2025

Urkiakera abesbatza etorri zen?

Borja del Río

Ikasturte honetako bigarren saioa Urkiak tabernan ospatu genuen, Mauratza auzoan. Ez dakigu oraindik zer nolako magia dela medio, baina inoiz baino doinu politenak entzun ahal izan genituela. Badirudi, tabenaren terrazaren kokapena eraikuntzen izkin baten zegoenez kantarien ahotsak inoiz baino garbiago eta txukunago entzun zirela. Hau da marka hau! Beharbada, Palestinako genozidiaren aurkako elkartaratzeak gure bihotzak ikutu zituen eta hori dela eta gure kanten melodiak goxo eta samurragoak irten zitzaizkugla... nork daki!

Ederto aritu ginen ordu eta erditxo bat kantu-giroan, lasai-lasai, eta oso ondo pasatzen. Eskerrik asko denori!

Hurrengoa, azaroaren 6an izango da oraindik zehazteke dagoen taberna batean. Espero dugu, meteorologiak laguntzea, animo eta laster arte!

Ikasturte honetan gogor hasi gara Mauratza plazatik eta oraingoa ere bertako Urkiak tabrnan ospatuko da hamaikagarren Topakanta. 

Bada, jada, urte bat ekimen honekin hasi ginenetik eta gure lehehengo urtebetetzea ospatzeko espero dugu jende mordoa hurbiltzea euskaraz mintzatzeko, kantatzeko eta ondo pasatzeko!

Ez ahaztu urriak 2, arratsaldeko 19etan, Mauratza plazako Urkiak tabernan.

Lagunekin hitzordua gorde eta zatozte!

1, 2, 3, fro, fro, frogatzen!

Borja del Río

Atzo denboraldiari hasiera eman genion. Udako oporrak oroitzapen goxoak baino ez dira jada eta gutxinaka ikasturtearen errutinak hartzen hasi beharko gara. Topakanta zuon errutinen txoko alai bat izan nahi du, beraz, gogoratu hilabete guztietako lehen ostegunetako arratsaldeak erreserbatzea kantu giro euskaldunean unetxo bat igarotzeko. Aurten ere Topakanta dator!

10. saioa Mauratza plazako Arbelaitz tabernan ospatu genuen. Jende asko hurbildu zen kantuz eta euskal giroaz gozatzeko, eskerrik asko denoi! Nabaritu zen herriko jaietako bezperan geundela eta nolabait jendearen jaietarako gogoa sentitu zen. 

Bestetik, sumatu genuen ere aurreko egunean Bilbo gertatutakoaren zirrara, herri baten ekintza solidarioa zanpatutako beste herri baten alde; gure herriaren herri-kontzientziaz harro! Gora Palestina libre, Stop genozidioa!

Hurrengo saioa urriaren 2an izango da, osteguna, arratsaldeko 19etan, oraindik zehazteke dagoen taberna batean. Bitartean kanta berriak prestatzen ibiliko gara, ia gure kantutegia handitzen goazen! 

Laster arte!

Irailean denboraldi berriari hasiera emango diogu. Oporraldia gozatu egin dugu, deskantsatu dugu eta pilak behar bezala kargatuta itzuliko gara Urduliz euskal kantuz buztitzeko gogoarekin. 

Lehenego saio hau, gure egitasmoaren hamargarrena izango da eta denboraldiaren estreinaldirako Arbelaitz tabernara joango gara. Betiko lez arratsaldeko zazpietatik zortzi eta erdiak arte egongo gara.

Kontuan izan Topakantaren egitasmoa kantugintza eta euskalgintza dela, hau da euskaraz bustitzea gure herria, beraz ezagutzen dituzun euskalzale guztiak gonbidatuta zaudete.

Animatu zaitezte!

Itxaropena

Itziar Belaunde

Azken egunotan itxaropena hitza sarri entzun dut ekitaldi desberdinetan, munduan gatazkak, genozidioa, gosearen erabilera arma gisa eta sarraskiak ikusten ditugun bitartean. Garai latzak eta krudelak dira.

Testuinguru horretan, gure 9.  topakantza ospatu da, orain arteko jendetsuena. Kalma tabernan 100 lagun inguru batu ginen, eta arratsalde eguzkitsuak lagunduta, Kalma tabernako terraza gainezka egon zen hasieratik 21:00ak arte, eta zelan ez, gure kiderik gazteenak, Haizea eta Kattalin, beste lagun birekin agertu ziren.

Gabriel Aresti idazlea hil zenetik 50 urte bete diren astean ospatu dugu gure hileroko kantaldia, eta haren omenez, "Guretzat" kantatu dugu. 

Gabriel Arestirentzat, poesia kontzientziak iratzartzeko tresna bat zen, "poesia mailu bat da", berak zioen bezala. Ziur nago Gabriel Arestik ere bidegabekeriak amaitu eta garai hobeak justizia eta bakea ekarriko zituen itxaropena zeukala.

Joan den asteburuan Jon Maia bertsolariak "Nik esperantza daukat" esan zuen, "Maravillas hil zuten herrian gaur egun jotak euskaraz kantatzen direlako. Matalas hil zuten herrian gaur egun ikastola bat dagoelako".

Guk ere itxaropena daukagu. Herri txikietan ere gauza handiak egiten direlako. Eta ziur nago uda ostean topakantak arrakastatsua izaten jarraituko duela.

Gora gu!

Konturatu gabe, eta txiri-txiri heldu egin da denboraldi honetako azkenengo saioa. Topakanta bultzatzen dugunok uztaila eta abuztua hartzen dugu atseden eta ondorioz, aurtengo azken Topakanta datorren ostegunean izango da,  hilak 5, arratsaldeko 19etatik aurrera metro geltokiko Kalma tabernan.

Eguraldiaren arabera, baliteke kanpoan egin ahal izatea eta kasu horretan eta azkenengo saioa dela kontuan izanik ohikoa baino pixkat gehiago luzatuko ginateke.

Espero dugu jendea animatzea eta hurbiltzea azken kantuak botatzeko.

Animatu zaitezte!

Topakanta gero eta sendoago!

Iñaki Azua

Maiatzaren 8 honetan komunikabideetan albiste bi nagusitu dira: “Fumata” eta Athletic Europako kopan sailkatu ezinezko finalaurrekoa. Irratia edo telebista piztu eta besterik ez zen entzuten. Txotxolo ale halakoak! Atzoko gertaerarik garrantzitsuena eta politena zein zen ez zekiten ala? 

Guk bai, guk bagenekien Topakanta zegoela Urdulizen, oraingoan Azkena tabernan, hain zuzen, eta zorionez, ez genuen galdu.

Zorionez diogu,  8. Topakantaren saioa itzela izan delako: parte-hartze handia izan da (40 lagun inguru!), agian orain arteko jendetsuena, eta aurrekoan parte-hartzaileen batez besteko adinak behera egin bazuen, oraingoan are gehiago.

Kattalin eta Haizea berriro izan ziren gure artean eta, apurka-apurka lotsa albo batera utzita, Borja gitarrajole abeslariari mikrofonoa eskatu eta beren ahots finez eta oso ondo intonatuz giroa primeran alaitu zuten, kanpoan zeuden beste ume batzuk gure kantuetara erakarri eta  guztion txalo zaparrada jaso arte.

Gainera, Ander, perkutsio-kaxoia jolea eta trikitrilari prestua,  oso ondo lagunduta etorri zen atzokoan, bikotearekin eta seme biekin, eta beste guztion artean bat eginda, jai-giroa ezin alaiagoa izan zen.

Gitarra, triki eta kaxoia, adin desberdinetako jendea, atzoko eta gaurko abestiak… zelako gozamena! Topakanta badoa aurrera, gero eta sendoago, soinuz eta kantuz, ondo pasatzen eta, batez ere, euskara indartzen herrian,  Orbizta  eta kimu berriak. Biba zuek!!

Atzoko topakantan gure aurpegi guztiak ikustea zaila zen. Izan ere, taberna erdiko zutabeak eta makina “dirujalea”k  ikusmena murrizten ziguten. Hala ere, ezkerreko txokoan zegoen gazte taldea argi nabarmentzen zen, batez ere, Gatiburen abestiren bat zetorren bakoitzean, bolumenari dezibelio batzuk gehitzen zizkiotelarik. Etorriko ahal dira hurrengoan! Arantza, atzo bezala, hurrengoan ere jantzi Gatiburen kamiseta! Gure talismana izan zen eta!

Atzoko saioaren erdian, Borjak, agian bere irakasle kutsua ezkutatu ezinik, erronka bota zigun Txantxibiri abestia dela-eta: “Bat, bat, bat bart errondan ibili, bart errondan ibili" ahapaldiak ez du batere errimatzen eta moldatu beharko genuke. Beraz, norbaiti hurrengo saiorako zerbait otutzen bazaio, esan diezaiola. Gonbitea eginda dago.

Eta “gonbitea” aipatu dugunez, gogorarazten dizuegu datorren ostiralean, maiatzaren 16an, plan ederra daukagula Euskaraldiaren barruan. Hain zuzen, Marutzeko frontoian, arratsaldeko 18:30ean, Uribe Kostako Mintzodromoa izango dugu, Kerman eta Ainhoa musikari algortarrek girotua, eta mokadutxu bat jan ondoren (entzun dut pizzak egongo direla!), 20:00etan Umore Gaua hasiko da, “Bihotz, Bi Hots, Bi Txotx!” emanaldiarekin.

Denok gaude gonbidatuta, baina mintzodromoan parte hartzeko, ez ahaztu izena ematea esteka honetan sakatuz: www.labur.eus/ukmintzodromoa

Amaitzeko eta ohitura denez, aurreratuko dizuegu non eta noiz egin nahi dugun hurrengo Topakanta: ekainaren 5ean, Kalma tabernan. Irrikan gaude berriz elkar ikusteko eta denok batera kantatzeko!

Bai, badakigu bihar hilaren lehen osteguna dela, baina guretzako maiatzak 1, letra larriz idazten den data denez ez dugu Topakanta ospatuko eta beste aste oso batez itxaron beharko duzue.

Bi saio baino ez zaizkigu geratzen aurten hasitako egitasmoaren lehen urteari bukaera emateko, eta kasu honetan metro ingurura abiatuko gara Urdulizeko beste taberna ospetxu batetara: Azkena taberna.

Beraz, gogoratu, datorren ostegunean, hilak 8, arratsaldeko 19etatik 20:30etara bertan musikaz gozatzen egongo gara abesten, dantzatzen eta  kantantzen. 

Animatu zaitezte!

Udaberriko soinuak

Itziar Belaunde 

Hilabete honetako topakanta berezia izan da; izan ere, Urdulizen Orbizta Euskera Elkartea sortu denetik ospatu dugun lehenengo edizioa izan da, eta guretzat, elkarrekin kantatzen aritzea gure elkartearen sorrera ospatzeko modu bikaina izan da.

Duela gutxi udaberria heldu da eta gure inguruko landak, zelaiak eta basoak orbizta eta lorez jantzi diren bezala, gure gogo-bihotza ere suspertu, biziberritu eta orbizta da, gure arteko lankidetzatik fruitua jaio arte: euskara sustatzeko elkartea. Baina goazen harira berriro. Atzoko Topakantaren saioak, betiko legez, bere berezitasunak eduki zituen. Urdulizko Mauratza auzoan ospatu zen, Txinpi tabernan, orain arteko beste tabernetatik apur bat urrunago, eta horrela, gure ahotsak eta Ander eta Borja musikaren doinuak Mauratzako kaleetara iristea lortu genuen. Eta zelan ez, eskerrik asko Txinpiko langileei (Abba eta Carol) hain ondo tratatzeagatik!

Atzo 35 pertsona inguru bildu ginen, eta nabarmendu behar dugu orain arteko ahots gazteenak izan zirela gure artean, Katalin eta Haizea! Bederatzi-hamar urteko kantukideen ahots zoragarriei esker, gure saioak bestelako kutsua eduki zuen, hitz batean esanda, ederra. Eta parte-hartzaileen kopuruak gora egin eta batez besteko adinak behera egiten duen bitartean, Borjak kanta berriak (Gatibu, Ken Zazpi...) gehitu ditu kantutegian eta orain aukera zabalagoa daukagu.

Azkenik, eta hasierako lerroetan esandakora itzulita, herriko  euskaltzaleentzako garai itxaropentsu eta pozgarria dator. Goazen ametsak betetzera eta kantatzera! 

Hurrengo topakantan elkar ikusiko dugu, maiatzaren 8an, Azkena tabernan, 19:00etan. Erdu!

Udaberriari kaixo esateko modurik onena kantuan ibiltzea dela badakigu! Oraingoan Mauratza auzoko Txinpi tabernara joango gara gure alaitasunarekin ingurua pozteko.

Gogoratu, datorren ostegunean, hilak 3, arratsaldeko 19etatik 20:30etara bertan musikaz gozatzen egongo gara: abesten, dantzatzen, kantantzen. Animat zaitezte!

Bada garaia hurrengo Topakantaren berri jasotzeko. Oraingoa, berriz ere, bueltatzen da Topakanta Laubide ingurura, eta kasu hontan Udaletxe aurrean dagoen Txiberrira.

Guretzako sekulako plazerra da bertan Topakanta ospatzea,  Txiberrik izen propioa baitu inguruko musika taldeentzako. Lan polita egiten dute Txiberrikoek eskualdeko talde desberdinen kontzertuak programatzen, eta musikariak garenok asko eskertzen dugu holako ekimenak gure inguruan egotea.

Gogoratu, datorren ostegunean, hilak 6, arratsaldeko 19etatik 20:30etara bertan musikaz gozatzen egongo gara: abesten, dantzatzen, kantantzen... Kontuan izan ondoren Athletic-eko partika ikusteko aukera ere izango dugula. Beraz, deitu lagunak, eta animatu zaitezte!