地區的分佈

南勢阿美族

是阿美族群裡面分布上北爿的群，查埔若是通過成年禮就會當戴「羽冠」來代表勇士的身份。因為佇地緣的關係佮太魯閣族（Truku）相倚，普遍認為講是阿美族內底上「歹」的一群。範圍大概對花蓮縣新城鄉、花蓮市、吉安鄉閣有壽豐鄉。

秀姑巒阿美族

分佈佇木瓜溪以南的所在，縱谷內面主要的阿美族群體。查埔大部分是用「七彩片褲」做主要的服裝。主要分佈的地區有花蓮縣鳳林鎮、光復鄉、瑞穗鄉、玉里鎮佮富里鄉。

海岸阿美族

倚海岸山脈蹛的阿美族群，保留上完整的海神信仰（kafit）佮捕魚傳統文化。有一部分的部落因為後來噶瑪蘭族（Kavalan）佮撒奇萊雅族（Sakizaya）徙入來了後就蹛做伙矣。主要分佈的地區有花蓮縣豐濱鄉，台東縣長濱鄉、成功鎮、東河鄉。

馬蘭阿美族

台東縣主要的阿美族族群，查埔佮查某的服飾攏佮其他地區的阿美族有足明顯的無仝。主要分佈的地區有台東縣池上鄉、關山鎮、鹿野鄉、卑南鄉、台東市、太麻里鄉。

恆春阿美族

有一个講法是因為排灣族（Paiwan）佮卑南族（Puyuma）的介入，對北爿的阿美族孤立，單獨組成一群。因為較早就佮漢族接觸著，受著漢人的宗教文化影響，普遍有燒香拜拜的風俗。這馬知影的分佈範圍有屏東縣旭海部落、屏東縣牡丹鄉、滿州鄉，花蓮縣新城鄉、富里鄉，台東縣池上鄉、關山鎮、鹿野鄉。