Sa Quezon Science High School (QSHS), tila ba lagi kaming bumabalik sa nakasanayang “Filipino time” tuwing Brigada Eskwela dahil palaging late nagsisimula ang programa. Taon-taon, ang Brigada Eskwela ay isang mahalagang aktibidad na naglalayong maghanda ng mga pasilidad ng paaralan para sa darating na pasukan. Ngunit ano nga ba ang kabuluhan ng Brigada Eskwela kung nagsisimula ito nang huli at nagtatapos na hindi kumpleto ang mga gawain?

Kapag sinabing “Filipino time,” ang ibig sabihin nito ay ang pagiging late sa anumang pupuntahan o dadaluhang okasyon. Bilang isang taong laging sumusunod sa tamang oras, wala nang mas nakakainis pa kaysa sa pag-aaksaya ng oras dahil sa mga taong huli dumating. Kapag sinabing alas siyete ng umaga ang oras ng tagpuan, kadalasang dumarating ang mga tao alas otso na. Laging late. Bihira sa amin ang makarating sa tamang oras. Laging may dahilan kung bakit late. Maraming dumarating na nag-uumpisa na ang mga pagtitipon o programa. 

Para sa iba, naging kaugalian na ang pagdating nang late. Isang hindi magandang ugali at nakakaapekto sa pag-unlad ng bansa. Kung hindi natin babaguhin ang nakaugaliang “Filipino time,” mahihirapang makausad ang bansa at magiging huli rin tayo sa lahat ng bagay.

Ito ang gustong baguhin ng dating Pangulong Noynoy Aquino noong siya’y nanunungkulan pa. Nilagdaan niya ang Republic Act No. 10535, na nag-aatas sa lahat na itama ang kanilang mga orasan at sundin ang Philippine Standard Time (PST). Ang tamang oras ay manggagaling sa Philippine Atmospheric, Geophysical, and Astronomical Services Administration (PAGASA). Inaatasan ang lahat ng ahensiya ng gobyerno na ipakita ang tamang oras sa kanilang mga official time devices, bundy clocks, at iba pa. Pagmumultahin ang hindi susunod sa batas na ito.

Bilang isang paaralan na naglalayong magbigay ng kalidad na edukasyon, ang QSHS ay dapat manguna sa pagbabago ng kultura ng pagiging huli. Ang palagiang pagkalate ultimo sa Brigada Eskwela ay nagdudulot ng hindi magandang imahe para sa paaralan at nagiging masamang ehemplo para sa mga mag-aaral. Kung ang mga guro, kawani, at magulang mismo ay hindi makakarating sa tamang oras para sa isang mahalagang aktibidad, paano na aasahan ang isang kabataang tulad ko na maging punctual?

Malinaw na ang pagiging huli sa Brigada Eskwela ay isang sintomas ng mas malalim na problema sa pagpaplano at koordinasyon. Kung nais ng QSHS na maging isang institusyon na may dangal, kahusayan, at serbisyo, kailangang iwaksi ang nakasanayang “Filipino time.” Kailangan ng isang masusing pagpaplano at dedikasyon mula sa lahat ng miyembro ng komunidad ng paaralan upang masiguro na ang lahat ng aktibidad ay magsisimula sa takdang oras.

Ang pagtuturo ng kahalagahan ng pagiging punctual ay dapat magsimula sa mga paaralan. Sa ganitong paraan, maipapakita ng isang kabataang tulad ko ang kahalagahan ng tamang oras at paano ito nakakaapekto sa buhay ng ibang tao. Ang QSHS, bilang isang premier na institusyong pang-edukasyon, ay dapat maging halimbawa sa pagpapatupad ng tamang oras, hindi lamang para sa mga mag-aaral, kundi pati na rin sa buong komunidad.

Sa huli, ang pagbabago ay magsisimula sa bawat isa. Kung nais na umunlad at makasabay sa ibang bansa, kailangan nang baguhin ang ating bulok na nakasanayan. Ang tamang oras ay hindi lamang isang simpleng bagay; ito ay isang salamin ng ating disiplina at respeto sa kapwa. Kung nais naming makamit ang tunay na progreso, magsimula kami sa simpleng bagay na ito. Wala nang excuse, wala nang "Filipino time." 

______________

Share This Article