၂၀၄။ ဝတ္ထုသၟိၚ်ဗိမ္ဗိသာရ
၃၃၁။ ပ္ဍဲအခိၚ်ဂှ် ယဲဘဂန္ဒိုလ် ‘ယဲဒူလာဆီပါ’ ဒှ်ဒၟံၚ်ကုသၟိၚ်ဗိမ္ဗိသာရ မၞုံယၟုသေနိယ တၠညးမဂဓရးရ၊ ဂၠိက်ဗိုက်ဂမၠိုၚ် ကၠေဝ်ဗာန်ဒၟံၚ်ဆီအိုတ်ရ၊ အခိၚ်ဂၞကျာ်ဂမၠိုၚ် ညာတ်ဒးဂှ် “ပ္ဍဲအခိၚ်လၟုဟ် တၠညးသၟိၚ်ဇၞော် ဥတုကၠုၚ်ဒၟံၚ်ရ၊ ကဴဥတုရာၚ်ဒၟံၚ် ကုတၠညးသၟိၚ်ဇၞော်ရ၊ တၠညးသၟိၚ်ဇၞော် ခြာဟွံလအ် ၜံၚ်သၠးကောန်ရ” ရဴဝွံ သ္ပဝေၚ်ဂရိၚ်စရဵုအိုတ်ရ။ ဟိုတ်မသ္ပဝေၚ်ဂရိုၚ်စရဵုဂှ်ရ သၟိၚ်ဇၞော် မုက်မတ်ဟွံကျေဝ် ဒှ်အာရ။
ပ္ဍဲအခိၚ်ဂှ် သၟိၚ်ဗိမ္ဗိသာရ မၞုံယၟုသေနိယ တၠညးမဂဓရးဂှ် “ယွံကောန်သၟိၚ်ဗၠာဲအဘယ ယဲဘဂန္ဒိုလ် ‘ယဲဒူလာဆီပါ’ မၞုံသဘဴသာ်ဂှ် ဒှ်ဒၟံၚ်ကုအဲရ၊ ဂၠိက်ဗိုက်ဂမၠိုၚ် ကၠေဝ်ဗာန်ဒၟံၚ်ဆီအိုတ်ရ၊ ဂၞကျာ်ဂမၠိုၚ် အခိၚ်ညာတ်ဒးအဲဂှ် ပ္ဍဲအခိၚ်လၟုဟ် တၠညးသၟိၚ်ဇၞော် ဥတုကၠုၚ်ဒၟံၚ်ရ၊ ကဴဥတုရာၚ်ဒၟံၚ် ကုတၠညးသၟိၚ်ဇၞော်ရ၊ တၠညးသၟိၚ်ဇၞော် ခြာဟွံလအ် ၜံၚ်သၠးကောန်ရ ရဴဝွံ သ္ပဝေၚ်ဂရိၚ်စရဵုအိုတ်ရ၊ ယွံအဘယ ဗတိုက်ဗအောဝ်ရ၊ ဩဝ်တီကေတ် အ္စာသဝ် မဝဳဗလးကဵုအဲမာန်ညိ” ရဴဝွံ ဟီုသ္ဂးကဵုကောန်သၟိၚ်ဗၠာဲအဘယရ။
ယွံတၠညးသၟိၚ်ဇၞော် အ္စာသဝ်မၞုံယၟုဇဳဝက ပိုဲဍိက်တအ်ညးဂမၠိုၚ်ဝွံ ဍောတ်လေဝ်ဍောတ်သွတ်ရ၊ ခိုဟ်လေဝ်ခိုဟ်ရ၊ အ္စာသဝ်ဂှ် ကြက်ဝဳဗလး တၠညးသၟိၚ်ဇၞော်မာန်ရ ရဴဝွံ (ဟီုသ္ဂးရ)။ ယွံအဘယ ဒှ်သာ်ဂှ်မ္ဂး ဩဝ်ဖအောဝ်ဗလးနၚ် အ္စာသဝ်ဇဳဝကညိ၊ အ္စာသဝ်ဂှ် ကြက်ဝဳ ကဵုအဲရ ရဴဝွံ (ဟီုသ္ဂးရ)။
ပ္ဍဲအခိၚ်ဂှ် ကောန်သၟိၚ်ဗၠာဲအဘယဂှ် “အမာံဇဳဝက ဩဝ်အာညိ၊ ဩဝ်ဝဳ သၟိၚ်ဇၞော်ညိ” ရဴဝွံ ဖအောဝ်ဏာ ကောန်လွဳဗ္စဳဝကရ။ “ယွံတၠညးကောန်သၟိၚ်ဗၠာဲ ခိုဟ်ရ” ရဴဝွံ သ္ဂးတုဲ ဇဳဝက ကောန်သၟိၚ်အဘယ ဂပ်ဝလွဳလွတ်ဗ္စဂှ် ဒုၚ်ဝန် ကုကောန်သၟိၚ်ဗၠာဲအဘယတုဲ ဂိုၚ်ကေတ်ဂဥုဲ နကဵုသၞေမ်တဲတုဲ ပြာပ်အာဇရေၚ်သၟိၚ်ဗိမ္ဗိသာရ တၠညးသၟိၚ်ဇၞော်ရ” ရဴဝွံ ဂရၚ်ပတီရ။ ပ္ဍဲအခိၚ်ဂှ ်သဝ်ဇဳဝက ကောန်သၟိၚ်အဘယ ဂပ်ဝ်လွဳလွတ်ဗ္စဂှ် နမလံက်ကဵုဂရုဲ ဗၞတ်မွဲအလန်ဓဝ်ဟေၚ် ပါဲနုက်ကၠေံ ယဲဘဂန္ဒိုလ် ‘ဒူလာဆီပါ’ သၟိၚ်ဗိမ္ဗိသာရ မၞုံယၟုသေနိယ တၠညးမဂဓရးရ။
ပ္ဍဲအခိၚ်ဂှ် သၟိၚ်ဗိမ္ဗိသာရ မၞုံယၟုသေနိယ တၠညးမဂဓရး ဟွံမွဲကဵုယဲဒှ်တုဲ ကဵုဗြဴဂမၠိုၚ်မသုန်ကၠံ ကျိုၚ်ကယျိုၚ်ကယျဝ် အလုံအိုတ်သီုတုဲမ္ဂး ကဵုသၠောတ်ကၠေံမွဲလှ်ေပၠန် ကဵုဗွဝ်ဖအုံလဝ်တုဲ “အမာံဇဳဝက ကျိုၚ်ကယျိုၚ်ကယျဝ် အလုံအိုတ်သီု ဗြဴဂမၠိုၚ်မစမသုန်ကၠံဝွံ ဩဝ်ကဵုဒှ်ကုတၠအဲညိ” ရဴဝွံ သ္ဂးကဵုဇဳဝက ကောန်သၟိၚ်အဘယ ဂပ်ဝ်လွဳလွတ်ဗ္စရ။
ယွံတၠညးသၟိၚ်ဇၞော် ဟွံမွဲပၟိက်ရ၊ သၟိၚ်ဇၞော် မိက်ကဵုဗှ်ဗၞုဟ်ဂွံဒၟံၚ်သတိဂုဏ်အဲဍိက်ရ ရဴဝွံ (ဂရၚ်ပတီရ)။ အမာံဇဳဝက ဒှ်သာ်ဂှ်မ္ဂး ဩဝ်ကၠောန်ၜိုတ် အဲကီု ဂကောံကမၠောၚ်မောၚ်မကီု သၚ်မၞုံပဓာန်ဍေံကျာ်တြဲညိ ရဴဝွံ (သ္ဂးရ)။ “ယွံတၠညးသၟိၚ်ဇၞော် ခိုဟ်သန်ရ” ရဴဝွံ သ္ဂးတုဲ ဇဳဝက ကောန်သၟိၚ်အဘာယ ဂပ်ဝ်လွဳလွတ်ဗ္စဂှဋ္ဌ် ဒုၚ်ဝန် ကုသၟိၚ်ဗိမ္ဗိသာရ မၞုံယၟုသေနိယ တၠညးမဂဓရးရ။
