1840年，噶瑪蘭族對宜蘭徙到北花蓮，頭起先建立六社，以加禮宛社的人數上濟，成做加禮宛。範圍大概是對這馬的嘉里村佮北部平原的部份。後來加禮宛社佮美崙溪南爿的撒奇萊雅族對抗大清，最後失敗而且部落去予大清霸佔，大多數人被迫愛離開，加上阿美族的勢力漸漸仔擴大，所以今仔日的嘉里村上濟的民族是阿美族。

部落族群：阿美族、噶瑪蘭族、撒奇萊雅族

※目前到遮是新城鄉原住民人口數上濟的部落

康樂村佇北埔村的北爿，北部的南三棧，因為倚新城村佮順安村，猶未興建懷恩橋進前，居民攏是用行的過溪，佮北二村佇生活上較親近。

部落族群：阿美族、太魯閣族

部落佇七星潭附近，以前稱這爿為Pacidalan代表日頭會曝會著的所在。村內的原住民有一寡是對台東來的阿美族，閣有太巴塱、馬太鞍等等部落的原住民。宗教信仰主要以天主教、基督教為主。因為村內有其他族群，祭典形式會用「聯合」的方式來辦。

部落族群：阿美族、太魯閣族、漢族

原本是屬於「大漢部落」的範圍，佇1971年的時陣興建足濟的住宅區，唌足濟的人口欲來遮蹛，形成一个單獨的部落。

部落族群：阿美族、布農族

1976年，大漢村大理石佇遮設立工廠，需要真濟人鬥相共，村裡原住民族原本干焦阿美族，工廠設立了後就有其它族群對其他所在搬徙過來。

部落族群：阿美族、太魯閣族、布農族、噶瑪蘭族

北埔村佇日本統治時代有一定的戰略地位。因為彼當時日本人佮太魯閣族人相戰，這爿就成做監視太魯閣的重點區。加禮宛事件結束了後閣有一寡撒奇萊雅族繼續蹛佇遮。

部落族群：阿美族、太魯閣族、布農族、撒奇萊雅族

民國89、90年，開墾新的路佮住宅區的興建，予一寡對台東搬來遮的族人有所在通蹛，人口數愈來愈濟就形成一个部落，村名是以彼條新路的名來號的（復興路）。

部落族群：阿美族、漢族

佳林部落是多个族群做伙生活的部落，因為村內種茄苳樹，就稱這爿為Katangka。早期是撒奇萊雅佮阿美族做伙拍獵的地區，日後因為空軍基地的設立，大多數人被迫搬徙到別位，離開家己原生的家園。

部落族群：阿美族、布農族、太魯閣族、撒奇萊雅族、漢族

1926年，恆春的漢人招阿美族的查埔來開墾，沿路經過的台東香蘭村、卑南、池上、光復、玉里、吉安.....最後做伙佇順安村來生活發展。

部落族群：阿美族

佇新城鄉上南爿，上倚花蓮市的部落。1945年，原本蹛佇花蓮市尚志路的阿美族（駁岸附近）逐年攏會受著風颱佮做大水的問題，族人開始徙到位置較懸的所在。另外一部分的人則是搬到這馬的嘉新村。

部落族群：阿美族

位置佇新城鄉上北爿、隔一條溪就是秀林鄉。部落較倚太魯閣國家公園，閣有新城火車頭、秀林國中等等的因素、唌足濟太魯閣族人來蹛，這馬新城部落內底太魯閣族比阿美族濟。

部落族群：太魯閣族、阿美族