Proxecto Lugares é unha iniciativa de pensamento contemporáneo, aprendizaxe e intervención paisaxística que se desenvolve no espazo público dunha das rutas máis transitadas en todo o mundo: o Camiño de Santiago.

O proxecto nace na primavera de 2023 a través dunhas xornadas de debate e dun taller en dous puntos específicos da ruta xacobea: Palas de Rei (Lugo), localidade situada no Camiño Primitivo, e Seadur (Larouco, Ourense), aldea próxima ao Camiño de Inverno. O obxectivo do Proxecto Lugares é expandir esta proposta e que teña continuidade até 2027, o vindeiro Ano Santo.

O proxecto desprégase nas comarcas da Ulloa e Valdeorras en catro fases de traballo ou formatos: 

1. Mediación. Proxecto Lugares desenvolve, desde febreiro de 2023, dous procesos de mediación con axentes sociais de Palas de Rei e da comarca de Valdeorras, a través de conversas ou entrevistas, coa intención de identificar, desde a proximidade, lugares, materiais e valores no territorio do Camiño, co obxectivo de poder imaxinar unha intervención de arquitectura da paisaxe sostible.
   
   

2. Seminario. O Castelo de Pambre acollerá os días 18 e 19 de abril de 2023 unhas xornadas de encontro e pensamento, na que profesionais vinculadas á arquitectura, paisaxe, deseño e artesanía abordarán cuestións vinculadas ás posibilidades de intervencións arquitectónicas, paisaxísticas e artísticas, desde unha visión sostible e contemporánea, no espazo público do Camiño de Santiago.
   
   

3. Taller. A aldea de Seadur (Larouco), na comarca ourensá de Valdeorras, acollerá un obradoiro aberto ás comunidades locais para, a través da transmisión de técnicas da arquitectura, da paisaxe, da artesanía e do deseño, imaxinar e desenvolver unha maqueta ou propotipo dunha posible intervención no espazo público.
   
   

4. Publicación. Todo o proceso do Proxecto Lugares quedará documentado cunha publicación de carácter ‘crossmedia’, na que se poderán consultar textos, conclusións, fotografías ou vídeos producidos ao longo do proceso.