Матурлык ул бар җирдә, яхшылык һәрбер кешедә бар. Күрә белергә генә кирәк. Һәр мизгелдә - бер мәгънә.

Безнең һәр иртәбез бүләктән башлана, һәрбер безгә бирелгән көн - ул бүләк. Бу бүләкне исраф итмәс өчен, без бөтен көчебезне куярга тиешбез.

Сау-сәламәт, якын кешеләр янда булу, яраткан эшен белән шөгыльләнә алу - бәхет. Гомумән, һәр мизгелне бәхетле мизгел итеп кабул итеп булуына инана башладым. Бәхет ул кайдадыр еракта түгел, аны эзләргә дә, аны көтәргә дә кирәк түгел. Менә мизгел! Һәм ул бәхетле мизгел. Бәхет - ул сездә! Чыгарга Ирек бирегез шуна.

Минемчә, чын яшәү ул тормышта булган һәр мизгелне ярата белү, кабул итә белү, аның өчен рәхмәтле булу. Уйланыгыз әле, бу дөньяда без рәхмәт әйтерлек нәрсәләр күпме бит!

Чын күңелдән рәхмәт

Татар халык мәкале: "Аюны да биергә өйрәтәләр"

Һәрбер мәкальгә дөньялыкның тәҗрибәсе салынуы - барыбызга да мәгълүмдер. Минемчә, кешенең теләге бар икән, ул һәрбер максатына ирешә ала. Бу мәкальгә туры килүче хәлләр күп булгандыр, минем сезгә берсе турында язып китәсем килә.

2016 ел башында кәгазьдән (гофро) чәчәкләр ясарга өйрәнгән мәлем турында булыр ул.

Интернеттан видеолар карап утырган вакытта, игътибарым күз явын алырлык, кәгазьләрдән ясалган, эченә кәнфитләр салынган букетларга төште. Шулай берничә видеодан үземә илһам алып, мин дә чәчәкләр ясарга карар кылдым. Өйдә сеңлемнән кәгазьләре дә бар икән. Менә иҗат итәргә мөмкинлек якында гына икән дип уйлап куйдым. Кибеткә барып, кәнфитләр сатып алдым. Иҗатка керештем. Эшли башлагач, видеога карагандагы кебек, жиңел булмавына төшендем, килеп чыккан чәчәкләрем, мәктәп баласының хезмәт дәресендә ясаган, эшләреннән ерак китми дигән уй керде башка. Ләкин интернеттагы илһам чыганакларым, уңышсызлыкларга очрасам да, тукталып калмаска көч бирде. Эшемне дәвам иттем. Башта кәнфитләр белән ясасам да, соңрак аларсыз гына ясадым.