၂၀၂။ ဝတ္ထုသဝ်ဇဳဝက
၃၂၆။ ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဝေဠုဝန် မဒှ်ဒၞာဲကဵုစၞ ကုယန်လမ္စံက်ဂမၠိုၚ် ဇရေၚ်ဍုၚ်ရာဇဂြိုဟ်ဂှ် ဍုၚ်ဝေသာလဳ ဍိုက်ပေၚ်သ္ဂေဟ်သွဟ်ရ၊ ဂီုကၠီု ဖဲသအဳရ၊ မၞုံကဵုလၟိဟ်မၞိဟ်ဂၠိုၚ်ရ၊ တ္ၜောန်တ္ၜောဲနှဲရဴတဴ နကဵုဂကူမၞိဟ်စုၚ်ရ၊ စၞစလှဲလးရ၊ ပြသာဒ်ဂမၠိုၚ် ထပှ်လ္ၚီ ထပှ်ကၠံ ထပှ်မကီု၊ သ္ၚိမၞုံကဵုအထောဋ်သ္ၚိကၠတ်ဂမၠိုၚ် ထပှ်လ္ၚီ ထပှ်ကၠံ ထပှ်မကီု၊ အာရှာံဂမၠိုၚ် ထပှ်လ္ၚီ ထပှ်ကၠံ ထပှ်မကီု၊ ကၟာဂမၠိုၚ် ထပှ်လ္ၚီ ထပှ်ကၠံ ထပှ်မကီု နွံအိုတ်ရ။
သအာၚ်နူဂှ် ဗြဴစရာဲဍုၚ်အမ္ဗပါလဳ ရုပ်သာ်ကျေဝ်ဂေါဝ်လောန်ရ၊ ထေက်ကဵုဗဵုသ္ၚေဝ်ခိုဟ်ရ၊ ကဵုစိုတ်ဇြုၚ်ကေဝ်မာန်ရ၊ ဍိုက်ပေၚ်တဴ ကေုာံသာ်သဏ္ဌာန်မပြဲရ၊ ပ္ဍဲပွမလှ်ေကီု ပ္ဍဲပွမဂယှ်ေဒွက်ကီု ပ္ဍဲပွမတိၚ်ကွိၚ်ကွိုက်ကီု စဳကၠးဆိုက်ဗ္ဒက်ရ၊ မၞိဟ်မၞုံပၟိက်ဂမၠိုၚ် ဂပ်ဝ်ပြာပ်အာစိုပ်ဒှ်တုဲ နကဵုမသုန်စှ်ေကသာပ်လေဝ် ဂွံအာကၠုၚ် ပ္ဍဲအခိၚ်ဗ္တံရ၊ ဟိုတ်နူဗြဴစရာဲဍုၚ်ဂှ်လေဝ် ဍုၚ်ဝေသာလဳ ရာၚ်ဆာဲ လောန်ကဵုဗၞတ်တွဵုရ။
ပ္ဍဲအခိၚ်ဂှ် မၞိဟ်ဇၞော်ကွာန်ကဆံၚ်လတူ ကောန်ညးရးရာဇဂြိုဟ် နကဵုကမၠောန်ကေၚ်ကာမမိက်ကဵုမွဲမွဲ အာဍုၚ်ဝေသာလဳရ၊ မၞိဟ်ဇၞော်ကွာန်ကဆံၚ်လတူ ကောန်ညးရးရာဇဂြိုဟ်ဂှ် ညာတ်ဒးအာ ဍုၚ်ဝေသာလဳ မဍိုက်ပေၚ်သ္ဂေဟ်သွဟ် မဂီုကၠီုဖဲသအဳ မၞုံကဵုလၟိဟ်မၞိဟ်ဂၠိုၚ်၊ မတ္ၜောန်တ္ၜောဲ နှဴရဴတဴ နကဵုဂကူမၞိဟ်စုၚ် စၞစလှဲလးရ၊ ညာတ်ဒးအာ ပြာသာဒ်ဂမၠိုၚ် ထပှ်လ္ၚီထပှ်ကၠံ ထပှ်မကီု သ္ၚိမၞုံကဵုအထောဋ်သ္ၚိကၠတ်ဂမၠိုၚ် ထပှ်လ္ၚီ ထပှ်ကၠံ ထပှ်မကီု အာရှာမ်ဂမၠိုၚ်ထပှ်လ္ၚီ ထပှ်ကၠံ ထပှ်မကီု ကၟာဂမၠိုၚ် ထပှ်လ္ၚီ ထပှ်ကၠံ ထပှ်မကီုရ။
ညာတ်ဒးအာ ဗြဴစရာဲဍုၚ်အမ္ဗပါလဳ ရုပ်သာ်ကျေဝ်ဂေါဝ်လောန် ထေက်ကဵုဗဵုသ္ၚေဝ်ခိုဟ်ကဵုစိုတ်ဇြုၚ်ကေဝ်မာန် မဍိုက်ပေၚ်တဴ ကေုာံသာ်သဏ္ဌာန်မပြဲ မစဳကၠးဆိုက်ဗ္ဒက် ပ္ဍဲပွမလှ်ေကီု ပ္ဍဲပွမဂယှ်ေဒွက်ကီု ပ္ဍဲပွမတိၚ်ကွိၚ်ကွိုက်ကီု မၞိဟ်မၞုံပၟိက်မၞုံပၟိက်ဂမၠိုၚ် ဂပ်ဝ်ပြာပ်အာစိုပ်ဒှ်တုဲ နကဵုမသုန်စှော်ကသာပ်လေဝ် ဂွံအာကၠုၚ် ပ္ဍဲအခိၚ်ဗ္တံရ၊ ဟိုတ်နူသၟတ်ဗြဴဂှ်လေဝ် ဍုၚ်ဝေသာလဳရာဲဆာဲ လောန်ကဵုဗၞတ်တွဵုရ။
၃၂၇။ ပ္ဍဲအခိၚ်ဂှ် မၞိဟ်ဇၞော်ကွာန်ကဆံၚ်လတူ ကောန်ညးရးရာဇဂြိုဟ် ကဵုစိုပ်ဒတုဲကၠေံကမၠောန်ကေၚ်ကာ မထေက်ကဵုသ္ပ ပ္ဍဲဍုၚ်ဝေသာလဳဂှ်တုဲ မွဲလှ်ေပၠန် ကလေၚ်စဴကၠုၚ် ဍုၚ်ရာဇဂြိုဟ်ရ၊ ပြာပ်အာဇရေၚ် သၟိၚ်ဗိမ္ဗိသာရ မၞုံယၟုသေနိယ တၠညးမဂဓရးတုဲမ္ဂး “ယွံသၟိၚ်ဇၞော် ဍုၚ်ဝေသာလဳ ဍိုက်ပေၚ်သ္ဂေဟ်သွဟ်ရ၊ ဂီုကၠီု ဖဲသအဳရ၊ မၞုံကဵုလၟိဟ်မၞိဟ်ဂၠိုၚ်ရ၊ တ္ၜောန်တ္ၜောဲနှဴရဴတဴ နကဵုဂကူ မၞိဟ်စုၚ်ရ၊ စၞစလှဲလးရ၊ ပြာသာဒ်ဂမၠိုၚ် ထပှ်လ္ၚီ ။ ပ ။ ဟိုတ်နူဗြဴစရာဲဍုၚ်ဂှ်လေဝ် ဍုၚ်ဝေသာလဳ ရာၚ်ဆာဲ လောန်ကဵုဗၞတ်တွဵုရ၊ ယွံသၟိၚ်ဇၞော် အာတ်ပါန်အခေါၚ်ရ၊ ပိုဲညးဂမၠိုၚ်လေဝ် စွံပတန် ဗြဴစရာဲဍုၚ်အိုတ်စိုအ်” ရဴဝွံ ဂရၚ်ပတီရ။
ယွံမၞး ယဝ်ဒှ်သာ်ဂှ်မ္ဂး မၞးတအ်ညးဂမၠိုၚ် မိက်စွံပတန်ဗြဴစရာဲမ္ဂး ဩဝ်တီကေတ်သၟတ်ဝုတ် တၠုၚ်လအာတုပ်သၟဟ် (ကောံအမ္ဗပါလဳ) အိုတ်ညိ။ ပ္ဍဲအခိၚ်ဂှ် ပ္ဍဲဍုၚ်ရာဇဂြိုဟ် သၟတ်ဝုတ်မၞုံယၟုသာလဝတဳ ရုပ်သာ်ကျေဝ်ဂေါဝ်လောန်ရ၊ ထေက်ကဵုဗဵုသ္ၚေဝ်ခိုဟ်ရ၊ ကဵုစိုတ်ဇြုၚ်ကေဝ်မာန်ရ၊ ဍိုက်ပေၚ်တဴကေုာံသာ်သဏ္ဌာန်မပြဲရ၊ ပ္ဍဲအခိၚ်ဂှ် မၞိဟ်ဇၞော်ကွာန်ကဆံၚ်လတူ ကောန်ညးရးရာဇဂြိုဟ်ဂှ် (သ္ပ) ဗြဴစရာဍုၚ် သၟတ်ဝုတ်မၞုံယၟုံသာလဝတဳတုဲ စွံပတန်ရ၊ ပ္ဍဲကြဴနူဂှ် ဗြဴစရာဲဍုၚ်သာလဝတဳဂှ် ခြာဟွံလအ်ဟေၚ် ပ္ဍဲပွမလှ်ေကီု ပ္ဍဲပွမဂယှ်ေဒွက်ကီု ပ္ဍဲပွမတိၚ်ကွိၚ်ကွိုက်ကီု စဳကၠးဆိုက်ဗ္ဒက်ရ၊ မၞိဟ်မၞုံပၟိက်မၞုံပၟိက်ဂမၠိုၚ် ဂပ်ဝ်ပြာပ်အာစိုပ်ဒှ်တုဲ နကဵုကၠံကသာပ်လေဝ် ဂွံအာကၠုၚ် ပ္ဍဲအခိၚ်ဗ္တံရ၊ ပ္ဍဲကြဴနူဂမၞိဟ်မၞုံပၟိက်မၞုံပၟိက်ဂမၠိုၚ် ဂပ်ဝ်ပြာပ်အာစိုပ်ဒှ်တုဲ နကဵုမသုန်စှော်ကသာပ်လေဝ် ဂွံအာကၠုၚ် ပ္ဍဲအခိၚ်ဗ္တံရ၊ ကြဴနူဂှ် ဗြဴစရာဲဍုၚ်သာလဝတဳဂှ် ခြာဟွံလအ်ဟေၚ် ကလိဂွံဂၠမ်ဂဝ်ရ။
ပ္ဍဲအခိၚ်ဂှ် “ညးဗြဴဂှ် မၞုံကဵုဂၠမ်ဂဝ်မ္ဂး ညးတြုံတအ် ဟွံသ္ဍိုက်မၠိုက်ရ၊ ယဝ်ညးမမိက်ကဵုမွဲမွဲ တီဂွံအဲ ‘ဗြဴစရာဲဍုၚ်သာလဝတဳ မၞုံကဵုဂၠမ်ဂဝ်ရ’ မ္ဂး၊ လာဘ်သက္ကာအလုံအိုတ်သီု ကြက်လီုလာ်ကုအဲရ၊ အဲ ဂိယဲဒၟံၚ်ရ ရဴဝွဴ သ္ဂောံကဵုတီကေတ် ခိုဟ်သန်ရ” ရဴဝွံ ကသပ်ဒှ် ကုဗြဴစရာဲဍုၚ်သာလဝတဳရ။
ပ္ဍဲအခိၚ်ဂှ် ဗြဴစရာဲဍုၚ်သာလဝတဳဂှ် “ယွံအမာံပၟၚ်တြၚ် တြုံမမိက်ကဵုမွဲမွဲလေဝ် လ္ပကဵုလုပ်ညိ၊ ယြဴတြုံမွဲ သၟာန်အဲမ္ဂး၊ ဂိယဲဒၟံၚ်ရ ရဴဝွံ ဩဝ်ဟီုညိ” ရဴဝွံ ဟီုဗကန်ကဵုပၟၚ်တြၚ်ရ။
“ခိုဟ်ရ ယွံနာဲဗြဴ” ရဴဝွံ ပၟၚ်တြၚ်ဂှ် ဒုၚ်ဝန် ကုဗြဴစရာဲဍုၚ်သာလဝတဳရ။ ကြဴနူဂှ် ဗြဴစရာဲဍုၚ်သာလဝတဳဂှ် သ္ပဟိုတ်ကဵုဂၠမ်ဂဝ်ဂှ် ကြံၚ်ဍုဟ်တုဲ ၜံၚ်သၠးကောန်ရ။ ပ္ဍဲအခိၚ်ဂှ် ပ္ဍဲအခိၚ်ဗ္တံရဂှ် ဗြဴစရာဲဍုၚ်သာလဝတဳ “ဟာဲဍိက်ဗြဴ ဟေအ်ဩဝ်ကေတ်ညိ၊ ကောန်ၚာ်သၟတ်ဝွံ စုတ်ပ္ဍဲကၞာဲတြေံတြေံတုဲ ရၚ်တၠုၚ်ဏာတုဲမ္ဂး ဩဝ်ကၠဟ်ထောံ ပ္ဍဲဌာန်ထောံသၟိက်ဟန်ဗန်ညိ” ရဴဝွံ ဖအောဝ် စကာဍိက်ဗြဴရ။ “ခိုဟ်ရ ယွံနာဲဗြဴဴ” ရဴဝွံ ဍိက်ဗြဴဂှ် ဒုၚ်ဝန် ကုဗြဴစရာဲဍုၚ်သာလဝတဳတုဲ စုတ်ကောန်ၚာ်သၟတ်ဂှ် ပ္ဍဲကၞာဲတြေံတြေံတုဲမ္ဂး ရၚ်တၠုၚ်ဏာ ကၠဟ်ထောံပ္ဍဲဌာန်ထောံသၟိက်ဟန်ဗန်ရ။
၃၂၈။ ပ္ဍဲအခိၚ်ဂှ် ကောန်သၟိၚ်ဗၠာဲအဘယ ပ္ဍဲနူဂယးပြဟ်ဟေၚ် အာတဴ သွက်ဂွံခပြာပ်စသၟိၚ်မ္ဂး ညာတ်ဒး ကောန်ၚာ်သၟတ် မဗိုၚ်လဝ်နကဵုခ္ဍာ်ဂမၠိုၚ်ဂှ်တုဲ “ယွံသကအ်တအ် အရာဝတ္ထု မဗိုၚ်လဝ် နကဵုခ္ဍာ်ဂမၠိုၚ်ဂှ် မုမွဲရော?” ရဴဝွံ သၟာန်မၞိဟ်ဂမၠိုၚ်ရ။ ယွံတၠညးကောန်သၟိၚ်ဗၠာဲ ကောန်ၚာ်သၟတ်ရ ရဴဝွံ သ္ဂးအိုတ်ရ။ ယွံသအ်တအ် လမျီုနွံဏီဟာ ရဴဝွံ (သၟာန်မ္ဂး) ယွံတၠညးကောန်သၟိၚ်ဗၠာဲ လမျီုနွံဏီရ ရဴတွံ (သ္ဂးအိုတ်ရ)။ ယွံသအ်တအ် ဒှ်သာ်ဂှ်မ္ဂး ကောန်ၚာိသၟတ်ဂှ် ရၚ်တၠုၚ်ဏာ သ္ၚိအဲတုဲ တၞဟ်နလွဳလွတ်ဗ္စ ဩဝ်ကဵုကုမိမိန်ဂမၠိုၚ်အိုတ်ညိ ရဴဝွံ (သ္ဂးရ)။
“ယွံတၠညးကောန်သၟိၚ်ဗၠာဲ ခိုဟ်သန်ရ” ရဴဝွံ မၞိဟ်ဂမၠိုၚ်ဂှ် ဒုၚ်ဝန် ကောန်သၟိၚ်ဗၠာဲအဘယတုဲ ကောန်ၚာ်ဂှ် ရၚ်တၠုၚ်ဏာ သ္ၚိကောန်သၟိၚ်ဗၠာဲအဘယတုဲမ္ဂး “ဩဝ်လွဳလွတ်အိုတ်ညိ” ရဴဝွံ ကဵုမိမိန်ဂမၠိုၚ်အိုတ်ရ။ ဟိုတ်နူဂလာန်သၟာန်မ္ဂး လမျီုနွံဟာဂှ်ရ ခုတ်ကဵုယၟု ကုကောန်ၚာ်ဂှ် “ဇဳဝက” (မာံအာယုက်ဂၠိၚ်) အိုတ်ရ၊ ဟိုတ်နူကောန်သၟိၚ် ဂပ်ဝ်လွဳလွတ်ဗ္စဖျုၚ်ဂှ်ရ ခုတ်ကဵုယၟု “ကောမရဘစ္စ” အိုတ်ရ။
ကြဴနူဂှ် ဇဳဝက ကောန်သၟိၚ်အဘယ မဂပ်ဝ်လွဳလွတ်ဗ္စဂှ် ခြာဟွံလအ်ဟေၚ် အာစိုပ်ဒဒှ်တီကၠိုဟ်ခၠၚ်ရ။ ပ္ဍဲအခိၚ်ဂှ် ဇဳဝက ကောန်သၟိၚ်အဘယ မဂပ်ဝ်လွဳလွတ်ဗ္စဂှ် ပြာပ်အာဇရေၚ် ကောန်သၟိၚ်ဗၠာဲအဘယတုဲမ္ဂး “ယွံတၠညးကောန်သၟိၚ်ဗၠာဲ မိယာဲအဲဍိက်တုန် ဒှ်ညးလဵုမွဲရော? မအံက်အဲဍိက်တုန် ဒှ်ညးလဵုမွဲရော?” ရဴဝွံ သၟာန်ကောန်သၟိၚ်ဗၠာဲအဘယရ၊ အမာံဇဳဝက အဲလေဝ် ဟွံတီ မိယာဲတၠအဲရ၊ ဗွဲစၟတ်တုန် အဲဂှ် ဒှ်မအံက်တၠအဲရ၊ အဲဟေၚ် ဂပ်ဝ်လွဳလွတ်ဗ္စရ ရဴဝွံ (သ္ဂးရ)။ ပ္ဍဲအခိၚ်ဂှ် ကုဇဳဝက ကောန်သၟိၚ်အဘယ မဂပ်ဝ်လွဳလွတ်ဗ္စဂှ် “သီုဟွံမွဲကဵုကွတ်ပညာ နိဿဲဗ္ဒာဲကဵုဂကူသၟိၚ်ဂမၠိုၚ်တုဲ တၞဟ်နဂယိုၚ်လမျီု ဟွံလောဲသွာရ၊ အဲ သ္ဂောံကတ်ဗတောန် ကွတ်ဂဥုဲမ္ဂး ခိုဟ်သန်ရ” ရဴဝွံ ကသပ်ဒှ်ကၠုၚ်ရ။
၃၂၉။ ပ္ဍဲအခိၚ်ဂှ် ပ္ဍဲဍုၚ်တက္ကသိုလ် အ္စာဂဥုဲဒိသာပါမောက္ခ ပဒတဴဒၟံၚ်ရ။ ပ္ဍဲအခိၚ်ဂှ် ဇဳဝက ကောန်သၟိၚ်အဘယ မဂပ်ဝ်လွဳလွတ်ဗ္စဂှ် သီုဟွံပါန်အခေါၚ် ကောန်သၟိၚ်ဗၠာဲအဘယ အာဍုၚ်တက္ကသိုလ်ရ၊ အတိုၚ်လၟေၚ်လၟေၚ် အာမ္ဂး ပြာပ်စိုပ်အာဇရေၚ် အ္စာဂဥုဲဍုၚ်တက္ကသိုလ် တုဲပ္ဍဲကြဴ “ယွံအ္စာ အဲဍိက် နွံပၟိက် တၞဟ်နကတ်ကွတ်ဂဥုဲရ” ရဴဝွံ ဟီုသ္ဂးကဵုအ္စာဂဥုဲရ။ အမာံဇဳဝက ဒှ်သာ်မ္ဂးဂှ် ဩဝ်ကတ်ညိ ရဴဝွံ (ဟီုသ္ဂးရ)။ ပ္ဍဲအခိၚ်ဂှ် ဇဳဝက ကောန်သၟိၚ်အဘယ မဂပ်ဝ် လွဳလွတ်ဗ္စဂှ် ဗွဲမဂၠိုၚ်လေဝ် ကတ်ဗတောန်ရ၊ ဗွဲမပြဟ်လေဝ် လေပ်အာရ၊ ဗွဲမ္ဒးရးလေဝ် စမ်ၜတ် ဂၠိုက်ဂၠာဲရ၊ ပညာဇၟာပ်ဗတောန်လဝ်လေဝ် ဟွံဝိုန်ကၠေံအာ ကုဇဳဝကအိုတ်ရ။
ပ္ဍဲအခိၚ်ဂှ် ကုဇဳဝက ကောန်သၟိၚ်အဘယ မဂပ်ဝ်လွဳလွတ်ဗ္စဂှ် အခိၚ်မကလိလောန်အာထပှ်သၞာံ “အဲဂှ် ဗွဲမဂၠိုၚ်လေဝ် ကတ်ဗတောန်ရ၊ ဗွဲမပြဟ်လေဝ် လေပ်အာရ၊ ဗွဲမ္ဒးရးလေဝ် စမ်ၜတ်ဂၠိုက်ဂၠာဲရ၊ ပညာဇၟာပ်ဗတောန်လဝ်လေဝ် ဟွံဝိုတ်ကၠေံအာ ကုအဲရ၊ ကုအဲမကတ်ဗတောန် လုကဴထပှ်သၞာံဂမၠိုၚ် လအိတ်ကွတ်ဂဥုဲဝွံ ဟွံပြာကဋ်ရ၊ မုရဴပ္ဍဲအခိၚ်မွဲ လအိတ်ကွတ်ဂဥုဲဝွံ ပြာကဋ်ရော?” ရဴဝွံ ကသပ်ဒှ်ကၠုၚ်ရ။
ပ္ဍဲအခိၚ်ဂှ် ဇဳဝက ကောန်သၟိၚ်အဘယ မဂပ်ဝ်လွဳလွတ်ဗ္စဂှ် ပြာပ်စိုပ်အာဇရေၚ် အ္စာဂဥုဲတုဲမ္ဂး “ယွံအ္စာဇၞော် အဲဍိက် ကတ်ဗတောန်လဝ် ဗွဲမဂၠိုၚ်ရ၊ ဗွဲမပြဟ်လေဝ် လေပ်အာရ၊ ဗွဲမ္ဒးရးလေဝ် စမ်ၜတ်ဂၠိုက်ဂၠာဲရ၊ ပညာဇၟာပ်ဗတောန်လဝ်လေဝ် ဟွံဝိုတ်ကၠေံအာ ကုအဲဍိက်ရ၊ ကုအဲဍိက် မကတ်ဗတောန် လုကဴထပှ်သၞာံဂမၠိုၚ် လအိတ်ကွတ်ဂဥုဲဝွံ ဟွံပြာကရော?” ရဴဝွံ ဟီုသ္ဂးကဵုအ္စာဂဥုဲဂှ်ရ။
အမာံဇဳဝက ဒှ်သာ်ဂှ်မ္ဂး ဂိုၚ်ကေတ် ကွဵုခါဲတိတုဲ ဂေတ်ဂ္ၚေၚ် ဌာန်မွဲယောဇနာ ဇရေၚ်ပွဳပွူ ဍုၚ်တက္ကသိုလ်တုဲ ဩဝ်ဗက်ဂၠာဲရံၚ် တၞံဆုဟွံလုပ်ဂဥုဲ မမိက်ကဵုမွဲမွဲညိ၊ ဩဝ်ရၚ်တၠုၚ်နၚ်တၞံဆု မဟွံလုပ်ဂဥုဲဂှ်ညိ ရဴဝွံ (ဟီုသ္ဂးရ)။ “ယွံအ္စာ ခိုဟ်သန်ရ” ရဴဝွံ ဇဳဝက ကောန်သၟိၚ်အဘယ မဂပ်ဝ်လွဳလွတ်ဗ္စ ဒုၚ်ဝန် ကုအ္စာဂဥုဲတုဲမ္ဂး ဂိုၚ်ကေတ် ကွဵုခါဲတိတုဲ ဂေတ်ဂ္ၚေၚ်ဌာန်မွဲယောဇနာ ဇရေၚ်ပွဳပွူ ဍုၚ်တက္ကသိုလ်မ္ဂး ဟွံညာတ်ကေတ် တၞံဆုဟွံလုပ်ဂဥုဲ မမိက်ကဵုမွဲမွဲရ။
ပ္ဍဲအခိၚ်ဂှ် ဇဳဝက ကောန်သၟိၚ်အဘယ မဂပ်ဝ်လွဳလွတ်ဗ္စဂှ် ပြာပ်စိုပ်အာဇရေၚ် အ္စာဂဥုဲတုဲမ္ဂး “ယွံအ္စာ ဂေတ်ဂ္ၚေၚ် ဌာန်မွဲယောဇနာ ဇရေၚ်ပွဳပူပွူ ဍုၚ်တက္ကသိုလ်ရ၊ ဂေတ်ဂ္ၚေၚ်မ္ဂး ဟွံညာတ်ကေတ် တၞံဆုဟွံလုပ်ဂဥုဲ မမိက်ကဵုမွဲမွဲရ” ရဴဝွံ ဟီုသ္ဂးရ။ “အမာံဇဳဝက ဂပ်ဝ်ကတ်ဗတောန်ကေတ် ဗွဲမ္ဒးရးတုဲရ၊ ကွတ်ဗၞတ်ဝွံ သၟဟ်စောံ တၞဟ်နဂယိုၚ်လမျီု ကုတၠအဲရ” ရဴဝွံ ဟီုသ္ဂးတုဲမ္ဂး ကဵုထောံဇွောံမဗၞတ်ညိနာၚ် ကုဇဳဝက ကောန်သၟိၚ်အဘယ မဂပ်ဝ်လွဳလွတ်ဗ္စရ။
ပ္ဍဲအခိၚ်ဂှ် ဇဳဝက ကောန်သၟိၚ်အဘယ မဂပ်ဝ်လွဳလွတ်ဗ္စ ဂိုၚ်ကေတ် ဇွောံမဗၞတ်ညိနာၚ်ဂှ်တုဲ စ္ဍးအာဍုၚ်ရာဇဂြိုဟ်ရ။ ပ္ဍဲအခိၚ်ဂှ် ကုဇဳဝက ကောန်သၟိၚ်အဘယ မဂပ်ဝ်လွဳလွတ်ဗ္စဂှ် ဇွောံမဗၞတ်ညိနာၚ်ဂှ် အာစိုပ်ပွမအိုတ်အာ အကြာဂၠံၚ်တရဴ ပ္ဍဲဍုၚ်သာကေတရ။ ပ္ဍဲအခိၚ်ဂှ် ကုဇဳဝက ကောန်သၟိၚ်အဘယ မဂပ်ဝ်လွဳလွတ်ဗ္စဂှ် “တရဴဝါတ်ဂါတ်ဂမၠိုၚ်ဝွံတုန် ဍာ်ဟွံမွဲအိုတ်ရ၊ စၞစဟွံမွဲအိုတ်ရ၊ တၞဟ်နအာ သီုဟွံမွဲကဵုဇွောံမဂှ် ဟွံလောဲသွာရ၊ အဲ ဂွံဂၠာဲဇွောံမမ္ဂး ခိုဟ်ရ” ရဴဝွံ သပ်ဒှ်ကၠုၚ်ရ။
