det månadscup og klubbmeisterskap på Voss. Månadscupen var dei fire første seriane medan klubbmeisterskapen henta inn to til. I månadscupen var det 12 deltakarar. Trond og Martin tok tak med solide seriar frå start og fulgtes åt inn til fjerde og siste månadscupeserien. Trond kom eit hestehovud føre Martin grunna litt meir hcp. Olav Ludvig gjorde ein bra figur med 170+ i snitt og enda på 3. plass i månadscupen. Eit par ungdomar var også med på cupen og spesielt Aksel (bilete) merka seg ut med eit par gode seriar.

I klubbmeisterskapen, som var utan hcp, var Martin i tet etter fire seriar vel 20 pinnar føre Frank og Trond. Underteikna hadde mange jojo-seriar på Voss, men fekk det bra til i 4. og 5. serien og leia med 13 pinnar på Martin og 40 på Trond før siste og avgjerande serie. Både Martin og eg sleit i sisteserien. For min del vart det for mange enkle sparemiss. Trond nytta høvet og stupte inn i tiarruta med fem strake strike på slep. Med ein trygg spare i siste ruta og kanonserien 225, kunne han løfta trofeet som klubbmeister med 10 pinnars margin ned til Frank på andreplass med Martin halsande etter som nr. 3.

Trond Johansen i utgangsposisjon og med sigersplaketten i sikte :)

Sesongrekordane 2025/2026 i Kvam

I Kvam byrja me sist sesong å registrera sesongens høgste score på ei tavle i hallen. Det er registrering i herre- og dameklassen på kvar bane, samt banepar på 3/4 og 1/2. For å koma på den tavla må seriane vera spelt i hallen som del av ei lokal turnering eller offisielle NBF-seriar.

Dei beste noteringane sist sesong vart levert av Randi Karin Hansen (Kvam), Camilla Heggland (Åsane), Frank Tangen (Kvam og Voss), Frode Oksnes (Kvam og Voss), Gaute Øye Melstveit (Kvam) og Thomas Hodel-Olsen Ørevik (Åsane). Ingen 300-serie, men Gaute var styggeleg nære eit par gonger.

Me har passert 1. juni og ein ny sesong har starta opp med ravnsvart tavle klar for nye toppnoteringar.

Gaute og Tom vinnarar i Øystese

Gaute klubbmeister

Frank sette Gaute litt på prøve i dag, men ungdomen hadde eigentleg ikkje så store problem med å henta pensjonisten inn igjen. Spørst om ikkje det var rein veldedigheit at han lot meg få ha leiinga såpass lenge :).
Jaffal er det rette mannen som vart klubbmeister. Gaute har levert ein ekstremt solid sesong sjølv med heller lite treningsgrunnlag. At han toppar sesongen med tittlelen er vel fortent. Gratulerer så mykje, Gaute!

Tom vinnar av månadscup

Det var liksom aldri tvil om kven som skulle ta månadscupen i dag. Me hadde kombinert månadscup for mai og klubbmeisterskap. Tom opna sterkt med 196 og fortsatte med 208 i serie 2 i rein score. Når vossingen då har bittelitt i hcp, vart me andre statistar. Brage var den som kom nærast, men det mangla 46 pinnar. Olav Ludvig var også i skiktet til Brage.

Me gratulerer Tom med atter ein månadscuptriumf!

Bedriftsserie i Kvam?

Aktivitetsgruppa i Kvam bowlingklubb har fått i oppgåve av styret å leggja fram plan for rekruttering av spelarar i klubben til eit ekstraordinært årsmøte i haust. Klubbaktiviteten har aldri vore lågare enn den er no samtidig som utleigeaktiviteten aldri har vore høgare. Dette gjev klubben god økonomi og ein fantastisk flott hall framskaffa av eit fåtals ivrige sjeler, men dårlege framtidsutsikter med tanke på den sportslege delen av Kvam bowlingklubb.

Mine tankar er at den beste vegen ut av uføret er å invitera bedrifter og venekonstellasjonar inn til ein bedriftsliga som går frå september til desember. Dei fleste av dagens medlemer utanom onsdagspensjonistane byrja med bowling via bedriftsserien som Njål i si tid starta. Diverre vart det særs arbeidskrevjande å oppretthalda bedriftsserien og den vart lagt ned ei stund etter at klubben overtok hallen. No er det på tide å vekkja den til live.

Sidan klubben per dato har godt med kapital, kan me bruka ein del midlar til å sponsa ein bedriftsliga. Klarar me i løpet av hausten å få nokre nye sjeler som vert tent på bowling, så er det vel anvendte midlar. Skal me få bedriftsserien i gang frå hausten, så må jobben gjerast no. Det må sendast ut informasjon før ferien til eit drøss av bedrifter der me gjev konkrete tilbod både på trening opp mot ein bedriftsserie og kva det vil kosta å melda på lag.

Aktivitetsgruppa består av to frå styret og to frå medlemsmassen; Lars Endre Tholo, Gaute Øye Melstveit, Olav Ludvig Haabrekke og Frank Tangen. Personleg er eg litt i tvil på om eg ynskjer å bruka så mykje energi på noko som kanskje fell på steingrunn. Har aktivitetsgruppa den nødvendige støtta frå styret og kva mandat har gruppa til å gjera vedtak relatert til aktivitet - td. til oppstart av ein bedriftsserie?

Møte med styret 14. mai 2026

Aktivitetsgruppa i Kvam sendte styret to forslag relatert til treningsaktiviteten til medlemene. Det eine forslaget om å endra treningstidene til kl. 18 i staden for kl. 19 vart nedstemt. Det andre forslaget vart vedtatt og lyder slik:
- Ei fritrening per veke uansett dag
- Kr. 50 per ekstratrening - maks kr. 200 per månad
- Dugnadstimar kan brukast som betaling for trening

Page updated

Google Sites

Report abuse