Noong Hulyo 22-26, 2024, ang Quezon Science High School (QSHS) ay nagdaos ng Brigada Eskwela, isang simbolo ng pagkakaisa at pagkabahala sa pagpasok ng bagong taong pampanuruan, kasama ang pagdagdag ng apatnapung bagong estudyante. Bagamat ang layunin ng bagong patakaran ng gobyerno ay mapalawig ang tulong ng institusyong ito, hindi maikakaila na ang QSHS ay hindi pa handa para sa nasabing pagdagdag.

Sa kasalukuyan, ang estado ng paaralan ay tila isang malalim na krater na puno ng kakulangan. Ang mga pasilidad ay hindi pa tapos, ang mga guro sa wika at sining ay kulang, at ang mga tauhan ay hindi sapat. Ang mga sirang kagamitan sa laboratoryo ay lalong nagpapalala sa kalagayan, at ang kasalukuyang sitwasyon ay nagpapakita ng potensyal na pag-usbong ng mas malalang krisis kung walang agarang solusyon.

Bagaman ang QSHS ay may tradisyunal na mga programa at pagdiriwang, ang Main Building Activity Area ay lumalantad sa kakulangan ng espasyo at komodidad. Ang sikip, init, at kakulangan sa mauupuan ay matinding patunay ng limitadong kapasidad ng kasalukuyang imprastruktura. Ayon kay Dr. Peter Andrew Regencia, ang auditorium ay hindi pa magagamit, patunay ng patuloy na kakulangan sa mga kinakailangang pag-aayos.

Sa kabila ng mga hamon, may positibong pananaw ang punong-guro dahil sa nakatakdang pagpapalawak ng Science Building, na magdadagdag ng labing-anim na silid-aralan. Subalit, ang pagpapalawak na ito ay hindi sapat kung hindi muna matutugunan ang mga pangunahing pangangailangan ng paaralan. Ang mga plano ay dapat na sumasalamin sa tunay na kakayahan ng institusyon, hindi lamang sa papel.

Isang malaking usapin ang kakulangan ng guro sa MAPEH. Isang guro lamang ang namamahala sa asignaturang ito, na nagreresulta sa kakulangan sa holistic learning na kinakailangan ng mga estudyante. Dagdag pa rito, ang paaralan ay walang school nurse at nutritionist, na mahalaga sa wastong pagpaplano ng meal plans at pangangalaga sa kalusugan ng mga estudyante.

Ang pagdagdag ng estudyante ay tila isang panibagong pagkakataon para sa mga mamamayan ng Quezon, ngunit ang oportunidad na ito ay magiging panibagong pasanin kung ang institusyon ay hindi handa. Ang patuloy na problema sa kasalukuyang estado ng paaralan ay maaaring magdulot ng matinding dismaya at hindi pagkakasiya kung hindi agad matutugunan.

Mahalaga ang masusing koordinasyon sa pagitan ng administrasyon at gobyerno ng probinsya upang mapabilis ang pag-unlad ng paaralan. Ang simpleng pag-uusap ay hindi sapat; kinakailangan ng konkretong aksyon. Dapat humingi ng mas malaking badyet upang agad na maipaayos ang mga sirang kagamitan at matugunan ang mga kinakailangang pasilidad. Ang QSHS ay nakaugat sa tatlong pundasyon: dangal, kahusayan, at serbisyo. Dapat unahin ang kalidad ng serbisyo bago ang pagpapalawak ng bilang ng estudyante, para sa tunay na kapakanan ng Quesayano, Quezon, at buong sambayanang Pilipino. 

______________

Share This Article