၁၈၅။ မဟာပဒေသပန်ပြကာ
၃၀၅။ ပ္ဍဲအခိၚ်ဂှ် “တဳလမၞုံပိုဉ်ကျာ်တြဲ ပ္ဍဲအရာလဵု အရာသာ်လဵုဂှ် ကဵုလဝ်အခေါၚ်ဂှ်ရော?” ရဴဝွံ ‘သံသယကုက္ကုစ္စ’ ပွမချပ်သၠေဟ်ပၟာ ဒှ်ကုခမဳဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
(၁) ယွံခမဳတအ် “အရာဝွံ ဟွံဂပ်ဝ်ရ” ရဴဝွံ ယြဴအရာမွဲ အဲကျာ် ဟဂပ်ဝ်ပါဲကၠေံရ၊ အရာဂှ် ယဝ်ဗဗွဲတဴ ကေုာံအရာမဟွံဂပ်ဝ်တုဲ စှ်ေစးကဵု အရာမဂပ်ဝ်မ္ဂး၊ အရာဂှ် ဟွံဂပ်ဝ် ကုမၞးတအ်ညးဂမၠိုၚ်ရ။
(၂) ယွံခမဳတအ် “အရာဝွံ ဟဂပ်ဝ်ရ” ရဴဝွံ ယြဴအရာမွဲ အဲကျာ် ဟဂပ်ဝ်ပါဲကၠေံရ၊ အရာဂှ် ယဝ်ဗဗွဲတဴ ကေုာံအရာမဂပ်ဝ်တုဲ စှ်ေစးကဵု အရာမဟွံဂပ်ဝ်မ္ဂး၊ အရာဂှ် ဂပ်ဝ်ကုမၞးတအ်ညးဂမၠိုၚ်ရ။
(၃) ယွံခမဳတအ် “အရာဝွံ ဂပ်ဝ်ရ” ရဴဝွံ ယြဴအရာမွဲ အဲကျာ် ဟဂပ်ဝ်ကဵုအခေါၚ်ရ၊ အရာဂှ် ယဝ်ဗဗွဲတဴ ကေုာံအရာမဂပ်ဝ်တုဲ စှ်ေစးကဵု အရာမဟွံဂပ်ဝ်မ္ဂး၊ အရာဂှ် ဟွံဂပ်ဝ် ကုမၞးတအ်ညးဂမမၠိုၚ်ရ။
(၄) ယွံခမဳတအ် “အရာဝွံ ဂပ်ဝ်ရ” ရဴဝွံ ယြဴအရာမွဲ အဲကျာ် ဟဂပ်ဝ်ကဵုအခေါၚ်ရ၊ အရာဂှ် ယဝ်ဗဗွဲတဴ ကေုာံအရာမဂပ်ဝ်တုဲ စှ်ေစးကဵု အရာမဟွံဂပ်ဝ်မ္ဂး၊ အရာဂှ် ဂပ်ဝ်ကုမၞးတအ်ညးဂမၠိုၚ်ရ ရဴဴဝွံ (သ္ဂးရ)။
ပ္ဍဲအခိၚ်ဂှ် “ယာဝကာလိက ကေုာံယာမကာလိက ဂပ်ဝ်ဟာ၊ ဟွံဂပ်ဝ်ဟာ။ ယာဝကာလိက ကေုာဲသတ္တာကာလိက ဂပ်ဝ်ဟာ၊ ဟွံဂပ်ဝ်ဟာ။ ယာဝကာလိက ကေုာံ ယာဝကာဇဳဝိက ဂပ်ဝ်ဟာ၊ ဟွံဂပ်ဝ်ဟာ။ ယာမကာလိက ကေုာံ သတ္တာဟကာလိက ဂပ်ဝ်ဟာ၊ ဟွံဂပ်ဝ်ဟာ။ ယာမကလိက ကေုာံယာဝဇဳဝိက ဂပ်ဝ်ဟာ၊ ဟွံဂပ်ဝ်ဟာ။ သတ္တာဟကာလိက ကေုာံယာဝဇဳဝိက ဂပ်ဝ်ဟာ၊ ဟွံဂပ်ဝ်ဟာ” ရဴဝွံ ကသပ်ဒှ် ကုခမဳဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ယာဝကာလိက ကေုာံယာမကာလိက ဂပ်ဝ်ဒုၚ်ဗဂိန်လဝ် ပ္ဍဲတ္ၚဲဂှ်ဒှ်မ္ဂး၊ ပ္ဍဲအခိၚ်နူဂယး ဂပ်ဝ်ရ၊ ပ္ဍဲအခိၚ်တ္ၚဲစေၚ် ဟွံဂပ်ဝ်ရ၊ ယွံခမဳတအ် ယာဝကာလိကကေုာံသတ္တာဟကာလိက ဂပ်ဝ်ဒုၚ်ဗဂိန်လဝ် ပ္ဍဲတ္ၚဲဂှ်ဒှ်မ္ဂး၊ ပ္ဍဲအခိၚ်နူဂယး ဂပ်ဝ်ရ၊ ပ္ဍဲအခိၚ်တ္ၚဲစေၚ် ဟွံဂပ်ဝ်ရ။
ယွံခမဳတအ် ယာဝကာလိက ကေုာံယာဝဇဳဝိက ဂပ်ဝ်ဒုၚ်ဗဂိန်လဝ် ပ္ဍဲတ္ၚဲဂှ်ဒှ်မ္ဂး၊ ပ္ဍဲအခိၚ်နူဂယး ဂပ်ဝ်ရ၊ ပ္ဍဲအခိၚ်တ္ၚဲစေၚ် ဟွံဂပ်ဝ်ရ။
ယွံခမဳတအ် ယာမကာလိက ကေုာံသတ္တာဟကာလိက ဂပ်ဝ်ဒုၚ်ဗဂိန်လဝ် ပ္ဍဲတ္ၚဲဂှ်ဒှ်မ္ဂး၊ ပ္ဍဲအခိၚ်သ္ဂာဗ္တံ ဂပ်ဝ်ရ၊ ကလိလောန်အခိၚ်သ္ဂာဗ္တံမ္ဂး ဟွံဂပ်ဝ်ရ။ ယွံခမဳတအ် ယာမကာလိက ကေုာံယာဝဇဳဝိက ဂပ်ဝ်ဒုၚ်ဗဂိန်လဝ် ပ္ဍဲတ္ၚဲဂှ်ဒှ်မ္ဂး၊ ပ္ဍဲအခိၚ်သ္ဂာံဗ္တံ ဂပ်ဝ်ရ၊ ကလိလောန်အခိၚ်သ္ဂာံဗ္တံမ္ဂး၊ ဟွံဂပ်ဝ်ရ။ ယွံခမဳတအ် သတ္တာဟကာလိက ကေုာံယာဝဇဳဝိက ဂပ်ဝ်ဒုၚ်ဗဂိန်လဝ်ဒှ်မ္ဂး၊ လုကဴထပှ်တ္ၚဲ ဂပ်ဝ်ရ၊ ကလိလောန်ထပှ်တ္ၚဲမ္ဂး ဟွံဂပ်ဝ်ရ” ရဴဝွံ သ္ဂးရ။
ဘေသဇ္ဇက္ခန္ဓကတုဲရ။
