၂၂၁။ သ္ၚာမၞုံပမာဏယုတ်အိုတ်မရုမ်ဂပ်ကဵုဝိကပ္ပန
၃၅၈။ ပ္ဍဲအခိၚ်ဂှ် “သ္ၚာပိဂတှ်ေရဴဝွံကီု သ္ၚာသၞုက်ဗြဲရဴဝွံကီု သၞာနိသဳဒိုန်ရဴဝွံကီု သၞာလးတိက်ရဴဝွံကီု သ္ၚာဂရောပ်စော်ရဴဝွံကီု ယာတ်ဇိုန်မုက်ရဴဝွံကီ ယာတ်ပရိက္ခရရဴဝွံကီု သ္ၚာဂမၠိုၚ်အိုတ်သီု တဳလမၞုံပိုဉ်ကျာ်တြဲ ကဵုလဝ်အခေါၚ်ဂှ် ဒးသ္ပအဓိဋ္ဌာန်ဟာ ယာံဆဂှ်ဟွံသေၚ်မ္ဂး ဒးသ္ပဝိကပ္ပနဟာ” ရဴဝွံ ကသပ်ဒှ်ကၠုၚ် ကုခမဳဂမၠိုၚ်ရ။ ခမဳဂမၠိုၚ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲရ။ ယွံခမဳတအ် သ္ၚာပိဂတှ်ေဂှ် ကဵုအခေါၚ် တၞဟ်နပတိုန်အဓိဋ္ဌာန် တၞဟ်နစွံသီုဟွံသ္ပဝိကပ္ပနရ၊ သ္ၚာသၞုက်ဗြဲဂှ် လုကဴဂိတုဲဗြဲ တၞဟ်နပတိုန်အဓိဋ္ဌာန် လောန်ဂိတုဗြဲတုဲပ္ဍဲကြဴ တၞဟ်နသ္ပဝိကပ္ပန၊ နိသဳဒိုန်ဂှ် တၞဟ်နပတိုန်အဓိဋ္ဌာန် တၞဟ်နစွံသီုဟွံသ္ပဝိကပ္ပန၊ သၞာလးတိက်ဂှ် တၞဟ်နပတိုန်အဓိဋ္ဌာန် တၞဟ်နစွံသီုဟွံသ္ပဝိကပ္ပန၊ သ္ၚာဂရောပ်စော်ဂှ် လုကဴကာလမၞုံကဵုယဲ တၞဟ်နပတိုန်အဓိဋ္ဌာန် ယဲဗၠးတုဲပ္ဍဲကြဴ တၞဟ်နသ္ပဝိကပ္ပန၊ ယာတ်ဇိုန်မုက်ဂှ် တၞဟ်နပတိုန်အဓိဋ္ဌာန် တၞဟ်နစွံဟွံသ္ပဝိကပ္ပန၊ ပရိက္ခာရစောဠဂှ် တၞဟ်နပတိုန်အဓိဋ္ဌာန် တၞဟ်နစွံသီုဟွံသ္ပဝိကပ္ပန ကဵုအခေါၚ်ရ ရဴဝွံ (သ္ဂးရ)။
ကြဴနူဂှ် “သ္ၚာမၞုံဗၞတ်ဗ္ၜတ်ယုတ်အိုတ်ဗၞတ်လဵု ထေက်ကဵုသ္ပဝိကပ္ပနရော?” ရဴဝွံ ကသပ်ဒှ်ကၠုၚ် ကုခမဳဂမၠိုၚ်တုဲ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြရ။ ယွံခမဳတအ် သ္ၚာမၞုံဗၞတ်ဗ္ၜတ် ယုတ်အိုတ် နလပုဟ်တဲကျာ် ဇမၠိုၚ်ဒ္စာံလပုဟ်တဲ အနာံပန်လပုဟ်တဲဂှ် ကဵုအခေါၚ် တၞဟ်နသ္ပဝိကပ္ပနရ ရဴဝွံ (သ္ဂးရ)။
၃၅၉။ ပ္ဍဲကာလမွဲအခိၚ် သ္ၚာပံၚ်သုကူတဳလပိဒည်မဟာကဿပ (ဟိုတ်မနာပ်ဗၠအ်လဝ် ဒၞါဲအိုတ်တြေံဂှ်ရ) ဇြိုၚ်လောန်ဒှ်တုဲ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲရ။ ယွံခမဳတအ် ကဵုအခေါၚ် သွက်ဂွံနာပ်ဗၠအ် နကဵုတောဝ်ရ ရဴဝွံ (သ္ဂးရ)။ ဒကဴဟွံညဳဒှ်တုဲ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲရ။ ယွံခမဳတအ် တၞဟ်နကုတ်ထောံဒကဴ ကဵုအခေါၚ်ရ ရဴဝွံ (သ္ဂးရ)။ တောဝ်ဂမၠိုၚ် လကဲတိတ်ဂမၠိုၚ်ဒှ်တုဲ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲရ။ ယွံခမဳတအ် တၞဟ်နပတိုန် ဒရီုအမာတ်ဇမၠိုၚ်ကီု ဒရီုအမာတ်မနာံကီု ကဵုအခေါၚ်ရ ရဴဝွံ (သ္ဂးရ)။
ပ္ဍဲကာလမွဲအခိၚ် အာမာတ်သကိုပ်ဂမၠိုၚ် ကလှ်စှ်ေအိုတ်တုဲ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲရ။ ယွံခမဳတအ် တၞဟ်နဖျေံခဏ်တုဲဇိၚ်ဂှ် ကဵုအခေါၚ်ရ ရဴဝွံ (သ္ဂးရ)။
၃၆၀။ ပ္ဍဲကာလမွဲအခိၚ် ကုခမဳမွဲဇကု ဇိၚ်သ္ပသ္ၚာပိဂတှ်ေမ္ဂး နမရေက်ကုတ်သီုပိဂတှ်ေဂှ် ဟွံရုမ်ဟွံဂပ်ဒှ်တုဲ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲရ။ ယွံခမဳတအ် ရေက်ကုတ်သ္ၚာဂမၠိုၚ် ၜါဂတှ်ေတုဲ သွက်ဟွံရေက်ကုတ်သ္ၚာမွဲဂတှ်ေဂှ် ကဵုအခေါၚ်ရ ရဴဝွံ (သ္ဂးရ)။
ရေက်ကုတ်သ္ၚာဂမၠိုၚ် ၜါဂတှ်ေတုဲ ၜိုန်စွံလဝ် သီုဟွံရေက်ကုတ် သ္ၚာမွဲဂတှ်ေလေဝ် ဟွံရုမ်ဂပ်ပၠန်ဒှ်တုဲ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲရ။ ယွံခမဳတအ် ဟွံရေက်ကုတ်သ္ၚာဂမၠိုၚ် ၜါဂတှ်ေတုဲ သွက်ဂွံရေက်ကုတ်သ္ၚာမွဲဂတှ်ေဂှ် ကဵုအခေါၚ်ရ ရဴဝွံ (သ္ဂးရ)။ ဟွံရေက်ကုတ်သ္ၚာဂမၠိုၚ် ၜါဂတှ်ေတုဲ ၜိုန်ရေက်ကုတ်သ္ၚာမွဲဂတှ်ေလေဝ် ဟွံရုမ်ဟွံဂပ်ပၠန်ဒှ်တုဲ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲရ။ ယွံခမဳတအ် တၞဟ်နပတိုၚ်ဂၠးအာဂန္တုကဂှ် ကဵုအခေါၚ်ရ ရဴဝွံ (သ္ဂးရ)။
ယွံခမဳတအ် ဟဂပ်ဝ်ပကၚ်ရၚ် သ္ၚာမဟွံရေက်ကုတ်အလုံအိုတ်သီုရ၊ ယြဴခမဳမွဲ ပကၚ်ရၚ်မ္ဂး၊ ကုခမဳဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
၃၆၁။ ပ္ဍဲကာလမွဲအခိၚ် သ္ၚာဗွဲမဂၠိုၚ် ကတဵုဒှ်ကၠုၚ် ကုခမဳမွဲဇကုရ၊ ခမဳဂှ် မိက်ကဵုသ္ၚာကုမိမဂမၠိုၚ်ရ။ (ခမဳသအာၚ်ဂမၠိုၚ်) ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲရ။ ယွံခမဳတအ် ခမဳဂမၠိုၚ်မမိက်ကဵု ကုမိမဂမၠိုၚ်ဂှ် ပသာ်ဂွံဟီုသ္ဂးအိုတ်ရော? ယွံခမဳတအ် တၞဟ်နကဵုမိမဂမၠိုၚ် ကဵုအခေါၚ်ရ ရဴဝွံ (သ္ဂးရ)။
ယွံခမဳတအ် ဟဂပ်ဝ်ပလီုပလာ် ပစ္စယ်မၞုံကဵုသဒ္ဓါတုဲမကဵုဒါန်ရ၊ ယြဴခမဳမွဲ ပလီုပလာ်မ္ဂး၊ ကုခမဳဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
၃၆၂။ ပ္ဍဲကာလမွဲအခိၚ် ခမဳမွဲဇကု စွံပတန်လဝ် သ္ၚာ (သကိုပ်) ပ္ဍဲဂြိုပ်အန္ဓဝိုန်တုဲမ္ဂး နကဵုသပိုၚ်သ္ၚာ လုပ်ဂ္ၚေၚ်ပိဏ္ဍပါတ် အပ္ဍဲကွာန်ရ၊ ကမၠတ်ဂမၠိုၚ် ကၠတ်ဏာသ္ၚာသကိုပ်ဂှ်အိုတ်ရ၊ ခမဳဂှ် ယာတ်သ္ၚာ အောန်အာရ၊ မၞုံကဵုသ္ၚာကၠိခ္ဍက်ၚေတ်ပေတ်ရ၊ ခမဳဂမၠိုၚ် “ယွံကောန်တၠ တၠအဲ မုဟိုတ် ယာတ်သ္ၚာ အောန်အာရော? မၞုံကဵုသ္ၚာကၠိခ္ဍက်ၚေတ်ပေတ်ရော?” ရဴဝွံ သၟာန်အိုတ်ရ။
ယွံကောန်တၠတအ် အဲဍိက် စွံပတန်လဝ် သ္ၚာ (သကိုပ်) ပ္ဍဲဂြိုပ်အန္ဓဝိုန်တုဲမ္ဂး နကဵုသပိုၚ်သ္ၚာ လုပ်ဂ္ၚေၚ်ပိဏ္ဍပါတ် အပ္ဍဲကွာန်ရ၊ ကမၠတ်ဂမၠိုၚ် ကၠတ်ဏာသ္ၚာသကိုပ်ဂှ်အိုတ်ရ၊ ဟိုတ်ဂှ်ရ ယာတ်သ္ၚာ ဒးအောန်အာရ၊ မၞုံကဵုသ္ၚာကၠိခ္ဍက်ၚေတ်ပေတ်ရ ရဴဝွံ (သ္ဂးရ)။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲရ။ ယွံခမဳတအ် နအယာံမာတ်သပိုၚ်သ္ၚာ ဟဂပ်ဝ်လုပ်အပ္ဍဲကွာန်ရ၊ ကုခမဳ မလုပ်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။ ပ္ဍဲအခိၚ်ဂှ် တဳလပိုည်အာနန္ဒ ဝိုတ်အာတုဲ နအယာံမာတ်သပိုၚ်သ္ၚာ လုပ်ဂ္ၚေၚ်ပိဏ္ဍပါတ် အပ္ဍဲကွာန်ရ၊ ခမဳဂမၠိုၚ် “ယွံကောန်တၠအာနန္ဒ တဳလမၞုံပိုဉ်ကျာ်တြဲဂှ် နအယာံမာတ်သပိုၚ်သ္ၚာ ဟဂပ်ဝ်လုပ်အပ္ဍဲကွာန်ရ ရဴဝွံ ပညပ်လဝ်သိက္ခာပိုဒ်ရ ဟွံသေၚ်ဟာ၊ ယွံကောန်တၠအာနန္ဒ တၠအဲ မုဟိုတ် နအယာံမာတ်သပိုၚ်သ္ၚာ လုပ်အပ္ဍဲကွာန်ရော?” ရဴဝွံ ဟီုသ္ဂးအိုတ်ရ။ ယွံကောန်တၠတအ် “နအယာံမာတ်သပိုၚ်သ္ၚာ ဟဂပ်ဝ်လုပ်အပ္ဍဲကွာန်ရ” ရဴဝွံ တဳလမၞုံပိုဉ်ကျာ်တြဲ ပညပ်လဝ်ဂှ် ဍာံပြရ၊ ၜိုန်ဂှ် အဲဍိက် ဝိုတ်အာဒှ်တုဲ လုပ်ဒးရ ရဴဝွံ (သ္ဂးရ)။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲရ။
ယွံခမဳတအ် ဟိုတ်ပွမစွံပတန်သကိုပ်မာန်ဂမၠိုၚ်တုန် ဣဝွံမသုန်ပြကာအိုတ်ရ။ ဂိယဲလေဝ် ကဵုဒှ်၊ ဂိတုဲဗြဲလေဝ်ကဵုဒှ်၊ မိက်အာသြၚ်ကြုၚ်မွဲလပါ်လေဝ် ကဵုဒှ်၊ ဘာမၞုံကဵုသၠတြၚ် မဂြောပ်ဗ္ဒန်လေဝ် ကဵုဒှ်၊ မၞုံကဵုအထိုန်မလလးတုဲလေဝ် ကဵုဒှ်၊ ယွံခမဳတအ် ဟိုတ်ပွမစွံပတန်သကိုပ်မာန်ဂမၠိုၚ်တုန် ဣဝွံမသုန်ပြကာအိုတ်ရ။
ယွံခမဳတအ် ဟိုတ်ပွမစွံပတန်သ္ၚာ ပွမစွံပတန်သပိုၚ်မာန်ဂမၠိုၚ်တုန် ဣဝွံမသုန်ပြကာအိုတ်ရ။ ဂိယဲလေဝ်ကဵုဒှ်၊ ဂိတုဗြဲလေဝ် ကဵုဒှ်၊ မိက်အာသြၚ်ကြုၚ်မွဲလပါ်လေဝ် ကဵုဒှ်၊ ဘာမၞုံကဵုသၠတြၚ် မဂြောပ်ဗ္ဒန်လေဝ် ကဵုဒှ်၊ မၞုံကဵုအထိုန်မလလးတုဲလေဝ် ကဵုဒှ်၊ ယွံခမဳတအ် ဟိုတ်ပွမစွံပတန်သ္ၚာ ပွမစွံပတန်သပိုၚ်မာန်ဂမၠိုၚ်တုန် ဣဝွံမသုန်ပြကာအိုတ်ရ။
ယွံခမဳတအ် ဟိုတ်ပွမစွံပတန်သ္ၚာသၞုက်ဗြဲမာန်ဂမၠိုၚ်တုန် ဣဝွံမသုန်ပြကာအိုတ်ရ။ ဂိယဲလေဝ်ကဵုဒှ်၊ မိက်အာမ္ၚးသိမ်လေဝ်ကဵုဒှ်၊ မိက်အာသြၚ်ကြုၚ်မွဲလပါ်လေဝ် ကဵုဒှ်၊ ဘာမၞုံကဵုသၠတြၚ် မဂြောပ်ဗ္ဒန်လေဝ် ကဵုဒှ်၊ ဟွံဂွံဇိၚ်သ္ၚာသၞုက်ဗြဲဏီကီုကဵုဒှ် ဇိၚ်ဟွံတုဲဏီကီုကဵုဒှ်၊ ယွံခမဳတအ် ဟိုတ်ပွမစွံပတန်သ္ၚာသၞုက်ဗြဲမာန်ဂမၠိုၚ်တုန် ဣဝွံမသုန်ပြကာအိုတ်ရ ရဴဝွံ (သ္ဂးရ)။
