Deseñadora. A través do seu traballo, procura provocar emocións e xerar un impacto sobre a percepción e o comportamento das persoas. Inspirada polas tradicións e as súas racíes galegas, goza coa creación de proxectos que implementen solucións colaborativas entre persoas, coa finalidade de revalorizar a pequenos colectivos cunha cultura e historia enriquecedoras. O seu proxecto da cadeira Bolina foi premiado pola Asociación de Diseño Industrial ADI-FAD.

Arquitecta, fotógrafa e artista visual. Na súa obra recente salienta a fotografía con contido social e sírvese da arquitectura como marco contextual. Compaxina o seu labor como freelance especializada en fotografía de arquitectura coa docencia en escolas de arte e universidades de todo o mundo. O seu traballo foi premiado e exhibido nacional e internacionalmente en numerosas institucións culturais e museísticas; e a súa recente investigación sobre o programa de colonización do INC será obxecto dunha exposición monográfica no Museo ICO no 2024. 

Arquitecta, experta en comunicación e comisaria independente. Divide a súa actividade entre a difusión da arquitectura e do urbanismo, a investigación e a xestión de proxectos, obradoiros e publicacións coa intención de xerar un pensamento crítico entre arquitectura e cultura contemporánea a través da investigación dos límites das disciplinas. Desde Madrid colabora con diferentes revistas nacionais e internacionais especializadas en arquitectura e, ao longo da súa traxectoria, ten participado en numerosas exposicións, conferencias e seminarios en América, Europa e Asia.

Arquitecto e profesor de universidade, é tamén presidente da Fundación Compostela Arquitectura e vicepresidente da Fundación RIA impulsada por David Chipperfield. Na XV BEAU (Bienal de Arquitectura e Urbanismo) acadou o Premio de Urbanismo por O’Banco do Piñeiro e de Produto pola súa proposta de elementos de identidade do Camiño de Santiago. Unha das súas obras máis coñecidas é o Mirador Pedra da Rá, galardoado cos premios FAD, LLEDÓ e COAG. Coa súa obra ten participado tamén exposicións colectivas, como foi o caso da recente Galicia Futura.

Creativa artesá, impulsora de Inés Rir& Co, estudio situado en Allariz e no que realiza produtos textís artesáns que unen tradición e novos diseños. Nos seus traballos integra o ecodeseño para favorecer a sostibilidade dos procesos, como é o uso de novos materiais como a fibra de proteína láctea. Actualmente combina a súa actividade artesanal coa investigación na creación de materiais relacionados cos residuos naturais e coa mentorización de proxectos de innovación social que promoven a dinamización dos territorios rurais a través da artesanía, o textil ou o turismo sostible. 

Licenciado en Ciencias Económicas e Empresariais, comezou a súa carreira profesional na Fundación Juana de Vega no ano 1997, e desde o ano 2005 dirixe esta entidade que ten por obxecto contribuír ao desenvolvemento do medio rural de Galicia. A súa traxectoria profesional convérteo nun especialista en temas relacionados coas problemáticas e retos dos espazos rurais. Neste eido ten participado en diversos foros, congresos, cursos, seminarios e publicado artigos en libros e revistas. Ademais, é profesor asociado da Universidade da Coruña.

Arquitecta. Cofundadora de PezEstudio, unha plataforma creativa de arquitectas ecofeminista na que desenvolve proxectos r-urbanos que promoven o impacto das persoas sobre o medioambiente e o desenvolvemento de cidades máis inclusivas e con perspectiva de xénero. É cofundadora de Inteligencias Colectivas, un proxecto aberto de investigación e deseño, así como da cooperativa de prácticas colaborativas Espacio Ucrania. Nos últimos anos realizou seminarios e talleres en universidades e programas de arquitectura e deseño a nivel nacional e internacional.

Bióloga e paisaxista. Presidiu a Asociación Española de Ingeniería del Paisaje (AEIP), lidera a Federación Europea de Bioenxeñería da Paisaxe (EFIB) e é membro do consello asesor de Política Territorial do goberno vasco. Entende a paisaxe como síntese de procesos e vivencias, á que se deben achegar, ademais da técnica, historia, beleza, sensibilidade e comprensión tanto do lugar como de quen habita o mesmo. Co seu estudio Sangalli Coronel y Asociados desenvolve proxectos nos que ecoloxía e as solucións baseadas na natureza son o centro da súa acción. 

Artesán. Após a súa graduación en Belas Artes decide crear un proxecto que aúne a súa paixón polo deseño, os oficios tradicionais e a escultura.. No ano 2018 crea o Santiago Besteiro Design, un estudio-obradoiro multidisciplinar que dedicado ao deseño, desenvolvemento e elaboración de pezas artesás de alta calidade realizadas con materiais naturais e biodegradables. No ano 2022 é seleccionado para representar a España na Bienal de Artesanía HomoFaber e recibe o Premio Nacional de Artesanía na categoría de emprendemento. 

Ceramista e artista galega. A súa práctica artística caracterízase por desdebuxar as fronteiras convencionais da cerámica expandindo as súas posibilidades en eidos como a escultura, a performance ou a danza contemporánea. No 2014 acadou a bolsa Eloy Gesto dos Premios Artesanía de Galicia e nos últimos anos realizou exhibicións individuais en institucións como a Fundación DIDAC ou no Museo Arqueolóxico da Coruña, ademais de participar en proxectos expositivos colectivos con carácter nacional e internacional.