2. Інтэрактыўныя практыкаванні

А якія зараз самыя вядомыя беларускія часопісы?

«Бярозка» – беларускі штомесячны грамадска-палітычны і літаратурна-мастацкі часопіс для дзяцей сярэдняга і старэйшага школьнага ўзросту. Рэкамендаваны да чытання з 12 гадоў. Заснаваны ў 1924 годзе.

Ад пачатку часопіс выходзіў як «Беларускі піянер» (да верасня 1929). Затым рэдакцыйная калегія падзялілася, пачалося выданне газеты «Піянер Беларусі» і часопіса «Іскры Ільіча». З чэрвеня 1945 года выдаецца пад назвай «Бярозка».

Зараз для хлопчыкаў і дзяўчынак у часопісе распрацаваны цэлыя напрамкі. «Бярозка» друкуе матэрыялы на музычныя, «кіношныя», спартыўныя, псіхалагічныя, навукова-папулярныя і нават кулінарныя тэмы. Апошняя не адыходзіць ад прынцыпаў літаратурнага выдання: наша «Гатавальня» прапануе рэцэпты страў, якія сустракаюцца ў паэмах, раманах, легендах. Па ўсім нумары рассыпаны кругляшы-«цікавосткі», апошняя старонка – літаральна «Смешная».

«Маладосць» – беларускі штомесячны літаратурна-мастацкі і грамадска-палітычны ілюстраваны часопіс. Арыентаваны ў асноўным на моладзь. Першы нумар «Маладосці» выйшаў з друку ў сярэдзіне красавіка 1953 г. У той час гэта быў адзіны ў Беларусі штомесячны часопіс для моладзі.

Ініцыятарам стварэння выдання з’яўляўся П.М. Машэраў. На старонках «Маладосці» друкаваліся творы Якуба Коласа, Петруся Броўкі, Аркадзя Куляшова, Міхася Лынькова, Янкі Маўра, Івана Мележа, Уладзіміра Караткевіча, Васіля Быкава і інш.; публіцыстычныя, крытычныя і літаратуразнаўчыя артыкулы, рэцэнзіі; матэрыялы на навуковыя, грамадска-палітычныя і гістарычныя тэмы; нарысы пра дзеячаў навукі, культуры, літаратуры і мастацтва, перадавікоў вытворчасці; пераклады літаратурных твораў народаў СССР і замежных краін.

Выданне адкрыла дарогу да чытача маладым літаратарам: Алесю Разанаву, Яўгеніі Янішчыц, Віктару Шніпу, Людміле Рублеўскай, Міколу Мятліцкаму, Сяргею Законнікаву, творы якіх з часам увайшлі ў залаты фонд айчыннай літаратуры.

Сёння, як і раней, «Маладосць» з’яўляецца аўтарытэтным выданнем маладых літаратараў, якое аб’ядноўвае таленавітых паэтаў, празаікаў, публіцыстаў, літаратурных крытыкаў і перакладчыкаў, падтрымлівае сувязь з літаратурнымі аб’яднаннямі моладзі з усіх рэгіёнаў Беларусі. Рэдакцыя часопіса адкрыта для любых форм супрацоўніцтва, выданне прадстаўлена ў сацыяльных сетках, мае свой YouTube-канал.

«Полымя» — літаратурна-мастацкi i грамадска-палiтычны часопіс. Выдаецца са снежня 1922 года ў Мінску штомесяц на беларускай мове. Найстарэйшае беларускае літаратурна-мастацкае выданне, у стварэнні якога непасрэдны ўдзел прымалі народныя песняры Беларусі Янка Купала і Якуб Колас.

На працягу дзесяцігоддзяў «Полымя» друкуе празаічныя і паэтычныя творы беларускіх пісьменнікаў, пераклады твораў класікаў сусветнай літаратуры, артыкулы па пытаннях беларускай літаратуры і мастацтва, гісторыі і культуры Беларусі, рэцэнзіі на новыя кнігі.

Так, 20-я гады XX ст., адметныя абуджэннем у грамадстве цікавасці да сваіх нацыянальных каранёў, да сваёй літаратуры, прадстаўлены творамі Янкі Купалы, Якуба Коласа, Міхася Чарота, Цішкі Гартнага, Змітрака Бядулі і інш.

У трагічны і ахвярны для інтэлігенцыі Беларусі перыяд 30-х гадоў часопіс меў назву «Полымя рэвалюцыі». У тыя часы друкаваліся пераклады твораў Максіма Горкага, Шата Руставелі, Генрыха Гейнэ і інш. Сярод беларускіх пісьменнікаў на гэтым гістарычным этапе значнае месца належала Кузьме Чорнаму. Таксама ў часопісе размешчаны творы Міхася Зарэцкага, Кандрата Крапівы, Міхася Лынькова.

У 40-50-я гады часопіс адраджаўся, як адраджалася і жыццё. Былі апублікаваны такія раманы, як «Людзі на балоце», «Птушкі і гнёзды», «Сэрца на далоні» і інш. Гэтыя творы адлюстроўвалі лепшыя бакі жыцця, паказвалі чалавека з уласцівымі яму дабрынёй і высокімі маральнымі якасцямі.

Далей літаратура станавілася больш быційнай, філасофскай. На старонках часопіса з’яўляюцца творы Васіля Быкава, Алеся Адамовіча, Уладзіміра Караткевіча, Андрэя Макаёнка. 

У пачатку ХХІ ст. для вялікай колькасці маладых пісьменнікаў «Полымя» па-ранейшаму застаецца «стартавай пляцоўкай». 

5. Дыдактычныя матэрыялы