၂၀၇။ ဝတ္ထုသၟိၚ်ပဇ္ဇောတ
၃၃၄။ ပ္ဍဲမွဲအခိၚ်တေံ ယဲဖျိုဟ်ဖျေတ် ဒှ်ကုသၟိၚ်ပဇ္ဇောတရ၊ အ္စာသဝ်ဒိသာပါမောက္ခဂမၠိုၚ်ဇၞော်ဇၞော်မဂၠိုၚ်ဂၠၚ် ကၠုၚ်တုဲ တၞဟ်နဝဳဗလး စဵုကဵုယဲဗၠးဂှ် ဟွံသၟဟ်ရထအိုတ်ရ၊ ဂိုၚ်ကေတ်ထဝ်သြန်မဂၠိုၚ်တုဲ အာအိုတ်ရ။ ပ္ဍဲအခိၚ်ဂှ် သၟိၚ်ပဇ္ဇောတဂှ် “ယဲမၞုံသဘဴသာ်ဂှ် ဒှ်ဒၟံၚ်ကုအဲရ၊ အာတ်ပါန်အခေါၚ်ရ၊ တၠညးသၟိၚ်ဇၞော် ဩဝ်ဖအောဝ်ဗလးနၚ် သဝ်ဇဳဝကညိ၊ သဝ်ဇဳဝကဂှ် ကြက်ဝဳအဲရ” ရဴဝွံ ဗလးဏာကလုတ် ဇရေၚ်သၟိၚ်ဗိမ္ဗိသာရ မၞုံယၟုသေနိယ တၠညးမဂဓရးရ။
ပ္ဍဲအခိၚ်ဂှ် သၟိၚ်ဗမ္ဗိသာရ မၞုံယၟုသေနိယ တၠညးမဂဓရးဂှ် “အမာံဇဳဝက ဩဝ်အာညိ၊ အာဍုၚ်ဥဇဇနဳတုဲမ္ဂး ဩဝ်ဝဳ သၟိၚ်ပဇ္ဇောတညိ” ရဴဝွံ ဖအောဝ်ဗလးဏာ သဝ်ဇဳဝက မၞုံယၟုကောမရဘစ္စရ။ “ယွံတၠညးသၟိၚ်ဇၞော် ခိုဟ်သန်ရ” ရဴဝွံ ဇဳဝက မၞုံယၟုကောမရဘစ္စဂှ် ဒုၚ်ဝန်ကုသၟိၚ်ဗိမ္ဗိသာရ မၞုံယၟုသေနိယ တၠညးမဂဓရးတုဲမ္ဂး အာဍုၚ်ဥဇ္ဇနဳတုဲ ပြာပ်အာဇရေၚ်သၟိၚ်ပဇ္ဇောတတုဲမ္ဂး စၟတ်သမ္တီကေတ် အကာဲအရာယဲ သၟိၚ်ပဇ္ဇောတတုဲ “ယွံတၠညးသၟိၚ်ဇၞော် ဩဝ်ကဵုကၠေၚ်သွဟ်ညိ၊ ကြက်ဖျိန်ကၠေၚ်သွဟ်ရ၊ တၠညးသၟိၚ်ဇၞော် ဒးသုၚ်ကၠေၚ်သွဟ်ရ” ရဴဝွံ သ္ဂးရ။ အမာံဇဳဝက ဟွံဗဗွဲရ၊ တၠအဲ နဂဥုဲမဟွံမွဲကဵုကၠေၚ်သွဟ်ဂှ် ဩဝ်ဝဳ စဵုကဵုယဲဗၠးညိ၊ အဲက္ဍုဟ်မၠေံဇအိုန်ဇရ ကၠေၚ်သွဟ်ကွေံရ ရဴဝွံ (သ္ဂးရ)။
ပ္ဍဲအခိၚ်ဂှ် “ယဲမၞုံသဘဴသာ်ဂှ် သၟိၚ်ဝွံ ဝေၚ်ကၠေံကၠေၚ်သွဟ်တုဲ တၞဟ်နဝဳကဵုယဲဗၠးဂှ် ဟွံသၟဟ်ရထရ၊ အဲဂွံဖျိန်ကၠေၚ်သွဟ် မၞုံကဵုသာ်ဍာ်ဗစိုတ် မၞုံကဵုသၟူအမြဲာဍာ်ဗစိုတ် မၞုံကဵုရှ်သာဍာ်ဗစိုတ်မ္ဂး ခိုဟ်ရဋ္ဌ” ရဴဝွံ ကသပ်ဒှ်ကၠုၚ် ကုသဝ်ဇဳဝက မၞုံယၟုကောမရဘစ္စရ။ ပ္ဍဲကြဴနူဂှ် သဝ်ဇဳဝက မၞုံယၟုကောမရဘစ္စ ဖျိန်တဴကၠေၚ်သွဟ် နကဵုဂဥုဲတၞဟ်တၞဟ် ညံၚ်ဂွံနွံကဵုသာ်ဍာ်ဗစိုတ် သၟူအမြာဲဍာ်ဗစိုတ် ရှ်သာ်ဍာ်ဗစိုတ်ရ။
ပ္ဍဲကြဴနူဂှ် “ကုသၟိၚ်ဝွံ ကၠေၚ်သွဟ် မဂပ်ဝ်သုၚ်ဂှ် လ္ၚတ်လာဲမ္ဂး ကြက်ကျာတိုန်ရ၊ (ထအေအ်တိုန်ရ)၊ သၟိၚ်ဝွံတုန် ကြမ်ကသအဵုသအာ်ရ၊ ကဵုဂစိုတ်ထောံအဲရ၊ ကိုပ်ကၠာဟဂွံကဵုဂဥုဲဏီဟေၚ် အဲသ္ဂောံပါန်လဝ်အခေါၚ်မ္ဂး ခိုဟ်ရ” ရဴဝွံ ကသပ်ဒှ်ကၠုၚ် ကုသဝ်ဇဳဝက မၞုံယၟုကောမရဘစ္စရ။
ပ္ဍဲအခိၚ်ဂှ် သဝ်ဇဳဝက မၞုံယၟုကောမရဘစ္စ ပြာပ်အာဇရေၚ် သၟိၚ်ဇၞော်တုဲမ္ဂး “ယွံတၠညးသၟိၚ်ဇၞော် ပိုဲတအ်အ္စာသဝ်မ္ဂးဂှ် ပ္ဍဲခဏမၞုံပၟိက်ဂှ် ဒးပိုက်ရိုဟ်ဂဥုဲဂမၠိုၚ်အိုတ်ရ၊ ဒးရၚ်တၠုၚ် ဂဥုဲဂမၠိုၚ်အိုတ်ရ၊ အာတ်ပါန်အခေါၚ်ရ၊ တၠညးသၟိၚ်ဇၞော် ပ္ဍဲရုၚ်စိၚ် ရုၚ်ချေံဂမၠိုၚ်ကီု ပ္ဍဲတြၚ်ဂမၠိုၚ်ကီု နကဵုယာန်သဝ်ဇဳဝကနွံပၟိက် ဩဝ်ကဵုအာညိ၊ နကဵုတြၚ်နွံပၟိက် ဩဝ်ကဵုအာညိ၊ ပ္ဍဲအခိၚ်နွံပၟိက် ဩဝ်ကဵုအာညိ၊ ပ္ဍဲအခိၚ်နွံပၟိက် ဩဝ်ကဵုလုပ်ညိ” ရဴဝွံ ပတိတ်လဝ်အသမ်ညိ ရဴဝွံ ဂရၚ်ပတီသၟိၚ်ဇၞော်ပဇ္ဇောတရ။
ပ္ဍဲအခိၚ်ဂှ် သၟိၚ်ပဇ္ဇောတဂှ် ပ္ဍဲရုၚ်စိၚ် ရုၚ်ချေံဂမၠိုက်ကီု ပ္ဍဲတြၚ်ဂမၠိုၚ်ကီု “နကဵုယာန်သဝ်ဇဳဝကနွံပၟိက် ဩဝ်ကဵုအာညိ၊ နကဵုတြၚ်နွံပၟိက် ဩဝ်ကဵုအာညိ၊ ပ္ဍဲအခိၚ်နွံပၟိက် ဩဝ်ကဵုအာညိ၊ ပ္ဍဲအခိၚ်နွံပၟိက် ဩဝ်ကဵုလုပ်ညိ” ရဴဝွံ ပတိတ်လဝ်အသမ်ရ။
ပ္ဍဲအခိၚ်ဂှ် ကုသၟိၚ်ပဇ္ဇောတဂှ် ယာန်စိၚ်ၝောံမၞုံယၟုဘဒ္ဒဝတိကာ အာစိုပ်တရဴမသုန်စှော်ယောဇနာ ကလေၚ်စဴတ္ၚဲဂှ်မာန်ရ။ ပ္ဍဲအခိၚ်ဂှ် သဝ်ဇဳဝက မၞုံယၟုကောမရဘစ္စဂှ် “တၠညးသၟိၚ်ဇၞော် ဩဝ်သုၚ်ဂဥုဲဍာ်ဗစိုတ်ညိ” ရဴဝွံ သ္ဂးတုဲ ဗဂိန်ကဵုကၠေၚ်သွဟ် ကုသၟိၚ်ဇၞော်ပဇ္ဇောတရ။ ပ္ဍဲအခိၚ်ဂှ် သဝ်ဇဳဝက မၞုံယၟုကောမရဘစ္စဂှ် ကဵုသၟိၚ်ပဇ္ဇောတ သုၚ်ကၠေၚ်သွဟ်တုဲပ္ဍဲကြဴ အာရုၚ်စိၚ်တုဲမ္ဂး နကဵုယာန်စိၚ်ၝောံမၞုံယၟုဘဒ္ဒဝတိကာ တိတ်အာ နူဍုၚ်ဥဇ္ဇေနဳရ။
ပ္ဍဲအခိၚ်ဂှ် ကုသၟိၚ်ပဇ္ဇောတဂှ် ကၠေၚ်သွဟ် မဂပ်ဝ်သုၚ်လဝ်ဂှ် လ္ၚတ်လာဲမ္ဂး ကျာတိုန်ရ။ ပ္ဍဲအခိၚ်ဂှ် သၟိၚ်ပဇ္ဇောတဂှ် “ယွံသကအ်တအ် သဝ်ဇဳဝက ပရေအ်ဇဂှ် ဖျုၚ်ကၠေၚ်သွဟ်ရ၊ ယွံသကအ်တအ် ဟိုတ်ဂှ်ရ ဩဝ်ဗက်ဂၠာဲ သဝ်ဇဳဝကအိုတ်ညိ” ရဴဝွံ သ္ဂးကဵုမၞိဟ်ဂမၠိုၚ်ရ။ ယွံတၠညးသၟိၚ်ဇၞော် နကဵုယာန်စိၚ်ၝောံမၞုံယၟုဘဒ္ဒဝတိကာ တိတ်အာ နူဍုၚ်ဥဇ္ဇေနဳရ။
ပ္ဍဲအခိၚ်ဂှ် ကုသၟိၚ်ပဇ္ဇောတဂှ် ဍိက်မၞုံယၟုကာက အာစိုပ်တြဴစှော်ယောဇနာ ကလေၚ်စဴတ္ၚဲဂှ်မာန်ရ။ ပ္ဍဲအခိၚ်ဂှ် သၟိၚ်ပဇ္ဇေတဂှ် “အမာံကာက ဩဝ်အာညိ၊ ‘ယွံအ္စာ သၟိၚ်ဇၞော်မိက်ကဵုတၠအဲ ကလေၚ်စဴကၠုၚ်’ ရဴဝွံ ဩဝ်ဟီုကဵုသဝ်ဇဳဝကတုဲ ဩဝ်ကဵုကလေၚ်ကၠုၚ်ညိ” ရဴဝွံ ဖအောဝ်ဗလးဏာ ဍိက်မၞုံယၟုကာကရ။ အမာံကာက အ္စာသဝ်ဂမၠိုၚ်မ္ဂးဂှ် မၞုံကဵုမာယာဂၠိုၚ်အိုတ်ရ၊ လ္ပဂိုၚ်ကေတ် စၞစစၞသုၚ် သဝ်ဇဳဝကဂှ် မမိက်ကဵုမွဲမွဲညိ” ရဴဝွံ (ဟီုဗကန်လဝ်ရ)။
ပ္ဍဲအခိၚ်ဂှ် ဍိက်ကာက ဗက်ဂတာပ်အာ သဝ်ဇဳဝက မၞုံယၟုကောမရဘစ္စ အကြာဂၠံၚ်တရဴ ပ္ဍဲဍုၚ်ကောသမ္ဗဳ ဃောသ္ပဒၟံၚ်ပွမစပုၚ်ဂဇးရ။ ပ္ဍဲအခိၚ်ဂှ် “ယွံအ္စာ သၟိၚ်ဇၞော် မိက်ကဵုတၠအဲ ကလေၚ်စဴကၠုၚ်” ရဴဝွံ သ္ဂးကဵုသဝ်ဇဳဝက မၞုံယၟုကောမရဘစ္စရ။ အမာံကာက ဩဝ်လၟတ်မၚ်မံၚ်စဵုကဵုစပုၚ်တုဲညိ၊ အမာံကာ ဟေအ် ဩဝ်စထောံညိ ရဴဝွံ (သ္ဂးရ)။ ယွံအ္စာ ဒေါံရ၊ သၟိၚ်ဇၞော်ဂှ် “အမာံကာက အ္စာသဝ်ဂမၠိုၚ်မ္ဂးဂှ် မၞုံကဵုမာယာဂၠိုၚ်အိုတ်ရ၊ လ္ပဂိုၚ်ကေတ် စၞစသၞသုၚ် သဝ်ဇဳဝကဂှ် မမိက်ကဵုမွဲမွဲညိ” ရဴဝွံ ဟီုဗကန်လဝ်ရဂှ် (ဟီုသ္ဂးရ)။
ပ္ဍဲအခိၚ်ဂှ် သဝ်ဇဳဝက မၞုံယၟုကောမရဘစ္စဂှ် စုတ်ဂဥုဲ ပ္ဍဲသၞေမ်တဲတုဲ သတ်တလုဲလေဝ်စရ၊ ဍာ်သုၚ်လေဝ် သုၚ်ရ၊ ကြဴနူဂှ် သဝ်ဇဳဝက မၞုံယၟုကောမရဘစ္စဂှ် “အမာံကာက ဩဝ်ဂိုၚ်ကေတ်ညိ၊ သတ်တလုဲလေဝ် ဩဝ်စညိ၊ ဍာ်သုၚ်လေဝ် ဩဝ်သုၚ်ညိ” ရဴဝွံ ဟီုသ္ဂးကဵုဍိက်ကာကရ။ ပ္ဍဲအခိၚ်ဂှ် ကာကဂှ် “အ္စာသဝ်ဝွံ သတ်တလုဲလေဝ် စရ၊ ဍာ်သုၚ်လေဝ် သုၚ်ရ၊ ဟွံထေက်ကဵု တၞဟ်နဒှ်ဒုဟ်မမိက်ကဵုမွဲမွဲရ” ရဴဝွံ ဗှ်ဗၞုဟ်တုဲ သတ်တလုဲဗၞတ်မွဲကရေက်လေဝ် စရ၊ ဍာ်သုၚ်လေဝ် သုၚ်ရ၊ သတ်တလုဲဗၞတ်မွဲကရေက် မဂပ်ဝ်စဖျေံဂှ် ပ္ဍဲဒၞါဲဂှ်ဟေၚ် ကဵုကာကဂှ် ဂၞဴဇွောဝ်ရ။
ပ္ဍဲအခိၚ်ဂှ် ကာကဂှ် “ယွံအ္စာ အဲဍိက် ဂျိုၚ်မံၚ်လမျီုဏီဟာ” ရဴဝွံ သၟာန်သဝ်ဇဳဝက မၞုံယၟုကောမရဘစ္စရ။ “အမာံကာက လ္ပဖေက်ညိ၊ တၠအဲကီု သၟိၚ်ကီု ကြက်ဒှ်ဟွံမွဲကဵုယဲရ၊ သၟိၚ်ဂှ်တုန် ကြမ်ကြသအဵုသအာ်ရ၊ ကဵုဂစိုတ်ထောံအဲရ၊ ဟိုတ်ဂှ် အဲဟွံကလေၚ်စဴရ” ရဴဝွံ သ္ဂးတုဲ ယာန်စိၚ်ၝောံမၞုံယၟုဘဒ္ဒဝတိကာဂှ် အပ်ပြာပ်ကဵုကုကာကတုဲမ္ဂး စ္ဍးအာဍုၚ်ရာဇဂြိုဟ်ရ။
အာအတိုၚ်တိုၚ်လမေၚ်တုဲ ပြာပ်စိုပ်အာဇရေၚ် သၟိၚ်ဗိမ္ဗိသာရ မၞုံယၟုသေနိယ တၠညးမဂဓရးတုဲမ္ဂး ဂရၚ်ပတီ ဟိုတ်ပရူပရာဝွံ ကုသၟိၚ်ဗိမ္ဗိသာရ မၞုံယၟုသေနိယ တၠညးမဂဓရးရ။ အမာံဇဳဝက ဟွံကလေၚ်ဗက်စဴဂှ် ဒှ်သ္ပဗွဲမ္ဒးရ၊ သၟိၚ်ဂှ်တုန် ကြမ်ကသအဵုသအာ်ရ၊ ကဵုဂစိုတ်ထောံတၠအဲရ ရဴဝွံ (သ္ဂးရ)။ ကြဴနူဂှ် သၟိၚ်ပဇ္ဇောတဟွံမွဲကဵုယဲမ္ဂး “ဇဳဝက ဩဝ်ကၠုၚ်ညိ၊ ကဵုလာဘ်ဗ္ဇဴမပြဲရ” ရဴဝွံ ဗလးဏာကလုတ် ဇရေၚ်သဝ်ဇဳဝက ကောန်သၟိၚ်အဘယ မဂပ်ဝ်လွဳလွတ်ဗ္စရ။ အမာံ ဒေါံရ၊ သၟိၚ်ဇၞော် ဩဝ်ဗှ်ဗၞုဟ်ဂွံသတိဂုဏ်အဲညိ ရဴဝွံ သ္ဂးရ။
