Månadscup sundag 28.06 kl 18

Månadscupen for juni vert arrangert 28. juni kl. 18.

- 4 seriar

- Pris: kr. 150

- 1/8-premiering

- Handicap:

* Diff. mellom internt snitt og 200.

* Maks 75 i hcp per serie

REISEBREV FRÅ ROMA

Torsdag 18. juni stikk eg av til Roma for å delta på den årlege ESBC-turneringa - tidlegare kalla veteran-EM. Norge stiller med 26 spelarar som skal duellere i singel, dobbel og trios frå måndag til torsdag.

Mine startar er (lenker til livescore):
- Singel: måndag 22.06 kl. 1245
- Trios: onsdag 24.06 kl. 1330 m/ Stein R. Holdal og Roar Haugan
- Dobbel: torsdag 25.06 kl. 1245 m/ Rolf Erik Nyseter

Heimreise sundag 28. juni tidsnok til månadscupen i Øystese før det vert 3 startar á 3 seriar i Åsane sommertreff på Vestkanten måndag 29. juni. Så mildt sagt ein aktiv bowlingperiode for underteikna på tampen av juni.

ESBC - Roma

-Frank

POMPEL & PILT PÅ HØNEFOSS 23. - 31. OKTOBER

Ei ny spanande turnering vert arrangert på Hønefoss i slutten av oktober. Det er tre ulike turneringsklassar alt etter kva snitt deltakarane ligg på.

- Open klasse
- 180 - 199 i snitt
- under 180 i snitt

Du må ha lisens i NBF for å delta. Påmelding på bowlingres.

TROND MED STORESLEM PÅ VOSS

Trond Johansen har verkeleg tatt av den siste veka. Vel har karen spelt bra før, men no toppar han alt han er med på. SIst onsdag sette han ny personleg rekord med 278 på Voss. Serien var teljande i den pågåande vekespotto og Trond er dermed sikra premie sidan han passerte 300-grensa inkl. hcp. Om det vert han som tar heile potto eller om det vert deling vil dei to neste dagane visa.

I dag var det månadscup og klubbmeisterskap på Voss. Månadscupen var dei fire første seriane medan klubbmeisterskapen henta inn to til. I månadscupen var det 12 deltakarar. Trond og Martin tok tak med solide seriar frå start og fulgtes åt inn til fjerde og siste månadscupeserien. Trond kom eit hestehovud føre Martin grunna litt meir hcp. Olav Ludvig gjorde ein bra figur med 170+ i snitt og enda på 3. plass i månadscupen. Eit par ungdomar var også med på cupen og spesielt Aksel (bilete) merka seg ut med eit par gode seriar.

I klubbmeisterskapen, som var utan hcp, var Martin i tet etter fire seriar vel 20 pinnar føre Frank og Trond. Underteikna hadde mange jojo-seriar på Voss, men fekk det bra til i 4. og 5. serien og leia med 13 pinnar på Martin og 40 på Trond før siste og avgjerande serie. Både Martin og eg sleit i sisteserien. For min del vart det for mange enkle sparemiss. Trond nytta høvet og stupte inn i tiarruta med fem strake strike på slep. Med ein trygg spare i siste ruta og kanonserien 225, kunne han løfta trofeet som klubbmeister med 10 pinnars margin ned til Frank på andreplass med Martin halsande etter som nr. 3.

Trond Johansen i utgangsposisjon og med sigersplaketten i sikte :)

SESONGREKORDANE I KVAM

I Kvam byrja me sist sesong å registrera sesongens høgste score på ei tavle i hallen. Det er registrering i herre- og dameklassen på kvar bane, samt banepar på 3/4 og 1/2. For å koma på den tavla må seriane vera spelt i hallen som del av ei lokal turnering eller offisielle NBF-seriar.

Dei beste noteringane sist sesong vart levert av Randi Karin Hansen (Kvam), Camilla Heggland (Åsane), Frank Tangen (Kvam og Voss), Frode Oksnes (Kvam og Voss), Gaute Øye Melstveit (Kvam) og Thomas Hodel-Olsen Ørevik (Åsane). Ingen 300-serie, men Gaute var styggeleg nære eit par gonger.

Me har passert 1. juni og ein ny sesong har starta opp med ravnsvart tavle klar for nye toppnoteringar.

KLUBBMEISTERSKAP OG MÅNADSCUP PÅ VOSS SUNDAG 7. JUNI KL. 1030

Det skal spelast seks seriar der dei fire første er teljande for månadscupen medan alle seks er teljande i klubbmeisterskapen.

KLUBBMEISTERSKAP OG MÅNADSCUP I KVAM 31. MAI KL 16

MERK TIDSPUNKTET!!

Sundag køyrer me kombinasjonen klubbmeisterskap og månadscup. Det vert spelt totalt seks seriar der dei fire første er teljande for månadscupen for mai medan alle seks tel i klubbmeisterskapen. Det vert overføring på youtube-kanalen vår.

FaktaBOKS - klikk for HCP OG INFO

KLUBBMEISTERSKAP 2025/2026

Sundag 31. mai kl. 16 vert klubbmeisterskapen vår arrangert.

- 6 seriar

- medlem i Kvam BK

- gratis å delta

- Ingen handicap

----------------------------------------

MÅNADSCUP FOR MAI

Også månadscupen for mai vil bli arrangert 31. mai kl. 16. Dei 4 første seriane i klubbmeisterskapen vil telja i månadscupen for dei som ynskjer å delta i den.

- 4 seriar

- Pris: kr. 150

- 1/8-premiering

- Handicap:

* Diff. mellom internt snitt og 200.

* Maks 75 i hcp per serie

--------------------------------------------

Førehandspåmelding til tlf. 41573625.

Maks 20 deltakarar - førstemann til mølla.

PÅMELDT: Tore Tellevik, Frode Oksnes, Tom Aasen, Brage Tellevik, Frank Tangen, Trond Johansen, Olav Ludvig Haabrekke, Terje Høysæther,

GAUTE KLUBBMEISTER I KVAM

Frank sette Gaute litt på prøve i dag, men ungdomen hadde eigentleg ikkje så store problem med å henta pensjonisten inn igjen. Spørst om ikkje det var rein veldedigheit at han lot meg få ha leiinga såpass lenge :).
Jaffal er det rette mannen som vart klubbmeister. Gaute har levert ein ekstremt solid sesong sjølv med heller lite treningsgrunnlag. At han toppar sesongen med tittlelen er vel fortent. Gratulerer så mykje, Gaute!

TOM VINNAR AV MÅNADSCUP

Det var liksom aldri tvil om kven som skulle ta månadscupen i dag. Me hadde kombinert månadscup for mai og klubbmeisterskap. Tom opna sterkt med 196 og fortsatte med 208 i serie 2 i rein score. Når vossingen då har bittelitt i hcp, vart me andre statistar. Brage var den som kom nærast, men det mangla 46 pinnar. Olav Ludvig var også i skiktet til Brage.

Me gratulerer Tom med atter ein månadscuptriumf!

GAMLE MINNER

Som dei fleste andre så har eg skuffer dedikert til ulike typer klesplagg. Mellom anna ei med sokkar og ei med truser. I sokkeskuffa vert det stadig oppdaga enklingar utan makker, men det har eg aldri opplevd i truseskuffa før - ikkje før no.

Etter morgonstellet til den ferske 70-åringen var eg klar for å trø inn i det mest intime plagget. Rota rundt i truseskuffa etter eit dugande emne og plutseleg, sånn innimydlo godt segne underbukser, låg ei som eg er rimeleg sikker på at eg ikkje har brukt før. Liten og søt, men dog noko slitt av elde tilliks med den noverande eigaren.

Må seia at minnene mine verkeleg må jobba på høggir før eg finn andre i min portefylgje som ville kledd denne. Etter 15 år som ungkar, så burde eg kanskje ramma ho inn og hengt ho opp saman med familiebileta på veggen?

😳

3 PINNAR FRÅ MAGISK 900-GRENSE

For dei som ikkje veit det eller har hugsa det ut, så kan eg minna om at Gaute har noregsrekorden over to seriar med 585 satt under NM i Trondheim i 2022. Rekorden over tre seriar er på 815 levert av moldespelar Morten Vestneshagen på Hamar i 2019. Offisielle rekordar må setjast i meisterskap, men utanom meisterskap verserer det hinsides resultat. Eit av dei mest sære resultata nasjonalt er frå ein kamp i Østfoldligaen i 2017 mellom Fredrikstad og Rolvsøy. Der opna Kjell Arne Nilsen med 299, så spelte han 299 i serie 2 før han avslutta kampen med 299 i serie 3.

BEDFRIFTSSERIE I KVAM?

Aktivitetsgruppa i Kvam bowlingklubb har fått i oppgåve av styret å leggja fram plan for rekruttering av spelarar i klubben til eit ekstraordinært årsmøte i haust. Klubbaktiviteten har aldri vore lågare enn den er no samtidig som utleigeaktiviteten aldri har vore høgare. Dette gjev klubben god økonomi og ein fantastisk flott hall framskaffa av eit fåtals ivrige sjeler, men dårlege framtidsutsikter med tanke på den sportslege delen av Kvam bowlingklubb.

Mine tankar er at den beste vegen ut av uføret er å invitera bedrifter og venekonstellasjonar inn til ein bedriftsliga som går frå september til desember. Dei fleste av dagens medlemer utanom onsdagspensjonistane byrja med bowling via bedriftsserien som Njål i si tid starta. Diverre vart det særs arbeidskrevjande å oppretthalda bedriftsserien og den vart lagt ned ei stund etter at klubben overtok hallen. No er det på tide å vekkja den til live.

Sidan klubben per dato har godt med kapital, kan me bruka ein del midlar til å sponsa ein bedriftsliga. Klarar me i løpet av hausten å få nokre nye sjeler som vert tent på bowling, så er det vel anvendte midlar. Skal me få bedriftsserien i gang frå hausten, så må jobben gjerast no. Det må sendast ut informasjon før ferien til eit drøss av bedrifter der me gjev konkrete tilbod både på trening opp mot ein bedriftsserie og kva det vil kosta å melda på lag.

Aktivitetsgruppa består av to frå styret og to frå medlemsmassen; Lars Endre Tholo, Gaute Øye Melstveit, Olav Ludvig Haabrekke og Frank Tangen. Personleg er eg litt i tvil på om eg ynskjer å bruka så mykje energi på noko som kanskje fell på steingrunn. Har aktivitetsgruppa den nødvendige støtta frå styret og kva mandat har gruppa til å gjera vedtak relatert til aktivitet - td. til oppstart av ein bedriftsserie?

VURDERER DU Å LØYSA LISENS KOMANDE SESONG?

Bowlingsesongen går frå 1. juni til 31. mai. Dermed nirrar me oss ny sesong. Viss du allereie har hatt eller har lisens i Norges bowlingforbund, så kjenner du til korleis dette fungerer. Viss du ikkje har hatt lisens før, så skal eg prøva å lista opp kva dører som opnar seg.

Prisen på lisensen varierer frå kr. 500 til kr. 700 alt etter om du har vore registrert med lisens tidlegare eller om du er føstegongsmedlem samt i kva aldersgruppe du høyrer til (kr. 600 for U26 og pensjonistar). Klubben kan registrere medlemer som ynskjer lisens inn via nettsidene til Norges bowlingforbund. Spelaren kan også sjølv registrera seg via MinIdrett, men det vert fort krøll viss ein brukar den. Det beste er å få ein i klubbstyret til å registrera deg. Etter at du er registrert vil du finna lisensnummer samt betalingsinformasjon på NBF sine GAMLE sider. Det ligg eit søkefelt i toppmenyen der du kan skriva inn namnet ditt og få treff viss du er registrert (lenka viser mine data og betalingsinfo). Det vart lansert nye sider for nokre år sidan, men dei er dårleg integrerte med datakjeldene.

Den viktigaste nettsida for spelarar med lisens og som ynskjer å delta i turneringar, er www.bowlingres.no - der vert alle opne turneringar publiserte med påmeldingsmoglegheiter og resultatservice. Sida er enkel, ryddig og informativ. Viss du registrerer deg som brukar av sida så kan du dynamisk melda deg på og av ulike turneringar.

Kva er så gevinsten ved å kjøpa lisens? Eigentleg ingenting anna enn kostnadar - jaffal viss ikkje du er særs dyktig. Men det er kjekt å farta rundt om og delta på turneringar, og det er lærerikt. Dei aller fleste klubbane har tilhøyrigheit til ein hall der ein kan delta i ligasystemet - anten nasjonalt eller regionalt. Utfordringa for vossingane er jo at hallen der diverre ikkje er godkjent verken for ligaspel eller turneringar.

Under her har eg lista opp tre sommarturneringar som krev lisens for dei som vil delta. Alle tre turneringane har valgt å forby spel med urethane-kuler. Anar du ikkje kva det er? Vel, då har du sikkert ikkje ei slik kule og dermed ikkje problem med det 😆.

Pers sommertreff 5. - 21. juni

NO URETHANE

Hallingkast inviterer til den årlege sommarturneringa på Pers på Gol frå 5. til 21. juni. Det vert spelt 3x3 - totalt 9 seriar innleiande. Det er ei populær turnering der dei mest attraktive plassane (les finalehelga) vert reinska på ein augneblink. Du må ha gyldig lisens for sesongen 2026/2027 for å delta.

Pris: Senior: kr. 900, EarlyBird: kr. 800, gjenstart: kr. 300 (3 seriar)
Hcp: klasse E (60% av diff. mellom eige snitt og 210 )
Påmelding: BowlingRes

Åsane sommertreff 26.06-04.07

NO URETHANE

Åsane Bowlingklubb inviterer til bowlingturnering på Bowling 1 Vestkanten. 3x3 innleiande seriar. Deltakarar må ha NBF-lisens. Hcp klasse C (0-3-7-12-20)

Prisar: Senior kr. 1100, Junior kr. 600, Reentry (gjenstart) kr. 400
Premiering: - Nr. 1 kr. 8000, elles 1/6-premiering
Påmelding: BowlingRes

Oppdalstreffet 16. - 26. juli

NO URETHANE

Den største sommarturneringa i Noreg er Oppdalstreffet som kvart år går i siste del av juli. For at alle skal ha same fair sjanse til å booke starttider, så annonserer Oppdal når turneringa opnar for påmelding. I år vert påmeldinga opna 5. juni kl. 17. Då sit nerdane klare rundt tastaturet med bowlingres open og høgg til så snart klokka rundar fem. Dette er også ei turnering i formatet 3x3 innleiande spel.

Pris. Senior: kr. 1050, jr/pensjonist: kr. 750, gjenstart kr. 300 (3 seriar)
Hcp: 50% av diff. mellom eige snitt og 200 - maks 20
Påmelding: BowlingRes (opnar 5. juni kl. 17)

MØTE MELLOM STYRET OG AKTIVITETSGRUPPA 14. MAI 2026

Aktivitetsgruppa i Kvam sendte styret to forslag relatert til treningsaktiviteten til medlemene. Det eine forslaget om å endra treningstidene til kl. 18 i staden for kl. 19 vart nedstemt. Det andre forslaget vart vedtatt og lyder slik:
- Ei fritrening per veke uansett dag
- Kr. 50 per ekstratrening - maks kr. 200 per månad
- Dugnadstimar kan brukast som betaling for trening

MÅNADSCUP OG KLUBBMEISTERSKAP:

31. mai kl. 1600 i Øystese
7. juni (kl. 1030?) på Voss

Både Kvam og Voss bk slår saman klubbmeisterskapen og månadscupen denne runden. Dei fire første seriane er teljande for månadscupen medan dei som deltek i klubbmeisterskapen spelar ytterlegare to seriar (tot. 6 seriar).

6'AR CUP EIN GONG I MÅNADEN I KVAM?

Det er kome forslag om å arrangera ei løpande turnering i Kvam med approbert spel (at seriane vert reigistrert i Norges bowlingforbund). Dette for å hjelpa dei som treng kravet på tal seriar for å delta i NM. Tidlegare hadde me ein såkalla 5'ar cup som vart arrangert ca. ein gong i månaden. Den førebels luftige ideen går på å ha ei turnering i månaden med 6 seriar og til ein minimalistisk deltakarpris sidan grunntanken ikkje er premiering, men oppsamling av seriar.

LIGASPEL SESONGEN 2026 / 2027 - PÅMELDINGSFRIST 10. JUNI

Påmeldingsfristen for deltaking i ligaane i Norges bowlingforbund (ikkje lokalliga) er 10. juni. Kvam har hatt veteranligalag kvart år sidan me debuterte med ein 20. plass i 2. divisjon sesongen 2008/2009 til me enda midt på tabellen i 4. divisjon i år.

Landsligalag hadde me i:

2015/2016: Nr. 2 i 3. div. Sør-Vestlandet avd. B
2016/2017: Nr. 3 i 3. div. Sør-Vestlandet avd. B
2023/2024: Nr. 2 i 3. divisjon Sør-Vestlandet

Page updated

Google Sites

Report abuse