၂၂၃။ ဝတ္ထုတဳလပိုဉ်ဥပနန္ဒ ကောန်သၟိၚ်သာကျဝၚ်
၃၆၄။ ပ္ဍဲကာလမွဲအခိၚ် တဳလပိုဉ်ဥပနန္ဒ မဒှ်ကောန်သၟိၚ်သာကျဝၚ် ဒၠိုက်ကတဵုနူဝသ် ပ္ဍဲဍုၚ်သာရဝှ်ဒှ်တုဲ အာဘာကွာန်သၟတ်မွဲရ။ ပ္ဍဲဘာဂှ်လေဝ် ခမဳဂမၠိုၚ် မိက်ပါ်ပရအ်သ္ၚာဒှ်တုဲ ကောံဓရီုအိုတ်ရ၊ ခမဳဂမၠိုၚ်ဂှ် “ယွံကောန်တၠ ကြက်ပါ်ပရအ် သ္ၚာဂမၠိုၚ်မဒှ်ဂြပ်သၚ်ဝွံအိုတ်ရ၊ သာယျေန် သွက်ဘိုအ်ဟာ” ရဴဝွံ သၟာန်သၟုက်အိုတ်ရ။ (ဥပနန္ဒဂှ်) ယွံကောန်တၠတအ် သာယျေန်ရ ရဴဝွံ (ဟီုသ္ဂးတုဲမ္ဂး) ဂိုၚ်ကေတ် သွက်ဘိုအ်သ္ၚာ နူဘာဂှ်တုဲ အာဘာသအာၚ်မွဲပၠန်ရ။
ပ္ဍဲဘာဂှ်လေဝ် ခမဳဂမၠိုၚ် မိက်ပါ်ပရအ်သ္ၚာဒှ်တုဲ ကောံဓရီုအိုတ်ရ၊ ခမဳဂမၠိုၚ်ဂှ် “ယွံကောန်တၠတအ် ကြက်ပါ်ပရအ်သ္ၚာဂမၠိုၚ် မဒှ်ဂြပ်သၚ်ဝွံအိုတ်ရ၊ သာယျေန် သွက်ဘိုအ်ဟာ” ရဴဝွံ သၟာန်သၟုက်အိုတ်ရ။ ယွံကောန်တၠတအ် သာယျေန်ရ ရဴဝွံ (ဟီုသ္ဂးတုဲမ္ဂး) နူဘာဂှ်လေဝ် ဂိုၚ်ကေတ် သွက်ဘိုအ်သ္ၚာတုဲ အာဘာသအာၚ်မွဲပၠန်ရ။
ပ္ဍဲဘာဂှ်လေဝ် ခမဳဂမၠိုၚ် မိက်ပါ်ပရအ်သ္ၚာဒှ်တုဲ ကောံဓရီုအိုတ်ရ၊ ခမဳဂမၠိုၚ်ဂှ် “ယွံကောန်တၠတအ် ကြက်ပါ်ပရအ်သ္ၚာဂမၠိုၚ် မဒှ်ဂြပ်သၚ်ဝွံအိုတ်ရ၊ သာယျေန် သွက်ဘိုအ်ဟာ” ရဴဝွံ သၟာန်သၟုက်အိုတ်ရ။ ယွံကောန်တၠတအ် သာယျေန်ရ ရဴဝွံ (ဟီုသ္ဂးတုဲမ္ဂး) နူဘာဂှ်လေဝ် ဂိုၚ်ကေတ် သွက်ဘိုအ်သ္ၚာတုဲ ဂိုၚ်ကေတ်ဂွဳစိုတ်သ္ၚာမဇၞော်တုဲမ္ဂး မွဲလှ်ေပၠန် ကလေၚ်ကၠုၚ်ဍုၚ်သာရဝှ်ရ။
ခမဳဂမၠိုၚ် “ယွံကောန်တၠဥပနန္ဒ တၠအဲ ပိုဉ်ဇၞော်ကွေံသွံ၊ သ္ၚာဗွဲမဂၠိုၚ် ကတဵုဒှ်ကုတၠအဲရ” ရဴဝွံ သ္ဂးအိုတ်ရ။ ယွံကောန်တၠတအ် သာ်လဵု ပိုဉ်ဂွံဇၞော်ကုအဲရော? အဲ ဒၠိုက်ကတဵုနူဝသ် ပ္ဍဲဍုၚ်သာရဝှ် ဒှ်တုဲ အာဘာကွာန်သၟတ်မွဲတုဲရ။ ပ္ဍဲဘာဂှ်လေဝ် ခမဳဂမၠိုၚ် မိက်ပါ်ပရအ်သ္ၚာဒှ်တုဲ ကောံဓရီုအိုတ်ရ၊ ခမဳဂမၠိုၚ်ဂှ် “ယွံကောန်တၠ ကြက်ပါ်ပရအ် သ္ၚာဂမၠိုၚ်မဒှ်ဂြပ်သၚ်ဝွံအိုတ်ရ၊ သာယျေန် သွက်ဘိုအ်ဟာ” ရဴဝွံ သၟာန်သၟုက်အိုတ်ရ။ ယွံကောန်တၠတအ် သာယျေန်ရ ရဴဝွံ (ဟီုသ္ဂးတုဲမ္ဂး) ဂိုၚ်ကေတ် သွက်ဘိုအ်သ္ၚာ နူဘာဂှ်တုဲ အာဘာသအာၚ်မွဲပၠန်ရ။
ပ္ဍဲဘာဂှ်လေဝ် ခမဳဂမၠိုၚ် မိက်ပါ်ပရအ်သ္ၚာဒှ်တုဲ ကောံဓရီုအိုတ်ရ၊ ခမဳဂမၠိုၚ်ဂှ် “ယွံကောန်တၠ ကြက်ပါ်ပရအ် သ္ၚာဂမၠိုၚ်မဒှ်ဂြပ်သၚ်ဝွံအိုတ်ရ၊ သာယျေန် သွက်ဘိုအ်ဟာ” ရဴဝွံ သၟာန်သၟုက်အဲအိုတ်ရ။ ယွံကောန်တၠတအ် သာယျေန်ရ ရဴဝွံ (ဟီုသ္ဂးတုဲမ္ဂး) နူဘာဂှ်လေဝ် ဂိုၚ်ကေတ် သွက်ဘိုအ်သ္ၚာတုဲ အာဘာသအာၚ်မွဲပၠန်ရ။
ပ္ဍဲဘာဂှ်လေဝ် ခမဳဂမၠိုၚ် မိက်ပါ်ပရအ်သ္ၚာဒှ်တုဲ ကောံဓရီုအိုတ်ရ၊ ခမဳဂမၠိုၚ်ဂှ် “ယွံကောန်တၠ ကြက်ပါ်ပရအ် သ္ၚာဂမၠိုၚ်မဒှ်ဂြပ်သၚ်ဝွံအိုတ်ရ၊ သာယျေန် သွက်ဘိုအ်ဟာ” ရဴဝွံ သၟာန်သၟုက်အဲအိုတ်ရ။ ယွံကောန်တၠတအ် သာယျေန်ရ ရဴဝွံ (ဟီုသ္ဂးတုဲမ္ဂး) နူဘာဂှ်လေဝ် ဂိုၚ်ကေတ် သွက်ဘိုအ်သ္ၚာရ၊ အတိုၚ်သ္ဂးကၠုၚ်တုဲဝွံ သ္ၚာဗွဲမဂၠိုၚ် ကတဵုဒှ်ကုအဲရ ရဴဝွံ (သ္ဂးရ)။
ယွံကောန်တၠဥပနန္ဒ တၠအဲ သီုကဵုဒၠိုက်ကတဵုနူဝသ် ပ္ဍဲဘာမွဲသအာၚ်ဂှ် သာယျေန် သွက်ဘိုအ်သ္ၚာ ပ္ဍဲဘာမွဲသအာၚ်ဟာ ရဴဝွံ (သၟာန်သၟုက်အိုတ်ရ)။ ယွံကောန်တၠတအ် သာ်ယျေန်ဂှ် ဍာံပြရ ရဴဝွံ (သ္ဂးရ)။ ခမဳပၟိက်အောန်ဂမၠိုၚ်ဂှ် “မုဟိုတ် တဳလပိုဉ်ဥပနန္ဒ မဒှ်ကောန်သၟိၚ်သာကျဝၚ် သီုကဵုဒၠိုက်ကတဵုနူဝသ် ပ္ဍဲဘာမွဲသအာၚ်ဂှ် သာယျေန် သွက်ဘိုအ်သ္ၚာ ပ္ဍဲဘာမွဲသအာၚ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ ယွံဥပနန္ဒ တၠအဲ သီုကဵုဒၠိုက်ကတဵုနူဝသ် ပ္ဍဲဘာမွဲသအာၚ်ဂှ် သာယျေန် သွက်ဘိုအ်သ္ၚာ ပ္ဍဲဘာမွဲသအာၚ်ရ ဟီုဂှ် ဍာံပြဟာ ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။
တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တၠအဲ မုဟိုတ် သီုကဵုဒၠိုက်ကတဵုနူဝသ် ပ္ဍဲဘာမွဲသအာၚ်ဂှ် သာယျေန် သွက်ဘိုအ်သ္ၚာ ပ္ဍဲဘာမွဲသအာၚ်ရော? ယွံတြုံမလ္ၚုသၟး (နူမဂ်ဖိုလ်) (ပွတၠအဲသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ဟီုဂရိုဟ်တုဲ တွံကဵုဂလာန်ဓရ်တုဲမ္ဂး “ယွံခမဳတအ် ခမဳ မဒၠိုက်ကတဵုနူဝသ် ပ္ဍဲဘာမွဲသအာၚ်ဂှ် ဟဂပ်ဝ်သာယျေန် သွက်ဘိုအ်သ္ၚာ ပ္ဍဲဘာမွဲသအာၚ်ရ၊ ကုခမဳမသာယျေန်ဂှ် ဒးအာပတ်ဒုက္ကဋ်ရ” ရဴဝွံ သ္ဂးကဵုခမဳဂမၠိုၚ်ရ။
ပ္ဍဲကာလမွဲအခိၚ် တဳလပိုဉ်ဥပနန္ဒ မဒှ်ကောန်သၟိၚ်သာကျဝၚ် “သ္ပရဴဝွံမ္ဂး သ္ၚာဗွဲမဂၠိုၚ် ကြက်ကတဵုဒှ် ကုအဲရ” ရဴဝွံ ပၠုပ်စိုတ်တုဲ သီုကဵုဒှ်တဴညးမွဲဓဝ် ပြာပ်လုပ်ဒဂိုန် ပ္ဍဲဘာဂမၠိုၚ်ၜါဘာရ။ ပ္ဍဲအခိၚ်ဂှ် “မုရဴသာ်လဵု သွက်ဘိုအ်သ္ၚာ ကုတဳလပိုဉ်ဥပနန္ဒ ကောန်သၟိၚ်သာကျဝၚ်ရော?” ရဴဝွံ ကသပ်ဒှ်ကၠုၚ် ကုခမဳဂမၠိုၚ်ဂှ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ဩဝ်ကဵုမွဲသွက် ကုတြုံမလ္ၚုသၟး (နူမဂ်ဖိုလ်) အိုတ်ညိ၊ ယွံခမဳတအ် ပ္ဍဲသာသနာဝွံ ခမဳဂှ် “သ္ပရဴဝွံမ္ဂး သ္ၚာဗွဲမဂၠိုၚ် ကြက်ကတဵုဒှ် ကုအဲရ” ရဴဝွံ ပၠုပ်စိုတ်တုဲ သီုကဵုဒှ်တဴညးမွဲဓဝ် ပြာပ်လုပ်ဒဂိုန် ပ္ဍဲဘာဂမၠိုၚ်ၜါဘာရ။ ယဝ်ပဒတဴ ပ္ဍဲဘာမၞုံယၟုဝွံကဝက် ပ္ဍဲဘာမၞုံယၟုဝွံကဝက်မ္ဂး၊ ဂပ်ဝ်ကဵုသွက်ဘိုအ်သ္ၚာ ပ္ဍဲဘာမၞုံယၟုဝွံကဝက် ပ္ဍဲဘာမၞုံယၟုဝွံကဝက်ရ။ (ဟွံသေၚ်မ္ဂး) ယြဴပ္ဍဲဘာမွဲတုန် ပဒတဴဗွဲမဂၠိုၚ်ရ၊ နူကဵုဘာဂှ် ဂပ်ဝ်ကဵုသွက်ဘိုအ်သ္ၚာရ ရဴဝွံ (သ္ဂးရ)။
