AVH TMS PROJECT

Aðferðafræði og lýsing á framkvæmd rannsóknar, þ.m.t hvað þátttakandi þarf að gera (hér)

Öllum þeim sem sækja þjónustu á geðsviði Landspítala og heyra raddir í ofskynjunum að minnsta kosti einu sinni á dag, sem ekki hefur tekist að meðhöndla með tveimur ráðlögðum lyfjaskömmum í 6-8 vikur verður boðin þátttaka. Þeim verður afhent upplýsingablað um framkvæmd og markmið rannsóknarinnar og þeir sem samþykkja að taka þátt fá afhent samþykkisyfirlýsingu sem þeir skrifa undir og skila rannsakanda.

Þátttakendur sem samþykkja að taka þátt í rannsókninni mæta í staðlað viðtal á Kleppi hjá rannsakenda sem metur jákvæð einkenni. Einnig munu þeir svara spurningalistum sem meta líðan og lífsgæði.

þrjátíu einstaklingar sem mælast með raddir í heyrnaroskynjunum og heyra þær a.m.k. einu sinni á dag verður boðin þátttaka í rannsókninni. Fimmtán þátttakendur fá segulörvunarmeðferð og fimmtán þátttakendur fá falska segulörvunarmeðferð. Þeir sem ekki fá alvöru meðferð mun standa til boða að fá segulörvunarmeðferð seinna þegar rannsókn lýkur. Mælingar fara fram í báðum hópum samtímis. Valið verður af handahófi hverjir verða í hvorum hóp fyrir sig.

Þeir sem fá segulörvunarmeðferð þurfa að mæta í heila-og vöðvarafrit til að mæla P50 og P300 svörun, gamma sveiflur og þögla tímabil heilabarkar. Þeir þurfa síðan að mæta í tíu 15 mínútna rað-segulörvunarmeðferð yfir hvirfilberki T3-P3 með segulörvunarstyrk upp á 1Hz við 100% hvíldarhreyfiþröskuld (e. resting motor threshold). Fyrir hverja meðferðarlotu er hvíldarhreyfiþröskuldur mældur og er það miðað við styrkinn af segulörvun 50-100 µV yfir hreyfibörk (e. motor cortex) sem þarf til að virkja abductor pollicis brevis (APB) vöðvann í þumlinum í 5 af 10 tilvikum. Á meðan meðferð stendur munu lífeðlisfræðileg merki vera mæld þrisvar.

Kjósi þátttakendur að hætta þátttöku í rannsókninni þegar hún er hafin geta þeir gert það á hvaða stigi rannsóknarinnar sem er án þess að það hafi neinar afleiðingar í för með sér fyrir þá.

Eftir meðferð mæta allir þátttakendur, bæði í tilraunahópi og sjúklinga samanburðarhópi aftur til rannskanda í staðlað viðtal sem metur jákvæð einkenni og svara spurningalistum sem meta líðan og lífsgæði. Áætlun er að leggja mat á hvort breyting hafi orðið á jákvæðum einkennum, líðan eða lífsgæðum annars vegar og hins vegar P50, P300, gamma sveiflum og þögla tímabil heilabarkar hins vegar.

Heilbrigður samanburðarhópur sem hefur gengist undir MINI greiningarviðtal þar sem niðurstöður benda ekki til alvarlegra geðkvilla munu gangast undir sömu lífeðlisfræðilegu mælingarnar til að búa til viðmið fyrir sjúklingahópana tvo.

Þrjár eftirfylgdarmælingar verða gerðar. Að tveimur, fjórum og tólf viknum liðnum verður aftur haft samband við þátttakendur og þeir beðnir um að koma og taka þátt í sama matsferlinu með það að markmiði að meta hvort hugsanlegur árangur af rað-segulörvunar meðferð mælist þegar á líður.

Hvers konar úrvinnsla (t.d. tölfræðileg) var gerð við undirbúning rannsóknar? Ítarlegri lýsingu má skila í fylgiskjali.

Tölfræðilegt afl (e. power analysis) var reiknað miðað við 80% kraft, 5% alpha, 30% minnkun einkenna, áætlað staðalfrávik upp á 9 og meðaltal 28 í PSYRATS listanum. Niðurstöður tölfræðiafls voru að það þyrftu að minnsta kosti 16 þátttakendur.

Staðlað viðtal

• PSYRATS (Psychotic Symptom Rating Scale)

• SCI-PANSS (Positive and Negative Symptom Scale)

Sjálfsmatskvarðar

• Bakgrunnslisti

• DASS (Depression, Anxiety and Stress Scale)

• Mat á lífsgæðum (Quality of Life Scale)

• Öryggisatriði vegna rað-segulörvunar (rTMS safety screening questionaire)

• Edinborgarspurningarlistinn um ríkjandi hönd (Edinburgh Handedness Inventory)

Lífeðlisfræðilegar mælingar

• P50

• P300

• Gamma sveiflur

• Þögla tímabil heilabarkar