၁၇၉။ ကဵုအခေါၚ်ကပ္ပိယဘူမိ
၂၉၅။ ပ္ဍဲအဃောအခိၚ်ဂှ် ဍုၚ်ဝေသာလဳ ဖဲသအဳရ၊ မၞုံကဵုသြောံၜဲခိုဟ်ရ၊ မၞုံကဵုပိဏ္ဍပါတ် ကလိဂွံလောဲသွာရ၊ မိန်ထ္ၜကေတ်ဗဗေၚ် ပ္ဍဲတဲတုဲ နပွမဂ္ၚေၚ်ပိဏ္ဍပါတ် တၞဟ်နယိုပ်ယာပ် လောဲသွာရ။ ပ္ဍဲအခိၚ်ဂှ် ကုတဳလမၞုံပိုဉ်ကျာ်တြဲ ပြပ်အာဌာန်လ္ၚုသ္ၚိတ်ဇြတုဲ မပဒတဴဒၟံၚ် ဗွဲမသ္ၚိတ်ဇြဂှ် "အဲဂှ် ပ္ဍဲအခိၚ်ဒှ်ကၞောဝ်ကၠောဝ်ဗျဵု သြောံၜဲဟွံခိုဟ်တုဲ ကလိဂွံပိဏ္ဍပါတ်ဝါတ်ဂှ် ကဵုလဝ်အခေါၚ် ကုခမဳဂမၠိုၚ် ပွမတိုပ်ဒေပ်စွံ ပ္ဍဲအပ္ဍဲအကပ္ပိယကုဋဳ ပွမဖျိန်ပ္ဍဲအပ္ဍဲအကပ္ပိယကုဋဳ ပွမဖျိန်အလဵုဇကုကီု ဗဂိန်လီုမ္ဂး ပွမဒုၚ်ဗဂိန်မွဲလှ်ေပၠန်ကီု မဂပ်ဝ်ရၚ်တၠုၚ်နၚ် နူဌာန်ကဵုပိုဉ် ဌန်ဘိက်နိမန်ကီု မပ္တံသတ်ဆု မဒှ်ပ္ဍဲဂြိုပ် ဒုၚ်ဗဂိန်လဝ် ပ္ဍဲအခိၚ်နူဂယးတုဲ မစွံပတန်လဝ်ကီု မပ္တံလွာဒကှ် တမ်လွာဒကှ် မဒှ်ပ္ဍဲတၞံဒကှ်ကီုဂှ် စဵုကဵုတ္ၚဲဏအ် ခမဳဂမၠိုၚ် သ္ပပြဘိုဂ်ဒၟံၚ်အိုတ်ဏီဟာ" ရဴဝွံ ကသပ်စိုတ်ဒှ်ရ။
ပ္ဍဲအခိၚ်ဂှ် ပ္ဍဲအခိၚ်ပယာံသဝ််တ္ၚဲ တဳလမၞုံပိုဉ်ကျာ်တြဲ ဒၠိုက်ကတဵုနူဒၞာဲမသတၚ်ဒၟံၚ်တုဲ "ယွံအာနန္ဒ အဲကျာ် ပ္ဍဲအခိၚ်ဒှ်ကေယာဝ်ကၠောဝ်ဗျဵု သြောံၜဲဟွံခိုဟ်တုဲ ကလိဂွံပိဏ္ဍပါတ်ဝါတ်ဂှ် ကဵုလဝ်အခေါၚ် ကုခမဳဂမၠိုၚ် ပွမတိုပ်ဒေပ်စွံ ပ္ဍဲအပ္ဍဲအကပ္ပိယကုဋဳ ပွမဖျိန်ပ္ဍဲအပ္ဍဲအကပ္ပိယကုဋဳ ပွမဖျိန်အလဵုဇကုကီု ဗဂိန်လီုမ္ဂး ပွမဒုၚ်ဗဂိန်မွဲလှ်ေပၠန်ကီု မဂပ်ဝ်ရၚ်တၠုၚ်နၚ် နူဌာန်ကဵုပိုဉ် ဌန်ဘိက်နိမန်ကီု မပ္တံသတ်ဆု မဒှ်ပ္ဍဲဂြိုပ် ဒုၚ်ဗဂိန်လဝ် ပ္ဍဲအခိၚ်နူဂယးတုဲ မစွံပတန်လဝ်ကီု မပ္တံလွာဒကှ် တမ်လွာဒကှ် မဒှ်ပ္ဍဲတၞံဒကှ်ကီုဂှ် စဵုကဵုတ္ၚဲဏအ် ခမဳဂမၠိုၚ် သ္ပပြဘိုဂ်ဒၟံၚ်အိုတ်ဏီဟာ" ရဴဝွံ သၟာန်တဳလပိုဉ်အာနန္ဒရ။
သ္ပပြဘိုဂ်ဒၟံၚ်အိုတ်ဏီရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲမ္ဂး "ယွံခမဳတအ် အဲကျာ် ပ္ဍဲအခိၚ်ဒှ်ကၞောဝ်ကၠောဝ်ဗျဵု သြောံၜဲဟွံခိုဟ်တုဲ ကလိဂွံပိဏ္ဍပါတ်ဝါတ်ဂှ် ကဵုလဝ်အခေါၚ် ကုခမဳဂမၠိုၚ် ပွမတိုပ်ဒေပ်စွံ ပ္ဍဲအပ္ဍဲအကပ္ပိယကုဋဳ ပွမဖျိန်ပ္ဍဲအပ္ဍဲအကပ္ပိယကုဋဳ ပွမဖျိန်အလဵုဇကုကီု ဗဂိန်လီုမ္ဂး ပွမဒုၚ်ဗဂိန်မွဲလှ်ေပၠန်ကီု မဂပ်ဝ်ရၚ်တၠုၚ်နၚ် နူဌာန်ကဵုပိုဉ် ဌန်ဘိက်နိမန်ကီု မပ္တံသတ်ဆု မဒှ်ပ္ဍဲဂြိုပ် ဒုၚ်ဗဂိန်လဝ် ပ္ဍဲအခိၚ်နူဂယးတုဲ မစွံပတန်လဝ်ကီု မပ္တံလွာဒကှ် တမ်လွာဒကှ် မဒှ်ပ္ဍဲတၞံဒကှ်ကီုဂှ် သ္ပတမ်နူတ္ၚဲဝွံတုဲ အဲကျာ် ပဲါဒဝ်ကၠေံရ။
ယွံခမဳတအ် ဘောဇိုန် မဂပ်ဝ်တိုပ်ဒေပ်စွံ ပ္ဍဲအပ္ဍဲအကပ္ပိယကုဋဳကီု ဘောဇိုန်မဂပ်ဝ်ဖျိန် ပ္ဍဲအပ္ဍဲအကပ္ပိယကုဋဳကီု ဘောဇိုန်မဂပ်ဝ်ဖျိန် အလဵုဇကုဂှ် ဟဂပ်ဝ်သ္ပပြဘိုဂ်ရ၊ ကုခမဳမသ္ပပြဘိုဂ်ဂှ် ဒးအာပတ်ဒုက္ကဋ်ရ၊ ယွံခမဳတအ် ဘောဇိုန်မဂပ်ဝ်ရၚ်တၠုၚ်နၚ် နူဌာန်ကဵုပိုဉ် ဌာန်ဘိက်နိမန်ကီု မပ္တံသတ်ဆု မဒှ်ပ္ဍဲဂြိုပ် ဒုၚ်ဗဂိန်လဝ် ပ္ဍဲအခိၚ်နူဂယးတုဲ မစွံပတန်လဝ်ကီု မပ္တံလွာဒကှ် တမ်လွာဒကှ် မဒှ်ပ္ဍဲတၞံဒကှ်ကီု ဘောဇိုန်မဟဂပ်ဝ်သ္ပအတိရိတ်ဝိနယ်ကမ်ဏီကီု ဃောကဵုပိုဉ်ဂှ် ခမဳမဆေဝ်ဒဝ်ဒး ရဴဝွံ ဒေံါရဂှ် ဟဂပ်ဝ်သ္ပပြဘိုဂ်ရ၊ ကုခမဳမသ္ပပြဘိုဂ်ဂှ် ဂပ်ဝ်ဒးသ္ဂုတ်သွာတ်ဗွဲမဗဗွဲကဵုဓရ်ရ" ရဴဝွံ သ္ဂးကဵုခမဳဂမၠိုၚ်ရ။
ပ္ဍဲအခိၚ်ဂှ် မၞိဟ်ပဒတဴပ္ဍဲဇနပိုဒ်ဂမၠိုၚ် ကဵုပတိုန် ၜဵုကီု ကၠေၚ်ကီု သ္ၚုကီု စၞစမဂၠိုၚ်ဂၠၚ်ကီု ပ္ဍဲကွဳဂမၠိုၚ်တုဲ သ္ပဝိုၚ်လဝ်ကွဳ ပ္ဍဲမုက်ထော်တြၚ်မ္ၚးအာရှာမ်တုဲ "အခိၚ်ကလိဂွံအလန် ကဵုဒါန်ပိဏ္ဍပါတ်ဂှ် ကြက်ကဵုဒါန်ပိဏ္ဍပါတ်အိုတ်ရ" ရဴဝွံ (ပၠုပ်စိုတ်တုဲ) ပဒတဴဒၟံၚ်အိုတ်ရ။ ဗြဲဇၞော်လေဝ် တိုန်ကၠုၚ်ရ၊ ပ္ဍဲအခိၚ်ဂှ် မၞိဟ်ဂမၠိုၚ် ပြာပ်အာဇရေၚ် တဳလပိုဉ်အာနန္ဒတုဲမ္ဂး "ယွံတဳလပိုဉ်အာနန္ဒ ပ္ဍဲအခိၚ်လၟုဟ် ပတိုန်လဝ် ၜဵုကီု ကၠေၚ်ကီု သ္ၚုကီု စၞစမဂၠိုၚ်ဂၠၚ်ကီု ပ္ဍဲကွဳဂမၠိုၚ်တုဲ တန်တဴဒၟံၚ်အိုတ်ရ၊ ဗြဲဇၞော်လေဝ် တိုန်ကၠုၚ်ရ၊ ယွံတဳလပိုဉ် ပသာ်ဝွံရော? ရဴဝွံ ဂရၚ်ပတီ တဳလပိုဉ် အာနန္ဒအိုတ်ရ။
ပ္ဍဲအခိၚ်ဂှ် တဳလပိုဉ်အနန္ဒ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲရ။ ယွံအာနန္ဒ ဒှ်သာ်ဂှ်မ္ဂး ယြဴဘာဖျေံစၟဳၜါလပါ်ကီု ဘာဖျေံစၟဳလပါ်ကီု ပြာသာဒ်ပန်ကၠၚ်ကီု ပြာသာဒ်ခၠုပ်ကီု ထီုဂိုဟ်ကီု မဒှ်လအိတ်မုဟ်မွဲ သၚ်မၞုံပၟိက်ရ၊ ဘာဂှ် သၟိတ်တဴရဴဝွံမ္ဂး ကပ္ပိယဘူမိတုဲ ဩဝ်ဒေပ်စွံ ပ္ဍဲဘာညိ။ ယွံခမဳတအ် ရဴဝွံ သ္ဒးသၟိတ်ရ၊ ခမဳ စဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ−
"ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ သၚ် သၟိၚ်တဴဘာမၞုံယၟုဝွံ ရဴဝွံမ္ဂး ကပ္ပိယဘူမိရ၊ ဣဝွံတုန် ပွမကဵုတီရ။
ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ် သၟိတ်တဴဘာမၞုံယၟုဝွံ ရဴဝွံမ္ဂး ရုၚ်ကပ္ပိယဘူမိရ၊ ယြဴကုတဳလပိုဉ်မွဲ သ္ဍိုက်မၠိုက် ပွမသၟိတ်တဴဘာမၞုံယၟုဝွံ ရဴဝွံမ္ဂး ကပ္ပိယဘူမိရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။
သၚ် ဂပ်ဝ်သၟိတ်တဴဘာမၞုံယၟုဝွံ ရဴဝွံမ္ဂးကပ္ပိယဘူမိတုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြ ရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ" ရဴဝွံ (သ္ဒးကဵုတီရ)။
ပ္ဍဲအခိၚ်ဂှ် မၞိဟ်ဂမၠိုၚ် ၜိုဟ်ယာဂု ပ္ဍဲကပ္ပိယဘူမိ မသၟိတ်လဝ်တုဲဂှ်အိုတ်ရ၊ ဖျိန်ပိဏ္ဍပါတ်အိုတ်ရ၊ စဳရေၚ်သွအိုတ်ရ၊ ကုတ်ဒန်ဖျုန်ဂမၠိုၚ်အိုတ်ရ၊ ကရေက်အှော်အိုတ်ရ။ တဳလမၞုံပိုဉ်ကျာ်တြဲ ပ္ဍဲပယာံဖလာၚ်ဂယးဗ္တံဂှ် ဒၠိုက်ကတဵုပြဟ်ပြဟ်မ္ဂး ဂွံမိၚ်ကေတ်ဗရုရမျာၚ်သကာတ်မြဟ်ဇၞော်လှဲ ရမျာၚ်ခ္ဍာ်ဂမၠိုၚ်လ်ရိုအ်ထအဴကၠံၚ်တုဲ "ယွံအာနန္ဒ ဗရုရမျာၚ်သကာတ်မြဟ်ဇၞော်လှဲ ရမျာၚ်ခ္ဍာ်ဂမၠိုၚ် လရိုအ်ထအဴကၠံၚ်ဂှ် မုရမျာၚ်ရော? ရဴဝွံ သၟာန်တဳလပိုဉ်အာနန္ဒရ။
ယွံကျာ်မၞုံပိုဉ် ပ္ဍဲအခိၚ်ဂှ် မၞိဟ်ဂမၠိုၚ် ၜိုဟ်ယာဂု ပ္ဍဲကပ္ပိယဘူမိ မသၟိိတ်လဝ်တုဲဂှ်အိုတ်ရ၊ ဖျိန်ပိဏ္ဍပါတ်အိုတ်ရ၊ စဳရေၚ်သွအိုတ်ရ၊ ကုတ်ဒန်ဖျုန်ဂမၠိုၚ်အိုတ်ရ၊ ကရေက်အှော်အိုတ်ရ။ ယွံကျာ်မၞုံပိုဉ် ဗရုရမျာၚ်သကာတ်မြဟ်ဇၞော်လှဲ ရမျာၚ်ခ္ဍာ်ဂမၠိုၚ် လရိုအ်ထအဴကၠံၚ်ဂှ် ဗရုရမျာၚ်ဝွံရ” ရဴဝွံ (ဂရၚ်ပတီရ)။
ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲမ္ဂး ‘ယွံခမဳတအ် ဟဂပ်ဝ်ပြဘိုဂ် ကပ္ပိယဘူမိ မသၟိတ်လဝ်တုဲဂှ်ရ၊ ကုခမဳမပြဘိုဂ်ဂှ် ဒးအာပတ်ဒုက္ကဋ်ရ။ ယွံခမဳတအ် ဥဿာနန္တိကကုဋဳ ဂေါနိသာဒိကုဋဳ ဂဟပတိကုဋဳ ကဵုအခေါၚ် ကပ္ပိယကုဋဳဂမၠိုၚ်ပိဂကူဝွံရ” ရဴဝွံ သ္ဂးကဵုခမဳဂမၠိုၚ်ရ။
ပ္ဍဲအခိၚ်ဂှ် တဳလပိုဉ်ယသောဇ ဂိယဲဒၟံၚ်ရ၊ သွက်တဳလပိုဉ်ဂှ် ရၚ်တၠုၚ်နၚ်ဂဥုဲဂမၠိုၚ်အိုတ်ရ၊ ဂဥုဲဂမၠိုၚ်ဂှ် ခမဳဂမၠိုၚ် တိုပ်ဒေပ်စွံလဝ် ပ္ဍဲမ္ၚးအိုတ်ရ၊ ဗ္ဂဲကၞိဟကေတ်ဇၞးဇာတ်ဂမၠိုၚ်လေဝ် ကိတ်စအိုတ်ရ၊ ကမၠတ်ဂမၠိုၚ်လေဝ် ရၚ်တၠုၚ်ကၠတ်ဏာအိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ “ယွံခမဳတအ် တၞဟ်နပြဘိုဂ် ကပ္ပိယဘူမိဂှ် ကဵုအခေါၚ်ရ၊ ယွံခမဳတအ် ဥဿာနန္တိကကုဋဳ ဂေါနိသာဒိကုဋဳ ဂဟပတိကုဋဳ သမ္မုတိကုဋဳ ကဵုအခေါၚ် ကပ္ပိယကုဋဳဂမၠိုၚ်ပန်ဂကူဝွံရ” ရဴဝွံ သ္ဂးရ။
ခဏ်စတုတ္တသဳဟတုဲရ။
