2024

Badaukagu prest hurrego Topakantaren egoitza; oraingoan Basartena tabernan izango da. Eskerrik asko, lagunok!

Oraingoan hilabete eta urtearen hasi hasieran egokitu zaigu lehen osteguna eta ondorioz urtarrilaren 2an izango da. Berriz ere arratsaldeko zazpietatik zortzi t'erdiak aldera egongo gara abesten, jotzen eta dantzatzen. Bertaratu nahi baduzu, badakizu, lagunekin lotu eta zatozte ondo pasatzera!

Urduliz Topakanta Jubilatuen tabernan  

Iñaki Azua

Euskararen Eguna ospatu berritan.

Aurreko zapatuan kalez kale jiran,

domekan manifestu, talo eta dantzan

oldarraldien kontra herria da bueltan.

Atzo gauean berriz lotu ginen kantan,

Antsoneko Plazako taberna  horretan.

Jubilatuak ere baegozan bertan,

umeak be alaitsu lurrean olgetan.

Hirugarrena izan zen atzoko saioa

Topakanta ez doa zubitik inora.

Hainbeste lagun bilduz, musika ta algara(n),

“hogeitahamar(re)tik gora” esango dut. Hara!.  

Loretxo bat zegoen bart barra atzean

euskaraz berba eginez modu ederrean.

Azkenik biztu zaigu lainoen artean,

orain aukera dugu zerbait eskatzean.  

Ondo pasa genuen, ondo girotuak.

Eskerrik asko, Borja, Ander, panderuak, 

etorri ezin zirenak ta bertaratuak,

zalantza bat bakarrik: noizko hurrengoa?

Urtarrilaren 2a izango da eguna

BASARTENA tabernan, leku aproposa.

Jon Zaharra omen dator gurekin batera

txalupa arraro baten harro bogatzera. 

Ostegun honetan Jubilatuetan

Konturatu gabe, bagaude abenduan! Eta azken hilabeteetan bezala, lehen ostegunean, Topakanta ospatuko da Urdulizen.

Oraingoan, Antsonekoa plazan dagoen Jubilatuen tabernan elkartuko gara arratsaldeko zazpietan elkarrekin abesteko, euskaraz mintzatzeko eta ondo pasatzeko.

Zure lagun eta inguruko euskalzale guztiak deitu eta zatoz!

Ez ahatu, eta hurrengo ostegunerarte!

Urduliz topakanta Laubide tabernan 

Itziar Belaunde

Atzo iluntzean Urdulizko topakantaren bigarren saioa amaitu berri zenean, lerrook idazten ari dena irribarrea kendu ezinik abiatu zen etxerantz, pentsamendu hau buruan: lagun bakar baten edo batzuen ideia edo asmo hutsa egia bilakatzeko gai gara, denon artean, ilusioa dagoenean. Eta euskaldunoi ez zaigu holakorik falta, ez horixe!!!

Baina goazen hasierara. Atzo, ostegunean, 19:00 aldera Urdulizko, Sopelako eta inguru honetako euskaltzaleak Laubide tabernara iristen hasi ziren, gogotsu, eta apurka-apurka ilusioa eta alaitasuna nagusitzen hasi ziren. Lehenengo saioan bezala, 40 lagun inguru batu ginen euskarazko kanta tradizionalak eta gaur egungoak abesteko eta, zelan ez, ekimena arrakastatsua izan zen. Oraingoan, ordea, berrikuntza batzuk egon dira. Musikarien artean, Borjarekin batera Ander aritu da perkusioan eta, ustekabean, Arantza biolin-jolea batu zaie. Eta hori bakarrik ez, pandero-joleak ere aritu dira-eta giroa alaitzen. Ea hemendik aurrera musikari gehiago animatzen diren!!! Horretaz gain, palestinar batzuen bisita eduki dugu, euskaldunok kantatzeko ohitura hau bertatik bertara ezagutzeko asmoz.

Kantu-kantari eta baten bat dantzan, kantutegia eskuan eta pozarren pasatu da ordubete eta erdiko bigarren topakanta, giro alaian eta euskaltzalean murgilduta. Hunkigarria izan da!

Eskerrik asko Laubide tabernako arduradunei lekua uzteagatik, eta bertaratu zineten guztioi ekimen hau aurrera eramaten laguntzeagatik!

Topakantaren bigarren saioak utzitako ajeaz oraindik gozatzen nagoela, gogorarazten dizuet hurrengo topakanta abenduaren 5ean izango dela, 19:00etan, Urdulizko Antsonekoa plazako tabernan. Han ikusiko gara!

Gaur kamiseta batzuk diseinatzea okurridu zaigu. Diseinua guztiz librea denez hemen daude atzeko hondoa gardena duten PNG erako fitxategiak.

Algortako Amets Kamisetak dendarekin hitz egin dugu eta bertan badago kamisetak edo beste hainbat gauzatxo sortzeko aukera. 

Ikusi nahi badituzu kamiseten ereduak zoaz Merchandising  orrira.