Hér eru nokkrar hugmyndir að verkefnum í tónmennt. Tilvalið fyrir þau sem þurfa að dvelja heima fyrir. Við notum vefsíðuna Chrome Music Lab þar sem finna má allskonar tæki og tól sem nýtast í tónmenntakennslu. Lýsingar og leiðbeiningar eru fyrir foreldra eða kennara.

Höfundur þessara verkefna er Bjarki Guðmundsson, B.Ed. nemi með tónmennt sem kjörsvið

Leiðbeinandi: Dr. Helga Rut Guðmundsdóttir, prófessor í tónlistarfræðum

Taktur

Hér ætlum við að vinna með laglínur með hjálp Melody Maker í Chrome Music Lab. Þar er hægt að setja saman einfalda laglínu með því að haka í reitinna á skjánum og ýta á ‘Play”. Takið eftir hraða stillinguni neðst og hafið í huga að oftar en ekki eru það þagnir sem gera góða laglínu betri.

Þrástef í Melody Maker

Hér ætlum við að kynna til leiks hugtakið ‘Þrástef’ eða ‘Ostinato’. Það er stutt endurtekið stef sem við upplifum yfirleitt ekki sem lag- eða sönglínu lags. Þrástefið gefur ákveðna festu líkt og bassalína. Í Melody Maker er laglínubútur endurtekinn í sífellu þegar spilarinn er settur í gang og því er í rauninni um að ræða þrástef.

Laglína og trommur

Song Maker er afar fjölþætt forrit þó það líti ekki út fyrir að vera flókið. Takið ykkur smá tíma til að fara yfir helstu skipanir, ræða hvernig á að bæta við, raða og eyða nótum. Það er margt í boði og því er gott að koma sér saman um á hverju skuli byrja. Fyrsta verkefnið var um trommur og takt svo það gæti verið góður staður til að byrja.

Byrjið á því að finna hvernig trommuhljóð þið viljið hafa og byrjið svo að teikna inn. Þar á eftir er hægt að setja inn einhverskonar þrástef eða bassagang og bæta svo við laglínu *Gott er gefa sér smá bil á milli þrástefs og laglínu, svo að allt komist vel til skila.

Laglínu möguleikarnir í Song Maker eru ekki jafn takmarkaðir og í Melody Maker. Það gefur okkur mikla möguleika, eins og að raddsetja laglínu, bæta við áherslu nótum hér og þar sem vinna með trommunum eða bara hvað sem ykkur dettur í hug.

Til kennara / foreldra

Meginmarkmiðið með verkefnunum er að öðlast skilning á viðfangsefninu, kafa dýpra með því að flækja það fyrir sér og sjá í víðara samhengi. Ekki líta svo á að verkefninu sé lokið á ákveðnum tímapunkti. Leitist við að lengja það og tengja eins og hægt er við tónlistarsköpun án hjálp tölvunnar eða spilið með henni. Spyrjið spurninga og talið saman um það sem þið heyrið.

Menntagildi:

Sköpun er einn af lykilþáttum menntunar í Aðalnámskrá grunnskólanna. Verkefnin sem hér má finna er ætlað að veita nemendum undirstöðu og hvatningu til að skapa tónlist á eigin forsendum. Sköpun felur í sér að hugsa óhlutbundið frá því sem fyrir liggur, beita gagnrýni hugsun og finna lausnir. Leiðbeiningarnar sem hér fyrir liggja er ætlað að kveikja áhuga og forvitni nemandans til að skapa sér eitthvað nýtt.

Tónlistarkennsla á að efla þekkingu og skilning nemenda á helstu frumþáttum tónlistar líkt og form, blæ og styrk. Þátttaka í tónlistarsköpun, leika rytma og þrástef, ræða tónlist og vinna með tónlistarforrit eru dæmi um hæfniviðmið fyrir Tónmennt í Aðalnámskrá. Verkefnunum hér er ætlað að kynna fyrir þessa þætti fyrir nemendum á sjónrænan og verklegan hátt.

Sjá: Aðalnámskrá grunnskóla, greinanámskrá 2013 bls. 150 um hæfniviðmið í Tónmennt og bls. 24 um grunnþáttinn Sköpun