၁၈၄။ ဝတ္ထုခမဳအရကျာ်
၃၀၃။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲဍုၚ်ကုသိနာရာမ် ဗွဲမမိပ်လဟိၚ်တုဲမ္ဂး မွဲဟာန်ကေုာံခမဳသၚ်ဂမၠိုၚ်မဂၠိုၚ်ဂၠၚ် ဗၞတ်လ္ၚီၜါကၠံမသုန်စှော် က္ညဂ္ၚေၚ်အာဒေသစာရိတ် ဍုၚ်အတုမရ။ ပ္ဍဲအခိၚ်ဂှ် ခမဳအရကျာ်မွဲဇကု မကေၚ်ဒှ်သၟာဆတ္တ သ္ပဒတဴဒၟံၚ် ပ္ဍဲဍုၚ်အာတုမရ။ ကောန်ၚာ်ဂမၠိုၚ်ၜါတၠ ကောန်ခမဳဇၞော်ဂှ်တုန် မၞုံကဵုဂလာန်သာယာအိုတ်ရ၊ မၞုံကဵုပညာစိစောန်အိုတ်ရ၊ စဳကၠးဆိုက်ဗ္ဒက် ပ္ဍဲကမၠောန်သၟာဆတ္တာဂမၠိုၚ် မဒှ်ကွတ်အ္စာဇကုအိုတ်ရ၊ ဍိုက်ပေၚ်တဴကေုာံကွတ်မဗုတ္ၜတ်အိုတ်ရ။
ခမဳဇၞော်ဂှ် “တဳလမၞုံပိုဉ်ကျာ်တြဲ မွဲဟာန်ကေုာံခမဳသၚ်ဂမၠိုၚ်မဂၠိုၚ်ဂၠၚ် ဗၞတ်လ္ၚီၜါကၠံမသုန်စှော် က္ညကၠုၚ်ဍုၚ်အာတုမရဂး” ရဴဝွံ ဂွံမိၚ်ကေတ်ရ။ ပ္ဍဲအခိၚ်ဂှ် ခမဳဇၞော်ဂှ် “ယွံကောန်သ္ဍိုက်ဆာန်တအ် တဳလမၞုံပိုဉ်ကျာ်တြဲ မွဲဟာန်ကေုာံခမဳသၚ်ဂမၠိုၚ်မဂၠိုၚ်ဂၠၚ် ဗၞတ်လ္ၚီၜါကၠံမသုန်စှော် က္ညကၠုၚ်ဍုၚ်အာတုမရဂး၊ ယွံကောန်သ္ဍိုက်ဆာန်တအ် ဩဝ်အာအိုတ်ညိ၊ ဂိုၚ်ကေတ်ကယျာ ၜုန်သော်တုဲ နကဵုခရော်ကီု နကဵုထိုၚ်ကီု ဩဝ်ဂေတ်ဂ္ၚေၚ် ဇၟာပ်သ္ၚိဇၟာပ်သ္ၚိအိုတ်ညိ၊ ဩဝ်ရၚ်တၠုၚ်နၚ် ၜဵုကၠေၚ်သ္ၚုစၞစဂမၠိုၚ်အိုတ်ညိ၊ ကုတဳလမၞုံပိုဉ်ကျာ် မက္ညကၠုၚ်ဂှ် ကြက်ဂွံကဵုဒါန် ယာဂုထေက်ကဵုသုၚ်အိုတ်ရ” ရဴဝွံ သ္ဂးကဵုကောန်ၚာ်ဂမၠိုၚ်ရ။
“ယွံမအံက် ခိုဟ်သန်ရ” ရဴဝွံ သ္ဂးတုဲ ကောန်ၚာ်ဂမၠိုၚ်ဂှ် ဒုၚ်ဝန် ကုခမဳဇၞော်ဂှ်တုဲမ္ဂး ဂိုၚ်ကေတ်ကယျာၜုန်သော်တုဲ နကဵုခရော်ကီု နကဵုထိုၚ်ကီု ဂေတ်ဂ္ၚေၚ် ဇၟာပ်သ္ၚိဇၟာပ်သ္ၚိအိုတ်ရ၊ ရၚ်တၠုၚ်နၚ် ၜဵုကၠေၚ်သ္ၚုစၞစဂမၠိုၚ်အိုတ်ရ။ မၞိဟ်ဂမၠိုၚ် ညာတ်ဒး ကောန်ၚာ်ဂမၠိုၚ် ရမျာၚ်လေဝ်သာယာ ပညာမစိစောန်လေဝ်နွံဂှ်တုဲ ၜိုန်ဟွံမွဲပၟိက်ကဵု တၞဟ်နပဠေဝ်ပဠေတ် သော်သၟိပ် သော်က္ဍိုပ်အိုတ်လေဝ် ကဵုပြုပြေၚ်အုတ်ရ၊ ကဵုပြုပြေၚ် ပွမပဠေဝ်ပဠေတ် သော်သၟိပ်သော်က္ဍိုပ်တုဲလေဝ် ကဵုတဴၚုဟ်လိၚ်မဂၠိုၚ်အိုတ်ရ၊ ပ္ဍဲအခိၚ်ဂှ် ကောန်ၚာ်ဂမၠိုၚ်ဂှ် ရၚ်တၠုၚ်နၚ် ၜဵုကၠေၚ်သ္ၚုစၞစဂမၠိုၚ် မဂၠိုၚ်ဂၠၚ်အိုတ်ရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ အတိုၚ်လၟေၚ်လၟေၚ် ဂေတ်ဂ္ၚေၚ်က္ညအာဒေသစာရိတ်မ္ဂး စိုပ်ကၠုၚ်ဍုၚ်အာတုမရ။ တဳလမၞုံပိုဉ်ကျာ်တြဲ သ္ပဒတဴဒၟံၚ် ပ္ဍဲရုၚ်ဖအုံဆံက် ဇရေၚ်ဍုၚ်အာတုမရ။ ပ္ဍဲအခိၚ်ဂှ် ခမဳဇၞော်ဂှ် ပ္ဍဲအခိၚ်ကလိလောန်အာဗ္တံဂှ် ကဵုစဳရေၚ် ယာဂုမဂၠိုၚ်ဂၠၚ်တုဲမ္ဂး “ယွံတဳလမၞုံပိုဉ် တဳလမၞုံပိုဉ်ကျာ်တြဲ ဩဝ်ဒုၚ်ဂိုၚ်ကေတ် ယာဂုအဲဍိက်ညိ” ရဴဝွံ ဗဂိန်ကဵုကုတဳလမၞုံပိုဉ်ကျာ်တဲရ။ ကျာ်တြဲဂမၠိုၚ် သီုမတီတဴလေဝ် သၟာန်သၟုက်အိုတ်ရ ။ ပ ။ နကဵုဟိုတ်ဂမၠိုၚ်ၜါပြကာ မတွံဂး သိက္ခာပိုဒ်ဂှ်လေဝ် ကြက်ပညပ်တဴ ကုကွးဂမၠိုၚ်အိုတ်ရဂှ် ကျာ်တြဲ မပတၠပိုဉ်တြဴပြကာဂမၠိုၚ် သၟာန်သၟုက်တဴ ခမဳဂမၠိုၚ်အိုတ်ရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲဂှ် “ယွံခမဳ ယာဂုဝွံ ကလိဂွံနၚ်နူလဵုရော?” ရဴဝွံ သၟာန်ခမဳဇၞော်ဂှ်ရ။ ပ္ဍဲအခိၚ်ဂှ် ခမဳဇၞော်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲရ။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ၊ ယွံတြုံမလ္ၚုသၟး (နူမဂ်ဖိုလ်) (ပွမတၠအဲဝွံ) ဟွံထေက်ကဵုကုခမဳဂမၠိုၚ်ရ၊ ဟွံဗဗွဲရ၊ ဟွံသပ္ပါယ်ရ၊ အာကာရခမဳတအ် ဟွံသေၚ်ရ၊ ဟွံဂပ်ဝ်ရ၊ ဟွံထေက်ကဵုခမဳဂမၠိုၚ် သ္ပရ။
ယွံတြုံမလ္ၚုသၟး (နူမဂ်ဖိုလ်) မုဟိုတ် တၠအဲ သီုကဵုဒှ်တဴခမဳ ကဵုဒဂိုန်ဂိုၚ်ကေတ် ပ္ဍဲမဟွံဂပ်ဝ်ရော? ယွံတြုံမလ္ၚုသၟး (နူမဂ်ဖိုလ်) (ပွတၠအဲသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ ဟဂပ်ဝ်ကဵုဒဂိုန်ဂိုၚ်ကေတ် ပ္ဍဲမဟွံဂပ်ဝ်ရ၊ ကုခမဳ မကဵုဒဂိုန်ဂိုၚ်ကေတ်ဂှ် ဒးအာပတ်ဒုက္ကဋ်ရ။ ယွံခမဳတအ် ခမဳမကေၚ်ဒှ်သၟာဆတ္တာဂှ် ဟဂပ်ဝ်ရၚ်တၠုၚ် ကယျာၜုန်သော်ရ၊ ကုခမဳ မရၚ်တၠုၚ်ဂှ် ဒးအာပတ်ဒုက္ကဋ်ရ” ရဴဝွံ သ္ဂးကဵုခမဳဂမၠိုၚ်ရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲဍုၚ်အာတုမ ဗွဲမမိပ်လဟိၚ်တုဲမ္ဂး က္ညဂ္ၚေၚ်အာဒေသစာရိတ် ဍုၚ်သာရဝှ်ရ။ အတိုၚ်လၟေၚ်လၟေၚ် က္ညဂ္ၚေၚ်အာဒေသစာရိတ်မ္ဂး စိုပ်ကၠုၚ်ဍုၚ်သာရဝှ်ဂှ်ရ၊ တဳလမၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အရှာမ်အာနထပိဏ္ဍိကသေဌဳ ဇရေၚ်ဍုၚ်သာရဝှ်ဂှ်ရ။
ပ္ဍဲအခိၚ်ဂှ် ပ္ဍဲဍဒၚ်သာရဝှ် စၞစသတ်ဆုဂၠိုၚ်ကဵုဂကူ ဂၠိုၚ်ဂၠၚ် (လှေၚ်) ရ၊ ပ္ဍဲအခိၚ်ဂှ် “ကျာ်တြဲ ကဵုအခေါၚ် စၞစသတ်ဆုဟာ၊ ဟွံကဵုအခေါၚ်ဟာ” ရဴဝွံ ကသပ်ဒှ် ကုခမဳဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ၊ ယွံခမဳတအ် ကဵုအခေါၚ် စၞစသတ်ဆုအိုတ်ရ ရဴဝွံ (သ္ဂးရ)။
၃၀၄။ ပ္ဍဲအခိၚ်ဂှ် တဵုပဠုမ်လဝ် မဗဳဇသံဃိကဂမၠိုၚ် ပ္ဍဲတိပုဂ္ဂလိကအိုတ်ရ၊ တဵုပဠုမ်လဝ် မဗဳဇပုဂ္ဂလိကဂမၠိုၚ် ပ္ဍဲတိသံဃိကအိုတ်ရ၊ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် တဵုပဠုမ်လဝ် မဗဳဇသံဃိကဂမၠိုၚ် ပ္ဍဲတိပုဂ္ဂလိကအိုတ်မ္ဂး ကဵုစှ်သွက်မွဲသွက်တုဲ (ကဵုစသတ်တုဲ) ဒးသ္ပပြဘိုဂ်ရ၊ ကဵုပဠုမ်လဝ် မဗဳဇပုဂ္ဂလိကဂမၠိုၚ် ပ္ဍဲတိသံဃိကအိုတ်မ္ဂး ကဵုစှ်သွက် မွဲသွက်တုဲ ဒးသ္ပပြဘိုဂ်ရ ရဴဝွံ (သ္ဂးရ)။
