Skapandi heimanám er heimanámsval á unglingastigi Stapaskóla. Nemendur fá aðra hverja viku hlaðborð verkefna að velja úr sem kennarar á unglingastigi setja upp. Verkefnin eru fjölbreytt og reynt er að bjóða nemendum upp á að skila á skapandi hátt. Verkefnin tengjast áhugasviðum nemenda og kennara og tengjast stundum yfirstandandi Stapamixi á unglingastigi. Kennarar hafa einnig leitað til nemenda eftir hugmyndum að verkefnum og tengt þannig beint við áhugasvið ákveðinna nemenda.
Nemendur velja sér 1-2 verkefni í samráði við foreldra og/eða forráðamenn til að vinna í hverju Stapamixi.
Öll skapandi heimanámsverkefni eru metin út frá
hæfniviðmiðum 7. - 10. bekkjar.
Markmiðin með skapandi heimanámi
Að skapa skemmtilega tengingu milli skóla og heimila.
Að nemendur þjálfi lykilhæfni og hæfni í námsgreinum 7. - 10. bekkjar.
Að nemendur nýti sköpunarkrafta sína á fjölbreyttan hátt.
Skipulag kennara
Kennarar í Stapamix teyminu halda saman utan um skapandi heimanám. Í hverri Stapamix lotu eru sett inn fleiri verkefni sem nemendur geta valið úr, en nemendur mega einnig velja eldri verkefni sem þau hafa ekki unnið áður. Verkefni kennara eru:
Að búa til skemmtileg verkefni og tengja þau við hæfniviðmið Aðalnámskrár.
Að setja verkefnin upp á vef.
Umsjónarkennarar passa upp á að allir nemendur velji sér í samráði við foreldra og/eða forráðamenn 1 - 2 verkefni í hverju Stapamixi.
Umsjónarkennarar passa upp á að nemendur komi í námssamtal við kennara til að meta heimanámsverkefni.
Að námsmat nemenda sé skráð í Mentor.
