၂၂၂။ သ္ၚာသံဃိကတဵုဒှ်
၃၆၃။ ပ္ဍဲကာလမွဲအခိၚ် ခမဳမွဲဇကု ညးမွဲဓဝ် ပြာပ်လုပ်ဒဂိုန်ရ။ မၞိဟ်ဂမၠိုၚ် “ကဵုဒါန်ကုသၚ်ရ” ရဴဝွံ သ္ဂးတုဲ ကဵုဒါန်သ္ၚာဂမၠိုၚ် ပ္ဍဲဘာဂှ်အိုတ်ရ။ ပ္ဍဲအခိၚ်ဂှ်−
“တဳလမၞုံပိုဉ်ကျာ်တြဲဂှ် ‘အောန်အိုတ်မၞုံကဵုဂကောံပန်ဇကုမှ သၚ်မ္ဂးရ’ ရဴဝွံ ပညပ်လဝ်ရ၊ အဲတုန် ဒှ်ဒၟံၚ်ညးမွဲဓဝ်ဟေၚ်ရ၊ မၞိဟ်ဂမၠိုၚ်ဝွံလေဝ် ‘ကဵုဒါန် ကုသၚ်ရ’ ရဴဝွံ သ္ဂးတုဲ ကဵုဒါန် သ္ၚာဂမၠိုၚ်အိုတ်ရ၊ အဲဂွံရၚ်တၠုၚ်ဏာ သ္ၚာဂမၠိုၚ်မဒှ်ဂြပ်သၚ်ဝွံ ဇရေၚ်ဍုၚ်သာရဝှ်မ္ဂး ခိုဟ်သန်ရ” ရဴဝွံ ကသပ်ဒှ်ကၠုၚ် ကုခမဳဂှ်ရ။ ကြဴနူဂှ် ခမဳဂှ် ဂိုၚ်ကေတ်သ္ၚာဂမၠိုၚ်တုဲ ဍုၚ်သာရဝှ်တုဲမ္ဂး ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲရ။
ယွံခမဳ သ္ၚာဂမၠိုၚ် စဵုကဵုပိုက်နုက်ကထိုန် ဒှ်သ္ၚာတၠအဲဂမၠိုၚ်ဟေၚ်ရ ရဴဝွံ (သ္ဂးရ)။ ယွံခမဳတအ် ပ္ဍဲသာသနာဝွံ ခမဳဂှ် မွဲဇကုဓဝ် ပြာပ်လုပ်ဒဂိုန်ရ။ မၞိဟ်ဂမၠိုၚ် “ကဵုဒါန် ကုသၚ်ရ” ရဴဝွံ သ္ဂးတုဲ ကဵုဒါန်သ္ၚာဂမၠိုၚ် ပ္ဍဲဘာဂှ်အိုတ်မ္ဂး။ ယွံခမဳ သ္ၚာဂမၠိုၚ်ဂှ် စဵုကဵုပိုက်နုက်ကထိုန် ကဵုအခေါၚ် ကုခမဳဂှ်ဟေၚ်ရ ရဴဝွံ (သ္ဂးရ)။
ပ္ဍဲကာလမွဲအခိၚ် ခမဳမွဲဇကု ပ္ဍဲကာလမသအာၚ်နူဂိတုဗြဲပန်ဂိတု ညးမွဲဓဝ်ပဒတဴဒၟံၚ်ရ။ မၞိဟ်ဂမၠိုၚ် “ကဵုဒါန် ကုသၚ်ရ” ရဴဝွံ သ္ဂးတုဲ ကဵုဒါန်သ္ၚာဂမၠိုၚ် ပ္ဍဲဘာဂှ်အိုတ်ရ။ ပ္ဍဲအခိၚ်ဂှ်−
“တဳလမၞုံပိုဉ်ကျာ်တြဲဂှ် ‘အောန်အိုတ်မၞုံကဵုဂကောံပန်ဇကုမှ သၚ်မ္ဂးရ’ ရဴဝွံ ပညပ်လဝ်ရ၊ အဲတုန် ဒှ်ဒၟံၚ်ညးမွဲဓဝ်ဟေၚ်ရ၊ မၞိဟ်ဂမၠိုၚ်လေဝ် ‘ကဵုဒါန် ကုသၚ်ရ’ ရဴဝွံ သ္ဂးတုဲ ကဵုဒါန် သ္ၚာဂမၠိုၚ်အိုတ်ရ၊ အဲဂွံရၚ်တၠုၚ်ဏာ သ္ၚာဂမၠိုၚ်မဒှ်ဂြပ်သၚ်ဝွံ ဇရေၚ်ဍုၚ်သာရဝှ်မ္ဂး ခိုဟ်သန်ရ” ရဴဝွံ ကသပ်ဒှ်ကၠုၚ် ကုခမဳဂှ်ရ။ ကြဴနူဂှ် ခမဳဂှ် ဂိုၚ်ကေတ်သ္ၚာဂမၠိုၚ်တုဲ ဍုၚ်သာရဝှ်တုဲမ္ဂး ဟီုလဴဗ္စ ဟိုတ်ပရူပရာဝွံ ကုခမဳဂမၠိုၚ်ရ၊ ခမဳဂမၠိုၚ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် တၞဟ်နပါ်ပရအ်ကေုာံသၚ် မဒှ်ဂတမုက် ကဵုအခေါၚ်ရ။
ယွံခမဳတအ် ပ္ဍဲသာသနာဝွံ ခမဳဂှ် ပ္ဍဲကာလမသအာၚ်နူဂိတုဗြဲပန်ဂိတု ညးမွဲဓဝ်ပဒတဴဒၟံၚ်ရ။ မၞိဟ်ဂမၠိုၚ် “ကဵုဒါန် ကုသၚ်ရ” ရဴဝွံ သ္ဂးတုဲ ကဵုဒါန်သ္ၚာဂမၠိုၚ် ပ္ဍဲဘာဂှ်အိုတ်ရ။ ယွံခမဳတအ် ခမဳဂှ် “သ္ၚာဂမၠိုၚ်ဝွံတုန် သ္ၚာအဲဂမၠိုၚ်ရ” ရဴဝွံ တၞဟ်နသှ်ပတူသ္ၚာဂမၠိုၚ် ကဵုအခေါၚ်ရ ရဴဝွံ (သ္ဂးရ)။
ယွံခမဳတအ် ကိုပ်ကၠာခမဳဂှ် ဟဂွံသှ်ပတူသ္ၚာဂှ် ယဝ်ခမဳမွဲသအာၚ် ကၠုၚ်စိုပ်မ္ဂး၊ ဂပ်ဝ်ဒးကဵုသွက်ဘိုအ် မညဳသာသၟဟ်သၟန်ရ။ ယွံခမဳတအ် ခမဳဂမၠိုၚ်ဂှ် ပါ်ပရအ်သ္ၚာဂှ်မ္ဂး ကိုပ်ကၠာထောံမာဲဟွံတုဲဏီ ယဝ်ခမဳမွဲသအာၚ် ကၠုၚ်စိုပ်မ္ဂး၊ ဂပ်ဝ်ဒးကဵု သွက်ဘိုအ်မညဳသာသၟဟ်သၟန်ရ။ ယွံခမဳတအ် ခမဳဂမၠိုၚ်ဂှ် ပါ်ပရအ်သ္ၚာဂှ်တုဲ ထောံမာဲတုဲမှ ခမဳမွဲသအာၚ် ကၠုၚ်စိုပ်မ္ဂး၊ ဟွံမိက်ကဵုမ္ဂး ဟွံဒးကဵုသွက်ဘိုအ်ရ။
ပ္ဍဲကာလမွဲအခိၚ် တဳလပိုဉ်ဣသိဒါသ ကေုာံဣသိဘဋ ထေရ်ကောဒေံဂမၠိုၚ်ၜါဇကု ဒၠိုက်ကတဵုနူဝသ် ပ္ဍဲဍုၚ်သာရဝှ်ဂမၠိုၚ်ဒှ်တုဲ အာဘာကွာန်သၟတ်မွဲအိုတ်ရ။ မှာထေရ်ဂမၠိုၚ် လအ်လမှက္ညကၠုၚ်အိုတ်ရ ရဴဝွံ ပၠုပ်စိုတ်တုဲ မၞိဟ်ဂမၠိုၚ် ကဵုပိဏ္ဍပါတ် မွဲဟာန်ကေုာံသ္ၚာအိုတ်ရ။ ခမဳပဒတဴဘာဂမၠိုၚ် “ယွံတဳလပိုဉ်တအ် သ္ၚာဂမၠိုၚ်မဒှ်ဂြပ်သၚ်ဝွံ သ္ပနိဿဲဗ္ဒာဲကဵုမှာထေရ်ဂမၠိုၚ်တုဲ ကတဵုဒှ်ကၠုၚ်အိုတ်ရ၊ မှာထေရ်ဂမၠိုၚ် သာယျေန်သွက်ဘိုအ်အိုတ်ဟာ” ရဴဝွံ သၟာန်မှာထေရ်ဂမၠိုၚ်အိုတ်ရ။ မှာထေရ်ဂမၠိုၚ် “ယွံကောန်တၠတအ် ပိုဲညးဂမၠိုၚ်တုန် တီတဴ ဓရ်အတိုၚ်တဳလမၞုံပိုဉ်ကျာ်တြဲတွံလဝ်အိုတ်ရ၊ သ္ၚာဂမၠိုၚ်ဂှ် စဵုကဵုပိုက်နုက်ကထိုန် ဒှ်သ္ၚာမၞးတအ်ညးဂမၠိုၚ်ဟေၚ်ရ” ရဴဝွံ သ္ဂးအိုတ်ရ။
ပ္ဍဲကာလမွဲအခိၚ် ခမဳဂမၠိုၚ်ပိဇကု ပြာပ်လုပ်ဒဂိုန် ပ္ဍဲဍုၚ်ရာဇဂြိုပ်အိုတ်ရ။ မၞိဟ်ဂမၠိုၚ် “ကဵုဒါန် ကုသၚ်ရ” ရဴဝွံ သ္ဂးတုဲ ကဵုဒါန်သ္ၚာဂမၠိုၚ် ပ္ဍဲဘာဂှ်အိုတ်ရ။ ပ္ဍဲအခိၚ်ဂှ်−
“တဳလမၞုံပိုဉ်ကျာ်တြဲဂှ် ‘အောန်အိုတ်မၞုံကဵုဂကောံပန်ဇကုမှ သၚ်မ္ဂးရ’ ရဴဝွံ ပညပ်လဝ်ရ၊ ပိုဲညးဂမၠိုၚ်တုန် ဒှ်ဒၟံၚ်ပိဇကုဟေၚ်အိုတ်ရ၊ မၞိဟ်ဂမၠိုၚ်လေဝ် ‘ကဵုဒါန် ကုသၚ်ရ’ ရဴဝွံ သ္ဂးတုဲ ကဵုဒါန်သ္ၚာဂမၠိုၚ်အိုတ်ရ၊ ပိုဲညးဂမၠိုၚ် မုရဴသာ်လဵု ဂွံဒ္ဂေတ်သ္ပရော?” ရဴဝွံ ကသပ်ဒှ်ကၠုၚ် ကုခမဳဂမၠိုၚ်ဂှ်ရ။
ပ္ဍဲအခိၚ်ဂှ် တဳလပိုဉ်နဳလဝါသဳ တဳလပိုဉ်သာဏဝါသဳ တဳလပိုဉ်ဂေါတက တဳလပိုဉ်ဘဂု တဳလပိုဉ် ဖဠိကသန္တာနဂမၠိုၚ် မဒှ်မှာထေရ်ဇၞော်မဂၠိုၚ်ဂၠၚ် သ္ပဒတဴဒၟံၚ် ပ္ဍဲဘာကုက္ကုဋာရာမ် ဇရေၚ်ဍုၚ်ပါဋလိပုတ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် အာဍုၚ်ပါဋလိပုတ်တုဲ သၟာန်မှာထေရ်ဂမၠိုၚ်အိုတ်ရ။
မှာထေရ်ဂမၠိုၚ် “ယွံကောန်တၠတအ် ပိုဲညးဂမၠိုၚ်တုန် တီတဴ ဓရ်အတိုၚ်တဳလမၞုံပိုဉ်ကျာ်တြဲတွံလဝ်အိုတ်ရ၊ သ္ၚာဂမၠိုၚ်ဂှ် စဵုကဵုပိုက်နုက်ကထိုန် ဒှ်သ္ၚာမၞးတအ်ညးဂမၠိုၚ်ဟေၚ်ရ” ရဴဝွံ သ္ဂးအိုတ်ရ။
