၂၀၆။ ဝတ္ထုကောန်သေဌဳ
၃၃၃။ ပ္ဍဲကာလမွဲအခိၚ် ကုကောန်သေဌဳ ပဒတဴဍုၚ်ဗာရာဏသဳ မဝေၚ်ဗတက်ဆေဝ်လုန်ဂှ် ဒှ်ယဲကြုက်ထကတ်ရ၊ နကဵုယဲဂှ် ယာဂုမဂပ်ဝ်သုၚ်ဂှ် ဟွံအာစိုပ်ပွမလ္ၚတ်လာဲ ဗွဲမ္ဒးရးရ၊ ပုၚ်မဂပ်ဝ်စလေဝ် မဟွံအာစိုပ်ပွမလ္ၚတ်လာဲ ဗွဲမ္ဒးရးရ၊ တရဴဇၞော်ကီု တရဴသၟတ်ကီု ဟွံတပ်ရ၊ ကောန်သေဌဳဂှ် နကဵုယဲဂှ် ဇြာဲသကှ်ရ၊ ဖျုန်ဆီဒေက်ခ္ဍေက်ရ၊ ရုပ်သာ်လီုလာ်ရ၊ မၞုံကဵုသာ်ဇကုဖျိုဟ်ဖျိုဟ် သၟဟ်ညံၚ်ရဴတၞးဆုဍုဟ်ဍုဟ်ရ၊ မၞုံကဵုဇကုဓရံၚ် ဇာလတေၚ်မံက်ထေၚ်ဒၟံၚ် (သၟဟ်ညံၚ်လးပၠးလဝ်ဇာနှိက်) ရ။
ပ္ဍဲအခိဂှ် “ကုကောန်အဲဂှ် ဒှ်ယဲမၞုံသဘဴသာ်ဂှ်ရ၊ ယာဂုမဂပ်ဝ်သုၚ်ဂှ် ဟွံအာစိုပ်ပွမလ္ၚတ်လာဲ ဗွဲမ္ဒးရးရ၊ ပုၚ်မဂပ်ဝ်စလေဝ် မဟွံအာစိုပ်ပွမလ္ၚတ်လာဲ ဗွဲမ္ဒးရးရ၊ တရဴဇၞော်ကီု တရဴသၟတ်ကီု ဟွံတပ်ရ၊ ကောန်အဲဂှ် နကဵုယဲဂှ် ဇြာဲသကှ်ရ၊ ဖျုန်ဆီဒေက်ခ္ဍေက်ရ၊ ရုပ်သာ်လီုလာ်ရ၊ မၞုံကဵုသာ်ဇကုဖျိုဟ်ဖျိုဟ် သၟဟ်ညံၚ်ရဴတၞးဆုဍုဟ်ဍုဟ်ရ၊ မၞုံကဵုဇကုဓရံၚ် ဇာလတေၚ်မံက်ထေၚ်ဒၟံၚ် (သၟဟ်ညံၚ်လးပၠးလဝ်ဇာနှိက်) ရ၊ အဲအာဍုၚ်ရာဇဂြိုဟ်တုဲမ္ဂး ဂွံဂရၚ်ပတီအာတ်သဝ်ဇဳဝက သွက်ဂွံဝဳယဲကောန်အဲ ကုသၟိၚ်ဇၞော်မ္ဂး ခိုဟ်ရ” ရဴဝွံ ကသပ်ဒှ်ကၠုၚ် ကုသေဌဳ ပဒတဴဍုၚ်ဗာရာဏသဳရ။
ပ္ဍဲကြဴနူဂှ် သေဌဳပဒတဴဍုၚ်ဗာရာဏသဳ အာဍုၚ်ရာဇဂြိုဟ်တုဲ ပြာပ်အာဇရေၚ် သၟိၚ်ဗိမ္ဗိသာရ မၞုံယၟုသေနိယ တၠညးမဂဓရးတုဲမ္ဂး “ယွံတၠညးသၟိၚ်ဇၞော် ကုကောန်အဲဍိက်ဂှ် ဒှ်ယဲမၞုံသဘဴသာ်ဂှ်ရ၊ ယာဂုမဂပ်ဝ်သုၚ်ဂှ် ဟွံအာစိုပ်ပွမလ္ၚတ်လာဲ ဗွဲမ္ဒးရးရ၊ ပုၚ်မဂပ်ဝ်စလေဝ် မဟွံအာစိုပ်ပွမလ္ၚတ်လာဲ ဗွဲမ္ဒးရးရ၊ တရဴဇၞော်ကီု တရဴသၟတ်ကီု ဟွံတပ်ရ၊ ကောန်အဲဂှ် နကဵုယဲဂှ် ဇြာဲသကှ်ရ၊ ဖျုန်ဆီဒေက်ခ္ဍေက်ရ၊ ရုပ်သာ်လီုလာ်ရ၊ မၞုံကဵုသာ်ဇကုဖျိုဟ်ဖျိုဟ် သၟဟ်ညံၚ်ရဴတၞးဆုဍုဟ်ဍုဟ်ရ၊ မၞုံကဵုဇကုဓရံၚ် ဇာလတေၚ်မံက်ထေၚ်ဒၟံၚ် (သၟဟ်ညံၚ်လးပၠးလဝ်ဇာနှိက်) ရ၊ ယွံတၠညးသၟိၚ်ဇၞော် အာတ်ပါန်အခေါၚ်ရ၊ တၠညးသၟိၚ်ဇၞော် ဩဝ်ဖအောဝ်ဗလး သဝ်ဇဳဝက သွက်ဂွံဝဳယဲ ကောန်အဲဍိက်ညိ” ရဴဝွံ ဂရၚ်ပတီ သၟိၚ်ဗိမ္ဗိသာရ မၞုံယၟုသေနိယ တၠညးမဂဓရးရ။
ပ္ဍဲအခိၚ်ဂှ် သၟိၚ်ဗိမ္ဗိသာရ မၞုံယၟုသေနိယ တၠညးမဂဓရးဂှ် “အမာံဇဳဝက ဩဝ်အာညိ၊ အာဍုၚ်ဗာရာဏသဳတုဲမ္ဂး ကောန်သေဌဳ ပဒတဴဍုၚ်ဍုၚ်ဗာရာဏသဳညိ” ရဴဝွံ ဖအောဝ်ဗလးဏာ သဝ်ဇဳဝက မၞုံယၟုကောမရဘစ္စရ။ “ယွံတၠညးသၟိၚ်ဇၞော် ခိုဟ်သန်ရ” ရဴဝွံ သ္ဂးတုဲ ဇဳဝက မၞုံယၟုကောမရဘစ္စဂှ် ဒုၚ်ဝန် ကုသၟိၚ်ဗမ္ဗိသာရ မၞုံယၟုသေနိယ တၠညးမဂဓရးတုဲမ္ဂး အာဍုၚ် ဗာရာဏသဳတုဲ ပြာပ်အာဇရေၚ် ကောန်သေဌဳ ပဒတဴဍုၚ်ဗာရာသဳတုဲမ္ဂး စၟတ်သမ္တီကေတ် အကာဲအရာယဲ ကောန်သေဌဳ ပဒတဴဍုၚ်ဗာရာဏသဳဂှ်တုဲ ကဵုဂကောံမၞိဟ် ပါဲကၠေဴကဵုစဵုဗိုၚ် ယာတ်သၞိက်တုဲမ္ဂး ဒက်လဝ်ပ္ဍဲဒယိုၚ်တုဲ စွံလဝ်သမ္ဘာ ပ္ဍဲဂတတုဲ ထိုက်ကယျာကၠေံစၞာံဗုၚ်တုဲမ္ဂး ဂၠံက်ပတိတ်ကြုတ်မထကတ်တုဲ− “ဩဝ်သ္ၚေဝ်ရံၚ် ယဲ တြုံတၠသ္ၚိ တၠအဲညိ။
နကဵုယဲဝွံ ယာဂုမဂပ်ဝ်သုၚ်ဂှ် ဟွံအာစိုပ်ပွမလ္ၚတ်လာဲ ဗွဲမ္ဒးရးရ၊ ပုၚ်မဂပ်ဝ်စလေဝ် မဟွံအာစိုပ်ပွမလ္ၚတ်လာဲ ဗွဲမ္ဒးရးရ၊ တရဴဇၞော်ကီု, တရဴသၟတ်ကီု ဟွံတပ်ရ၊ ကောန်အဲဂှ် နကဵုယဲဝွံ သေဌဳဝွံ ဇြာဲသကှ်ရ၊ ဖျုန်ဆီဒေက်ခ္ဍေက်ရ၊ ရုပ်သာ်လီုလာ်ရ၊ မၞုံကဵုသာ်ဇကုဖျိုဟ်ဖျိုဟ် သၟဟ်ညံၚ်ရဴတၞးဆုဍုဟ်ဍုဟ်ရ၊ မၞုံကဵုဇကုဓရံၚ် ဇာလတေၚ်မံက်ထေၚ်ဒၟံၚ် (သၟဟ်ညံၚ်လးပၠးလဝ်ဇာနှိက်) ရ” ရဴဝွံ ထ္ၜးကဵုကုသမ္ဘာရ။ သှ်ပလာဲပတပ်ကၠေံ ကြုတ်ထကတ်တုဲ ကလေၚ်သပၠုပ်ကၠေံကြုတ်ဂမၠိုၚ်မွဲလှ်ေပၠန်တုဲမ္ဂး ဇိၚ်ကၠေံ စၞာံဗုၚ်တုဲ လံက်ကဵုဂဥုဲလံက်ပလေတ်ရ။
ပ္ဍဲအခိၚ်ဂှ် ကောန်သေဌဳ ပဒတဴဍုၚ်ဗာရာဏသဳဂှ် ခြာဟွံလအ်ဟေၚ် ယဲကၠေံစ္ဍးအာရ။ ပ္ဍဲအခိၚ်ဂှ် သေဌဳ ပဒတဴဍုၚ်ဗာရာဏသဳဂှ် “ကုကောန်အဲဂှ် ဟွံမွဲကဵုယဲဒှ်တုဲ တန်ရ” ရဴဝွံ ကဵုကသာပ်မွဲဠက်တြဴလ္ၚီ ကုသဝ်ဇဳဝက မၞုံယၟုကောမရဘစ္စရ။ ပ္ဍဲအခိၚ်ဂှ် သဝ်ဇဳဝက မၞုံယၟုကောမရဘစ္စ ဂိုၚ်ကေတ်ကသပ်မွဲဠက်တြဴလ္ၚီတုဲ မွဲလှ်ေပၠန် ကလေၚ်စဴကၠုၚ်ဍုၚ်ရာဇဂြိုဟ်ရ။
