၂၀၃။ ဝတ္ထုဂၞကျာ်သေဌဳ
၃၃၀။ ပ္ဍဲအခိၚ်ဂှ် ပ္ဍဲဍုၚ်သာကေတ ကုဂၞကျာ်သေဌဳဂှ် ဒှ်ဒၟံၚ်ယဲဂိက္ဍိုပ် ဗၞတ်ထပှ်သၞာံရ၊ အ္စာသဝ်ဇၞော်ဒိသာပါမောက္ခဂမၠိုၚ်မဂၠိုၚ်ဂၠၚ် ကၠုၚ်တုဲ တၞဟ်နဝဳဗလး စဵုကဵုယဲဗၠးဂှ် ဟွံသၟဟ်ရထအိုတ်ရ၊ ဂိုၚ်ကေတ် ထဝ်သြန်မဂၠိုၚ်တုဲ အာအိုတ်ရ။
ပ္ဍဲအခိၚ်ဂှ် ဇဳဝက ကောန်သၟိၚ်အဘယ မဂပ်ဝ်လွဳလွတ်ဗ္စဂှ် လုပ်ကၠုၚ်ဍုၚ်သာကေတတုဲမ္ဂး “ယွံမၞးတအ် မုရဴညးမွဲ ဂိယဲဒၟံၚ်ရော? သ္ဂောံဝဳကဵုညးလဵုမွဲရော?” ရဴဝွံ သၟာန်မၞိဟ်ဂမၠိုၚ်ရ၊ ယွံအ္စာ ကုဂၞကျာ်သေဌဳဝွံ ဒှ်ဒၟံၚ်ယဲဂိက္ဍိုပ် ဗၞတ်ထပှ်သၞာံရ၊ အ္စာ ဩဝ်အာညိ၊ ဩဝ်ဝဳဗလးဂၞကျာ်သေဌဳညိ ရဴဝွံ (ဟီုသ္ဂးရ)။ ပ္ဍဲအခိၚ်ဂှ် ဇဳဝက ကောန်သၟိၚ်အဘယ မဂပ်ဝ်လွဳလွတ်ဗ္စ ပြာပ်အာသ္ၚိသေဌဳတုဲမ္ဂး ယွံပၟၚ်တြၚ် ဩဝ်အာညိ၊ “ယွံနာဲဗြဴ အ္စာသဝ်ကၠုၚ်ရ၊ အ္စာသဝ်ဂှ် မိက်သ္ၚေဝ်ရံၚ် တၠအဲဂၞကျာ်သေဌဳရ ရဴဝွံ ဩဝ်အာဟီုလဴညိ” ရဴဝွံ ဖအောဝ်စကာ ပၟၚ်တြၚ်ရ။
“ယွံအ္စာ ခိုဟ်သန်ရ” ရဴဝွံ ပၟၚ်တြၚ်ဂှ် ဒုၚ်ဝန် ကုဇဳဝက ကောန်သၟိၚ်အဘယ မဂပ်ဝ်လွဳလွတ်ဗ္စတုဲ ပြာပ်အာဇရေၚ် ဂၞကျာ်သေဌဳတုဲမ္ဂး “ယွံနာဲဗြဴ အ္စာသဝ်ကၠုၚ်စိုပ်ရ၊ အ္စာသဝ်ဂှ် မိက်သ္ၚေဝ်ရံၚ် တၠအဲဂၞကျာ်သေဌဳရ” ရဴဝွံ ဟီုသ္ဂးကဵုဂၞကျာ်သေဌဳရ။ အမာံပၟၚ်တြၚ် အ္စာသဝ်ဂှ် မၞုံအဝယ်ဗၞတ်လဵုရော? ရဴဝွံ (သၟာန်ရ)။ ဒှ်ညးဍောတ်သွတ်ရ ယွံနာဲဗြဴ ရဴဝွံ (ဟီုသ္ဂးရ)။ အမာံပၟၚ်တြၚ် ဟွံဗဗွဲရ၊ အ္စာသဝ်မဍောတ်သွတ် ပသာ်ဂွံသ္ပမာန် ကုအဲရော? အ္စာသဝ်ဒိသာပါမောက္ခဂမၠိုၚ် ဇၞော်ဇၞော်မဂၠိုၚ်ဂှ် ကၠုၚ်တုဲ တၞဟ်နဝဳဗလး စဵုကဵုယဲဗၠးဂှ် ဟွံသၟဟ်ရထအိုတ်ရ၊ ဂိုၚ်ကေတ် ထဝ်သြန်မဂၠိုၚ်တုဲ အာအိုတ်ရ ရဴဝွံ (ဟီုသ္ဂးရ)။
ပ္ဍဲအခိၚ်ဂှ် ပၟၚ်တြၚ်ဂှ် ပြာပ်အာဇရေၚ် ဇဳဝက ကောန်သၟိၚ်အဘယ မဂပ်ဝ်လွဳလွတ်ဗ္စတုဲ “ယွံအ္စာ ဂၞကျာ်သေဌဳဂှ် အမာံပၟၚ်တြၚ် ဟွံဗဗွဲရ၊ အ္စာသဝ်မဍောတ်သွတ် ပသာ်ဂွံသ္ပမာန်ကုအဲရော? အ္စာသဝ်ဒိသာပါမောက္ခဂမၠိုၚ် ဇၞော်ဇၞော်မဂၠိုၚ်ဂှ် ကၠုၚ်တုဲ တၞဟ်နဝဳဗလး စဵုကဵုယဲဗၠးဂှ် ဟွံသၟဟ်ရထအိုတ်ရ၊ ဂိုၚ်ကေတ် ထဝ်သြန်မဂၠိုၚ်တုဲ အာအိုတ်ရ” ရဴဝွံ ဟီုသ္ဂးရဂှ် ဟီုသ္ဂးကဵု ဇဳဝက ကောန်သၟိၚ်အဘယ မဂပ်ဝ်လွဳလွတ်ဗ္စရ။
ယွံပၟၚ်တြၚ် ဩဝ်အာညိ၊ “ယွံနာဲဗြဴ ကိုပ်ကၠာယဲဟွံဗၠးဏီ လ္ပကဵုၚုဟ်မမိက်ကဵုမွဲမွဲညိ၊ အခိၚ်ဗၠးနူယဲမှ ဝတ္ထုမိက်ဂွံကဵုဂှ် ဩဝ်ကဵုညိ” ရဴဝွံ အ္စာသဝ်ဂှ် ဟီုရ ရဴဝွံ ဩဝ်အာဟီုကဵု ဂၞကျာ်သေဌဳညိဂှ် ဖအောဝ်စကာ ပၟၚ်တြၚ်ရ။ “ယွံအ္စာ ခိုဟ်သန်ရ” ရဴဝွံ ပၟၚ်တြၚ်ဂှ် ဒုၚ်ဝန်ကုဇဳဝက ကောန်သၟိၚ်အဘယ မဂပ်ဝ်လွဳလွတ်ဗ္စတုဲ ပြာပ်အာဇရေၚ် ဂၞကျာ်သေဌဳတုဲမ္ဂး “ယွံနာဲဗြဴ ကိုပ်ကၠာယဲဟွံဗၠးဏီ လ္ပကဵုၚုဟ်မမိက်ကဵုမွဲမွဲညိ၊ အခိၚ်ဗၠးနူယဲမှ ဝတ္ထုမိက်ဂွံကဵုဂှ် ဩဝ်ကဵုညိ” ရဴဝွံ အ္စာသဝ်ဂှ် ဟီုရ ရဴဝွံ ဟီုသ္ဂးကဵုဂၞကျာ်သေဌဳရ။
အမာံပၟၚ်တြၚ် ဒှ်သာ်ဂှ်မ္ဂး ကဵုအ္စာသဝ်ကၠုၚ်ညိ ရဴဝွံ (ဟီုသ္ဂးရ)။ “ယွံနာဲဗြဴ ခိုဟ်သန်ရ” ရဴဝွံ သ္ဂးတုဲ ပၟၚ်တြၚ်ဂှ် ဒုၚ်ဝန် ကုဂၞကျာ်သေဌဳတုဲ ပြာပ်အာဇရေၚ် ဇဳဝက ကောန်သၟိၚ်အဘယ မဂပ်ဝ်လွဳလွတ်ဗ္စတုဲ “ယွံအ္စာ ဂၞကျာ်သေဌဳဂှ် ကော်ဒၟံၚ်တၠအဲရ” ရဴဝွံ ဟီုသ္ဂးကဵုဇဳဝက ကောန်သၟိၚ်အဘယ မဂပ်ဝ်လွဳလွတ်ဗ္စရ။
ပ္ဍဲအခိၚ်ဂှ် ဇဳဝက ကောန်သၟိၚ်အဘယ မဂပ်ဝ်လွဳလွတ်ဗ္စဂှ် ပြာပ်အာဇရေၚ် ဂၞကျာ်သေဌဳတုဲမ္ဂး သမ္တီကေတ် ပွမပၠန်ဂတးဂၞကျာ်သေဌဳတုဲ “ယွံနာဲဗြဴ နွံပၟိက်ကဵုကၠေၚ်သွဟ် မွဲဇၚာၚ်တဲရ” ရဴဝွံ ဟီုသ္ဂးကဵုဂၞကျာ်သေဌဳရ။ ပ္ဍဲအခိၚ်ဂှ် ဂၞကျာ်သေဌဳဂှ် ဖအောဝ်ကဵု ကဵုကၠေၚ်သွဟ်မွဲဇၚာၚ်တဲ ဇဳဝက ကောန်သၟိၚ်အဘယ မဂပ်ဝ်လွဳလွတ်ဗ္စရ။ ပ္ဍဲအခိၚ်ဂှ် ဇဳဝက ကောန်သၟိၚ်အဘယ မဂပ်ဝ်လွဳလွတ်ဗ္စဂှ် ဖျိန်ကၠေံ ကၠေၚ်သွဟ်မွဲဇၚာၚ်တဲဂှ် နကဵုဂဥုဲတၞဟ်တၞဟ်နတုဲ ကဵုဂၞကျာ်သေဌဳ တိက်လံက်လ္ၚာ ပ္ဍဲလတူဇံၚ်တုဲ ကဵုခရောတ်နုဟ်ရ။ ပ္ဍဲအခိၚ်ဂှ် ကၠေၚ်သွဟ်ကဵုခရောတ်ပၠုပ်ဂှ် ဇအအ်တိတ်ကၠုၚ် နူပါၚ်ရ။
ပ္ဍဲအခိၚ်ဂှ် ဂၞကျာ်သေဌဳဂှ် ချပ်စုတ်ပ္ဍဲထၟာဲချဟ် (ထၟာဲတဲ) တုဲ “ဟာဲဍိက်ဗြဴ ကၠေၚ်သွဟ်ဝွံ ဩဝ်ဍာပ်ကေတ် နကဵုတောဝ်ချဵုညိ” ရဴဝွံ ဖအောဝ်စကာ ဍိက်ဗြဴရ။ ပ္ဍဲအခိၚ်ဂှ် ကုဇဳဝက ကောန်သၟိၚ်အဘယ မဂပ်ဝ်လွဳလွတ်ဗ္စဂှ် “ဩဒးအမ်သဝ်ကွေံရသွံ၊ တၠသ္ၚိဗြဴဝွံတုန် သအေတ်သပါန် ဂဗိဂမ္တက်လောန်ရသွံ၊ သီုကဵုဒှ်တဴ သေဌဳၝောံလေဝ် ကၠေၚ်သွဟ်မၞုံသဘဴ မဂပ်ဝ်ကၠဟ်ထောံဝွံ ကဵုဍာပ်ကေတ် နကဵုတောဝ်ချဵုဏီရ၊ အဲဒးဖက်လဝ်ဂဥုဲဂမၠိုၚ် မထေက်ကဵုၚုဟ်မးမဂၠိုၚ်အိုတ်ရ၊ တၠသ္ၚိဗြဴဂၞကျာ်သေဌဳဝွံ သာ်လဵုဂွံကဵု ဝတ္ထုမမိက်ကဵုမွဲမွဲ ကုအဲရော?” ရဴဝွံ ကသပ်ဒှ်ကၠုၚ်ရ။
ပ္ဍဲအခိၚ်ဂှ် ဂၞကျာ်သေဌဳဂှ် သမ္တီကေတ် အကာဲအရာမပၠန်ဂတး ဇဳဝက ကောန်သၟိၚ်အဘယ မဂပ်ဝ်လွဳလွတ်ဗ္စတုဲ “ယွံအ္စာ တၠအဲ မုဟိုတ် ဒှ်သၠိုက်သ္ၚောံစိုတ်ရော?” ရဴဝွံ သ္ဂးကဵုဇဳဝက ကောန်သၟိၚ်အဘယ မဂပ်ဝ်လွဳလွတ်ဗ္စရ။ ကုအဲဂှ် “ဩဒးအမ်သဝ်ကွေံရသွံ၊ တၠသ္ၚိဗြဴဝွံတုန် သအေတ်သဗါန် ဂဗိဂမ္တက်လောန်ရသွံ၊ သီုကဵုဒှ်တဴ သေဌဳၝောံလေဝ် ကၠေၚ်သွဟ်မၞုံသဘဴ မဂပ်ဝ်ကၠဟ်ထောံဝွံ ကဵုဍာပ်ကေတ် နကဵုတောဝ်ချဵုဏီရ၊ အဲဒးဖက်လဝ်ဂဥုဲဂမၠိုၚ် မထေက်ကဵုၚုဟ်မး မဂၠိုၚ်အိုတ်ရ၊ တၠသ္ၚိဗြဴဂၞကျာ်သေဌဳဝွံ သာ်လဵုဂွံကဵု ဝတ္ထုမမိက်ကဵုမွဲမွဲကုအဲရော?” ရဴဝွံ ကသပ်ဒှ်ကၠုၚ်ရဂှ် ဟီုသ္ဂးရ။
ယွံအ္စာ ပိုဲတအ်ညးပဒတဴသ္ၚိကၟိန်ဂမၠိုၚ်မ္ဂးဂှ် တီကတ် ဂုဏ်ဝဳဗလးကဵု ဂုဏ်ပတိတ်ဗလး ကဵုနူယဲဂှ်အိုတ်ရ၊ ကၠေၚ်သွဟ်ဝွံ ကုဍိက်ဂမၠိုၚ်ကီု ကုသၟာကမၠောန်ဂမၠိုၚ်ကီု သွက်ဂွံလံၚ်ဇိုၚ် ခိုဟ်ဏီရ၊ သွက်ဂွံစုတ် ပ္ဍဲပၟတ်ကၠေၚ်သ္ဍဴလေဝ် ခိုဟ်ဏီရ၊ ယွံအ္စာ တၠအဲ လ္ပဒှ်သၠိုက်သ္ၚောံစိုတ်ညိ၊ ၚုဟ်မး မထေက်ကဵုကဵုကုတၠအဲဂှ် ဟွံကဵုဟုတ်ယုတ်ရ ရဴဝွံ (ဟီုသ္ဂးရ)။ ပ္ဍဲအခိၚ်ဂှ် ဇဳဝက ကောန်သၟိၚ်အဘယ မဂပ်ဝ်လွဳလွတ်ဗ္စဂှ် နအယာံမာတ် ကဵုခရောတ်နုဟ် မွဲအလန်ဓဝ်ဂှ် ပါဲနုက်ကၠေံ ယဲဂိက္ဍိုပ် ဂၞကျာ်သေဌဳ ဒှ်ဒၟံၚ်ထပှ်သၞာံရ။
ပ္ဍဲအခိၚ်ဂှ် ဂၞကျာ်သေဌဳဂှ် ဟွံမွဲကဵုယဲမ္ဂး ကဵုတဴကသာပ်ဂမၠိုၚ်ပန်လ္ၚီ ကုဇဳဝက ကောန်သၟိၚ်အဘယ မဂပ်ဝ်လွဳလွတ်ဗ္စတုဲရ၊ ကောန်ဂှ်လေဝ် “မိယာဲအဲ ဟွံမွဲကဵုယဲတုဲ ဂွံတန်တဴရ” ရဴဝွံ ကဵုတဴကသာပ်ဂမၠိုၚ်ပန်လ္ၚီရ၊ ကောန်ခအှ်ဗြဴလေဝ် “ခါမ်သဳၝောံအဲ ဟွံမွဲကဵုယဲတုဲ ဂွံတန်တဴရ” ရဴဝွံ ကဵုတဴကသာပ်ဂမၠိုၚ်ပန်လ္ၚီရ၊ သေဌဳဇၞော်လေဝ် “သမ္ဘာအဲ ဟွံမွဲကဵုယဲတုဲ ဂွံတန်တဴရ” ရဴဝွံ ကဵုတဴကသာပ်ဂမၠိုၚ်ပန်လ္ၚီ ကေုာံဍိက်တြုံဍိက်ဗြဴ ကွဳချေဴဂမၠိုၚ်ရ။
ပ္ဍဲအခိၚ်ဂှ် ဇဳဝက ကောန်သၟိၚ်အဘယ မဂပ်ဝ်လွဳလွတ်ဗ္စဂှ် ဂိုၚ်ကေတ်ကသာပ်ဂမၠိုၚ်မွဲဠက်တြဴလ္ၚီ ကေုာံဍိက်တြုံဍိက်ဗြဴ ကွဳချေံဂမၠိုၚ်တုဲ အာဍုၚ်ရာဇဂြိုဟ်ရ။ အတိုၚ်လၟေၚ်လၟေၚ်အာမ္ဂး ပြာပ်စိုပ်အာ ဍုၚ်ရာဇဂြိုဟ် ဇရေၚ်ကောန်သၟိၚ်ဗၠာဲအဘယတုဲမ္ဂး “ယွံတၠညးကောန်သၟိၚ်ဗၠာဲ အလုံသီုဖအိုတ် မတွံဂး ကသာပ်ဂမၠိုၚ် မွဲဠက်တြဴလ္ၚီ ကေုာံဍိက်တြုံဍိက်ဗြဴ ကွဳချေံဝွံ ဟိုတ်နူကမၠောန်ဝဳယဲ အဲကလိဂွံဗွဲကိုပ်ကၠာအိုတ်ရ၊ တၠညးကောန်သၟိၚ်ဗၠာ မိက်ကဵုဒုၚ်ဂိုၚ်ကေတ် ဂုဏ်မလွဳလွတ်ဗ္စလဝ်အဲရ” ရဴဝွံ သ္ဂးကဵုကောန်သၟိၚ်အဘယရ။
အမာံဇဳဝက ကောတ်ရ ဩဝ်ကဵုဒှ်ကုတၠအဲဟေၚ်ညိ၊ ဩဝ်သိုၚ်ခၞံသ္ၚိဒၟံၚ် ပ္ဍဲအပ္ဍဲသ္ၚိအဲဟေၚ်ညိ ရဴဝွံ (ဟီုသ္ဂးရ)။ “ယွံတၠညးကောန်သၟိၚ်ဗၠာဲ ခိုဟ်သန်ရ” ရဴဝွံ ဇဳဝ ကောန်သၟိၚ်အဘယ မဂပ်ဝ်လွဳလွတ်ဗ္စ ဒုၚ်ဝန် ကုကောန်သၟိၚ်ဗၠာဲအဘယတုဲ သိုၚ်ခၞံသ္ၚိ ပ္ဍဲအပ္ဍဲသ္ၚိကောန်သၟိၚ်ဗၠာဲအဘယရ။
