၂၁၉.၂။ လာဘ်ဝိသာခါ ဒ္စာံသာ်
(၁) ယွံတဳလမၞုံပိုဉ် အဲဍိက် စဵုကဵုလအိတ်လမျီု မိက်ဂွံကဵုဒါန် သ္ၚာသၞုက်ဗြဲ ကုသၚ်ရ။ (၂) မိက်ဂွံကဵုဒါန် ပိဏ္ဍပါတ် ကုခမဳကၟုဲအာဂန္တုကဂမၠိုၚ်ရ။ (၃) မိက်ဂွံကဵုဒါန် ပိဏ္ဍပါတ် ကုခမဳကွာ်တရဴဂမၠိုၚ်ရ။ (၄) မိက်ဂွံကဵုဒါန် ပိဏ္ဍပါတ် ကုခမဳဂိယဲဂမၠိုၚ်ရ။ (၅) မိက်ဂွံကဵုဒါန် မိဏ္ဍပါတ် ကုခမဳကၠောန်ၜိုတ်ညးဂိယဲဂမၠိုၚ်ရ။ (၆) မိက်ဂွံကဵုဒါန် ဂဥုဲ ကုခမဳဂိယဲဂမၠိုၚ်ရ။ (၇) မိက်ဂွံကဵုဒါန် ယာဂုလၟိုန်ဒမၠိရ။ (၈) မိက်ဂွံကဵုဒါန် သၞုက်ဍာ် ကုဘိက္ခုနဳသၚ်ရ ရဴဝွံ (ဂရၚ်ပတီရ)။
ယွံဝိသာခါ တၠအဲ ညာတ်ကေတ် ဒတုဲဖဵုတၟေၚ်ဗွဲမ္ဒးရး သာ်လဵုတုဲ အာတ်လာဘ်ဒ္စာံသာ် ကုအဲကျာ်ရော? ရဴဝွံ (သၟာန်ရ)။ ယွံတဳလမၞုံပိုဉ် အဲဍိက် ပ္ဍဲအခိၚ်လၟုဟ် “ဟာဲဍိက်ဗြဴ ဩဝ်အာညိ၊ အာ အာရှာမ်ဘာတုဲ ယွံတဳလမၞုံပိုဉ် ဒးအခိၚ်ရ၊ ပဠေဝ်လဝ် ပိဏ္ဍပါတ်တုဲရ” ရဴဝွံ ဩဝ်ဂရၚ်ပတီ အခိၚ်ကဵုပိုန် (ကုတဳလမၞုံပိုဉ်ကျာ်တြဲ) ညိ” ရဴဝွံ ဖအောဝ်ဗလးဏာ ဍိက်ဗြဴရ။ ယွံတဳလမၞုံပိုဉ် ပ္ဍဲအခိၚ်ဂှ် ဍိက်ဗြဴဂှ် အာ အာရှာမ်ဘာမ္ဂး ညာတ်ဒး ခမဳဂမၠိုၚ် ဖျေံလဝ်သ္ၚာဂမၠိုၚ်ဒှ်တုဲ ဒုၚ်ဍာ်ဗြဲဇကုအိုတ်တုဲ “ပ္ဍဲအာရှာမ်ဘာ ခမဳဂမၠိုၚ် ဟွံမွဲအိုတ်ရ၊ အာဇဳဝကဂမၠိုၚ် ဒုၚ်ဍာ်ဗြဲဇကုအိုတ်ရ” ရဴဝွံ (သမ္တီထေၚ်ကေတ်တုဲ) ကၠုၚ်ဇရေၚ် အဲဍိက်တုဲမ္ဂး “ယွံနာဲဗြဴ ပ္ဍဲအာရှာမ်ဘာ ခမဳဂမၠိုၚ် ဟွံမွဲအိုတ်ရ၊ အာဇဳဝကဂမၠိုၚ် ဒုၚ်ဍာ်ဗြဲ ဇကုအိုတ်ရ” ရဴဝွံ သ္ဂးကဵုအဲဍိက်ရ။
ယွံတဳလမၞုံပိုဉ် ပွမဂၞံၚ်ဂၞါတ်ဇကုပြဲ ဟွံမွဲကဵုယာတ်ဂှ် ဟွံသအးဇ္ၚးရ၊ ထေက်ကဵုက္ဍုဟ်မၠေံ ထေက်ကဵုဇအိုတ်ဇရရ။ ယွံတဳလမၞုံပိုဉ် အဲဍိက် ညာတ်ကေတ်ဖဵုဝွံ ဗွဲမ္ဒးရးဒှ်တုဲ စဵုကဵုလအိတ်လမျီု မိက်ဂွံကဵုဒါန် သ္ၚာသၞုက်ဗြဲ ကုသၚ်ရ။ ယွံတဳလမၞုံပိုဉ် သအာၚ်နူဂှ်လေဝ် ခမဳမဒှ်ကၟုဲ အာဂန္တုကဂှ် ဟွံစဳကၠးဆိုက်ဗ္ဒက် ဂၠံၚ်တရဴဒှ်တုဲ ဟွံတီသ္ၚိဂပ်ဝ်ဒုၚ်ပိဏ္ဍပါတ် မဟဂပ်ဝ်ဒုၚ်ပိဏ္ဍပါတ်တုဲ ဒးဂ္ၚေၚ်ပိဏ္ဍပါတ် သီုမဒှ်လၟောၚ်ဍောၚ်ၜိုတ်ရ၊ ခမဳကၟုဲအာဂန္တုကဂှ် ကဵုပိုဉ်ပိဏ္ဍပါတ် မကဵုဒါန်ကုကၟုဲဂမၠိုၚ် အဲဍိက်တုဲမှ တီဂၠံၚ်တရဴဒှ်တုဲ တီသ္ၚိဂပ်ဝ်ဒုၚ်ပိဏ္ဍပါတ် မဟဂပ်ဝ်ဒုၚ်ပိဏ္ဍပါတ်တုဲ ကြက်ဂွံဂ္ၚေတ်ပိဏ္ဍပါတ် သီုဟွံဒှ်လၟောၚ်ဍောၚ်ၜိုတ်ရ။ ယွံတဳလမၞုံပိုဉ် အဲဍိက် ညာတ်ကေတ်ဖဵုဝွံ ဗွဲမ္ဒးရးဒှ်တုဲ စဵုကဵုလအိတ်လမျီု နွံပၟိက် သွက်ဂွံကဵုဒါန်ပိဏ္ဍပါတ် ကုခမဳသၚ်အာဂန္တုကရ။
ယွံတဳလမၞုံပိုဉ် သအာၚ်နူဂှ်လေဝ် ခမဳမကွာ်တရဴဂှ် ဒးဂၠာဲသ္ၚေဝ်ပိဏ္ဍပါတ်ဇကုမ္ဂး နူသကအ်ရဲ ညးဗၞိက်လေဝ် ကြက်သှ်ေၜက်အာရ၊ ပ္ဍဲဟွံသေၚ်ကဵုအခိၚ်လေဝ် ကြက်အာစိုပ် ဘာမမိက်အာရ၊ ကြက်ဒးအာတရဴအဓာန် ဗွဲမဍောၚ်ၜိုတ်ရ။ ခမဳဂှ် ကဵုပိုဉ်ပိဏ္ဍပါတ် မကဵုဒါန် ကုခမဳကွာ်တရဴဂမၠိုၚ် အဲဍိက်တုဲမှ အာမ္ဂး နူသကအ်ရဲညးဗၞိက်လေဝ် ကြက်ဟွံသှ်ေၜက်အာရ၊ ပ္ဍဲအခိၚ်လေဝ် ကြက်အာစိုပ် ဘာမမိက်အာရ၊ ကြက်ဂွံအာတရဴအဓာန် သီုဟွံဍောၚ်ၜိုတ်မာန်ရ။ ယွံတဳလမၞုံပိုည် အဲဍိက် ညာတ်ကေတ်ဖဵုဝွံ ဗွဲမ္ဒးရးဒှ်တုဲ စဵုကဵုလအိတ်လမျီု နွံပၟိက် သွက်ဂွံကဵုဒါန်ပိဏ္ဍပါတ် ကုခမဳသၚ်ကွာ်တရဴရ။
ယွံတဳလမၞုံပိုဉ် သအာၚ်နူဂှ်လေဝ် ကုခမဳမဂိယဲဂှ် ဟိုတ်မဟွံကလိဂွံ ဘောဇိုန်ဂမၠိုၚ် မဗဗွဲသပ္ပါယ်ဂှ်ရ ယဲလေဝ် ကြက်ဂၠိုၚ်တိုန်ရ၊ ပွမဒးချိုတ်လေဝ် ကြက်ဒှ်ရ။ ကုခမဳမဂွံကဵုပိုဉ်ပိဏ္ဍပါတ် မကဵုဒါန်ကုခမဳဂိယဲဂမၠိုၚ် အဲဍိက်ဂှ် ယဲလေဝ် ကြက်ဟွံဂၠိုၚ်တိုန်ရ၊ ပွမဒးချိုတ်လေဝ် ကြက်ဟွံဒှ်ရ။ ယွံတဳလမၞုံပိုဉ် အဲဍိက် ညာတ်ကေတ်ဖဵုဝွံ ဗွဲမ္ဒးရးဒှ်တုဲ စဵုကဵုလအိတ်လမျီု နွံပၟိက် သွက်ဂွံကဵုဒါန်ပိဏ္ဍပါတ် ကုခမဳသၚ်ဂိယဲရ။
ယွံတဳလမၞုံပိုဉ် သအာၚ်နူဂှ်လေဝ် ခမဳကၠောန်ၜိုတ်ညးဂိယဲဂှ် ဒးဂၠာဲသ္ၚေဝ်ပိဏ္ဍပါတ်ဇကုမ္ဂး တ္ၚဲသၠုၚ်မှ ကြက်ရၚ်တၠုၚ်ဏာ ပိဏ္ဍပါတ်ခမဳဂိယဲရ၊ ကြက်ပိုဉ်သကုတ်ရ၊ ခမဳကၠောန်ၜိုတ်ညးဂိယဲဂှ် ဂွံကဵုပိုဉ်ပိဏ္ဍပါတ် မကဵုဒါန်ကုခမဳကၠောန်ၜိုတ်ညးဂိယဲဂမၠိုၚ် အဲဍိက်မ္ဂး ကြက်ရၚ်တၠုၚ်ပိဏ္ဍပါတ် ခမဳဂိယဲပြဟ်ပြဟ်မာန်ရ၊ ကြက်ဟွံဒှ်ပိုဉ်သကုတ်ရ။ ယွံတဳလမၞုံပိုဉ် အဲဍိက် ညာတ်ကေတ်ဖဵုဝွံ ဗွဲမ္ဒးရးဒှ်တုဲ စဵုကဵုလအိတ်လမျီု နွံပၟိက် သွက်ဂွံကဵုဒါန်ပိဏ္ဍပါတ် ကုခမဳသၚ်ကၠောန်ၜိုတ်ညးဂိယဲရ။
ယွံတဳလမၞုံပိုဉ် သအာၚ်နူဂှ်လေဝ် ကုခမဳမဂိယဲဂှ် ဟိုတ်မဟွံကလိဂွံ ဂဥုဲဂမၠိုၚ် မဗဗွဲသပ္ပါယ်ရ ယဲလေဝ် ကြက်ဂၠိုၚ်တိုန်ရ၊ ပွမဒးချိုတ်လေဝ် ကြက်ဒှ်ရ။ ကုခမဳမဂွံပြဘိုဂ်ဂဥုဲမကဵုဒါန် ကုခမဳဂိယဲဂမၠိုၚ် အဲဍိက်ဂှ် ယဲလေဝ် ကြက်ဟွံဂၠိုၚ်တိုန်ရ၊ ပွမဒးချိုတ်လေဝ် ကြက်ဟွံဒှ်ရ။ ယွံတဳလမၞုံပိုဉ် အဲဍိက် ညာတ်ကေတ်ဖဵုဝွံ စဵုကဵုလအိတ်လမျီု နွံပၟိက် သွက်ဂွံကဵုဒါန်ဂဥုဲ ကုခမဳသၚ်ဂိယဲရ။
ယွံတဳလမၞုံပိုဉ် သအာၚ်နူဂှ်လေဝ် နမညာတ်ကေတ်ဖဵုဂမၠိုၚ်စှ်သာ် တဳလမၞုံပိုဉ်ကျာ်တြဲ ကဵုအခေါၚ်ယာဂု ပ္ဍဲဍုၚ်အန္ဓကဝိန္ဒရ၊ ယွံတဳလမၞုံပိုဉ် အဲဍိက် ညာတ်ကေတ်ဖဵုဂမၠိုၚ်စှ်သာ်ဂှ် ဗွဲမ္ဒးရးဒှ်တုဲ စဵုကဵုလအိတ်လမျီု နွံပၟိက် သွက်ဂွံကဵုဒါန်ယာဂုလၟိုန်ဒမၠိ ကုခမဳသၚ်ရ။
ယွံတဳလမၞုံပိုဉ် ပ္ဍဲသာသနာဝွံ ခမဳဗြဴဂမၠိုၚ် သီုမဂၞံၚ်ဂၞါတ်ဇကုသၟး (ဟွံမွဲကဵုဗွိုက်လတက်) ဟုမ်ဍာ် ပ္ဍဲကြုၚ်အစိရဝတဳ မွဲဟာန်ကေုာံ ဗြဴစရာဲဍုၚ်ဂမၠိုၚ် ပ္ဍဲမွဲသၞေဟ်ဓဝ်အိုတ်ရ။ ယွံတဳလမၞုံပိုဉ် ဗြဴစရာဲဍုၚ်ဂမၠိုၚ်ဂှ် “ယွံနာဲဗြဴတအ် နပွမဒ္ဂေတ်တဴဒ္ဂေတ်မပြဲ ကုနာဲဗြဴတအ်ညးဂမၠိုၚ် မဒှ်ညးအဝယ် ဍောတ်သွတ်ဂှ် မုဖဵုမၞုံရော? ထေက်ကဵုဒုၚ်စသိုၚ်တသိုခ်ကာမဂုဏ်ရ ဟွံသေၚ်ဟာ၊ ပ္ဍဲအခိၚ်မဗျုထဴတေံ ကြက်သ္ဒးဒ္ဂေတ်လ္ၚတ် ဒ္ဂေတ်မပြဲအိုတ်ရ၊ ဒ္ဂေတ်တဴရဴဝွံမ္ဂး ကုမၞးတအ်ညးဂမၠိုၚ် သ္ဂောံသီထ္ၜောဝ်ကေတ် ဒတုဲဖဵုဂမၠိုၚ်ၜါပြကာအိုတ်ရ” ရဴဝွံ သ္ပဂရိုၚ်စရဵုဟီုဗျံက် ခမဳဗြဴဂမၠိုၚ်အိုတ်ရ။
ယွံတဳလမၞုံပိုဉ် ခမဳဗြဴဂမၠိုၚ်ဂှ် ဟိုတ်နူဗြဴစရာဲဍုၚ်ဂမၠိုၚ် သ္ပစရိုၚ်စရဵုဟီုဗျံက်ဂှ်ရ မုက်မတ်ဟွံကျေဝ် ဒးဒှ်အိုတ်ရ။ ယွံတဳလမၞုံပိုဉ် ကုမၞိဟ်ဗြဴ ပွမဂၞံၚ်ဂၞါတ်ဇကုပြဲ ဟွံမွဲကဵုယာတ်ဂှ် ဟွံသအးဇ္ၚးရ၊ ထေက်ကဵုက္ဍုဟ်မၠေံ ထေက်ကဵုဇအိုတ်ဇရရ။ ယွံတဳလမၞုံပိုဉ် အဲဍိက် ညာတ်ကေတ်ဖဵုဝွံ ဗွဲမ္ဒးရးဒှ်တုဲ စဵုကဵုလအိတ်လမျီု နွံပၟိက် သွက်ဂွံကဵုဒါန်သၞုက်ဍာ် ကုဘိက္ခုနဳသၚ်ရ ရဴဝွံ (ဂရၚ်ပတီရ)။
၃၅၁။ ယွံဝိသာခါ တၠအဲ ညာတ်ကေတ် မုရဴအာနိသံသမွဲဗွဲမ္ဒးရးဒှ်တုဲ အာတ်လာဘ်ဒ္စာံသာ် ကုအဲကျာ်ရော? ရဴဝွံ (သၟာန်ရ)။
ယွံတဳလမၞုံပိုဉ် ပ္ဍဲသာသနာဝွံ ခမဳဒၠိုက်ကတဵုနူဝသ်ဂမၠိုၚ် သွက်ဂွံဗဵုလ္ၚောဝ်ကျာ်တြဲကြက်ကၠုၚ် ဍုၚ်သာရဝှ်အိုတ်ရ၊ ခမဳဂမၠိုၚ်ဂှ် ပြာပ်ကၠုၚ်ဇရေၚ် တဳလမၞုံပိုဉ်ကျာ်တြဲတုဲ “ယွံတဳလမၞုံပိုဉ် ခမဳမၞုံယၟုဝွံတုန် ချိုတ်အာတုဲရ၊ လအာဂတိခမဳဂှ်တုန် ညးဍေံရော? ပွမကတဵုဘဝပရလိုက်တုန် ညးဍေံရော? (ပွမကလိဂွံဓရ်တိတ်ဗၠးတုန် ညးဍေံရော)” ရဴဝွံ ကြက်သၟာန်အိုတ်ရ။ တဳလမၞုံပိုဉ်ကျာ်တြဲဂှ် ခမဳမစုတိ ကလိလောန်စဴဂှ် အာစိုပ်သောတာပတ္တိဖိုလ်ရ ရဴဝွံကီု အာစိုပ်သကဒါဂါမိဖိုလ်ရ ရဴဝွံကီု အာစိုပ်အနာဂါမိဖိုလ်ရ ရဴဝွံကီု အာစိုပ်အရဟတ္တဖိုလ်ရ ရဴဝွံကီု ကြက်တွံကဵုရ။
အဲဍိက် ပြာပ်အာဇရေၚ် ခမဳဂမၠိုၚ်ဂှ်တုဲမ္ဂး “ယွံတဳလပိုဉ်တအ် တဳလပိုဉ်ဂှ် ကေၚ်ကၠုၚ်ဒၟံၚ် ဍုၚ်သာရဝှ်ဟာ” ရဴဝွံ ကြက်သၟာန်ရ။ ခမဳဂှ် “ကေၚ်ကၠုၚ်ဒၟံၚ် ဍုၚ်သာရဝှ်ရ” ရဴဝွံ ယဝ်ဟီုသ္ဂး ကဵုကုအဲဍိက်အိုတ်မ္ဂး၊ ပ္ဍဲအခိၚ်မဟီုသ္ဂးဂှ် ဨကန်မှချ တီလပိုဉ်ဂှ် သ္ၚာသၞုက်ဗြဲအဲလေဝ် ကေၚ်ပြဘိုဂ်ရ၊ ပိဏ္ဍပါတ်မကဵုဒါန် ကုကၟုဲဂမၠိုၚ်ကီု ပိဏ္ဍပါတ်မကဵုဒါန် ကုညးကွာ်တရဴဂမၠိုၚ်ကီု ပိဏ္ဍပါတ်မကဵုဒါန် ကုညးယဲဂမၠိုၚ်ကီု ပိဏ္ဍပါတ်မကဵုဒါန် ကုခမဳကၠောန်ၜိုတ်ညးဂိယဲဂမၠိုၚ်ကီု ဂဥုဲမကဵုဒါန်ကုခမဳဂိယဲဂမၠိုၚ်ကီု ယာဂုမကဵုဒါန်လၟိုန်ဒမၠိကီု ကေၚ်သ္ပပြဘိုဂ်ရ” ရဴဝွံ ကြက်အာစိုပ် ပွမသ္ဂုတ်သွာတ်ရ။
ကုအဲဍိက် မဗှ်ဗၞုက်ခမဳမကေၚ်သ္ပပြဘိုဂ်ဂှ် ပွမအိုဟ်တၟိုဟ် ကြက်ကတဵုဒှ်ရ၊ ကုအဲဍိက်မအိုတ်တၟိုဟ်ဂှ် ပွမသ္ဍိုက်မၠိုက် ကြက်ကတဵုဒှ်ရ၊ ဇကုအဲဍိက်မၞုံကဵုပွမသ္ဍိုက်မၠိုက်ဂှ် ကြက်ၜိုဟ်လလမ်ရ၊ အဲဍိက်မၞုံကဵုဇကုမၜိုဟ်လလမ်ဂှ် ကြက်ဂွံဒုၚ်စသိုၚ်တသိုခ်ရ၊ စိုတ်အဲဍိက်မဒှ်တသိုခ်ဂှ် ကြက်တန်ကန်ရ၊ ပွတန်ကြန်ဂှ် ကြက်ဒှ်ပွမဇၞော်ပၟဝ်ဣန္ဒြဳ ပွမဇၞော်ပၟဝ်ဗိုလ် ပွမဇၞော်ပၟဝ်ဗောဇ္ၛာၚ်ရ။ ယွံတဳလမၞုံပိုဉ် အဲဍိက် ညာတ်ကေတ် ဖဵုအာနိသံသဝွံ ဗွဲမ္ဒးရးဒှ်တုဲ အာတ်လာဘ်ဒ္စာံသာ် ကုတဳလမၞုံပိုဉ်ကျာ်တြဲရ ရဴဝွံ (ဂရၚ်ပတီရ)။ ယွံဝိသာခါ ခိုဟ်သန်ရ၊ ယွံဝိသာခါ တၠအဲ ညာတ်ကေတ် ဖဵုအာနိသံသဝွံ ဗွဲမ္ဒးရးဒှ်တုဲ အာတ်လာဘ်ဂမၠိုၚ်ဒ္စာံသာ် ကုအြကျာ်ဂှ် ခိုဟ်သန်ရ၊ ယွံဝိသာခါကဵုအခေါၚ် လာဘ်ဂမၠိုၚ်ဒ္စာံသာ် ကုတၠအဲရ ရဴဝွံ (သ္ဂးရ)။
ကြဴနူဂှ် တဳလမၞုံပိုဉ်ကျာ်တြဲ သ်ပအနုမောဒနာ ဝိသာခါမၞုံယၟုမိဂါရမာတာ နကဵုဂါထာဂမၠိုၚ်ဝွံရ−
“(ယွံဝိသာခါ) ယြဴကွးမွဲ အဲကျာ်မွဲ မၞုံကဵုပွမမိပ်စိုတ်လောန်ဒှ်တုဲ ကဵုဒါန်ပုၚ်ဍာ်ပၠာဲရ၊ ဍိုက်ပေၚ်တဴကေုာံဒ္ဂေတ်သဳလရ၊ ပ္ဍဵုကၠေံ ပွမသအေတ်သပါန်တုဲ လေပ်ကဵုဒါန် မဒှ်ဟိုတ်ကတဵုဒှ်ပ္ဍဲသွဝ် မလေပ်ပါဲပၠေၚ်ကၠေံပွမဂွိၚ်စံၚ်တူ မလေပ်ရၚ်တၠုၚ်ဏာကဵုတသိုခ်ရ။
ကွးဗြဴဂှ် အာစိုပ်အရိယမဂ် မစာ်စ္ဍးနူကၠိုက်လ္ၚေၚ်ကိလေသ မဟွံမွဲကဵုကိလေသ မလေပ်ကဵုအာစိုပ်အပါယ်တုဲ ကလိဂါံ ပွမအာယုက်ဂၠိၚ်မဒှ်ပ္ဍဲသွဝ်ရ၊ ကွးဗြဴ မၞုံပၟိက်ကဵုကုသိုလ်ထၟိက် မဍိုက်ပေၚ်တဴကေုာံတသိုခ် မဟွံမွဲကဵုယဲဘဲဂှ် ဂွံမိပ်လဟိၚ် ပ္ဍဲဍုၚ်သွဝ် ဗွဲမလအ်လကာဖာရ” ရဴဝွံ (သ္ပအနုမောဒနာရ)။
၃၅၂။ ကြဴနူဂှ် တဳလမၞုံပိုဉ်ကျာ်တြဲ သ္ပအနုမောဒနာ ဝိသာခါမၞုံယၟုမိဂါရမာတာ နကဵုဂါထာဂမၠိုၚ်ဝွံတုဲမ္ဂး ဒၠိုက်ကတဵုနူဒၞါဲ က္ညစ္ဍးအာရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ် တွံကဵုဂလာန်ဓရ်တုဲမ္ဂ။ “ယွံခမဳတအ် ကဵုအခေါၚ် သ္ၚာသၞုက်ဗြဲကီု ပိဏ္ဍပါတ်မကဵုဒါန်ကုကၟုဲဂမၠိုၚ်ကီု ပိဏ္ဍပါတ်မကဵုဒါန် ကုညးကွာ်တရဴဂမၠိုၚ်ကီု ပိဏ္ဍပါတ်မကဵုဒါန် ကုညးယဲဂမၠိုၚ်ကီု ပိဏ္ဍပါတ်မကဵုဒါန် ကုခမဳကၠောန်ၜိုတ်ညးဂိယဲဂမၠိုၚ်ကီု ဂဥုဲမကဵုဒါန် ကုခမဳဂိယဲဂမၠိုၚ်ကီု ယာဂုမကဵုဒါန် လၟိုန်ဒမၠိကီ သၞုက်ဍာ် ကုဘိက္ခုနဳသၚ်ကီုရ” ရဴဝွံ သ္ဂးကဵုခမဳဂမၠိုၚ်ရ။
ခဏ်ဝိသာခါတုဲရ။
