၂၁၈။ သ္ၚာပရဲ
၃၄၇။ ပ္ဍဲကာလမွဲအခိၚ် ခမဳဆဗ္ဗဂ္ဂဳဂမၠိုၚ် “တဳလမၞုံပိုဉ်ကျာ်တြြ ကဵုအခိၚ် သ္ၚာပိဂတှ်ေရ” ရဴဝွံ (သမ္တီကေတ်တုဲ) နကဵုပိဂတှ်ေမွဲသအာၚ်ဟေၚ် လုပ်ကွာန်အိုတ်ရ၊ နကဵုသ္ၚာပိဂတှ်ေမွဲသအာၚ် ပဒတဴပ္ဍဲအပ္ဍဲအာရှာမ်အိုတ်ရ၊ နကဵုသ္ၚာပိဂတှ်ေမွဲသအာၚ် စှ်ေအာသၞေဟ်ဟုမ်ဍာ်အိုတ်ရ။
ခမဳပၟိက်အောန်ဂမၠိုၚ်ဂှ် “ခမဳဆဗ္ဗဂ္ဂဳဂမၠိုၚ် မုဟိုတ် ပကၚ်ရၚ်သ္ၚာပရဲ သီုဟွံသ္ပအဓိဋ္ဌာန် ဝိကပ္ပနအိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ၊ ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ဟိုတ်နူဟိုတ် အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲမ္ဂး “ယွံခမဳတအ် ဟဂပ်ဝ်ပကၚ်ရၚ်သ္ၚာပရဲ မလောန်လတူသ္ၚာပိဂတှ်ေ သီုဟဂွံသ္ပအဓိဋ္ဌာန်ဝိကပ္ပနရ၊ ခမအမပကၚ်ရၚ်ဂှ် ဒးသ္ပဗွဲမဗဗွဲကဵုဓရ်” ရဴဝွံ သ္ဂးကဵု ခမဳဂမၠိုၚ်ရ။
ပ္ဍဲကာလမွဲအခိၚ် သ္ၚာပရဲ မလောန်လတူသ္ၚာပိဂတှ်ေ ကတဵုဒှ်ကၠုၚ် ကုတဳလပိုဉ်အာနန္ဒရ၊ တဳလပိုဉ်အာနန္ဒလေဝ် သ္ၚာဂှ် နွံပၟိက်ကဵုဒါန် ကုတဳလပိုဉ်သာရိပိုတ်ရ၊ တဳလပိုဉ်သာရိပိုတ်လေဝ် သ္ပဒတဴဒၟံၚ် ပ္ဍဲဍုၚ်သာကေတရ၊ ပ္ဍဲအခိၚ်ဂှ် “‘ဟဂပ်ဝ်ပကၚ်ရၚ်သ္ၚာပရဲ မလောန်လတူသ္ၚာပိဂတှ်ေရ’ ရဴဝွံ တဳလမၞုံပိုဉ်ကျာ်တြဲ ပညပ်လဝ်သိက္ခာပိုဒ်ရ၊ သ္ၚာပရဲ မလောန်လတူသ္ၚာပိဂတှ်ေဝွံလေဝ် ကတဵုဒှ်ကၠုၚ် ကုအဲရ၊ အဲလေဝ် သ္ၚာဝွံ နွံပၟိက်ကဵုဒါန် ကုတဳလပိုဉ်သာရိပိုတ်ရ၊ တဳလပိုဉ်သာရိပိုတ်လေဝ် သ္ပဒတဴဒၟံၚ် ပ္ဍဲဍုၚ်သာကေတရ၊ အဲ မုရဴသာ်လဵု သ္ဂောံဒ္ဂေတ်သ္ပရော?” ကသပ်ဒှ်ကၠုၚ် ကုတဳလပိုဉ်အာနန္ဒရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲရ။
ယွံအာနန္ဒ သာရိပိုတ် ပ္ဍဲအခိၚ်ဗၞတ်လလအ်လဵု ကြက်ကလေၚ်ကၠုၚ်ရော? ရဴဝွံ (သၟာန်ရ)။ ယွံကျာ်မၞုံပိုဉ် ပ္ဍဲတ္ၚဲမရနုက်ကဵုဒ္စိတ်တ္ၚဲကီု ပ္ဍဲတ္ၚဲမရနုက်ကဵုစှ်တ္ၚဲကီု (ကြက်ကလေၚ်ကၠုၚ်ရ) ရဴဝွံ (ဂရၚ်ပတီရ)။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲမ္ဂး “ယွံခမဳတအ် လုကဴကာလအပိုၚ်အခြာစှ်တ္ၚဲ ကဵုအခေါၚ်ပကၚ်ရၚ်သ္ၚာပရဲ မလောန်လတူသ္ၚာပိဂတှ်ေရ” ရဴဝွံ သ္ဂးကဵုခမဳဂမၠိုၚ်ရ။
ပ္ဍဲကာလမွဲအခိၚ် သ္ၚာပရဲ မလောန်လတူသ္ၚာပိဂတှ်ေ ကတဵုဒှ်ကၠုၚ် ကုခမဳဂမၠိုၚ်ရ။ ပ္ဍဲအခိၚ်ဂှ် “ပိုဲညးဂမၠိုၚ် သာ်လဵုဂွံဒ္ဂေတ်သ္ပ ပ္ဍဲသ္ၚာပရဲ မလောန်လတူသ္ၚာပိဂတှ်ေအိုတ်ရော?” ရဴဝွံ ကသပ်ဒှ်ကၠုၚ် ကုခမဳဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲရ။ “ယွံခမဳတအ် ကဵုအခေါၚ် တၞဟ်နသ္ပဝိကပ္ပန သ္ၚာပရဲ မလောန်လတူသ္ၚာပိဂတှ်ေရ” ရဴဝွံ (သ္ဂးရ)။
၃၄၈။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲဍုၚ်ဝေသာလဳ ဗွဲမမိပ်လဟိၚ်တုဲမ္ဂး က္ညဂ္ၚေၚ်အာဒေသစာရိတ် ဍုၚ်ဗာရာဏသဳရ။ အတိုၚ်လၟေၚ်လၟေၚ် က္ညဂ္ၚေၚ်အာဒေသစာရိတ်မ္ဂး စိုပ်ကၠုၚ်ဍုၚ်ဗာရာဏသဳရ၊ တဳလမၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲဂြိုဟ်မိဂဒါဝိုန် ဒှ်အရာကဵု မသက္ကုဘဲကုသတ်ဂမၠိုၚ် မၞုံယၟုဣသိပတန ဇရေၚ်ဍုၚ်ဗာရာဏသဳဂှ်ရ။
ပ္ဍဲအခိၚ်ဂှ် သပိုၚ်ခမဳမွဲဇကု စာ်ထောၚ်အာရ၊ ပ္ဍဲအခိၚ်ဂှ် “တဳလမၞုံပိုဉ်ကျာ်တြဲ ကဵုအခေါၚ်သ္ၚာပိဂတှ်ေ မတွံဂးသကိုပ်ၜါထပ် သ္ၚာကၞေဟ်မွဲထပ် သပိုၚ်မွဲထပ်ရ၊ ကုအဲလေဝ် သပိုၚ်ဝွံ စာ်ထောၚ်အာရ၊ ယဝ်အဲဂွံနၚ်ဗာအ်စုတ် နယာတ်မှာ်မ္ဂး နပွဳပွူကြက်ဒှ်ၜါထပ်ရ၊ ပ္ဍဲလဒေါဝ် ကြက်ဒှ်မွဲထပ်ရ” ရဴဝွံ ကသပ်ဒှ်ကၠုၚ် ကုခမဳဂှ်ရ။ ကြဴနူဂှ် ခမဳဂှ် နာပ်ဗၠအ် နကဵုယာတ်မှာ်ရ။
တဳလမၞုံပိုဉ်ကျာ်တြဲ က္ညဂေတ်ဂ္ၚေၚ်အာဒေသစာရိတ် လၟေၚ်ဘာမ္ဂး ညာတ်ဒး ခမဳမနာပ်ဗၠအ်ဒၟံၚ် နကဵုယာတ်မှာ်ဂှ်တုဲ က္ညအာဇရေၚ် ခမဳဂှ်တုဲမ္ဂ “ယွံခမဳ တၠအဲ သ္ပဒၟံၚ်မုမွဲရော?” ရဴဝွံ သၟာန်ခမဳဂှ်ရ။ ယွံကျာ်မၞုံပိုဉ် နာမ်ဗၠအ်ဒၟံၚ် နကဵုယာတ်မှာ်ရ ရဴဝွံ ဂရၚ်ပတီမ္ဂး ယွံခမဳ ခိုဟ်သန်ရ ခိုဟ်သန်ရ၊ ယွံခမဳ တၠအဲ နာမ်ဗၠအ် နကဵုယာတ်မှာ်ဂှ် ခိုဟ်သန်ရ ရဴဝွံ သ္ဂးရ။
ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲမ္ဂး “ယွံခမဳတအ် ယာတ်မဟဂွံလပိုက်ကြာတ်ကြဴဏီ ယာတ်မလပိုက်ကြာတ်ကြဴမွဲဝါ မတုပ်သၟဟ်ကေုာံယာတ် မဟဂွံလပိုက်ကြာတ်ကြဴဏီဂှ် ကဵုအခေါၚ် သကိုပ်ၜါထပ် သ္ၚာကၞေဟ်မွဲထပ် သပိုၚ်မွဲထပ်ရ၊ နကဵုယာတ်တြေံမဒေပ်လဝ်ဂၠိုၚ်ကဵုဥတုဂှ် တၞဟ်နသ္ပသကိုပ်ပန်ထပ် သ္ၚာကၞေဟ်ၜါထပ် သပိုၚ်ၜါထပ်ကီု ပ္ဍဲပံၚ်သုကူ တၞဟ်နထပ်အတိုၚ်နွံပၟိက်ကီု ကဵုအခေါၚ်ရ၊ ဒးသ္ပပ္ဍဲပွမပတိတ်ဇြဟတ် ပ္ဍဲပွမဂၠာဲသ္ၚေဝ် ယာတ်တြေံမတုံစှ်ေ ပ္ဍဲမပ္တံကဵုသ္ၚိဖျာရ၊ ယွံခမဳတအ် ကဵုအခေါၚ် ပွမနာပ်ဗၠအ်ကီု ပွမဇိၚ်နတၞိၚ်ကီု ပွမထၟူတုဲဇိၚ်ကီု ပွမဇိၚ်အုပ်စုတ်ယာတ်ကီု ဟွံသာ်ကၠေံအိုဟ်တြေံတုဲ ပွမနာပ်ထပ်စုတ်ပ္ဍဲလတူကီုရ” ရဴဝွံ သ္ဂးကဵုခမဳဂမၠိုၚ်ရ။
