၁၇၈။ ဝတ္ထုသကိုပ်ပၞာန်ဇၞော်သဳဟ
၂၉၀။ ပ္ဍဲအခိၚ်ဂှ် သၟိၚ်လိစ္ဆဝဳဂမၠိုၚ် မဒယှ်တှ်ပြာကဋ်လောန်တအ်ဂှ် မံၚ်ဒၟံၚ်မွဲစွံ ကောံဓရီုမံၚ်မွဲစွံ ပ္ဍဲရုၚ်သၟိၚ်ကောံဓရီုအိုတ်တုဲ နကဵုဟိုတ်မဂၠိုၚ် ဟီုသ္ဂးတဴ ဂုဏ်ကျာ်အိုတ်ရ၊ ဟီုသ္ဂးတဴ ဂုဏ်ဓရ်အိုတ်ရ၊ ဟီုသ္ဂးတဴ ဂုဏ်သၚ်အိုတ်ရ။
ပ္ဍဲအခိၚ်ဂှ် သကိုပ်ပၞာန်ဇၞော်သဳဟ မဒှ်ကွးတဳနိဂဏ္ဌဂှ် ဂဇအ်ဒၟံၚ် ပ္ဍဲပရိသာတ်ဂှ်ရ။ ပ္ဍဲအခိၚ်ဂှ် “တဳလမၞုံပိုဉ်ကျာ်တြဲဂှ် ကြက်ဒှ်ကျာ်တြဲ မထေက်ကဒုၚ်ဒါန်ပူဇဴဗွဲတၟေၚ် မဂြၚ်တီကေတ် (ဓရ်အိုတ်သီု) အလဵုဇကု ဗွဲမဍာံစၟတ် ဍာံဍာံရ၊ ဟိုတ်ဒှ်သာ်ဂှ်ဟေၚ် သၟိၚ်လိစ္ဆဝဳဂမၠိုၚ် မဒယှ်တှ်ပြာကဋ်လောန်တအ်ဂှ် မံၚ်ဒၟံၚ်မွဲစွံ ကောံဓရီုမံၚ်မွဲစွံ ပ္ဍဲရုၚ်သၟိၚ်ကောံဓရီုအိုတ်တုဲ နကဵုဟိုတ်မဂၠိုၚ် ဟီုသ္ဂးတဴ ဂုဏ်ကျာ်အိုတ်ရ။ ဟီုသ္ဂးတဴ ဂုဏ်ဓရ်အိုတ်ရ၊ ဟိုသ္ဂးတဴ ဂုဏ်သၚ်အိုတ်ရ၊ အဲဂှ် ဂွံပြာပ်အာ ဗဵုလ္ၚောဝ် တဳလမၞုံပိုဉ်ကျာ်တြဲ မထေက်ဒုၚ်ဒါန်ပူဇဴဗွဲတၟေၚ် မဂြၚ်တီကေတ် (ဓရ်အိုတ်သီု) အလဵုဇကု ဗွဲမဍာံစၟတ်ဂှ်မ္ဂး ခိုဟ်ရ” ရဴဝွံ ကသပ်စိုတ်ကတဵုဒှ်ကၠုၚ် ကုသကိုပ်ပၞာန်ဇၞော်သဳဟရ။
ကြဴနူဂှ် သကိုပ်ပၞာန်ဇၞော်သဳဟဂှ် ပြာပ်အာဇရေၚ် နိဂဏ္ဌနာဋပုတ္တတုဲ “ယွံတဳလပိုဉ် အဲဍိက် နွံပၟိက် တၞဟ်နပြာပ်အာ သွက်ဂွံဗဵုလ္ၚောဝ် ခမဳဂေါတမရ” ရဴဝွံ ဟီုကဵုနိဂဏ္ဌနာဋပုတ္တရ။
ယွံသဳဟ တၠအဲဂှ် သီုမၞုံကဵုကွေတ် ‘ကိရိယဝါဒ’မ္ဂး မထေက်ကဵုသ္ပဖိုဟ် မုဟိုတ် မိက်ဂွံပြာပ်အာ သွက်ဂွံဗဵုလ္ၚောဝ် ခမဳဂေါတမ မၞုံကဵုကွေတ် ‘အကိရယဝါဒ’မ္ဂး ဟွံထေက်ကဵုသ္ပဂှ်ရော? ယွံသဳဟ ခမဳဂေါတမဂှ် မၞုံကဵုကွေတ် ‘အကိရိယဝါဒ’မ္ဂး ဟွံထေက်ကဵုသ္ပရ၊ တွံတဴဓရ် တၞဟ်နဟွံသ္ပရ၊ နကဵုဓရ် (အကိရိယဝါဒ)ဂှ် ဝေတ်ဒၠောံဗ္တောန်တဴ ကွးဂမၠိုၚ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ပွမပတိတ်ဇြဟတ်လွဳပရာ ရဴဝွံမ္ဂး ကြက်အာ သွက်ဂွံဗဵုလ္ၚောဝ်ကျာ်တြဲဂှ် လလမ်အာ ကုသဳဟရ။ မရနုက်ကဵုၜါဝါလေဝ် သၟိၚ်လိစ္ဆဝဳဂမၠိုၚ် မဒယှ်တှ်ပြာကဋ်လောန်တအ်ဂှ် မံၚ်ဒၟံၚ်မွဲစွံ ကောံဓရီုဒၟံၚ်မွဲစွံ ပ္ဍဲရုၚ်သၟိၚ်ကောံဓရီုအိုတ်တုဲ နကဵုဟိုတ်မဂၠိုၚ် ဟီုသ္ဂးတဴ ဂုဏ်ကျာ်အိုတ်ရ၊ ဟီုသ္ဂးတဴ ဂုဏ်ဓရ်အိုတ်ရ၊ ဟီုသ္ဂးတဴ ဂုဏ်သၚ်အိုတ်ရ။
မရနုက်ကဵုၜါဝါလေဝ် “တဳလမၞုံပိုဉ်ကျာ်တြဲဂှ် ကြက်ဒှ်ကျာ်တြဲ မထေက်ဒုၚ်ဒါန် ပူဇဴဗွဲတၟေၚ် မဂြၚ်တီကေတ် (ဓရ်အိုတ်သီု) အလဵုဇကု ဗွဲမဍာံစၟတ် ဍာံဍာံရ၊ ဟိုတ်ဒှ်သာ်ဂှ်ဟေၚ် သၟိၚ်လိစ္ဆဝဳဂမၠိုၚ် မဒယှ်တှ်ပြာကဋ်လောန်တအ်ဂှ် မံၚ်ဒၟံၚ်မွဲစွံ ကောံဓရီုဒၟံၚ်မွဲစွံ ပ္ဍဲရုၚ်သၟိၚ် ကောံဓရီုအိုတ်တုဲ နကဵုဟိုတ်မဂၠိုၚ် ဟီုသ္ဂး ဂုဏ်ကျာ်အိုတ်ရ၊ ဟီုသ္ဂးတဴ ဂုဏ်ဓရ်အိုတ်ရ၊ ဟီုသ္ဂးတဴ ဂုဏ်သၚ်အိုတ်ရ၊ အဲဂှ် ဂွံပြာပ်အာ ဗဵုလ္ၚောဝ် တဳလမၞုံပိုဉ်ကျာ်တြဲ မထေက်ဒုၚ်ဒါန်ပူဇဴတၟေၚ် မဂြၚ်တီကေတ်(ဓရ်အိုတ်သီု) အလဵုဇကု ဗွဲမဍာံစၟတ်ဂှ်မ္ဂး ခိုဟ်ရ” ရဴဝွံ ကသပ်စိုတ် ကတဵုဒှ်ကၠုၚ် ကုသကိုပ်ပၞာန်ဇၞော်သဳဟရ။
မရနုက်ကဵုၜါဝါလေဝ် သကိုပ်ပၞာန်ဇၞော်သဳဟဂှ် ပြာပ်အာဇရေၚ် နိဂဏ္ဌနာဋပုတ္တတုဲ “ယွံတဳလပိုဉ် အဲဍိက် နွံပၟိက် တၞဟ်နပြာပ်အာ သွက်ဂွံဗဵုလ္ၚောဝ် ခမဳဂေါတမ” ရဴဝွံ ဟိုကဵုနိဂဏ္ဌနာဋပုတ္တရ။
ယွံသဳလ တၠအဲဂှ် သီုမၞုံကဵုကွေတ် ‘ကိရိယဝါဒ’မ္ဂး မထေက်ကဵုသ္ပဖိုဟ် မုဟိုတ် မိက်ဂွံပြာပ်အာ သွက်ဂွံဗဵုလ္ၚောဝ် ခမဳဂေါတမ မၞုံကဵုကွေတ် ‘အကိရယဝါဒ’မ္ဂး ဟွံထေက်ကဵုသ္ပဂှ်ရော? ယွံသဳဟ ခမဳဂေါတမဂှ် မၞုံကဵုကွေတ် ‘အကိရိယဝါဒ’မ္ဂး ဟွံထေက်ကဵုသ္ပရ၊ တွံတဴဓရ် တၞဟ်နဟွံသ္ပရ၊ နကဵုဓရ် (အကိရိယဝါဒ)ဂှ် ဝေတ်ဒၠောံဗ္တောန်တဴ ကွးဂမၠိုၚ်ရ ရဴဝွံ (သ္ဂးရ)။
မရနုက်ကဵုၜါဝါလေဝ် ပွမပတိတ်ဇြဟတ်လွဳပရာ ရဴဝွံမ္ဂး ကြက်အာ သွက်ဂွံဗဵုလ္ၚောဝ်ကျာ်တြဲဂှ် လလမ်အာ ကုသဳဟရ။ မရနုက်ကဵုပိဝါလေဝ် သၟိၚ်လိစ္ဆဝဳဂမၠိုၚ် မဒယှ်တှ်ပြာကဋ်လောန်တအ်ဂှ် မံၚ်ဒၟံၚ်မွဲစွံ ကောံဓရီုဒၟံၚ်မွဲစွံ ပ္ဍဲရုၚ်သၟိၚ်ကောံဓရီုအိုတ်တုဲ နကဵုဟိုတ်မဂၠိုၚ် ဟီုသ္ဂးတဴ ဂုဏ်ကျာ်အိုတ်ရ၊ ဟီုသ္ဂးတဴ ဂုဏ်ဓရ်အိုတ်ရ၊ ဟီုသ္ဂးတဴ ဂုဏ်သၚ်အိုတ်ရ။
မရနုက်ကဵုပိဝါလေဝ် “တဳလမၞုံပိုဉ်ကျာ်တြဲဂှ် ကြက်ဒှ်ကျာ်တြဲ မထေက်ဒုၚ်ဒါန် ပူဇဴဗွဲတၟေၚ် မဂြၚ်တီကေတ် (ဓရ်အိုတ်သီု) အလဵုဇကု ဗွဲမဍာံစၟတ် ဍာံဍာံရ၊ ဟိုတ်ဒှ်သာ်ဂှ်ဟေၚ် သၟိၚ်လိစ္ဆဝဳဂမၠိုၚ် မဒယှ်တှ်ပြာကဋ်လောန်တအ်ဂှ် မံၚ်ဒၟံၚ်မွဲစွံ ကောံဓရီုဒၟံၚ်မွဲစွံ ပ္ဍဲရုၚ်သၟိၚ် ကောံဓရီုအိုတ်တုဲ နကဵုဟိုတ်မဂၠိုၚ် ဟီုသ္ဂး ဂုဏ်ကျာ်အိုတ်ရ၊ ဟီုသ္ဂးတဴ ဂုဏ်ဓရ်အိုတ်ရ၊ ဟီုသ္ဂးတဴ ဂုဏ်သၚ်အိုတ်ရ၊ ဂရၚ်ပတီကဵုဒှ် ဟွံဂရၚ်ပတီကဵုဒှ် နိဂဏ္ဌဂမၠိုၚ်ဝွံ မုပမာန်အိုတ်ရော? အဲဂှ် ဟွံဂရၚ်ပတီ နိဂဏ္ဌဂမၠိုၚ်တုဲဟေၚ် ဂွံပြာပ်အာ သွက်ဂွံဗဵုလ္ၚောဝ်ကျာ်တြဲ မထေက်ဒုၚ်ဒါန်ပူဇဴဗွဲတၟေၚ် မဂြၚ်တီကေတ် (ဓရ်အိုတ်သီု) အလဵုဇကု ဗွဲမဍာံစၟတ်ဂှ်မ္ဂး ခိုဟ်ရ” ရဴဝွံ ကသပ်စိုတ် ကတဵုဒှ်ကၠုၚ် ကုသကိုပ်ပၞာန်ဇၞော်သဳဟရ။
ကြဴနူဂှ် သကိုပ်ပၞာန်ဇၞော်သဳဟဂှ် ပ္ဍဲအခိၚ်ဂှ်တ္ၚဲစေၚ် သွက်ဂွံဗဵုလ္ၚောဝ်ကျာ််တြဲ တိတ်အာ နူဍုၚ်ဝေသာလဳ နကဵုကွဳဂမၠိုၚ်မသုန်ကၠံရ။ စဵုကဵုဌာန်အာကဵုယာန်မာန်ဂှ် အာကဵုယာန်တုဲ စှ်ေနူယာန်တုဲ နမကွာ်တိုက်ဟေၚ် ပြာပ်အာဇရေၚ်ကျာ်တြဲတုဲ လ္ၚောဝ်တုဲ ဂဇအ်မံၚ်မွဲဒၞာဲတုဲ-
“ယွံတဳလမၞုံပိုဉ် ‘ခမဳဂေါတမဂှ် မၞုံကဵုကွေတ် ‘အကိရိယဝါဒ’မ္ဂး ဟွံထေက်ကဵုသ္ပရ၊ တွံတဴဓရ် တၞဟ်နဟွံသ္ပရ၊ နကဵုဓရ် (အကိရိယဝါဒ) ဂှ် ဝေတ်ဒၠောံဗ္တောန်တဴ ကွးဂမၠိုၚ်ရ’ ရဴဝွံ ဂွံကေၚ်မိၚ်လဝ်ရ။ ယွံတဳလမၞုံပိုဉ် သာ်လဵုဂှ်ရော?- ‘ခမဳဂေါတမဂှ် မၞုံကဵုကွေတ် ‘အကိရိယဝါဒ’မ္ဂး ဟွံထေက်ကဵုသ်ပရ၊ တွံတဴဓရ် တၞဟ်နဟွံသ္ပရ၊ နကဵုဓရ် (အကိရိယဝါဒ) ဂှ် ဝေတ်ဒၠောံဗ္တောန်တဴ ကွးဂမၠိုၚ်ရ’ ရဴဝွံ ညးမသ္ဂးတဴဂမၠိုၚ်ဂှ် သ္ဂးတဴ အတိုၚ်ကျာ်တြဲ မသ္ဂးအိုတ်ဟာ၊ ဟွံအာစိုပ် စောတ်စောဲကျာ်တြဲ နဂလာန်ဟွံဍာံပြအိုတ်ဟာ၊ ဓရ်ကျာ်တြဲဝွံဂှ်ဟေၚ် တွံတဴ မွဲကဆံၚ်ဟာ၊ ဂလာန် (ညးတအ်) ဟီုမွဲကဆံၚ်ကဵု ဂလာန်မူလတၞမ် (ကျာ်တြဲ) ဂှ် စာ်စ္ဍးနူဟိုတ် မထေက်ကဵုဂရိုဟ်ကီုဟာ။ ပိုဲဍိက်တအ်ဂှ်တုဲ ဟွံမွဲပၟိက်စောတ်စောဲကျာ်တြဲအိုတ်ရ” ရဴဝွံ ဂရၚ်ပတီ ကုတဳလမၞုံပိုဉ်ကျာ်တြဲရ။
၂၉၁။ ယွံသဳဟ ယြဴနနဲပြယာဲလဵုမွဲ “ခမဳဂေါတမဂှ် မၞုံကဵုကွေတ် ‘အကိရိယဝါဒ’မ္ဂး ဟွံထေက်ကဳုသ္ပရ၊ တွံဓရ် တၞဟ်နဟွံသ္ပရ၊ နကဵုဓရ် (အကိရိယဝါဒ) ဂှ်ရ ဝေတ်ဒၠောံဗ္တောန်တဴ ကွးဂမၠိုၚ်ရ” ရဴဝွံ မိက်ဂွံဟီုကဵုအဲကျာ်မ္ဂး ဟီုမာန်ရ၊ နဲပြယာဲသာ်ဂှ် နွံဟေၚ်ရ။ (၁)
ယွံသဳဟ ယြဴနနဲပြယာဲလဵုမွဲ “ခမဳဂေါတမဂှ် မၞုံကဵုကွေတ် ‘ကိရိယဝါဒ’မ္ဂး ထေက်ကဵုသ္ပရ၊ တွံဓရ် တၞဟ်နသ္ပရ၊ နကဵုဓရ် (ကိရိယဝါဒ) ဂှ်ရ ဝေတ်ဒၠောံဗ္တောန်တဴ ကွးဂမၠိုၚ်ရ” ရဴဝွံ မိက်ဂွံဟီုကဵုအဲကျာ်မ္ဂး ဟီုမာန်ရ၊ နဲပြယာဲသာ်ဂှ် နွံဟေၚ်ရ။ (၂)
ယွံသဳဟ ယြဴနနဲပြယာဲလဵုမွဲ “ခမဳဂေါတမဂှ် မၞုံကဵုကွေတ် ‘ဥစ္ဆေဒဝါဒ’မ္ဂး ဂပ်ဝ်ကုတ်ထပိုတ်ရ၊ တွံတဴဓရ် တၞဟ်နကုတ်ထပိုတ်ရ၊ နကဵုဓရ် (ဥစ္ဆေဒဝါဒ) ဂှ်ရ ဝေတ်ဒၠောံဗ္တောန်တဴ ကွးဂမၠိုၚ်ရ” ရဴဝွံ မိက်ဂွံဟီုကဵုအဲကျာ်မ္ဂး ဟီုမာန်ရ၊ နဲပြာယာဲသာ်ဂှ် နွံဟေၚ်ရ။ (၃)
ယွံသဳဟ ယြဴနနဲပြယာဲလဵုမွဲ “ခမဳဂေါတမဂှ် မၞုံသဘဴပွမက္ဍုဟ်မၠေံရ၊ တွံတဴဓရ် တၞဟ်နက္ဍုဟ်မၠေံရ၊ နကဵုဓရ်ဂှ်ရ ဝေတ်ဒၠောံဗ္တောန်တဴ ကွးဂမၠိုၚ်ရ” ရဴဝွံ မိက်ဂွံဟီုကဵုအဲကျာ်မ္ဂး ဟီုမာန်ရ၊ နဲပြယာဲသာ်ဂှ် နွံဟေၚ်ရ။ (၄)
ယွံသဳဟ ယြဴနနဲပြယာဲလဵုမွဲ “ခမဳဂေါတမဂှ် လေပ်ပလီုပလာ်ရ၊ တွံတဴဓရ် တၞဟ်နပလီုပလာ်ရ၊ နကဵုဓရ်ဂှ်ရ ဝေတ်ဒၠောံဗ္တောန်တဴ ကွးဂမၠိုၚ်ရ” ရဴဝွံ မိက်ဂွံဟီုကဵုအဲကျာ်မ္ဂး ဟီုမာန်ရ၊ နဲပြယာဲသာ်ဂှ် နွံဟေၚ်ရ။ (၅)
ယွံသဳဟ ယြဴနနဲပြယာဲလဵုမွဲ “ခမဳဂေါတမဂှ် မၞုံကဵုဒ္ဂေတ် မလေပ်ကတဴကတာန်ရ၊ တွံတဴဓရ် တၞဟ်နကတဴကတာန်ရ၊ နကဵုဓရ်ဂှ်ရ ဝေတ်ဒၠောံဗ္တောန်တဴ ကွးဂမၠိုၚ်ရ” ရဴဝွံ မိက်ဂွံဟီုကဵုအဲကျာ်မ္ဂး ဟီုမာန်ရ၊ နဲပြယာဲသာ်ဂှ် နွံဟေၚ်ရ။ (၆)
ယွံသဳဟ ယြဴနနဲပြယာဲလဵုမွဲ “ခမဳဂေါတမဂှ် စာ်စ္ဍးနူပွမတန်ပဋိသန္ဓိရ၊ တွံတဴဓရ် တၞဟ်နစာ်စ္ဍးနူပွမတန်ပဋိသန္ဓိရ၊ နကဵုဓရ်ဂှ်ရ ဝေတ်ဒၠောံဗ္တောန်တဴ ကွးဂမၠိုၚ်ရ” ရဴဝွံ မိက်ဂွံဟီုကဵုအဲကျာ်မ္ဂး ဟီုမာန်ရ၊ နဲပြယာဲသာ်ဂှ် နွံဟေၚ်ရ။ (၇)
ယွံသဳဟ ယြဴနနဲပြယာဲလဵုမွဲ “ခမဳဂေါတမဂှ် လေပ်ဂၠာဲသ္ၚေဝ်တဴ အရာမကလိဂွံဇၟူရ၊ တွံတဴဓရ် တၞဟ်နကလိဂွံ အရာမကလိဂွံဇၟူရ၊ နကဵုဓရ်ဂှ်ရ ဝေတ်ဒၠောံဗ္တောန်တဴ ကွးဂမၠိုၚ်ရ” ရဴဝွံ မိက်ဂွံဟီုကဵုအဲကျာ်မ္ဂး ဟီုမာန်ရ၊ နဲပြယာဲသာ်ဂှ် နွံဟေၚ်ရ။ (၈)
၂၉၂။ ယွံသဳဟ ယြဴနနဲပြယာဲလဵုမွဲ “ခမဳဂေါတမဂှ် မၞုံကဵုကွေတ် ‘အကိရိယဝါဒ’မ္ဂး ဟွံထေက်ကဵုသ္ရ၊ တွံတဴဓရ် တၞဟ်နဟွံသ္ပရ၊ နကဵုဓရ် (အကိရိယဝါဒ) ဂှ် ဝေတ်ဒၠောံဗ္တောန်တဴ ကွးဂမၠိုၚ်ရ” ရဴဝွံ ညးမိက်ဂွံဟီုကဵုအဲကျာ် ဗွဲမ္ဒးရးဂှ် ဟီုသ္ဂးမာန်ရ၊ နဲဟိုတ်မဟီုမာန်ဂှ် ညးဍေံဂှ်ရော?။
ယွံသဳဟ ‘ကာယဒုစရိုတ်’ ဒ္ဂေတ်ဟွံခိုဟ်ဆာဲ မသ္ပနကာယ ‘ဝစဳဒုစရိုတ်’ ဒ္ဂေတ်ဟွံခိုဟ်ဆာဲ မဟီုနပါၚ် ‘မနောဒုစရိုတ်’ ဒ္ဂေတ်ဟွံခိုဟ်ဆာဲ မချပ်နစိုတ်ဂှ် ဟွံထေက်ကဵုသ္ပရ ရဴဝွံ အဲကျာ် ဟီုတွံရ၊ ဓရ်အကုသိုလ် မယုတ်သဝ်ဂမၠိုၚ်မဂၠိုလေဝ် ဟွံထေက်ကဵုသ္ပရ ရဴဝွံ အဲကျာ်ဟီုတွံရ။ ယွံသဳဟ နနဲပြယာဲဝွံ “ခမဳဂေါတမဂှ် မၞုံကဵုကွေတ် ‘အကိရိယဝါဒ’မ္ဂး ဟွံထေက်ကဵုသ္ပရ၊ တွံတဴဓရ် တၞဟ်နဟွံသ္ပရ၊ နကဵုဓရ်(အကိရိယဝါဒ)ဂှ်ရ ဝေတ်ဒၠောံဗ္တောန်တဴ ကွးဂမၠိုၚ်ရ” ရဴဝွံ ညးမိက်ဂွံဟီုကဵုအဲကျာ် ဗွဲမ္ဒးရးဂှ် ဟီုသ္ဂးမာန်ရ။ (၁)
ယွံသဳဟ ယြဴနနဲပြယာဲလဵုမွဲ “ခမဳဂေါတမဂှ် မၞုံကဵုကွေတ် ‘ကိရိယဝါဒ’မ္ဂး ထေက်ကဵုသ္ပရ၊ တွံဓရ် တၞဟ်နသ္ပရ၊ နကဵုဓရ် (ကိရိယဝါဒ) ဂှ် ဝေတ်ဒၠောံဗ္တောန်တဴ ကွးဂမၠိုၚ်ရ” ရဴဝွံ ညးမိက်ဂွံဟီုကဵုအဲကျာ် ဗွဲမ္ဒးရးဂှ် ဟီုသ္ဂးမာန်ရ၊ နဲဟိုတ်မဟီုမာန်ဂှ် ညးဍေံရော?။
ယွံသဳဟ ‘ကာယသုစရိုတ်’ ဒ္ဂေတ်မခိုဟ်ဆာဲ မသ္ပနကာယ ‘ဝစဳသုစရိုတ်’ ဒ္ဂေတ်မခိုဟ်ဆာဲ မဟီုနပါၚ် ‘မနောဒုစရိုတ်’ ဒ္ဂေတ်မခိုဟ်ဆာဲ မချပ်နစိုတ်ဂှ် ထေက်ကဵုသ္ပရ ရဴဝွံ အဲကျာ် ဟီုတွံရ၊ ဓရ်ကုသိုလ်ဂမၠိုၚ်မဂၠိုလေဝ် ထေက်ကဵုသ္ပရ ရဴဝွံ အဲကျာ်ဟီုတွံရ။ ယွံသဳဟ နနဲပြယာဲဝွံ “ခမဳဂေါတမဂှ် မၞုံကဵုကွေတ် ‘ကိရိယဝါဒ’မ္ဂး ထေက်ကဵုသ္ပရ၊ တွံတဴဓရ် တၞဟ်နဟွံသ္ပရ၊ နကဵုဓရ်(ကိရိယဝါဒ)ဂှ်ရ ဝေတ်ဒၠောံဗ္တောန်တဴ ကွးဂမၠိုၚ်ရ” ရဴဝွံ ညးမိက်ဂွံဟီုကဵုအဲကျာ် ဗွဲမ္ဒးရးဂှ် ဟီုသ္ဂးမာန်ရ။ (၂)
ယွံသဳဟ ယြဴနနဲပြယာဲလဵုမွဲ “ခမဳဂေါတမဂှ် မၞုံကဵုကွေတ် ‘ဥစ္ဆေဒဝါဒ’မ္ဂး ဂပ်ဝ်ကုတ်ထပိုတ်ရ၊ တွံတဴဓရ် တၞဟ်နကုတ်ထပိုတ်ရ၊ နကဵုဓရ်(ဥစ္ဆေဒဝါဒ)ဂှ် ဝေတ်ဒၠောံဗ္တောန်တဴ ကွးဂမၠိုၚ်ရ” ရဴဝွံ ညးမိက်ဂွံဟီုကဵုအဲကျာ် ဗွဲမ္ဒးရးဂှ် ဟီုသ္ဂးမာန်ရ၊ နဲဟိုတ်မဟီုမာန်ဂှ် ညးဍေံဂှ်ရော?။
ယွံသဳဟ ထေက်ကဵုကုတ်ထပိုတ်ကၠေံ ရာဂ ဒေါသ မောဟဂမၠိုၚ်ဂှ် အဲကျာ် ဟီုတွံရ၊ ထေက်ကဵုကုတ်ထပိုတ်ကၠေံ ဓရ်အကုသိုလ် မယုတ်သဝ်ဂမၠိုၚ်မဂၠိုၚ်ဂှ် အဲကျာ်ဟီုတွံရ၊ ယွံသဳဟ နနဲပြယာဲဝွံ ‘ခမဳဂေါတမဂှ် မၞုံကဵုကွေတ် ‘ဥစ္ဆေဒဝါဒ’မ္ဂး ဂပ်ဝ်ကုတ်ထပိုတ်ရ၊ တွံတဴဓရ် တၞဟ်နကုတ်ထပိုတ်ရ၊ နကဵုဓရ်(ဥစ္ဆေဒဝါဒ)ဂှ်ရ ဝေတ်ဒၠောံဗ္တောန်တဴ ကွးဂမၠိုၚ်ရ” ရဴဝွံ ညးမိက်ဂွံဟီုကဵုအဲကျာ် ဗွဲမ္ဒးရးဂှ် ဟီုသ္ဂးမာန်ရ။ (၃)
ယွံသဳဟ ယြဴနနဲပြယာဲလဵုမွဲ “ခမဳဂေါတမဂှ် မၞုံကဵုသဘဴ ပွမက္ဍုဟ်မၠေံရ၊ တွံတဴဓရ် တၞဟ်နက္ဍုဟ်မၠေံရ၊ နကဵုဓရ်ဂှ် ဝေတ်ဒၠောံဗ္တောန်တဴကွးဂမၠိုၚ်ရ” ရဴဝွံ ညးမိက်ဂွံဟီုကဵုအဲကျာ် ဗွဲမ္ဒးရးဂှ် ဟီုသ္ဂးမာန်ရ၊ နဲဟိုတ်မဟီုမာန်ဂှ် ညးဍေံဂှ်ရော?။
ယွံသဳဟ အဲကျာ်ဂှ် က္ဍုဟ်မၠေံ နူ‘ကာယဒုစရိုတ်’ ဒ္ဂေတ်ဟွံခိုဟ်ဆာဲ မသ္ပနကာယ ‘ဝစဳဒုစရိုတ်’ ဒ္ဂေတ်ဟွံခိုဟ်ဆာဲ မဟီုနပါၚ် ‘မနောဒုစရိုတ်’ ဒ္ဂေတ်ဟွံခိုဟ်ဆာဲ မချပ်နစိုတ်ရ၊ က္ဍုဟ်မၠေံ နူပွမအာစိုပ်ဓရ်က္ဍုဟ်မၠေံရ၊ တွံတဴဓရ်တၞဟ်နက္ဍုဟ်မၠေံရ၊ နကဵုဓရ်ဂှ်ရ ဝေတ်ဒၠောံဗ္တောန်တဴကွးဂမၠိုၚ်ရ” ရဴဝွံ ညးမိက်ဂွံဟီုကဵု အဲကျာ် ဗွဲမ္ဒးရးဂှ် ဟီုသ္ဂးမာန်ရ။ (၄)
ယွံသဳဟ ယြဴနနဲပြယာဲလဵုမွဲ “ခမဳဂေါတမဂှ် လေပ်ပလီုပလာ်ရ၊ တွံတဴဓရ် တၞဟ်နပလီုပလာ်ရ၊ နကဵုဓရ်ဂှ် ဝေတ်ဒၠောံဗ္တောန်တဴကွးဂမၠိုၚ်ရ” ရဴဝွံ ညးမိက်ဂွံဟီုကဵုအဲကျာ် ဗွဲမ္ဒးရးဂှ် ဟီုသ္ဂးမာန်ရ၊ နဲဟိုတ်မဟီုမာန်ဂှ် ညးဍေံဂှ်ရော?
ယွံသဳဟ ယြဴနနဲပြယာဲလဵုမွဲ တွံတဴဓရ် တၞဟ်နပလီုပလာ်ကၠေံ ရာဂကီု ဒေါသကီု မောဟကီုရ၊ တွံတဴဓရ် တၞဟ်နပလီုပလာ်ကၠေံ ဓရ်အကုသိုလ် မယုတ်သဝ်ဂမၠိုၚ်မဂၠိုၚ်ရ၊ ယွံသဳဟ နဲပြယာဲဝွံ “ခမဳဂေါတမဂှ် လေပ်ပလီုပလာ်ရ၊ တွံတဴဓရ် တၞဟ်နပလီုပလာ်ရ၊ နကဵုဓရ်ဂှ် ဝေတ်ဒၠောံဗ္တောန်တဴကွးဂမၠိုၚ်ရ” ရဴဝွံ ညးမိက်ဂွံဟီုကဵုအဲကျာ် ဗွဲမ္ဒးရးဂှ် ဟီုသ္ဂးမာန်ရ။ (၅)
ယွံသဳဟ ယြဴနနဲပြယာဲလဵုမွဲ “ခမဳဂေါတမဂှ် မၞုံသဘဴ မလေပ်ကဵုကတဴကတာန်ရ၊ တွံတဴဓရ် တၞဟ်နကတဴကတာန်ရ၊ နကဵုဓရ်ဂှ် ဝေတ်ဒၠောံဗ္တောန်တဴကွးဂမၠိုၚ်ရ” ရဴဝွံ ညးမိက်ဂွံဟီုကဵုအဲကျာ် ဗွဲမ္ဒးရးဂှ် ဟီုသ္ဂးမာန်ရ၊ နဲဟိုတ်မဟီုမာန်ဂှ် ညးဍေံဂှ်ရော?
ယွံသဳဟ လေပ်ကဵုကတဴကတာန်ကၠေံ ဓရ်အကုသိုလ်မယုတ်သဝ်ဂမၠိုၚ်မဂၠိုၚ်ဂှ် ရဴဝွံ အဲကျာ် ဟီုတွံရ၊ လေပ်ကဵုကတဴကတာန်ကၠေံ ‘ကာယဒုစရိုတ်’ ဒ္ဂေတ်ဟွံခိုဟ်ဆာဲ မသ္ပနကာယ ‘ဝစဳဒုစရိုတ်’ ဒ္ဂေတ်ဟွံခိုဟ်ဆာဲ မဟီုနပါၚ် ‘မနောဒုစရိုတ်’ ဒ္ဂေတ်ဟွံခိုဟ်ဆာဲ မချပ်နကဵုစိုတ်ဂှ် ရဴဝွံ ဟီုတွံရ၊ ယွံသဳဟ ညးမပါဲကၠေံ ဓရ်အကုသိုလ်မယုတ်သဝ် မလေပ်ကဵုကတဴကတာန်ဂမၠိုၚ်တုဲ မကုတ်ထပိုတ်ကၠေံရိုဟ် (အဝိဇ္ဇာတဏှာ) ဗွဲမသက္ကုသၟေဟ်တုဲ မသ္ပကၠေံညံၚ်ရဴဒၞာဲတၞံတာ (မပိုက်ကၠေံတုဲ) တုဲ မသ္ပပွမဟွံဒှ် (တၟိ) တုဲ ဟွံမွဲကဵုသဘဴမကတဵုဒှ် ပ္ဍဲလက်ကရဴဂှ် ညးမၞုံကဵုဒ္ဂေတ် မလေပ်ကဵုကတဴကတာန်ကၠေံကိလေသ ရဴဝွံ အဲကျာ်ဟီုတွံရ။ ယွံသဳဟ ကျာ်တြဲဂှ် ပါဲကၠေံဓရ် အကုသိုလ်မယုတ်သဝ် မလေပ်ကဵုကတဴကတာန်ဂမၠိုၚ်တုဲရ၊ ကုတ်ထပိုတ်ကၠေံရိုဟ် (အဝိဇ္ဇာတဏှာ) ဗွဲမသက္ကုသၟေဟ်တုဲရ၊ သ္ပကၠေံညံၚ်ရဴဒၞာဲတၞံတာ (မပိုက်ကၠေံတုဲ) တုဲရ၊ သ္ပပွမဟွံဒှ် (တၟိ) တုဲရ၊ ဟွံမွဲကဵုသဘဴမကတဵုဒှ် ပ္ဍဲလက်ကရဴရ။ ယွံသဳဟ နနဲပြယာဲဝွံ “ခမဳဂေါတမဂှ် မၞုံကဵုဒ္ဂေတ် မလေပ်ကဵုကတဴကတာန်ရ။ တွံတဴဓရ် တၞဟ်နကတဴကတာန်ရ၊ နကဵုဓရ်ဂှ်ရ ဝေတ်ဒၠောံဗ္တောန်တဴကွးဂမၠိုၚ်ရ” ရဴဝွံ ညးမိက်ဂွံဟီုကဵုအဲကျာ် ဗွဲမ္ဂးရးဂှ် ဟီုသ္ဂးမာန်ရ။ (၆)
ယွံသဳဟ ယြဴနနဲပြယာဲလဵုမွဲ “ခမဳဂေါတမဂှ် စာ်စ္ဍးအာနူပွမတန်ပဋိသန္ဓိရ၊ တွံတဴဓရ် တၞဟ်နစာ်စ္ဍးအာနူပွမတန်ပဋိသန္ဓိရ၊ နကဵုဓရ်ဂှ် ဝေတ်ဒၠောံဗ္တောန်တဴကွးဂမၠိုၚ်ရ” ရဴဝွံ ညးမိက်ဂွံဟီုကဵုအဲကျာ် ဗွဲမ္ဒးရးဂှ် ဟီုသ္ဂးမာန်ရ၊ နဲဟိုတ်မဟီုမာန်ဂှ် ညးဍေံဂှ်ရော?
ယွံသဳဟ ညးမပါဲကၠေံပွမတန်ပဋိသန္ဓိမွဲဝါပၠန် ပွမကတဵုဒှ် ပ္ဍဲဘဝတၟိမွဲဝါပၠန်တုဲ မကုတ်ထပိုတ်ကၠေံရိုဟ် (အဝိဇ္ဇာတဏှာ) ဗွဲမသက္ကုသၟေဟ်တုဲ မသ္ပကၠေံညံၚ်ရဴဒၞာဲတၞံတာ (မပိုက်ကၠေံ) တုဲ မသ္ပပွမဟွံဒှ် (တၟိ) တုဲ ဟွံမွဲကဵုသဘဴမကတဵုဒှ် ပ္ဍဲလက်ကရဴဂှ် စာ်စ္ဍးအာ နူပွမတန်ပဋိသန္ဓိရ ရဴဝွံ အဲကျာ်ဟီုတွံရ။ ယွံသဳဟ ကျာ်တြဲဂှ် ပါဲကၠေံ ပွမတန်ပဋိသန္ဓိမွဲဝါပၠန် ပွမကတဵုဒှ် ပ္ဍဲဘဝတၟိမွဲဝါပၠန်တုဲရ၊ ကုတ်ထပိုတ်ကၠေံရိုဟ် (အဝိဇ္ဇာတဏှာ) ဗွဲမသက္ကုသၟေဟ်တုဲရ၊ သ္ပကၠေံ ညံၚ်ရဴဒၞာဲတၞံတာ (မပိုက်ကၠေံတုဲ) တုဲရ၊ သ္ပပွမဟွံဒှ် (တၟိ) တုဲရ၊ ဟွံမွဲကဵုသဘဴမကတဵုဒှ် ပ္ဍဲလက်ကရဴရ၊ ယွံသဳဟ နနဲပြယာဲဝွံ “ခမဳဂေါတမဂှ် စာ်စ္ဍးအာနူပွမတန်ပဋိသန္ဓိရ၊ တွံတဴဓရ် တၞဟ်နစာ်စ္ဍးအာနူပွမတန်ပဋိသန္ဓိရ၊ နကဵုဓရ်ဂှ် ဝေတ်ဒၠောံဗ္တောန်တဴကွးဂမၠိုၚ်ရ” ရဴဝွံ ညးမိက်ဂွံဟီုကဵုအဲကျာ် ဗွဲမ္ဒးရးဂှ် ဟီုသ္ဂးမာန်ရ။ (၇)
ယွံသဳဟ ယြဴနနဲပြယာဲလဵုမွဲ “ခမဳဂေါတမဂှ် လေပ်ဂၠာဲသ္ၚေဝ်တဴ အရာမကလိဂွံဇၟူရ၊ တွံတဴဓရ် တၞဟ်နကလိဂွံ အရာမကလိဂွံဇၟူရ၊ နကဵုဓရ်ဂှ် ဝေတ်ဒၠောံဗ္တောန်တဴကွးဂမၠိုၚ်ရ” ရဴဝွံ ညးမိက်ဂွံဟီုကဵုအဲကျာ် ဗွဲမ္ဒးရးဂှ် ဟီုသ္ဂးမာန်ရ၊ နဲဟိုတ်မဟီုမာန်ဂှ် ညးဍေံဂှ်ရော?
ယွံသဳဟ အဲကျာ်ဂှ် ဂၠာဲသ္ၚေဝ်တဴ အရာမကလိဂွံဇၟူ နမကလိဂွံဇၟူ (မတွံဂးမဂ်ဖိုလ်) ဂှ် မပြဲရ၊ တွံတဴဓရ် တၞဟ်နကလိဂွံ အရာမကလိဂွံဇၟူရ၊ နကဵုဓရ်ဂှ် ဝေတ်ဒၠောံဗ္တောနတဴကွးဂမၠိုၚ်ရ၊ ယွံသဳဟ နနဲပြယာဲဝွံ “ခမဳဂေါတမဂှ် လေပ်ဂၠာဲသ္ၚေဝ်တဴ အရာမကလိဂွံဇၟူရ၊ တွံတဴဓရ် တၞဟ်နကလိဂွံရ၊ နကဵုဓရ်ဂှ် ဝေတ်ဒၠောံဗ္တောန်တဴကွးဂမၠိုၚ်ရ” ရဴဝွံ ညးမိက်ဂွံဟီုကဵုအဲကျာ် ဗွဲမ္ဒးရးဂှ် ဟီုသ္ဂးမာန်ရ။ (၈)
၂၉၃။ တွံတဴသာ်ဝွံမ္ဂး သကိုပ်ပၞာန်ဇၞော်သဳဟဂှ် ဂရၚ်ပတီကုကျာ်တြဲ (ဂလာန်) ဝွံရ- “ယွံတဳလမၞုံပိုဉ် (ဓရ်ဂှ်) ထေက်ကဵုပွမသ္ဍိုက်မၠိုက်လောန်ရ ။ ပ ။ ကျာ်တြဲဂှ် သ္ပတမ်နူတ္ၚဲဝွံတုဲ စဵုကဵုလအိတ်လမျီု စၟတ်သမ္တီလဝ် အဲဍိက် ရဴဝွံမ္ဂး ဥပးလေပ်ပြာပ်ခစရတ်ပိပြကာညိ” ရဴဝွံ (ဂရၚ်ပတီရ)။
ယွံသဳဟ စမ်ၜတ်ဗ္စာရဏာတုဲ သ္ပညိ၊ ကုညးမဒယှ်တှ်ပြာကဋ်ဂမၠိုၚ် ညံၚ်ရဴမၞးတအ်ဂှ် စမ်ၜတ်ဗ္စာရဏာတုဲမှ သ္ပမ္ဂး ခိုဟ်ရ ရဴဝွံ (သ္ဂးရ)။
ယွံတဳလမၞုံပိုဉ် ကျာ်တြဲဂှ် “ယွံသဳဟ စမ်ၜတ်ဗ္စာရဏာတုဲ သ္ပညိ၊ ကုညးမဒယှ်တှ်ပြာကဋ်ဂမၠိုၚ် ညံၚ်ရဴမၞးတအ်ဂှ် စမ်ၜတ်ဗ္စာရဏာတုဲမှ သ္ပမ္ဂး ခိုဟ်ရ” ရဴဝွံ သ္ဂးကဵုအဲဍိက်ရ၊ နကဵုဂလာန်ဝွံလေဝ် အဲဍိက်ဂှ် မိပ်စိုတ်သ္ဍိုက်မၠိုက်လတူကျာ်တြဲ လောန်ကဵုဗၞတ်ရ။
ယွံတဳလမၞုံပိုဉ် တဳမၞုံကဵုကွေတ်မွဲသအာၚ်ဂမၠိုၚ်ဂှ် ကလိဂွံကွး ဗီုအဲဍိက်မ္ဂး “သကိုပ်ပၞာန်ဇၞော်သဳဟဂှ် အာစိုပ်ဒဒှ်ကွးပိုဲရ” ရဴဝွံ ပၠုပ်စိုတ်တုဲ ပစူပတူဇၞော်အလာံ အလုံဍုၚ်ဝေသာလဳအိုတ်ရ၊ သီုမဒှ်တဴသာ်ဂှ် ကျာ်တြဲဂှ် “ယွံသဳဟ “ယွံသဳဟ စမ်ၜတ်ဗ္စာရဏာတုဲ သ္ပညိ၊ ကုညးမဒယှ်တှ်ပြာကဋ်ဂမၠိုၚ် ညံၚ်ရဴမၞးတအ်ဂှ် စမ်ၜတ်ဗ္စာရဏာတုဲမှ သ္ပမ္ဂး ခိုဟ်ရ” ရဴဝွံ သ္ဂးကဵုအဲဍိက်ရ။
ယွံတဳလမၞုံပိုဉ် မရနုက်ကဵုၜါဝါလေဝ် အဲဍိက်ဂှ် ပြာပ်ခစကျာ်တြဲ ရဴဝွံမ္ဂး စ္ၜုဲစ္ၜော်ရ၊ ပြာပ်ခစဓရ် ရဴဝွံမ္ဂး စ္ၜုဲစ္ၜော်ရ၊ ပြာပ်ခစသၚ် ရဴဝွံမ္ဂး စ္ၜုဲစ္ၜော်ရ၊ ကျာ်တြဲဂှ် သ္ပတမ်နူတ္ၚဲဝွံတုဲ စဵုကဵုလအိတ်လမျီု စၟတ်သမ္တီလဝ် အဲဍိက် ရဴဝွံမ္ဂး ဥပးလေပ်ပြာပ်ခစ ရတ်ပိပြကာညိ ရဴဝွံ (ဂရၚ်ပတီရ)။
ယွံသဳဟ လုကဴဗ္တံတ္ၚဲမဂၠိၚ်သ္ၚောဲ သ္ၚိတၠအဲဂှ် ဟိုတ်နူဒှ်ကၠုၚ် ညံၚ်ဍာ်ကဂမၠိုၚ် နိဂဏ္ဌတအ်ဂှ်ရ ဒးကဵုဒါန်ကုၚ်ကဵုနိဂဏ္ဌ မပြာပ်ကၠုၚ်တအ်ရောၚ်ဂှ် ဂွံသတိဗှ်ဗၞုဟ်ညိ ရဴဝွံ (သ္ဂးရ)။ ယွံတဳလမၞုံပိုဉ် ကျာ်တြဲဂှ် “ယွံသဳဟ လုကဴဗ္တံတ္ၚဲမဂၠိၚ်သ္ၚောဲ သ္ၚိတၠအဲဂှ် ဟိုတ်နူဒှ်ကၠုၚ် ညံၚ်ဍာ်ကဂမၠိုၚ် နိဂဏ္ဌတအ်ဂှ်ရ ဒးကဵုဒါန်ကုၚ်ကဵုနိဂဏ္ဌ မပြာပ်ကၠုၚ်တအ်ရောၚ်ဂှ် ဂွံသတိဗှ်ဗၞုဟ်ညိ” ရဴဝွံ သ္ဂးကဵုအဲဍိက်ရ၊ နကဵုဂလာန်ဝွံလေဝ် အဲဍိက်ဂှ် မိပ်စစိုတ်သ္ဍိုက်မၠိုက် လတူတဳလမၞုံပိုဉ်ကျာ်တြဲ လောန်ကဵုဗၞတ်ရ။
ယွံတဳလမၞုံပိုဉ် ခမဳဂေါတမဂှ် တွံတဴ “ထေက်ကဵု ကဵုဒါန် ကုအဲဟေၚ်ရ၊ ဟွံထေက်ကဵု ကဵုဒါန် ကုညးတၞဟ်သအာၚ်ရ၊ ထေက်ကဵု ကဵုဒါန် ကုကွးအဲဟေၚ်ရ၊ ဟွံထေက်ကဵု ကဵုဒါန် ကုကွးညးတၞဟ်သအာၚ်ရ၊ ဒါန်မသၠးကဵုဒါန် ကုအဲဂှ်ဟေၚ် ဖဵုဇၞော်ရ၊ ဒါန်မသၠးကဵုဒါန် ကုညးတၞဟ်သအာၚ်ဂှ် ဖဵုဟွံဇၞော်ရ၊ ဒါန်မသၠးကဵုဒါန် ကုကွးအဲဂှ်ဟေၚ် ဖဵုဇၞော်ရ၊ ဒါန်မသၠးကဵုဒါန် ကုကွးညးတၞဟ်သအာၚ်ဂှ် ဖဵုဟွံဇၞော်ရ” ရဴဝွံ ဂလာန်သာ်ဝွံ အဲဍိက် ကေၚ်မိၚ်လဝ်ရ။
သီုမသှ်တဴသာ်ဂှ် ကျာ်တြဲဂှ် ကဵုအဲဍိက် ဒဂိုန်ဂိုၚ်ကေတ် ပ္ဍဲပွမကဵုဒါန် ကုနိဂဏ္ဌတအ်ဏီရ၊ ယွံတဳလမၞုံပိုဉ် ဗွဲစၟတ်မ္ဂး ပိုဲဍိက်တအ် တီတဴအခိၚ် ပ္ဍဲပွမကဵုဒါန်ဂှ်အိုတ်ရ၊ ယွံတဳလမၞုံပိုဉ် မရနုက်ကဵုပိဝါလေဝ် အဲဍိက်ဂှ် ပြာပ်ခစကျာ်တြဲ ရဴဝွံမ္ဂး စ္ၜုဲစ္ၜော်ရ၊ ပြာပ်ခစဓရ် ရဴဝွံမ္ဂး စ္ၜုဲစ္ၜော်ရ၊ ပြာပ်ခစသၚ် ရဴဝွံမ္ဂး စ္ၜုဲစ္ၜော်ရ၊ ကျာ်တြဲဂှ် သ္ပတမ်နူတ္ၚဲဝွံတုဲ စဵုကဵုလအိတ်လမျီု စၟတ်သမ္တီလဝ် အဲဍိက် ရဴဝွံမ္ဂး ဥပးလေပ်ပြာပ်ခစ ရတ်ပိပြကာညိ ရဴဝွံ (ဂရၚ်ပတီရ)။
တဳလမၞုံပိုဉ်ကျာ်တြဲ တွံကဵုဂလာန်ဓရ် ကုသကိုပ်ပၞာန်ဇၞော်သဳဟ အတိုၚ်လၟေၚ်ရ၊ ဂလာန်ဓရ်ဂှ် ညးဍေံဂှ်ရော? ဂလာန်မစပ်ကဵုဒါနကီု ။ ပ ။ အာစိုပ်ဂံၚ်သကာ (သက်လှက်) ပ္ဍဲသာသသနာကျာ်တြဲတုဲဂှ်ဒှ်တုဲ ဟွံမွဲကဵုညးလျုၚ်ပတှ်ေ မသအာၚ်နူကျာ်ဂှ်ဒှ်တုဲ “ယွံတဳလမၞုံပိုဉ် တဳလမၞုံပိုဉ်ကျာ်တြဲ မွဲဟာန်ကေုာံခမဳသၚ် သွက်တ္ၚဲယးတေံ ဩဝ်ဒုၚ်တဲပိဏ္ဍပါတ် အဲဍိက်ညိကျာ်” ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ နမမံၚ်ဒၟံၚ်သ္ၚိတ်သ္ၚိတ်ဂှ် ဒုၚ်ကေတ်တဲရ။ ပ္ဍဲအခိၚ်ဂှ် သကိုပ်ပၞာန်ဇၞော်သဳဟ တီကေတ် တဳလမၞုံပိုဉ်ကျာ်တြဲ ဒုၚ်တဲတုဲ ဒၠိုက်ကတဵုနူဒၞာဲ လ္ၚောဝ်သ္ပဝတ် တဳလမၞုံပိုဉ်ကျာ်တြဲ သ္ပရှ်ေသှ်ေရဴဂဴတုဲမ္ဂး ပါဲစ္ဍးအာရ။
၂၉၄။ ပ္ဍဲကြဴနူဂှ် သကိုပ်ပၞာန်ဇၞော်သဳဟဂှ် “ယွံသကအ် ဩဝ်အာညိ၊ ဩဝ်တီကေတ် ဖျုန်ကတဵုဒှ် အလဵုလဵုဍေံညိ” ရဴဝွံ ဟီုသ္ဂးတုဲ ဖအောဝ်စကာတြုံမွဲရ။ ပ္ဍဲအခိၚ်ဂှ် ဗ္တံဂှ် လောန်ၜက်အာတုဲ သကိုပ်ပၞာန်ဇၞော်သဳဟ ကဵုစဳရေၚ်တဴ အာဟာရဘောဇိုန်မပြဲပြဲတုဲမ္ဂး “ယွံကျာ်မၞုံပိုဉ် ဒးအခိၚ်ရ၊ ပဠေဝ်လဝ်ပိဏ္ဍပါတ်တုဲရ” ရဴဝွံ ကဵုဂရၚ်ပတီ အခိၚ်ကဵုပိုန် ကုတဳလမၞုံပိုဉ်ကျာ်တြဲရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ပ္ဍဲအခိၚ်ဖလာၚ်ယး ဗိုက်ပဠေဝ်သ္ၚာတုဲ သီုမထ္ၜဂိုၚ်ရပ်ကေတ်ဗဗေၚ်သ္ၚာ မွဲဟာန်ကေုာံခမဳသၚ် က္ညပြာပ်စဴအာ သ္ၚိသကိုပ်ပၞာန်ဇၞော်သဳဟတုဲ ဂဇအ်ဒၟံၚ် ပ္ဍဲသၞာမလးပညပ်လဝ်ဂှ်ရ။ ပ္ဍဲအခိၚ်ဂှ် နိဂဏ္ဌဂမၠိုၚ်မဂၠိုၚ် ပ္ဍဲဍုၚ်ဝေသာလဳ (အာ) ဂၠံၚ်ဇၞော် မွဲဂၠံၚ်တုဲမွဲဂၠံၚ် ဂၠံၚ်သွာၚ် မွဲသွာၚ်တုဲမွဲသွာၚ် ပၚ်ယာလဝ်သပါတဲအိုတ်တုဲ “တ္ၚဲဝွံ သကိုပ်ပၞာန်ဇၞော်သဳဟ ဂစိုတ်တဴသတ် (မပ္တံကၠိက် ဗ္ၜေံ ပြေၚ် ဂၠဴ) မကြောအ်ကၠေၚ်တုဲ ဖာပ်ဗ္စခမဳဂေါတမရ၊ ခမဳဂေါတမဂှ် သီုမတီတဴ ဖျုန်ရန်တၟံတုဲ ဂစိုတ်လဝ်ဂှ် စရ၊ (ကလိဂွံ) အကုသိုလ်ကမ် သ္ပဟိုတ်ကဵုဇကုတုဲ မဂစိုတ်ရ” ရဴဝွံ က္ညာၚ်ကရေဲ ကြဵုဇာအိုတ်ရ။
ပ္ဍဲအခိၚ်ဂှ် တြုံမွဲ ပြာပ်အာဇရေၚ် သ္ၚိသကိုပ်ပၞာန်ဇၞော်သဳဟတုဲ “ယွံတၠနာဲ ဩဝ်တီညိ၊ နိဂဏ္ဌဂမၠိုၚ်မဂၠိုၚ်တအ်ဂှ် ပ္ဍဲဍုၚ်ဝေသာလဳ (အာ) ဂၠံၚ်ဇၞော် မွဲဂၠံၚ်တုဲမွဲဂၠံၚ် ဂၠံၚ်သွာၚ် မွဲသွာၚ်တုဲမွဲသွာၚ် ပၚ်ယာလဝ်သပါတဲအိုတ်တုဲ ‘တ္ၚဲဝွံ သကိုပ်ပၞာန်ဇၞော်သဳဟ ဂစိုတ်တဴသတ် (မပ္တံကၠိက် ဗ္ၜေံ ပြေၚ် ဂၠဴ) မကြောအ်ကၠေၚ်တုဲ ဖာပ်ဗ္စ ခမဳဂေါတမရ၊ ခမဳဂေါတမဂှ် သီုမတီတဴဖျုန်ရန်တၟံတုဲ ဂစိုတ်လဝ်ဂှ် စရ၊ (ကလိဂွံ အကုသိုလ်ကမ် သ္ပဟိုတ်ကဵုဇကုတုဲ မဂစိုတ်ရ' ရဴဝွံ က္ညာၚ်ကရေဲကြဵုဇာအိုတ်ရ" ရဴဝွံ ဟီုလဴစ ပ္ဍဲတမ်ကတောဝ် သကိုပ်ပၞာန်ဇၞော်သဳဟရ။
ယွံအမာံ ဟွံဒးရးရ၊ တၠနာဲနိဂဏ္ဌတအ်ဂှ် လုကဴကာလ ဗ္တံတ္ၚဲမဂၠိၚ်သ္ၚောဲ မၞုံပၟိက်ကဵုမသက္ကုဂုဏ် ကျာ်တြဲအိုတ်ရ၊ မၞုံပၟိက်ကဵုမသက္ကုဂုဏ် ဓရ်အိုတ်ရ၊ မၞုံပၟိက်ကဵုမသက္ကုဂုဏ် သၚ်အိုတ်ရ၊ တဳလပိုဉ်နိဂဏ္ဌဂမၠိုၚ်ဂှ် စောတ်စောဲမံၚ်ကျာ်တြဲ နကဵုဂလာန်ဟွံဍာံစၟတ် ဟွံမွဲပြာကဋ် မလ္ၚုသၟးဂှ် ဒေံါအိုတ်အာဟွံမာန်ရ၊ ပိုဲညးဂမၠိုၚ်တုန် ဟိုတ်နူဟိုတ်မတွံဂးလမျီုကီုလေဝ် နကဵုစေတနာမိက်ဂွံကဵုချိုတ်ဂှ် ဟွံဂစိုတ်တဴ လမျီုညးတၞဟ်အိုတ်ရ ရဴဝွံ ဟီုသ္ဂးရ။
ပ္ဍဲအခိၚ်ဂှ် သကိုပ်ပၞာန်ဇၞော်သဳဟ အလဵုလဵုဇကု ကၠောန်ၜိုတ်တဴ ခမဳသၚ် မၞုံပဓာန်ဍေံကျာ်တြဲ နကဵုစၞအာဟာရဘောဇိုန်မပြဲပြဲ စဵုကဵုတရိုပ်စိုတ် စဵုကဵုဒးဆေဝ်တာရ။ အခိၚ်ကျာ်တြဲ ကဵုပိုဉ်တုဲ ပဲါထောံတဲ နူဗဗေၚ်တုဲဂှ် သကိုပ်ပၞာန်ဇၞော်သဳဟ ဂဇအ်မံၚ်မွဲဒၞာဲရ။ သကိုပ်ပၞာန်ဇၞော်သဳဟ မဂဇအ်ဒၟံၚ်ပ္ဍဲဒၞာဲမွဲဂှ် နကဵုဂလာန်ဓရ် တဳလမၞုံပိုဉ်ကျာ်တြဲ ကဵုတီညာတ်ကေတ် (ဒတုဲဖဵု) ကဵုဒဂိုန်ဂိုၚ်ကေတ် (ဓရ်) (သွက်ဂွံဒ္ဂေတ်ဓရ်) ကဵုသကေက်သကာ ကဵုမြဟ်မြဴတုဲ ကတဵုနူဒၞာဲဂဇအ်တုဲ က္ညစ္ဍးအာရ။
ပ္ဍဲကြဴနူဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲမ္ဂး "ယွံခမဳတအ် သီုကဵုမတီတဴ ဖျုန်ရန်တၟံတုဲ မဂပ်ဝ်ဂစိုတ်ဂှ် ဟဂပ်ဝ်သ္ပပြဘိုဂ်ရ၊ ကုခမဳမသ္ပပြဘိုဂ်ဂှ် ဒးအာပတ်ဒုက္ကဋ်ရ။ ယွံခမဳတအ် ကဵုအခေါၚ် ကဖျုန် မသ္အးဇ္ၚးနူလအိတ်ပိပြကာ မဟွံညာတ် မဟွံမိၚ် မဟွံသၠေဟ်ပၟါရ" ရဴဝွံ သ္ဂးကဵုခမဳဂမၠိုၚ်ရ။
