၁၇၇။ ဝတ္ထုလိစ္ဆဝဳ
၂၈၉။ သၟိၚ်လိစ္ဆဝဳဂမၠိုၚ် မပဒတဴဒၟံၚ် ပ္ဍဲဍုၚ်ဝေသာလဳတအ်ဂှ် “တဳလမၞုံပိုဉ်ကျာ်တြဲ စိုပ်ကၠုၚ်ကွာန်ကောဋိရဂး” ရဴဝွံ ဂွံမိၚ်ကေတ်အိုတ်ရ။ ပ္ဍဲအခိၚ်ဂှ် သၟိၚ်လိစ္ဆဝဳဂမၠိုၚ် မပဒတဴဒၟံၚ် ပ္ဍဲဍုၚ်ဝေသာလဳတအ်ဂှ် ကဵုဗ္ဂန်ကေတ်ယာန်ဂမၠိုၚ် မခိုဟ်ဆာဲခိုဟ်ဆာဲတအ်တုဲ တိုန်ဍိုက်ကေတ်ယာန််တအ်ဂှ်တုဲ သွက်ဂွံဗဵုလ္ၚောဝ် တဳလမၞုံပိုဉ်ကျာ်တြဲ တိတ်ကၠုၚ်နူဍုၚ်ဝေသာလဳ မွဲဟာန်ကေုာံယာန်တအ်ဂှ်အိုတ်ရ။
ပၞောဝ်ကဵုသၟိၚ်လိစ္ဆဝဳဂမၠိုၚ်ဂှ် သၟိၚ်လိစ္ဆဝဳဂမၠိုၚ်လ္ၚဵု နွံကဵုသာ်လမ္စံက် နွံကဵုယာတ်လမ္စံက် နွံကဵုကယျိုၚ်ကယျဝ် လမ္စံက်ဂမၠိုၚ်တုဲ လစံက်ဒၟံၚ်အလုံအိုတ်သီုအိုတ်ရ။
သၟိၚ်လိစ္ဆဝဳဂမၠိုၚ်လ္ၚဵု နွံကဵုသာ်မိတ် နွံကဵုယာတ်သာ်မိတ် နွံကဵုကယျိုၚ်ကယျဝ် သာ်မိတ်ဂမၠိုၚ်တုဲ ဒှ်ဒၟံသ်သာ်မိတ် အလုံအိုတ်သီုအိုတ်ရ။
သၟိၚ်လိစ္ဆဝဳဂမၠိုၚ်လ္ၚဵု နွံကဵုသာ်ဗကေတ် နွံကဵုသာ်ဗကေတ် နွံကဵုကယျိုၚ်ကယျဝ် ဗကေတ်ဂမၠိုၚ်တုဲ ဗကေတ်ဒၟံၚ် အလုံအိုတ်သီုအိုတ်ရ။
သၟိၚ်လိစ္ဆဝဳဂမၠိုၚ်လ္ၚဵု နွံကဵုယာတ်သာ်ဗု နွံကဵုယာတ်ဗု နွံကဵုကယျိုၚ်ကယျဝ်ဗုဂမၠိုၚ်တုဲ ဗုဒၟံၚ် အလုံအိုတ်သီုအိုတ်ရ။
ပ္ဍဲအခိၚ်ဂှ် ဗြဴစရာဲဍုၚ်အမ္ဗပါလဳဂှ် ကွဳသၟိၚ်လိစ္ဆဝဳဂမၠိုၚ် အာယုက်အဝယ် မဍောတ်သွတ်ဍောတ်သွတ် ကေုာံကွဳဇကု ရိကွဳရၚ်သကအ် သၠာကွဳရၚ်သကအ် တဝ်လ္ၚဝ်ကွဳရၚ်သကအ် ကဵုဇီုတေက်ဒးရ။ ပ္ဍဲအခိၚ်ဂှ် သၟိၚ်လိစ္ဆဝဳဂမၠိုၚ်ဂှ် ဟီုသ္ဂးကဵု ဗြဴစရာဲဍုၚ်အမ္ဗပါလဳ ဂလာန်ဝွံအိုတ်ရ “ဟာဲအမ္ဗပါလဳ ကွဳသၟိၚ်လိစ္ဆဝဳဂမၠိုၚ် အာယုက်အဝယ် မဍောတ်သွတ်ဍောတ်သွတ် ကေုာံကွဳတၠအဲ ရိကွဳရၚ်သကအ် သၠာကွဳရၚ်သကအ် တဝ်လ္ၚဝ်ကွဳရၚ်ကအ် မုဟိုတ် တၠအဲ ကဵုဇီုတေက်ဒးဂှ်ရော?” ရဴဝွံ (ဟီုသ္ဂးအိုတ်ရ)။
ယွံကောန်နာဲတအ် တဳလမၞုံပိုဉ်ကျာ်တြဲ မွဲဟာန်ကေုာံခမဳသၚ် သွက်ဂွံကဵုပိုန်တ္ၚဲယးတေံ အဲဘိက်နိမန်လဝ်တုဲရ၊ ဟိုတ်ဂှ်ရ (ကဵုဇီုတေက်ဒးရ) ရဴဝွံ အမ္ဗပါလဳ ကလေၚ်ဟီုရ။
ဟာဲအမ္ဗပါလဳ ပိဏ္ဍပါတ်ဂှ် နကဵုကသာပ်မွဲကိုဋ် ဩဝ်သွံကဵုညိ ရဴဝွံ (ဟီုသ္ဂးအိုတ်ရ)။
ယွံကောန်နာဲတအ် ဍုၚ်ဝေသာလဳ မွဲဟာန်ကေုာံရးခရိုၚ် ၜိုန်ကဵုကုအဲလေဝ် ပိဏ္ဍပါတ်ဂှ် အဲကဵုဟွံမာန်ရ ရဴဝွံ (ကလေၚ်ဟီုရ။)
ပ္ဍဲအခိၚ်ဂှ် သၟိၚ်လိစ္ဆဝဳဂမၠိုၚ်လေဝ် “ယွံအမာံတအ် ညးဗြဴဂှ် ဇၞးအာ ပိုဲညးဂမၠိုၚ်တုဲရ၊ ယွံအမာံတအ် ညးဗြဴဂှ် ဇၞးအာပိုဲညးဂမၠိုၚ်တုဲရ” ရဴဝွံ (သီုဟီုသ္ဂးဂှ်) လယှ်တဲအိုတ်ရ။
ပ္ဍဲအခိၚ်ဂှ် သၟိၚ်လိစ္ဆဝဳဂမၠိုၚ်ဂှ် ပြာပ်အာဇရေၚ် တဳလမၞုံပိုဉ်ကျာ်တြဲအိုတ်ရ။ တဳလမၞုံပိုဉ်ကျာ်တြဲ သ္ဂောံညာတ်ကေတ် သၟိၚ်လိစ္ဆဝဳဂမၠိုၚ် မကၠုၚ်ဒၟံၚ် နူဇမ္ၚောဲဂှ်ဟေၚ်တုဲ ကော်လၟိၚ်တိုန် ခမဳဂမၠိုၚ်ရ
“ယွံခမဳတအ် ခမဳဂမၠိုၚ် မဟွံကေၚ်ညာတ် ဒေဝတဴတာဝတိံဂမၠိုၚ်ဂှ် ဩဝ်မၠာ်သ္ၚေဝ်ဗဵုရံၚ် ပရိသာတ်လိစ္ဆဝဳအိုတ်ညိ၊ ဩဝ်မၠာ်သ္ၚေဝ်ဗဵုရံၚ် ပရိသာတ်လိစ္ဆဝဳ ဂၠိုၚ်ဂၠိုၚ်ကဵုဝါအိုတ်ညိ၊ ပရိသာတ်လိစ္ဆဝဳဂှ် ပတုပ်ကဵု ပရိသာတ်ဒေဝတဴတာဝတိံတုဲ ဩဝ်မၠာ်သ္ၚေဝ် ဗဵုရံၚ်ညိ” ရဴဝွံ (သ္ဂးရ)။
ပ္ဍဲအခိၚ်ဂှ် သၟိၚ်လိစ္ဆဝဳဂမၠိုၚ်ဂှ် ဌာန်မထေက်ကဵုအာ နကဵုယာန်မာန်ဂှ် အာနကဵုယာန်တုဲ စှ်ေနူယာန်တုဲမ္ဂး နတရဴတိုက်ဟေၚ် ပြာပ်အာဇရေၚ် တဳလမၞုံပိုဉ်ကျာ်တြဲတုဲ လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲ ဂဇအ်ဒၟံၚ် ပ္ဍဲဌာန်မဗဗွဲမွဲဒၞာဲအိုတ်ရ။
သၟိၚ်လိစ္ဆဝဳဂမၠိုၚ် မဂဇအ်ဒၟံၚ် ပ္ဍဲဌာန်မဗဗွဲမွဲဒၞာဲဂှ် နကဵုဂလာန်ဓရ် တဳလမၞုံပိုဉ်ကျာ်တြဲ ကဵုတီညာတ်ကေတ် ဒတုဲဖဵု ကဵုဒဂိုန်ဂိုၚ်ကေတ်ဓရ် သွက်သ္ဂောံဒ္ဂေတ်ဓရ် ကဵုသကေက်သကာ ကဵုမြဟ်မြာရ။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ နကဵုဂလာန်ဓရ် ကဵုတီညာတ်ကေတ် ဒတုဲဖဵု ကဵုဒဂိုၚ်ဂိုၚ်ကေတ်ဓရ် သွက်သ္ဂောံဒ္ဂေတ်ဓရ် ကဵုသကေက်သကာ ကဵုမြဟ်မြာတုဲမ္ဂး သၟိၚ်လိစ္ဆဝဳဂမၠိုၚ်ဂှ် ဂရၚ်ပတီတိုန် တဳလမၞုံပိုဉ်ကျာ်တြဲ ဂလာန်ဝွံအိုတ်ရ- “ယွံကျာ်မၞုံပိုဉ်ကျာ်တြဲ မွဲဟာန်ကေုာံခမဳသၚ် သွက်တ္ၚဲယးတေံ ဩဝ်ဒုၚ်တဲပိဏ္ဍပါတ် ပိုဲဍိက်တအ်ညိကျာ်” ရဴဝွံ (ဂရၚ်ပတီအိုတ်ရ)။
"ယွံသၟိၚ်လိစ္ဆဝဳတအ် သွက်တ္ၚဲယးတေံ အဲကျာ် ဒုၚ်လဝ်တဲ ပိဏ္ဍပါတ်ဗြဴစရာဲဍုၚ်အမ္ဗပါလဳတုဲရ” ရဴဝွံ (သ္ဂးရ)။ ပ္ဍဲအခိၚ်ဂှ် သၟိၚ်လိစ္ဆဝဳဂမၠိုၚ်ဂှ် “ယွံအမာံတအ် ညးဗြဴဂှ် ဇၞးအာပိုဲညးဂမၠိုၚ်တုဲရ၊ ယွံအမာံတအ် ညးဗြဴဂှ် ဇၞးအာပိုဲညးဂမၠိုၚ်တုဲရ” ရဴဝွံ (သီုဟီုသ္ဂးဂှ်) လယှ်တဲအိုတ်ရ။ ပ္ဍဲအခိၚ်ဂှ် သၟိၚ်လိစ္ဆဝဳဂမၠိုၚ်ဂှ် ဓရ်တဳလမၞုံပိုဉ်ကျာ်တြဲတွံလဝ်ဂှ် သ္ဍိုက်မၠိုက်လောန်တုဲ အိုဟ်တၟိုဟ်လျုၚ် ဒုၚ်သာဓုကာတုဲမ္ဂး ဒၠိုက်ကတဵုနူဒၞာဲ လ္ၚောဝ်သ္ပဝတ် တဳလမၞုံပိုဉ်ကျာ်တုဲ သ္ပရှ်ေသှ်ေရဴဂဴတုဲ ပါဲစ္ဍးအာအိုတ်ရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲကွာန်ကောဋိ ဗွဲမမိပ်လဟိၚ်တုဲမ္ဂး က္ညအာကွာန်နာတိကရ၊ တဳလမၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲဘာဍိုတ် (ဘာတိုက်) ဇရေၚ်ကွာန်နာတိကဂှ်ရ။
ပ္ဍဲအခိၚ်ဂှ် ဗ္တံဂှ် လောန်ၜက်အာတုဲ ဗြဴစရာဲဍုၚ်အမ္ဗပါလဳ ကဵုစဳရေၚ်တဴ အာဟာရဘောဇိုန်မပြဲပြဲ ပ္ဍဲအာရှာမ်ဇကုတုဲမ္ဂး “ယွံကျာ်မၞုံပိုဉ် ဒးအခိၚ်ရ၊ ပဠေဝ်လဝ် ပိဏ္ဍပါတ်တုဲရ” ရဴဝွံ ကဵုဂရၚ်ပတီ အခိၚ်ကဵုပိုန် ကုတဳလမၞုံပိုဉ်ကျာ်တြဲရ။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ပ္ဍဲအခိၚ်ဖလာၚ်ဂယး ဗိုက်ပဠေဝ်သ္ၚာတုဲ သီုမထ္ၜဂိုၚ်ရပ် ကေတ်ဗဗေၚ်သ္ၚာ မွဲဟာန်ကေုာံခမဳသၚ် က္ညပြာပ်စဴအာ သ္ၚိဗြဴစရာဲဍုၚ်အမ္ဗပါလဳတုဲ ဂဇအ်ဒၟံၚ် ပ္ဍဲသၞာလးပညပ်လဝ်ဂှ်ရ။
ပ္ဍဲအခိၚ်ဂှ် ဗြဴစရာဲဍုၚ်အမ္ဗပါလဳ နကဵုအာဟာဘောဇိုန်မပြဲပြဲ အလဵုဇကု တရိုပ်ဖာပ်ဗ္စခမဳသၚ် မၞုံပဓာန်ဍေံကျာ်တြဲ စဵုကဵုတရိုပ်ကဵုစိုတ် စဵုကဵုဒးဆေဝ်တာ ပဒေါံကၠေံရ။ တဳလမၞုံပိုဉ်ကျာ်တြဲကဵုပိုန်တုဲ ပ္ဍဲအခိၚ် မပါဲကၠေံတဲနူဗဗေၚ်တုဲဂှ် ဗြဴစရာဲဍုၚ်အမ္ဗပါလဳ ဂိုၚ်ကေတ် သၞာဂဇအ်သဝ်သဝ်မွဲတုဲ ဂဇအ်ကေတ် ပ္ဍဲဌာန်မဗဗွဲမွဲဒၞာဲတုဲမ္ဂး ဂရၚ်ပတီတိုန် တဳလမၞုံပိုဉ်ကျာ်တြဲ ဂလာန်ဝွံရ- “ယွံကျာ်မၞုံပိုဉ် အာရှာမ်ဥယျာန်ဝွံ အဲဍိက်ကဵုဒါန် ကုခမဳသၚ် မၞုံပဓာန်ဍေံကျာ်တြဲရ” ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ ဒုၚ်ဒါန် အာရှာမ်ဥယျာန်ဂှ်ရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ နကဵုဂလာန်ဓရ် ကဵုဗြဴစရာဲဍုၚ်အမ္ဗပါလဳ တီညာတ်ကေတ်ဒတုဲဖဵု ကဵုဒဂိုန်ဂိုၚ်ကေတ်ဓရ် သွက်ဂွံဒ္ဂေတ်ဓရ် ကဵုသကေက်သကာ ကဵုမြဟ်မြာတုဲမ္ဂး ဒၠိုက်ကတဵုနူဒၞာဲတုဲ က္ညအာဂြိုပ်မဟာဝိုန်ရ။ တဳလမၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲဘာပြာသာဒ်ဇၞော် မၞုံကဵုအထောဋ်သ္ၚိကၠတ် အပ္ဍဲဂြဂိုပ်မဟာဝိုန် ဇရေၚ်ဍုၚ်ဝေသာလဳဂှ်ရ။
