Udruga Dren i Zelena čistka

Post date: Oct 15, 2009 3:02:27 PM

Dragi Drenovčani,

Va pasanen broju pisala san na standardnen hrvatsken zajiku o Udruge za očuvanje i promicanje drenjule DREN Rijeka. Od ovega broja pisat ću na čakavsken zajiku, aš volin drenovsku čakavicu i mislin da se mora očuvat; najprvo čez sakidajni govor domaćeh judi, a onput i čez ove naše novine ke povedaju o sen ča se na našoj Drenove lepega dogaja.

Beseda drenjula va nazivu našega društva je ta prvi korak kega smo storili. Krenuli smo fanj ambiciozno, puni smo lepeh zamisli, ma smo i vredni. Kako san već pisala, prijavili smo se z projekton "Revitalizacija nasada drenjule na Drenovi" na natječaj Grada Rijeke, Projekt lokalnog partnerstva skupa z Mjesnen odboron ki nan je dal punu podršku. Ča znači da smo dobili i šoldi za sadnju drenjul! Rekli su da će nan dat ruku i Zbor DVD Drenova, Dobrovoljno vatrogasno društvo Drenova, OŠ "Fran Franković" i Klub umirovljenika Drenova, kot i ča nan je puno judi ki su čuli za našu akciju reklo da će nan pomoć kakogod moru.

Dogovori z rečkemi gradskemi službami gredu dobro, već smo našli mesta na ka ćemo sadit nove drenjule. Ovo proleće nećemo još sadit aš je prognoza da će bit vela suša. Kako znamo da mlado drevo rabi zalevat, a voda je se ceneja, odlučili smo da čagod moremo parićamo prvo jeseni, kada mislimo posadit okol 40 drenjul, ča većih, ča manjih. Za prvu ruku bit će to okol stare škole, crekve i zad koludric. Prva akcija će bit sobotu 21. 4. 2012. na zemji okol Gradske biblioteke na Drenove, kade ćemo čistit draču, seć grmi i grane,čistit teren od smet i grot, a se to kot del međunarodne akcije Zelena čistka (www.zelena-cistka.org)

Pozvani su si ki moru doć i ki bi teli pomoć da zamu kosiri, rukavice, grabje, krampi, lopate i dobru voju. Bit će ča za pojist i popit, a kako nas je dosta i ki kantamo va zboru - sigurna san da će bit veselo!

Va našen je društvu osvanula još jedna vela ideja na ku smo si jako ponosni. Draško Maršanić, geodet, osmislel je "Katastar drenjule" i vaje počel delat na ten skupa z Christianon Grailachon. Čin je drenjula procvala, saki dan su obahajali del po del šume oko starega groblja na Dolnjoj Drenove, kako i Vele i Male Drage, Proslop, Veli vrh i Lubanj. Poslikali su više od 300 stabal i grmih, očitali koordinate i za saku drenjulu zapisali va kakoven se okruženju nahaja, kulike su njin visina i širina, i na kakovoj se pozicije nalaze, su kraj zidića al va kamenjaru... Se zapisano stavili su va posebnu tabelicu ka će se još z vrimenom popunit z novemi podatki za južni del Drenove i samo naselje. Storili su i karte na kemi su ucrtane pozicije drenjul. Međutin, to su samo šumske drenjule, a znamo da i neki Drenovčani stabla drenjule imaju okol svojeh kuć. Bilo bi lepo da i ta dreva budu upisana va katastar i poslikana pa molimo seh ki bi to želeli da se jave va Mjesni odbor radi podatkih. O "Katastru drenjule" teli bimo van još i više reć na predstavljanju ko će bit održano va povodu "Dana biološke raznolikosti" dana 22. 5. 2012., a na taj isti dan je I Dan zaštite prirode va celoj Hrvatskoj.

To će bit prilika da semi pokažemo kakovo prirodno bogatstvo ima naša Drenova i kako mislimo da "zeleno srce" Reke moremo pošparat zavavek, ako budemo složni.

Budite mi zdravi kako drenjule!

Vesna Lukanović