家族歷史

逐家好，我的名號做莊承叡，阿美族的族名號做Kulang，我是花蓮的Pangcah（Amis）。

Kulang這个名稱是我的阿爸予我的，佇阿美族的語言有「芥菜」的意思，佇我生活當中嘛有一定的影響。

自細漢時，我的阿公就已經對台東徙到花蓮北部矣，阿媽的故鄉佇花蓮豐濱鄉的磯崎村（Kaluluwan）；兩人緣分黏做伙就佇花蓮生活矣。

因為我的阿公佮阿媽佇日本統治時代受著日本教育佮語言真深，講著阿美族語的機會無遐濟，大部分攏是用日語咧溝通，各種的因素造成我本人有基本的日語能力佮一寡文化認同的欠缺。

後來因為意識的改變，開始想欲用心學族語，佇高中時就開始家己咧學阿美語的路。

高中時期的啟蒙

上幸運的是我讀的高中是足重視原住民教育的重點學校。

連紲得著全國冠軍的原住民舞蹈隊、專工咧教授原住民文化智識的原住民專班、趣味的族語課程....因為遮的原因，予我感覺應該是這个時陣愛好好仔去學習家己族群的人文矣。

全學校原住民學生的人數比一般生懸，互相鬥扶持的朋友嘛愈來愈濟，佮同學做伙拍拚的過程嘛是造成我佇文化路的一个成就。

大學時期去接觸著台語

我佇台中讀大學，因為科系是咧研究本土語言佮文化的探討，特別是語言的學習，佇大學的時陣便開始我學習台語的坎站。

本身的台語能力會當講是完全攏袂曉，教授上課的時陣攏是全台語授課，規个霧煞煞，前段時間我過甲真痛苦。

後來有同學佮部落的朋友共我鬥扶持，過程起起落落，最後就順利將台語變做家己另外一个語言。後來嘛漸漸仔發現台語世界的豐沛，開始學習一寡本土的特色佮文化，予家己知影，除了原住民文化以外，對其他佇臺灣生活的族群嘛愛重視。

共消失的文化揣倒轉來

教育的普及佮全民原教的實施，少年人已經開始有想欲佮傳統文化保存的意識，其中當然嘛包括我這个「混血兒」的存在；佇大學讀冊的時陣，因為身軀邊的同學對「原住民」這个群體無啥了解，拄仔好是一个好機會予同學去學習一寡阿美族佮原住民的人文。

我的部落的斷層非常嚴重，村裡的序大佮老歲仔已經漸漸仔逝去，佳哉阿兄有組成部落的青年會，學習祭典的傳統古調、傳統服飾的製作。

這馬各位青年已經會當提mái-khuh「領唱」。