ပိဋကတ်ပိ ဘာသာမန် - ၂၂၀။ ကဵုအခေါၚ်မပ္တံသၞာနိသဳဒိုန်

၂၂၀။ ကဵုအခေါၚ်မပ္တံသၞာနိသဳဒိုန်

၃၅၃။ ပ္ဍဲကာလမွဲအခိၚ် ခမဳဂမၠိုၚ် သ္ပပြဘိုဂ် ဘောဇိုန်မပြဲပြဲဂမၠိုၚ်တုဲမ္ဂး သတိမဗၠးကီု သီုဟွဴမွဲပွမဗ္စာရဏာ အာစိုပ်ပွမတိက်လှိၚ်အိုတ်ရ။ ကုခမဳဂမၠိုၚ် သတိဗၠးကီု ဟီုဟွံမွဲပွမဗ္စာရဏာ အာစိုပ်ပွမတိက်လှိၚ်ဂှ် နမတိတ်လ္ပအ်ညာတ် သုက်သၠောတ်တိတ်ရ၊ သၞာသတိက်သၞာဒၟံၚ် ကၠေဝ်ဗာန်ဒၟံၚ်သုက်ရ။ ပ္ဍဲအခိၚ်ဂှ် တဳလမၞုံပိုည်ကျာ်တြဲ မွဲဟာန်ကေုာံတဳလပိုဉ်အာနန္ဒ မဒှ်ခမဳဗွက်ကြဴ ဂေတ်ဂ္ၚေၚ်လၟေၚ်ဘာမ္ဂး ညာတ်ဒး သၞာသတိက်သၞာဒၟံၚ် ကၠေဝ်ဗာန်ဒၟံၚ်သုက်တုဲ “ယွံအာနန္ဒ သၞာသတိက်သၞာဒၟံၚ်ဝွံ ကၠေဝ်ဗာန်ဒၟံၚ် နကဵုမုရော?” ရဴဝွံ သၟာန်တဳလပိုဉ်အာနန္ဒရ။

ယွံတဳလမၞုံပိုဉ် ပ္ဍဲအခိၚ်လၟုဟ် သ္ပပြဘိုဂ် ဘောဇိုန်မပြဲပြဲဂမၠိုၚ်တုဲမ္ဂး ကုခမဳဂမၠိုၚ် သတိမဗၠးကီု သီုဟွံမွဲပွမဗ္စာရဏာ အာစိုပ်ပွမတိက်လှိၚ်ဂှ် နမတိတ်လ္ပအ်ညာတ် ဟိုတ်နူသုက်သၠောတ်တိတ်ဂှ်ရ သၞာသတိက်သၞာဒၟံၚ်ဂှ် ကၠေဝ်ဗာန်ဒၟံၚ်သုက်ရ ရဴဝွံ (ဂရၚ်ပတီရ)။

ယွံအာနန္ဒ ဂလာန်ဂှ် ဍာံပြအတိုၚ်ဟီုဂှ်ရ၊ ယွံအာနန္ဒ ဂလာန်ဂှ် ဍာံပြအတိုၚ်ဟီုဂှ်ရ၊ ယွံအာနန္ဒ ကုခမဳဂမၠိုၚ် သတိမဗၠးကီု သီုဟွံမွဲပွမဗ္စရဏာ အာစိုပ်ပွမတိက်လှိၚ်ဂှ် နမတိက်လ္ပအ်ညာတ် သုက်သၠောတ်တိတ်ရ။ ယွံအာနန္ဒ ကုခမဳဂမၠိုၚ် သတိပြာကဋ်ပၠ သ္ပဗွမဗ္စာရဏာ အာစိုပ်ပွမတိက်လှိၚ်ဂှ် နမတိတ်လ္ပအ်ညာတ် သုက်ဟွံသၠောတ်တိတ်ရ။ ယွံအာနန္ဒ ကုပုထုဇန်ဂမၠိုၚ် မဒှ်အထိုက်ဒတန်ဟွံထၞေန်စပ် ပ္ဍဲကာမဂုဏ်ဂမၠိုၚ်လေဝ် သုက်ဟွံသၠောတ်တိတ်ရ။ ယွံအာနန္ဒ ကုတၠအရှန် ဟိုတ်အခေါၚ်အရာ သုက်သၠောတ်တိတ် ဟွံမွဲဟေၚ်ရ ရဴဝွံ (သ္ဂးရ)။

ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုည်ကျာ်တြ တွံကဵုဂလာန်ဓရ်တုဲမ္ဂး “ယွံခမဳတအ် ပ္ဍဲအခိၚ်လၟုဟ် အဲကျာ် မွဲဟာန်ကေုာံအာနန္ဒ မဒှ်ခမဳဗွက်ကြဴ ဂေတ်ဂ္ၚေၚ်လၟေၚ်ဘာမ္ဂး ညာတ်ဒး သၞာသတိက်သၞာဒၟံၚ် ကၠေဝ်ဗာန်ဒၟံၚ်သုက်တုဲ “ယွံအာနန္ဒ သၞာသတိက်သၞာဒၟံၚ်ဝွံ ကၠေဝ်ဗာန်ဒၟံၚ် နကဵုမုရော?” ရဴဝွံ သၟာန်ကၠုၚ်အာနန္ဒတုဲရ။

ယွံခမဳတအ် ဒုသ် ခမဳ သတိမဗၠးကီု သီုဟွံမွဲပွမဗ္စာရဏာ အာစိုပ်ပွမတိက်လှိၚ်ဂမၠိုၚ် ဣဝွံ မသုန်ပြကာအိုတ်ရ။ ဂွံတိက်ဗွဲဒဒိုခ်ရ၊ ဂွံၚုဟ်ဗွဲဒဒိုခ်ရ၊ လ္ပအ်ညာတ် လ္ပအ်ဟွံခိုဟ်ရ၊ ဒေဝတဴဂမၠိုၚ် ဟွံမၚ်မွဲအိုတ်ရ၊ သုက်လေဝ်ဗၠးတိက်ရ။ ယွံခမဳတအ် ဒုသ်ခမဳ သတိဗၠးကီု သီုဟွံမွဲပွမဗ္စာရဏာ အာစိုပ်ပွမတိက်လှိၚ်ဂမၠိုၚ် ဣဝွံ မသုန်ပြကာအိုတ်ရ။

ယွံခမဳတအ် ဖဵုခမဳသတိပြာကဋ်ပၠ သ္ပပွမဗ္စာရဏာ အာစိုပ်ပွမတိက်လှိၚ်ဂမၠိုၚ် ဣဝွံ မသုန်ပြကာအိုတ်ရ။ ဂွံတိက်ဗွဲတသိုခ်ရ၊ ဂွံၚုဟ်ဗွဲတသိုခ်ရ၊ ဟွံလ္ပအ်ညာတ် လ္ပအ်ဟွံခိုဟ်ရ။ ဒေဝတဴဂမၠိုၚ် မၚ်မွဲအိုတ်ရ၊ သုက်ဟွံဗၠးတိတ်ရ။ ယွံခမဳတအ် ဖဵုခမဳသတိပြကာဋ်ပၠ သ္ပပွမဗ္စာရဏာ အာစိုပ်ပွမတိက်လှိၚ်ဂမၠိုၚ် ဣဝွံ မသုန်ပြကာအိုတ်ရ။

ယွံခမဳတအ် တၞဟ်နပွမကဵုဂြောပ်ဗ္ဒန်ဇကု တၞဟ်နပွမကဵုဂြောပ်ဗ္ဒန်သ္ၚာ တၞဟ်နပွမကဵုဂြောပ်ဗ္ဒန်သၞာသတိက်သၞာဒၟံၚ် ကဵုအခေါၚ် သၞာနိသဳဒိုန်ရ ရဴဝွံ (သ္ဂးရ)။ ပ္ဍဲအခိၚ်ဂှ် သၞာနိသဳဒိုန် မဍောတ်လောန်ဂှ် ကဵုဂြောပ်ဗ္ဒန်သၞာသတိက်သၞာဒၟံၚ်အလုံအိုတ်သီု ဟွံမာန်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲရ။ ယွံခမဳတအ် ကဵုအခေါၚ် တၞဟ်နခၞံသၞာလးတိက် မဇၞော်ၜိုတ်နွံပၟိက်ရဴ ရဴဝွံ (သ္ဂးရ)။

၃၅၄။ ပ္ဍဲကာလမွဲအခိၚ် ကုတဳလပိုဉ်ဗေလဋ္ဌသဳသ မဒှ်အ္စာဥပဇ္ၛာယ် တဳလပိုဉ်အာနန္ဒဂှ် ဒှ်ဒၟံၚ်ယဲစော်ဇၞော်ရ၊ နကဵုဇၜိုတ်ဆီပတိုဟ်သရ သ္ၚာဂမၠိုၚ် ကာတ်ဗာန်ဒၟံၚ် ပ္ဍဲဇကုအိုတ်ရ၊ သ္ၚာဂမၠိုၚ်ဂှ် ခမဳဂမၠိုၚ် ဖ္ဍုက်ကဵုဖ္ဍုက်ကဵု နကဵုဍာ်တုဲ (ဆာပ်ဍာ်တုဲ) ခွါကယျာအိုတ်ရ။ တဳလမၞုံပိုဉ်ကျာ်တြဲ ဂေတ်ဂ္ၚေၚ်ဒေသစာရိတ်လၟေၚ်ဘာမ္ဂး ညာတ်ဒး ခမဳဂမၠိုၚ်ဂှ် ဖ္ဍုက်ကဵုဖ္ဍုက်ကဵု နကဵုဍာ်တုဲ (ဆာပ်ဍာ်တုဲ) ခွါကယျာပတိတ်ဒၟံၚ် သ္ၚာဂမၠိုၚ်ဂှ်တုဲ ပြာပ်အာဇရေၚ်ခမဳဂမၠိုၚ်တုဲမ္ဂး “ယွံခမဳတအ် ယဲခမဳဝွံတုန် မုယဲဂှ်ရော?” ရဴဝွံ (သၟာန်ရ)။

ယွံတဳလမၞုံပိုဉ် ယဲတဳလပိုဉ်ဝွံတုန် ယဲစော်ဇၞော်ရ၊ နကဵုဇၜိုတ်ဆီပတိုဟ် သ္ၚာဂမၠိုၚ် ကာတ်ဗာန်ဒၟံၚ် ပ္ဍဲဇကုအိုတ်ရ၊ သ္ၚာဂမၠိုၚ်ဂှ် ပိုဲဍိက်တအ်ညးဂမၠိုၚ် ဖ္ဍုက်ကဵုဖ္ဍုက်ကဵု နကဵုဍာ်တုဲ (ဆာပ်ဍာ်တုဲ) ခွါကယျာအိုတ်ရ၊ ရဴဝွံ (ဂရၚ်ပတီအိုတ်ရ)။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲမ္ဂး “ယွံခမဳတအ် ယြဴကုခမဳမွဲ ယဲသၞော်ကီု ယဲကတောတ် ခ္ဍတ်မြန်ဗြိုအ်မာကီု ယဲဍာ်သရာဇွောဝ်ကီု ယဲစော်ဇၞော်ကီု နွံမ္ဂး၊ (ကုခမဳဂှ်) ကဵုအခေါၚ် သ္ၚာဂရောပ်စော်ရ” ရဴဝွံ သ္ဂးကဵုခမဳဂမၠိုၚ်ရ။

၃၅၅။ ပ္ဍဲအခိၚ်ဂှ် ဝိသာခါမၞုံယၟုမိဂါရမာတာ ဂိုၚ်ကေတ်နၚ်ယာတ်ဇိုတ်မုက်တုဲ ပြာပ်ကၠုၚ်ဇရေၚ် တဳလမၞုံပိုဉ်ကျာ်တြဲတုဲမ္ဂး လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲ သီုမဂဇအ်ဒၟံၚ်ပ္ဍဲဒၞါဲမွဲဂှ် “ယွံတဳလမၞုံပိုဉ် တဳလမၞုံပိုဉ်ကျာ်တြဲ ဩဝ်ဒုၚ်ဂိုၚ်ကေတ် ယာတ်ဇိုတ်မုက် အဲဍိက်ညိ၊ ပွမဒုၚ်ဂိုၚ်ကေတ်သာ်ဂှ် လုကဴကာလဗ္တံတ္ၚဲမဂၠိၚ်သ္ၚောဲ ကြက်ဒှ်တၞဟ်နဒတုဲမြမောဝ် တသိုခ်ကုအဲဍိက်ရ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။ တဳလမၞုံပိုဉ်ကျာ်တြဲ ဒုၚ်ဂိုၚ်ကေတ်ယာတ်ဇိုတ်မုက်ရ။ ကြဴနူဂှ် နကဵုဂလာန်ဓရ် တဳလမၞုံပိုဉ်ကျာ်တြဲ ကဵုဝိသာခါမၞုံယၟုမိဂါရမာတာ တီညာတ်ကေတ် (ဒတုဲဖဵုမြမောဝ်) ကဵုဒဂိုန်ဂိုၚ်ကေတ် (ဓရ်) (သွက်ဂွံဒ္ဂေတ်ဓရ်) ကဵုသကေက်သကာ ကဵုမြဟ်မြာရ။

ပ္ဍဲအခိၚ်ဂှ် ဝိသာခါမၞုံယၟုမိဂါရမာတာဂှ် နကဵုဂလာန်ဓရ် တဳလမၞုံပိုဉ်ကျာ်တြဲ ကဵုတီညာတ်ကေတ် (ဒတုဲဖိုလ်မြမောဝ်) ကဵုဒဂိုန်ဂိုၚ်ကေတ် (ဓရ်) (သွက်ဂွံဒ္ဂေတ်ဓရ်) ကဵုသကေက်သကာ ကဵုမြဟ်မြာတုဲမ္ဂး ဒၠိုက်ကတဵုနူဒၞါဲ လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲမ္ဂး သ္ပရှ်ေသှ်ေရဴဂဴကၠာစ္ဍးအာရ။ ကြဴနူဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲမ္ဂး “ယွံခမဳတအ် ကဵုအခေါၚ် ယာတ်ဇိုတ်မုက်ရ” ရဴဝွံ သ္ဂးကဵုခမဳဂမၠိုၚ်ရ။

၃၅၆။ ပ္ဍဲအခိၚ်ဂှ် သၟိၚ်မလ္လမၞုံယၟုရောဇ ဒှ်မိတ်သဟာဲ တဳလပိုဉ်အာနန္ဒရ၊ ယာတ်တြေံကတဵုဒှ်ခေါမရး သၟိၚ်မလ္လမၞုံယၟုရောဇဂှ် အပ်စွံလဝ် ပ္ဍဲတဲတဳလပိုဉ်အာနန္ဒရ၊ ကုတဳလပိုဉ်အာနန္ဒလေဝ် နွံပၟိက်ကဵုယာတ်တြေံကတဵုဒှ်ခေါမရးရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲရ။ ယွံခမဳတအ် ကုခမဳမဍိုက်ပေၚ်တဴကေုာံအၚ်္ဂဂမၠိုၚ်မသုန်သာ်ဂှ် ကဵုအခေါၚ် တၞဟ်နဂိုၚ်ကေတ် ဗွဲမဍုက်ကေဝ်ဒဒှ်ေဒယှ်ရ။ မိတ်သဟာဲမကေၚ်ညာတ်လေဝ်ဒှ်မ္ဂး၊ ဃောဂျိုၚ်လမျီုလေဝ်ဒှ်မ္ဂး၊ “အဲဂိုၚ်ကေတ်မ္ဂး ကြက်ဒှ်ပွမမိပ်စိုတ်အိုဟ်တၟိုဟ်ရ” ရဴဝွံလေဝ် တီမ္ဂး။ ယွံခမဳတအ် ကုခမဳမဍိုက်ပေၚ်တဴကေုာံအၚ်္ဂဂမၠိုၚ်မသုန်သာ်ဝွံ ကဵုအခေါၚ် တၞဟ်နဂိုၚ်ကေတ် ဗွဲမဍုက်ကေဝ်ဒဒှ်ေဒယှ်ရ ရဴဝွံ (သ္ဂးရ)။

၃၅၇။ ပ္ဍဲကာလမွဲအခိၚ် သ္ၚာပိဂတှ်ေ ဍိုၚ်ပေၚ်တဴ ကုခမဳဂမၠိုၚ်ရ၊ နွံပၟိက်ကဵုယာတ်ခ္ဍိုဟ်ဍာ်ဂမၠိုၚ်ကီု ထိုၚ်ဂမၠိုၚ်ကီုရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲရ။ ယွံခမဳတအ် ကဵုအခေါၚ် ယာတ်ခ္ဍိုဟ်ဍာ်ဂမၠိုၚ်ကီု ထိုၚ်ဂမၠိုၚ်ကီုရ ရဴဝွံ (သ္ဂးရ)။