၂၀၅။ ဝတ္ထုသေဌဳရာဇဂြိုဟ်
၃၃၂။ ပ္ဍဲအခိၚ်ဂှ် ကုသေဌဳပဒတဴဍုၚ်ရာဇဂြိုဟ်ဂှ် ဒှ်ဒၟံၚ်ယဲဂိက္ဍိုပ် ဗၞတ်ထပှ်သၞာံရ၊ အ္စာသဝ်ဒိသာပါမောက္ခဂမၠိုၚ် ဇၞော်ဇၞော်မဂၠိုၚ်ဂၠၚ် ကၠုၚ်တုဲ တၞဟ်နဝဳဗလး စဵုကဵုယဲဗၠးဂှ် ဟွံသၟဟ်ရထအိုတ်ရ၊ ဂိုၚ်ကေတ် ထဝ်သြန်မဂၠိုၚ်တုဲ အာအိုတ်ရ။ ဗွဲစၟတ်တုန် အ္စာသဝ်ဂမၠိုၚ် ဗလးကၠေံတဲရ၊ အ္စာသဝ်လ္ၚဵုလ္ၚဵုဂှ် “သေဌဳဂှ် ပ္ဍဲတ္ၚဲမရနုက်ကဵုမသုန်ဂှ် ကြက်ဒးချိုတ်ရ” ရဴဝွံ ဟီုသ္ဂးအိုတ်ရ၊ အ္စာသဝ်လ္ၚဵုလ္ၚဵုဂှ် “သေဌဳဂှ် ပ္ဍဲတ္ၚဲမရနုက်ကဵုထပှ်ဂှ် ကြက်ဒးချိုတ်ရ” ရဴဝွံ ဟီုသ္ဂး အိုတ်ရ။
ပ္ဍဲအခိၚ်ဂှ် ကုမၞိဟ်ဇၞော်ကွာန်ကဆံၚ်လတူ ကောန်ညးရးရာဇဂြိုဟ်ဂှ် “သေဌဳဝွံ ကုသၟိၚ်ဇၞော်ကီု ကုညးဂကောံကွာန်ကီု မၞုံကဵုဂုဏ်မဂၠိုၚ်ရ၊ ဗွဲစၟတ်တုန် အ္စာသဝ်ဂမၠိုၚ် ဗလးထောံတဲရ၊ အ္စာသဝ်လ္ၚဵုလ္ၚဵုဂမၠိုၚ်ဂှ် “သေဌဳဂှ် ပ္ဍဲတ္ၚဲမရနုက်ကဵုမသုန်ဂှ် ကြက်ဒးချိုတ်ရ” ရဴဝွံ ဟီုသ္ဂးအိုတ်ရ၊ အ္စာသဝ်လ္ၚဵုလ္ၚဵုဂှ် “သေဌဳဂှ် ပ္ဍဲတ္ၚဲမရနုက်ကဵုထပှ်ဂှ် ကြက်ဒးချိုတ်ရ” ရဴဝွံ ဟီုသ္ဂး အိုတ်ရ။ အ္စာသဝ်မၞုံယၟုဇဳဝက သၟိၚ်ဇၞော်ဝွံတုန် ဍောတ်လေဝ်ဍောတ်ရ၊ ခိုဟ်လေဝ်ခိုဟ်ရ၊ ပိုဲညးဂမၠိုၚ် ဂွံအာတ် သဝ်ဇဳဝက သွက်ဂွံဝဳယဲသေဌဳ ကုသၟိၚ်ဇၞော်မ္ဂး ခိုဟ်သန်ရ” ရဴဝွံ ကသပ်ဒှ်ကၠုၚ်ရ။
ပ္ဍဲအခိၚ်ဂှ် မၞိဟ်ဇၞော်ကွာန်ကဆံၚ်လတူ ကောန်ညးရးရာဇဂြိုဟ်ဂှ် ပြာပ်အာဇရေၚ်သၟိၚ်ဗမ္ဗိသာရ မၞုံယၟုသေနိယ တၠညးမဂဓရးတုဲ ‘ယယွံတၠညးသၟိၚ်ဇၞော် သေဌဳဝွံ ကုတၠညးသၟိၚ်ဇၞော်ကီု ကုညးဂကောံကွာန်ကီု မၞုံကဵုဂုဏ်မဂၠိုၚ်ရ၊ ဗွဲစၟတ်တုန် အ္စာသဝ်ဂမၠိုၚ် ဗလးထောံတဲရ၊ အ္စာသဝ်လ္ၚဵုလ္ၚဵုဂမၠိုၚ်ဂှ် ‘သေဌဳဂှ် ပ္ဍဲတ္ၚဲမရနုက်ကဵုမသုန်ဂှ် ကြက်ဒးချိုတ်ရ” ရဴဝွံ ဟီုသ္ဂးအိုတ်ရ၊ အ္စာသဝ်လ္ၚဵုလ္ၚဵုဂှ် “သေဌဳဂှ် ပ္ဍဲတ္ၚဲမရနုက်ကဵုထပှ်ဂှ် ကြက်ဒးချိုတ်ရ’ ရဴဝွံ ဟီုသ္ဂး အိုတ်ရ’ ရဴဝွံ ဟီုသ္ဂးအိုတ်ရ၊ ယွံတၠညးသၟိၚ်ဇၞော် အာတ်ပါန်အခေါၚ်ရ၊ သၟိၚ်ဇၞော် ဩဝ်ဖအောဝ်ဗလး သဝ်ဇဳဝက သွက်ဂွံဝဳယဲသေဌဳညိ” ရဴဝွံ ဂရၚ်ပတီ သၟိၚ်ဗိမ္ဗိသာရ မၞုံယၟုသေနိယ တၠညးမဂဓရးရ။
ပ္ဍဲအခိၚ်ဂှ် သၟိၚ်ဗိမ္ဗိသာရ မၞုံယၟုသေနိယ တၠညးမဂဓရးဂှ် “အမာံဇဳဝက ဩဝ်အာညိ၊ ဩဝ်ဝဳသေဌဳညိ” ရဴဝွံ ဖအောဝ်ဗလးဏာ သဝ်ဇဳဝက ကောန်သၟိၚ်အဘယ မဂပ်ဝ်လွဳလွတ်ဗ္စရ၊ “ယွံတၠညးသၟိၚ်ဇၞော် ခိုဟ်သန်ရ” ရဴဝွံ သ္ဂးတုဲ ဇဳဝက ကောန်သၟိၚ်အဘယ ဂပ်ဝ်လွဳလွတ်ဗ္စဂှ် ဒုၚ်ဝန် ကုသၟိၚ်ဗိမ္ဗိသာရ မၞုံယၟုသေနိယ တၠညးမဂဓရးတုဲ ပြာပ်အာဇရေၚ် သေဌဳတုဲမ္ဂး စၟတ်သမ္တီကေတ် အကာဲအရာမပၠန်ဂတးသေဌဳဂှ်တုဲ “ယွံသေဌဳဇၞော် တၠအဲ ယဝ်ဒှ်ဟွံမွဲကဵုယဲမ္ဂး၊ ဂြပ်ရတ်ဗၞတ်မုစိ ကဵုကုအဲရော?” ရဴဝွံ ဟီုသ္ဂးကဵုသေဌဳရ။ ယွံအ္စာ ဂြပ်ရတ်အဲသီုဖအိုတ်ကဵုဒှ်ဂြပ်အ္စာညိ၊ အဲလေဝ် ကြက်ဒှ်ဍိက်အ္စာရ ရဴဝွံ (သ္ဂးရ)။
ယွံသေဌဳဇၞော် တၠအဲ တၞဟ်နတိက် နကဵုသကဲမွဲလပါ် လုကဴထပှ်ဂိတုဂမၠိုၚ်ဂှ် သၟဟ်ရထဟာ ရဴဝွံ (သၟာန်ရ)။ ယွံအ္စာ အဲဍိက် တၞဟ်နတိက် နကဵုသကဲမွဲလပါ် လုကဴထပှ်ဂိတုဂမၠိုၚ်ဂှ် သၟဟ်ရထရ ရဴဝွံ (သ္ဂးရ)။ ယွံသေဌဳဇၞော် တၠအဲ တၞဟ်နတိက် နကဵုသကဲမရနုက်ကဵုၜါ လုကဴထပှ်ဂိတုဂမၠိုၚ်ဂှ် သၟဟ်ရထဟာ ရဴဝွံ (သၟာန်ရ)။ ယွံအ္စာ အဲဍိက် တၞဟ်နတိက် နကဵုသကဲမရနုက်ကဵုၜါ လုကဴထပှ်ဂိတုဂမၠိုၚ်ဂှ် သၟဟ်ရထရ ရဴဝွံ (သ္ဂးရ)။ ယွံသေဌဳဇၞော် တၠအဲ တၞဟ်နတိက်လံက်သ္ၚာ လုကဴထပှ်ဂိတုဂမၠိုၚ်ဂှ် သၟဟ်ရထဟာ ရဴဝွံ (သၟာန်ရ)။ ယွံအ္စာ အဲဍိက် တၞဟ်နတိက်လံက်သ္ၚာ လုကဴထပှ်ဂိတုဂမၠိုၚ်ဂှ် သၟဟ်ရထရ ရဴဝွံ (သ္ဂးရ)။
ပ္ဍဲအခိၚ်ဂှ် သဝ်ဇဳဝက ကောန်သၟိၚ်အဘယ မဂပ်ဝ်လွဳလွတ်ဗ္စဂှ် ကဵုသေဌဳ တိက်ပ္ဍဲဇံၚ်တုဲ ဒက်လဝ်ပ္ဍဲဇံၚ်ဗွဲမဗိုန်ဗတ်တုဲ ထိုက်ကယျာကၠေံ စၞာံဂၞါက္ဍဟ်တုဲမ္ဂး ပံက်ကၠေံဗ္စပ်ဂၞါက္ဍဟ်တုဲ ပတတ်ကၠေံ စၟဂမၠိုၚ်ၜါတုဲ “ယွံအမာတ်တအ် ဩဝ်သ္ၚေဝ်ရံၚ် စၟဂမၠိုၚ်ၜါတွံဝွံအိုတ်ညိ၊ မွဲဂှ် ဍောတ်ရ၊ မွဲဂှ်တုန် ဇၞော်ရ၊ အ္စာဂမၠိုၚ်မဟီုသ္ဂး ရဴဝွံ ‘သေဌဳဂှ် ပ္ဍဲတ္ၚဲမရနုက်ကဵုမသုန်ဂှ် ကြက်ဒးချိုတ်ရ’ ဂှ်တုန် ညးကေတ် စၟဇၞော်ဝွံရ၊ ပ္ဍဲတ္ၚဲမရနုက်ကဵုမသုန် ကၠေၚ်က္ဍဟ်သေဌဳဂှ် ကြက်အိုတ်အာရ၊ ဟိုတ်နူကၠေၚ်က္ဍဟ်အိုတ်အာဂှ်ရ သေဌဳကြက်ဒးချိုတ်ရ၊ အ္စာသဝ်ဂမၠိုၚ်ဂှ် ဂပ်ဝ်ညာတ်ဗွဲမ္ဒးရးရ။
အ္စာဂမၠိုၚ် မဟီုသ္ဂး ရဴဝွံ ‘သေဌဳဂှ် ပ္ဍဲတ္ၚဲမရနုက်ကဵုထပှ်ဂှ် ကြက်ဒးချိုတ်ရ’ ဂှ်တုန် ညးကေတ်စၟဍောတ်ဝွံရ၊ ပ္ဍဲတ္ၚဲမရနုက်ကဵုထပှ် ကၠေၚ်က္ဍဟ်သေဌဳဂှ် ကြက်အိုတ်အာရ၊ ဟိုတ်နူကၠေၚ်က္ဍဟ်အိုတ်အာဂှ်ရ သေဌဳ ကြက်ဒးချိုတ်ရ၊ အ္စာသဝ်ဂမၠိုၚ်ဂှ် ဂပ်ဝ်ညာတ် ဗွဲမ္ဒးရးရ” ရဴဝွံ ထ္စးကဵုဂကောံမၞိဟ်ရ။
ပ္ဍဲအခိၚ်ဂှ် သေဌဳဂှ် အခိၚ်မလောန်အာထပှ်တ္ၚဲ “ယွံအ္စာ အဲဍိက်တၞဟ်နတိက် နကဵုသကဲမွဲလပါ် လုကဴထပှ်ဂတုဂမၠိုၚ်ဂှ် ဟွံသၟဟ်ရထရ” ရဴဝွံ သ္ဂးကဵုသဝ်ဇဳဝက ကောန်သၟိၚ်အဘယ မဂပ်ဝ်လွဳလွတ်ဗ္စရ။ ယွံသေဌဳ တၠအဲဂှ် “ယွံအ္စာ အဲဍိက် တၞဟ်နတိက် နကဵုသကဲမွဲလပါ် လုကဴထပှ်ဂိတုဂမၠိုၚ်ဂှ် သၟဟ်ရထရ” ရဴဝွံ ဒုၚ်လဝ်ဝန် ကဵုအဲရ ဟွံသေၚ်ဟာ ရဴဝွံ (သၟာန်ရ)။ ယွံအ္စာ အဲဒုၚ်ဒးဝန်ဂှ်တုန် ဍာံပြရ၊ ၜိုန်ဍာံပြသာ်ဂှ်လေဝ် အဲဍိက် ဒးချိုတ်သဍေံရ၊ အဲဍိက် တၞဟ်နတိက် နကဵုသကဲမွဲလပါ် လုကဴထပှ်ဂိတုဂမၠိုၚ်ဂှ် ဟွံသၟဟ်ရထရ” ရဴဝွံ (သ္ဂးရ)။
ယွံသေဌဳ ဒှ်သာ်ဂှ်မ္ဂး တၠအဲ ဩဝ်တိက် နကဵုသကဲမရနုက်ကဵုၜါ လုကဴထပှ်ဂိတုဂမၠိုၚ်ညိ ရဴဝွံ (သ္ဂးရ)။ ကြဴနူဂှ် သေဌဳဂှ် အခိၚ်မလောန်အာထပှ်တ္ၚဲ “ယွံအ္စာ အဲဍိက် တၞဟ်နတိက် နကဵုသကဲမွဲမရနုက်ကဵုၜါ လုကကဴထပှ်ဂိတုဂမၠိုၚ်ဂှ် ဟွံသၟဟ်ရထရ” ရဴဝွံ သ္ဂးကဳုသဝ်ဇဳဝက ကောန်သၟိၚ်အဘယ မဂပ်ဝ်လွဳလွတ်ဗ္စရ။ ယွံသေဌဳ တၠအဲဂှ် “ယွံအ္စာ အဲဍိက် တၞဟ်နတိက် နကဵုသကဲမရနုက်ကဵုၜါ လုကဴထပှ်ဂိတုဂမၠိုၚ်ဂှ် သၟဟ်ရထရ” ရဴဝွံ ဒုၚ်လဝ်ဝန် ကဵုအဲရ ဟွံသေၚ်ဟာ ရဴဝွံ (သၟာန်ရ)။ ယွံအ္စာ အဲဒုၚ်လဝ်ဝန်ဂှ်တုန် ဍာံပြရ၊ ၜိုန်ဍာံပြသာ်ဂှ်လေဝ် အဲဍိက် ဒးချိုတ်သဍေံရ၊ အဲဍိက် တၞဟ်နတိက် နကဵုသကဲမရနုက်ကဵုၜါ လုကဴထပှ်ဂိတုဂမၠိုၚ်ဂှ် ဟွံသၟဟ်ရထရ” ရဴဝွံ (သ္ဂးရ)။ ယွံသေဌဳ ဒှ်သာ်ဂှ်မ္ဂး တၠအဲ ဩဝ်တိက်လံက်လ္ၚာ လုကဴထပှ်ဂိတုဂမၠိုၚ်ညိ ရဴဝွံ (သ္ဂးရ)။
ကြဴနူဂှ် သေဌဳဂှ် အခိၚ်မလောန်အာထပှ်တ္ၚဲ “ယွံအ္စာ “ယွံအ္စာ အဲဍိက် တၞဟ်နတက်လံက်သ္ၚာ လုကဴထပှ်ဂတုဂမၠိုၚ်ဂှ် ဟွံသၟဟ်ရထရ” ရဴဝွံ သ္ဂးကဵုသဝ်ဇဳဝက ကောန်သၟိၚ်အဘယ မဂပ်ဝ်လွဳလွတ်ဗ္စရ။ ယွံသေဌဳ တၠအဲဂှ် “ယွံအ္စာ အဲဍိက် တၞဟ်နတိက်လံက်လ္ၚာ လုကဴထပှ်ဂိတုဂမၠိုၚ်ဂှ် သၟဟ်ရထရ” ရဴဝွံ ဒုၚ်လဝ်ဝန် ကဵုအဲရ ဟွံသေၚ်ဟာ ရဴဝွံ (သၟာန်ရ)။ ယွံအ္စာ အဲဒုၚ်ဒးဝန်ဂှ်တုန် ဍာံပြရ၊ ၜိုန်ဍာံပြသာ်ဂှ်လေဝ် အဲဍိက် ဒးချိုတ်သဍေံရ၊ အဲဍိက် တၞဟ်နတိက်လံက်လ္ၚာ လုကဴထပှ်ဂိတုဂမၠိုၚ်ဂှ် ဟွံသၟဟ်ရထရ” ရဴဝွံ (သ္ဂးရ)။
ယွံသေဌဳဇၞော် အဲ ယဝ်ဟွံဟီုဂလာန်ဝွံမ္ဂး၊ တၠအဲ စဵုကဵုဗၞတ်လလအ်ဝွံ တိက်ဟွံသေၚ်ရ၊ ဗွဲစၟတ်တုန် ပြဟ်ပြဟ်ဂှ်ဟေၚ် “နပိသတ္တာဂမၠိုၚ် သေဌဳဇၞော် ကြက်ယဲဗၠးရ” ရဴဝွံ အဲတီဒၟံၚ်ရ။ ယွံသေဌဳဇၞော် ဩဝ်ကတဵုညိ၊ ယဲဟွံမွဲရ၊ လာဘ်ဗ္ဇဴ ထေက်ကဵုဒးကဵုကုအဲ ဗၞတ်ၜိုတ်လဵုဂှ် ဩဝ်တီကေတ်ညိ ရဴဝွံ သ္ဂးရ။
ယွံအ္စာ ဂြပ်ရတ်သီုဖအိုတ်ဂှ် ကဵုဒှ်ဂြပ်အ္စာညိ၊ အဲဍိက်လေဝ် ကြက်ဒှ်ဍိက်အ္စာရ၊ ရဴဝွံ သ္ဂးရ။ ယွံသေဌဳ ဟွံဗဗွဲရ၊ တၠအဲ လ္ပကဵုအဲ ဂြပ်ရတ်အဲသီုဖအိုတ်ညိ၊ ဍိက်အဲလေဝ် လ္ပဒှ်ညိ၊ ဩဝ်ကဵု ကုသၟိၚ်ဇၞော် ကသပ်မွဲကိုဋ်ညိ၊ ကုအဲလေဝ် ဩဝ်ကသာပ်မွဲကိုဋ်ညိ ရဴဝွံ သ္ဂးရ။ ပ္ဍဲအခိၚ်ဂှ် သေဌဳဇၞော်ဂှ် ဟွံမွဲကဵုယဲဒှ်တုဲ ကတဵုတဴ ကုသၟိၚ်ဇၞော် ကသာပ်မွဲကိုဋ် ကုသဝ်ဇဳဝက မၞုံယၟုကောမရဘစ္စ ကသာပ်မွဲကိုဋ်ရ။
