၂၁၇။ ကဵုအခေါၚ် တိစဳဝရိက်
၃၄၆။ ပ္ဍဲကြဴနူဂှ် တဳလမၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲဍုၚ်ရာဇဂြိုဟ် ဗွဲမမိပ်လဟိၚ်တုဲမ္ဂး က္ညဂ္ၚေၚ်အာဒေသစာရိတ် ဍုၚ်ဝေသာလဳရ။ တဳလမၞုံပိုဉ်ကျာ်တြဲ ဃောသွိုန်ဗပိုန်တဴ တရဴအဓာန်မဂၠိုၚ်သ္ၚောဲ အကြာဍုၚ်ရာဇဂြိုဟ် ကေုာံဍုၚ်ဝေသာလဳဂှ် ညာတ်ဒးခမဳဂမၠိုၚ်မဂၠိုၚ်ဂၠၚ် မၞုံကဵုကယျာဘဏ် မဂပ်ဝ်ယိုက်ပတိုန်သ္ၚာဂမၠိုၚ် သ္ပလဝ်သ္ၚာထပ်ကဵုထပ်ညံၚ်ရဴဖုန် ပ္ဍဲက္ဍိုပ်ကီု ပ္ဍဲပၞးကီု ပ္ဍဲဂၞိၚ်ကီုတုဲ မကၠုၚ်ဒၟံၚ်တုဲ “တြုံမလ္ၚုသၟး (နူမဂ်ဖိုလ်) ဂမၠိုၚ်ဝွံ ဗွဲမပြဟ်သန်ဟေၚ် ဂေတ်ဂ္ၚေၚ်တၞဟ်နဖဵုသွက်သ္ၚာဂွံဂၠိုၚ်အိုတ်ရ၊ အဲဂွံဒက်အပိုၚ်အခြာ ပ္ဍဲသ္ၚာ ကုခမဳဂမၠိုၚ်မ္ဂး ဂွံစွံပတိုန် အပိုၚ်အခြာမ္ဂး ခိုဟ်သန်ရ” ရဴဝွံ ကသပ်ဒှ်ကၠုၚ် ကုတဳလမၞုံပိုဉ်ကျာ်တြဲရ။ ကြဴနူဂှ် တဳလမၞုံပိုဉ်ကျာ်တြဲ အတိုၚ်လၟေၚ်လၟေၚ် က္ညဂ္ၚေၚ်အာဒေသစာရိတ်မ္ဂး စိုပ်ကၠုၚ်ဍုၚ်ဝေသာလဳရ၊ တဳလမၞုံပိုဉ်ျကျာ်တြဲ သ္ပဒတဴတန်ဒၟံၚ် ပ္ဍဲစေတဳမၞုံယၟုဂေါတမက ဇရေၚ်ဍုၚ်ဝေသာလဳရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ပ္ဍဲဒ္စာံဗ္တံဂမၠိုၚ် မဒှ်အကြာဂိတုမာဃ်ဖဝ်ရဂိုဏ်ဂမၠိုၚ် မဒှ်အခိၚ် ဥတုကသကတ်မၜိုဟ်ဂံက် အခိၚ်ဗ္တံလတိုပ်စှ်ေဂှ် မၞုံကဵုသ္ၚာမွဲဂတှ်ေဓဝ်ဒှ်တုဲ ဂဇအ်ဒၟံၚ်ပ္ဍဲအမှဲအကးရ။ ပွမၜိုဟ်ဂံက် ဟွံဒှ်ကုတဳလမၞုံပိုဉ်ကျာ်တြဲရ။
ကလိလောန်အာပဌမယာမ်မ္ဂး ပွမၜိုဟ်ဂံက် ဒှ်ကၠုၚ်ကုတဳလမၞုံပိုဉ်ကျာ်တြဲရ။ တဳလမၞုံကျာ်တြဲ ဓလီုလတက်စုတ်သ္ၚာ မရနုက်ကဵုၜါဂတှ်ေရ၊ ပွမၜိုဟ်ဂံက် ဟွံဒှ်ကုတဳလမၞုံပိုဉ်ကျာ်တြဲရ။
ကလိလောန်အာမဇ္ၛိမယာမ်မ္ဂး ပွမၜိုဟ်ဂံက် ဒှ်ကၠုၚ်ကုတဳလမၞုံပိုဉ်ကျာ်တြဲရ။ တဳလမၞုံပိုဉ်ကျာ်တြဲ ဓလီုလတက်စုတ်သ္ၚာ မရနုက်ကဵုပိဂတှ်ေရ၊ ပွမၜိုဟ်ဂံက် ဟွံဒှ်ကုတဳလမၞုံပိုဉ်ကျာ်တြဲရ။
ကလိလောန်အာပစ္ဆိမယာမ်မ္ဂး အရှိုဏ်တိုန်ကၠုၚ် ဗ္တံမတုပ်သၟဟ်ကေုာံမုက္ခဝါ ထေက်ကဵုသ္ဍိုက်မၠိုက်မ္ဂး ပွမၜိုဟ်ဂံက် ဒှ်ကၠုၚ်ကုတဳလမၞုံပိုဉ်ကျာ်တြဲရ။ တဳလမၞုံပိုဉ်ကျာ်တြဲ ဓလီုလတက်စုတ်သ္ၚာ မရနုက်ကဵုပန်ဂတှ်ေရ၊ ပွမၜိုဟ်ဂံက် ဟွံဒှ်ကုတဳလမၞုံပိုဉ်ကျာ်တြဲရ။
ပ္ဍဲအခိၚ်ဂှ် “ပ္ဍဲသာသနာဝွံ ကောန်ဂကူဂမၠိုၚ် မၞုံသဘဴလေပ်ၜိုဟ်ဂံက် မၞုံသဘဴမဖေက်ၜိုဟ်ဂံက်ဂှ် တၞဟ်နယိုပ်ယာပ်တရိုတ်စိုတ် နကဵုသ္ၚာပိဂတှ်ေ သၟဟ်ရထအိုတ်ရ၊ အဲဂွံဒက်အပိုၚ်အခြာ ပ္ဍဲသ္ၚာ ကုခမဳဂမၠိုၚ်မ္ဂး ဂွံစွံပတန်အပိုၚ်အခြာမ္ဂး ဂွံကဵုအခေါၚ် သ္ၚာပိဂတှ်ေမ္ဂး ခိုဟ်သန်ရ” ရဴဝွံ ကသပ်ဒှ်ကၠုၚ် ကုတဳလမၞုံပိုဉ်ကျာ်တြဲရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲမ္ဂး−
“ယွံခမဳတအ် ပ္ဍဲသာသနာဝွံ အဲကျာ် ဃောသွိုန်ဗပိုန်တဴ တရဴအဓာန်မဂၠိုၚ်သ္ၚောဲ အကြာဍုၚ်ရာဇဂြိုဟ် ကေုာံဍုၚ်ဝေသာလဳဂှ် ညာတ်ဒးခမဳဂမၠိုၚ်မဂၠိုၚ်ဂၠၚ် မၞုံကဵုကယျာဘဏ် မဂပ်ဝ်ယိုက်ပတိုန်သ္ၚာဂမၠိုၚ် သ္ပလဝ်သ္ၚာထပ်ကဵုထပ်ညံၚ်ရဴဖုန် ပ္ဍဲက္ဍိုပ်ကီု ပ္ဍဲပၞးကီု ပ္ဍဲဂၞိၚ်ကီုတုဲ မကၠုၚ်ဒၟံၚ်တုဲ ‘တြုံမလ္ၚုသၟး (နူမဂ်ဖိုလ်) ဂမၠိုၚ်ဝွံ ဗွဲမပြဟ်သန်ဟေၚ် ဂေတ်ဂ္ၚေၚ် တၞဟ်နဖဵုသွက်သ္ၚာဂွံဂၠိုၚ်အိုတ်ရ၊ အဲဂွံဒက်အပိုၚ်အခြာ ပ္ဍဲသ္ၚာ ကုခမဳဂမၠိုၚ်မ္ဂး ဂွံစွံပတိုန် အပိုၚ်အခြာမ္ဂး ခိုဟ်သန်ရ’ ရဴဝွံ ကသပ်ဒှ်ကၠုၚ်ကုအဲရ။
ယွံခမဳတအ် ပ္ဍသာသနာဝွံ အဲကျာ် ပ္ဍဲဒ္စာံဗ္တံဂမၠိုၚ် မဒှ်အကြာဂိတုမာဃ်ဖဝ်ရဂိုဏ်ဂမၠိုၚ် မဒှ်အခိၚ်ဥတုသကတ်မၜိုဟ်ဂံက် အခိၚ်ဗ္တံလတိုပ်စှ်ေဂှ် မၞုံကဵုသ္ၚာမွဲဂတှ်ေဓဝ်ဒှ်တုဲ ဂဇအ်ဒၟံၚ်ပ္ဍဲအမှဲအကးရ၊ ပွမၜိုဟ်ဂံက် ဟွံဒှ်ကုအဲရ။
ကလိလောန်အာပဌမယာမ်မ္ဂး ပွမၜိုဟ်ဂံက် ဒှ်ကၠုၚ်ကုအဲရ။ အဲ ဓလီုလတက်စုတ်သ္ၚာ မရနုက်ကဵုၜါဂတှ်ေရ၊ ပွမၜိုဟ်ဂံက် ဟွံဒှ်ကုတဳလမၞုံပိုဉ်ကျာ်တြဲရ။
ကလိလောန်အာမဇ္ၛိမယာမ်မ္ဂး ပွမၜိုဟ်ဂံက် ဒှ်ကၠုၚ်ကုအဲပၠန်ရ။ အဲ ဓလီုလတက်စုတ်သ္ၚာ မရနုက်ကဵုပိဂတှ်ေရ၊ ပွမၜိုဟ်ဂံက် ဟွံဒှ်ကုအဲရ။
ကလိလောန်အာပစ္ဆိမယာမ်မ္ဂး အရှိုဏ်တိုန်ကၠုၚ် ဗ္တံမတုပ်သၟဟ်ကေုာံမုက္ခဝါ ထေက်ကဵုသ္ဍိုက်မၠိုက်မ္ဂး ပွမၜိုဟ်ဂံက် ဒှ်ကၠုၚ်ကုအဲပၠန်ရ။ အဲ ဓလီုလတက်စုတ်သ္ၚာ မရနုက်ကဵုပန်ဂတှ်ေရ၊ ပွမၜိုဟ်ဂံက် ဟွံဒှ်ကုအဲရ။
ပ္ဍဲအခိၚ်ဂှ် ‘ပ္ဍဲသာသနာဝွံ ကောန်ဂကူဂမၠိုၚ် မၞုံသဘဴလေပ်ၜိုဟ်ဂံက် မၞုံသဘဴမဖေက်ၜိုဟ်ဂံက်ဂှ် တၞဟ်နယိုပ်ယာပ်တရိုတ်စိုတ် နကဵုသ္ၚာပိဂတှ်ေ သၟဟ်ရထအိုတ်ရ၊ အဲဂွံဒက်အပိုၚ်အခြာ ပ္ဍဲသ္ၚာ ကုခမဳဂမၠိုၚ်မ္ဂး ဂွံစွံပတန်အပိုၚ်အခြာမ္ဂး ဂွံကဵုအခေါၚ် သ္ၚာပိဂတှ်ေမ္ဂး ခိုဟ်သန်ရ’ ရဴဝွံ ကသပ်ဒှ်ကၠုၚ်ကုအဲရ။ ယွံခမဳတအ် ကဵုအခေါၚ် သ္ၚာပိဂတှ်ေ မတွံဂသကိုပ်ၜါထပ် သ္ၚာကၞေဟ်မွဲထပ် သပိုၚ်မွဲထပ်ရ” ရဴဝွံ သ္ဂးကဵုခမဳဂမၠိုၚ်ရ။
