၂၂၄။ ဝတ္ထုခမဳဂိယဲ
၃၆၅။ ပ္ဍဲကာလမွဲအခိၚ် ကုခမဳမွဲဇကုဂှ် ဒှ်ယဲဂၞဴဇၞော်ဇွောဝ်ရ၊ ခမဳဂှ် သီုမလောပၠူဒၟံၚ် ပ္ဍဲတရဴဇၞော်, တရဴသၟတ်ဇကုဂှ် ဒးတိက်ဒၟံၚ်ရ။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ မွဲဟာန်ကေုာဴတဳလပိုဉ်အာနန္ဒ မဒှ်ခမဳဗွက်ကြဴ ဂေတ်ဂ္ၚေၚ်လၟေၚ်ဘာမ္ဂး စိုပ်အာဘာခမဳဂၞဴဇွောဝ်ဂှ်ရ။ တဳလမၞုံပိုဉ်ကျာ်တြဲညာတ်ဒး ခမဳမဒးတိက်လောပၠူဒၟံၚ် ပ္ဍဲတရဴဇၞော်တရဴသၟတ်ဇကုဂှ်တုဲ က္ညအာဇရေၚ် ခမဳဂၞဴဇၞော်ဇွောဝ်တုဲမ္ဂး “ယွံခမဳ ယဲတၠအဲတုန် မုယဲရော?” ရဴဝွံ သၟာန်ခမဳဂှ်ရ။
ယွံတဳလမၞုံပိုဉ် ယဲအဲဍိက်တုန် ယဲဂၞဴဇွောဝ်ရ ရဴဝွံ (ဂရၚ်ပတီရ)။ ညးကၠောန်ၜိုတ်ကုတၠအဲ နွံဟာ ရဴဝွံ (သၟာန်ရ)။ ဟွံမွဲရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ ခမဳဂမၠိုၚ် မုဟိုတ်ဟွံကၠောန်ၜိုတ် တၠအဲအိုတ်ရော? ရဴဝွံ (သၟာန်ရ)။ ယွံကျာ်မၞုံပိုဉ် အဲဍိက် ဟွံကေၚ်ကၠောန်ၜိုတ် ကုခမဳသအာၚ်ရ၊ ဟိုတ်ဂှ်ရ ခမဳဂမၠိုၚ်လေဝ် ဟွံကၠောန်ၜိုတ်အဲဍိက်ရ ရဴဝွံ (ဂရၚ်ပတီရ)။
ကြဴနူဂှ် တဳလမၞုံပိုဉ်ကျာ်တြဲဂှ် “ယွံအာနန္ဒ ဩဝ်အာညိ၊ ဩဝ်ရၚ်တၠုၚ်နၚ်ဍာ်ညိ၊ ကြက်ဟုမ်ဍာ် ကဵုခမဳဝွံအိုတ်ရ” ရဴဝွံ သ္ဂးကဵုတဳလပိုဉ်အာနန္ဒရ။ “ယွံတဳလမၞုံပိုဉ် ခိုဟ်ရ” ရဴဝွံ သ္ဂးတုဲ တဳလပိုဉ်အာနန္ဒး ဒုၚ်ဝန် ကုတဳလမၞုံပိုဉ်ကျာ်တြဲတုဲ ရၚ်တပုၚ်နၚ်ဍာ်ရ၊ တဳလမၞုံပိုဉ်ကျာ်တြဲ ကိုဟ်ချာဲကဵုဍာ်ရ၊ တဳလပိုဉ်အာနန္ဒ ကြာတ်ကြဴရ၊ တဳလမၞုံပိုဉ်ကျာ်တြဲ ဂိုၚ်ကေတ်နူက္ဍိုပ်ရ၊ တဳလပိုဉ်အာနန္ဒ ပၚ်ယာပတိုန် နူဇိုၚ်တုဲ သတိက်ကဵု ပ္ဍဲဇံၚ်အိုတ်ရ။
ကြဴနူဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ ကဵုဂကောံခမဳ ကောံဓရီုတုဲမ္ဂး “ယွံခမဳတအ် ပ္ဍဲဘာမၞုံယၟုဝွံ ခမဳနွံဟာ” ရဴဝွံ သၟာန်ခမဳဂမၠိုၚ်ရ။ နွံရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ ယွံခမဳတအ် ယဲခမဳဂှ်တုန် မုယဲရော? ရဴဝွံ (သၟာန်ရ)။ ယွံကျာ်မၞုံပိုဉ် ယဲခမဳဂှ်တုန် ယဲဂၞဴဇွောဝ်ရ ရဴဝွံ (ဂရၚ်ပတီအိုတ်ရ)။ ယွံခမဳတအ် ညးကၠောန်ၜိုတ်ခမဳဂှ် နွံဟာ ရဴဝွံ (သၟာန်ရ)။ ယွံကျာ်မၞုံပိုဉ် ဟွံမွဲရ ရဴဝွံ (ဂရၚ်ပတီအိုတ်ရ)။ ယွံခမဳတအ် မုဟိုတ် ဟွံကၠောန်ၜိုတ် ခမဳဂှ်အိုတ်ရော? ရဴဝွံ (သၟာန်ရ)။ ယွံကျာ်မၞုံပိုဉ် ခမဳဝွံ ဟွံကေၚ်ကၠောန်ၜိုတ် ကုခမဳဂမၠိုၚ်ရ၊ ဟိုတ်ဂှ်ရ ခမဳဂမၠိုၚ် ဟွံကၠောန်ၜိုတ် ခမဳဂှ်အိုတ်ရ ရဴဝွံ (ဂရၚ်ပတီအိုတ်ရ)။
ယွံခမဳတအ် မိမဂမၠိုၚ် ဟွံမွဲကုမၞးတအ်ညးဂမၠိုၚ်အိုတ်ရ၊ ယွံခမဳတအ် မၞးတအ်ညးဂမၠိုၚ် ယဝ်ဟွံကၠောန်ၜိုတ် ရၚ်သကအ်မ္ဂး မုရဴညးမွဲ ကြက်ကၠောန်ၜိုတ်ရော? ယွံခမဳတအ် ခမဳမမိက်ကၠောန်ၜိုတ် အဲကျာ်ဂှ် ဒးကၠောန်ၜိုတ် ခမဳဂိယဲရ။
ယဝ်အ္စာဥပဇ္ၛာယ် အ္စာဥပဇ္ၛာယ်ဂှ် စဵုကဵုလအိတ်လမျီု ဒးကၠောန်ၜိုတ်ရ၊ ခမဳဂိယဲဂှ် စဵုကဵုယဲဗၠး ဒးလၟတ်မၚ်ဒၟံၚ်ရ။
ယဝ်အ္စာနွံမ္ဂး အ္စာဂှ် စဵုကဵုလအိတ်လမျီု ဒးကၠောန်ၜိုတ်ရ၊ ခမဳဂိယဲဂှ် စဵုကဵုယဲဗၠး ဒးလၟတ်မၚ်ဒၟံၚ်ရ။
ယဝ်ကွးပဒတဴမွဲစွံနွံမ္ဂး ကွးပဒတဴမွဲစွံဂှ် စဵုကဵုလအိတ်လမျီု ဒးကၠောန်ၜိုတ်ရ၊ ခမဳဂိယဲဂှ် စဵုကဵုယဲဗၠး ဒးလၟတ်မၚ်ဒၟံၚ်ရ။
ယဝ်ကွးပဒတဴဇရေၚ်နွံမ္ဂး ကွးပဒတဴဇရေၚ်ဂှ် စဵုကဵုလအိတ်လမျီု ဒးကၠောန်ၜိုတ်ရ၊ ခမဳဂိယဲဂှ် စဵုကဵုယဲဗၠး ဒးလၟတ်မၚ်ဒၟံၚ်ရ။
ယဝ်သကအ်ပွံၚ်ဥပဇ္ၛာယ်တုပ်နွံမ္ဂး သကအ်ပွံၚ်ဥပဇ္ၛာယ်တုပ်ဂှ် စဵုကဵုလအိတ်လမျီု ဒးကၠောန်ၜိုတ်ရ၊ ခမဳဂိယဲဂှ် စဵုကဵုယဲဗၠး ဒးလၟတ်မၚ်ဒၟံၚ်ရ။
ယဝ်ခမဳအ္စာတုပ်နွံမ္ဂး ခမဳအ္စာတုပ်ဂှ် စဵုကဵုလအိတ်လမျီု ဒးကၠောန်ၜိုတ်ရ၊ ခမဳဂိယဲဂှ် စဵုကဵုယဲဗၠး ဒးလၟတ်မၚ်ဒၟံၚ်ရ။
ယဝ်ဥပဇ္ၛာယ် အ္စာ ကွးပဒတဴမွဲစွံ ကွးပဒတဴဇရေၚ် ခမဳဥပဇ္ၛာယ်တုပ် ခမဳအ္စာတုပ် ဟွံမွဲမ္ဂး၊ သၚ် ဒးကၠောန်ၜိုတ်ရ၊ ယဝ်ဟွံကၠောန်ၜိုတ်မ္ဂး၊ ဒးအာပတ်ဒုက္ကဋ်ရ။
၃၆၆။ ယွံခမဳတအ် ခမဳဂိယဲ မဍိုက်ပေၚ်တဴကေုာံအၚ်္ဂဂမၠိုၚ်မသုန်ပြကာဂှ် ကၠောန်ၜိုတ်ဥပကာဝါတ်ရ။ မၞုံအလေံသ္ပတဴ မဟွံဗဗွဲသပ္ပါယ်ကဵု (ယဲ) ရ။ ဟွံလေပ်တီဗၞတ်ဗ္ၜတ် ပ္ဍဲမဗဗွဲသပ္ပါယ်ကဵု (ယဲ) ရ။ ဟွံသိပ်ဂၠိပ် သွိုန်ဗပိုန်ဂဥုဲရ။ ကုခမဳကၠောန်ၜိုတ်ညးယဲ မၞုံပၟိက်ကဵုဒတုဲဖဵုဇကုဂှ် ယဲဂၠိုၚ်တိုန်ဂှ် “ဂၠိုၚ်တိုန်ရ” ရဴဝွံကီု ၊ ယဲဆုတ်စှ်ေဂှ် “ဆုတ်စှ်ေရ” ရဴဝွံကီု၊ ယဲတန်ညိၚ်ဂှ် “တန်ညိၚ်ရ” ရဴဝွံကီု၊ ဟွံလေပ်သ္ပပြာကဋ်ကဵုယဲဂှ်ရ။ မၞုံသဘဴဟွံအေၚ်ဒုၚ် ယဲဝေဒနာဂမၠိုၚ် မကတဵုဒှ်ကၠုၚ် သကာတ်မြဟ်ကြမ်ကြ ရိၚ်ကတၚ်ဂိသကဝ် ဟွံထေက်ကဵုသာယျေန် ဟွံထေက်ကဵုသ္ဍိုက်မၠိုၚ်တုဲ မကတဵုဒှ်ပ္ဍဲဇကု မကဵုချိုတ်လမျီုအိုတ်ရ။ ယွံခမဳတအ် ခမဳဂိယဲ မဍိုက်ပေၚ်တဴကေုာံအၚ်္ဂဂမၠိုၚ်မသုန်ပြကာဝွံ ကၠောန်ၜိုတ်ဥပကာဝါတ်ရ။
ယွံခမဳတအ် ခမဳဂိယဲ မဍိုက်ပေၚ်တဴကေုာံအၚ်္ဂဂမၠိုၚ်မသုန်ပြကာဂှ် ကၠောန်ၜိုတ်ဥပကာလောဲရ။ လေပ်သ္ပမဗဗွဲသပ္ပါယ်ကဵု (ယဲ) ရ၊ တီဗၞတ်ဗ္ၜတ် ပ္ဍဲမဗဗွဲသပ္ပါယ်ကဵု (ယဲ) ရ၊ သိပ်ဂၠိပ်သွိန်ဗပိုန်ဂဥုဲရ၊ ကုခမဳကၠောန်ၜိုတ်ညးယဲ မၞုံပၟိက်ကဵုဒတုဲဖဵုဇကုဂှ် ယဲဂၠိုၚ်တိုန်ဂှ် “ဂၠိုၚ်တိုန်ရ” ရဴဝွံကီု ၊ ယဲဆုတ်စှ်ေဂှ် “ဆုတ်စှ်ေရ” ရဴဝွံကီု၊ ယဲတန်ညိၚ်ဂှ် “တန်ညိၚ်ရ” ရဴဝွံကီု၊ လေပ်သ္ပပြာကဋ်ကဵုယဲဂှ်ရ။ မၞုံသဘဴပွမအေၚ်ဒုၚ် ယဲဝေဒနာဂမၠိုၚ် မကတဵုဒှ်ကၠုၚ် သကာတ်မြဟ်ကြမ်ကြ ရိၚ်ကတၚ်ဂိသကဝ် ဟွံထေက်ကဵုသာယျေန် ဟွံထေက်ကဵုသ္ဍိုက်မၠိုၚ်တုဲ မကတဵုဒှ်ပ္ဍဲဇကု မကဵုချိုတ်လမျီုအိုတ်ရ။ ယွံခမဳတအ် ခမဳဂိယဲ မဍိုက်ပေၚ်တဴကေုာံအၚ်္ဂဂမၠိုၚ်မသုန်ပြကာဝွံ ကၠောန်ၜိုတ်ဥပကာလောဲရ။
ယွံခမဳတအ် ခမဳကၠောန်ၜိုတ်ဥပကာညးယဲ မဍိုက်ပေၚ်တဴကေုာံအၚ်္ဂဂမၠိုၚ်မသုန်ပြကာဂှ် ဟွံထေက်ကဵု တၞဟ်နကၠောန်ၜိုတ်ဥပကာညးယဲရ။ ဟွံသၟဟ်ရထ တၞဟ်နစဳရေၚ်ဂဥုဲရ။ ဟွံလေပ်တီကေတ် မဗဗွဲသပ္ပါယ် ဟွံဗဗွဲသပ္ပါယ်ကဵု (ယဲ) ရ၊ ဗဂိန်ကဵုဂဥုဲမဟွံဗဗွဲသပ္ပါယ်ရ၊ ပါဲထောံ ဂဥုဲမဗဗွဲသပ္ပါယ်ရ။ မၞုံပၟိက်ကဵုအာမိသ (မပ္တံသ္ၚာပိဏ္ဍပါတ်) ဒှ်တုဲ ကၠောန်ၜိုတ်ဥပကာ ညးယဲရ၊ မၞုံကဵုမေတ္တာစိုတ်ဂှ်ဒှ်တုဲ ကၠောန်ၜိုတ်ဟွံသေၚ်ရ။ တၞဟ်နကၠဟ်ထောံတရဴဇၞော်, တရဴသၟတ်ကီု ဇအအ်တကီု ဍာ်ပါၚ်ကီုဂှ် က္ဍုဟ်မၠေံဇအိုန်ဇရရ။ ဗွဲမဗဗွဲကဵုအခိၚ်အခါ နကဵုဂလာန်ဓရ် ဟွံသၟဟ်ရထ တၞဟ်နကဵုညးယဲ တီညာတ်ကေတ် (ဒတုဲဖဵု) တၞဟ်နကဵုဒဂိုန်ဂိုၚ်ေကတ် (ဓရ်) တၞဟ်နကဵုသကေက်သကာ ကဵုမြဟ်မြာ (သွက်ဂွံဒ္ဂေတ်ဓရ်) ရ၊ ယွံခမဳတအ် ခမဳကၠောန်ၜိုတ်ဥပကာညးယဲ မဍိုက်ပေၚ်တဴကေုာံအၚ်္ဂဂမၠိုၚ်မသုန်ပြကာဝွံ ဟွံထေက်ကဵုတၞဟ်နကၠောန်ၜိုတ်ဥပကာညးယဲရ။
ယွံခမဳတအ် ခမဳကၠောန်ၜိုတ်ဥပကာညးယဲ မဍိုက်ပေၚ်တဴကေုာံအၚ်္ဂဂမၠိုၚ်မသုန်ပြကာဂှ် ထေက်ကဵုတၞဟ်နကၠောန်ၜိုတ်ဥပကာညးယဲရ။ သၟဟ်ရထ တၞဟ်နစဳရေၚ်ဂဥုဲရ၊ လေပ်တီကေတ်မဗဗွဲသပ္ပါယ် ဟွံဗဗွဲသပ္ပါယ်ကဵု (ယဲ) ရ၊ ပါဲထောံ ဂဥုဲမဟွံဗဗွဲသပ္ပါယ်ရ၊ ဗဂိန်ကဵုဂဥုဲမဗဗွဲသပ္ပါယ်ရ။ မၞုံကဵုမေတ္တာစိုတ်ဂှ်ဒှ်တုဲ ကၠောန်ၜိုတ်ဥပကာညးယဲရ။ မၞုံပၟိက်ကဵုအာမိသ (မပ္တံသ္ၚာပိဏ္ဍပါတ်) ဒှ်တုဲ ကၠောန်ၜိုတ်ဟွံသေၚ်ရ။ တၞဟ်နကၠဟ်ထောံ တရဴဇၞော်, တရဴသၟတ်ကီု ဇအအ်တကီု ဍာ်ပါၚ်ကီုဂှ် ဟွံမွဲကဵုပွမက္ဍုဟ်မၠေံဇအိုတ်ဇရရ။ ဗွဲမဗဗွဲကဵုအခိၚ်အခါ နကဵုဂလာန်ဓရ် သၟဟ်ရထ တၞဟ်နကဵု ညးယဲတီညာတ်ကေတ် (ဒတုဲဖဵု) တၞဟ်နကဵုဒဂိုန်ဂိုၚ်ကေတ် (ဓရ်) တၞဟ်နကဵုသကေက်သကာ ကဵုမြဟ်မြာ (သွက်ဂွံဒ္ဂေတ်ဓရ်) ရ။ ယွံခမဳတအ် ညးကၠောန်ၜိုတ်ဥပကာညးယဲ မဍိုက်ပေၚ်တဴကေုာံအၚ်္ဂဂမၠိုၚ်မသုန်ပြကာဝွံ ထေက်ကဵုတၞဟ်နကၠောန်ၜိုတ်ဥပကာညးယဲရ ရဴဝွံ သ္ဂးရ။
