Konvent de musi
Ante anui mult, omni musi konventav e diskutav medi leplu bon gardar se kontr ataki de kat. Po ke kelk proposasioni avav esed debated, mus sapient e respekted levav se e anunsiav: „Mi pens, ke mi av proposasion, kel sertifikero future nostr sekuritet, suposante ke voi aprobero e efektuero it. Sirka kol de kat, nostr neamik, noi debero fiksar kloket, kel prekautero noi di adproksimasion de kat mediu sue tintinasion.” Audiante istkos, otr musi present aplaudav, e ili resolvav adoptar el proposasion, kuande mus ansian levav se e dikav: „Mi es in akord ko voi, ke proyekt ante noi es admirabl: ma, permitate a mi interogar: Ki fiksero kloket sirka kat?”
Farmer e serpent
Kelkunfoa durantu frigotemp, farmer truvav serpent, kel esav rigid kausu frigor. Il kompasionav it, e il plasav it kontr sue pektor. Serpent esav reanimated rapide kausu kalor e, rekomensante sue instinkti natural, it mordav sue benefasiator e fasiav a il vulner mortifikant. „O!” farmer klamav mediu sue respir final, „mi merit rekte istkos kause mi kompasionav brikon.”
Muski e mielpot
Numr de muski esav atrakted a mielpot subverted in kamr de serva, e plasante sue pedi in it, ili edav avide. Ye sie pedi deveniav tale kuvred mediu miel, ke ili no potesav usar sue ali, ni librifikar se, e ili sufokav se. Ili eksklamav moriante: „O! Noi es animali fol, kause noi av destrukted noi kausu kuantitet minim de plesir.”
Korv e sin
Korv visav sin e desirav avar et el sem plumaj bel. Suposante ke kolor blank splendid de sin aparav kausu sie lavasion in akua, in kel il flotav, Korv partav da visinitet, keloke il prendav sie aliment, e komensav residar ad lagi e stagni. Ma negligante ke il lavav sue plumi tale frekuente kuale posibl, il no potesav mutar lor kolor, e il moriav manku aliment. Mutasion de kustomi no potes mutar natur.