၁၇၆။ ဝတ္ထုအမ္ဗပါလဳ
၂၈၈။ ဗြဴစရာဲဍုၚ်အမ္ဗပါလဳဂှ် “တဳလမၞုံပိုဉ်ကျာ်တြဲ စိုပ်ကၠုၚ်ကွာန်ကောဋိရဂး” ရဴဝွံ ဂွံမိၚ်ကေတ်ဟေၚ်ရ။ ပ္ဍဲအခိၚ်ဂှ် ဗြဴစရာဲဍုၚ်အမ္ဗပါလဳ ကဵုဗ္ဂန်ကေတ်ယာန်ဂမၠိုၚ် မခိုဟ်ဆာဲ ခိုဟ်ဆာဲတအ်တုဲ တိုန်ဍိုန်ကေတ်ယာန်တအ်ဂှ်တုဲ သွက်ဂွံဗဵုလ္ၚောဝ် တဳလမၞုံပိုဉ်ကျာ်တြဲ တိတ်ကၠုၚ်နူဍုၚ်ဝေသာလဳ မွဲဟာန်ကေုာံယာန်တအ်ဂှ်ရ။ ဌာန်ၜိုတ်ထေက်ကဵုအာ နကဵုယာန်မာန်ဂှ် အာနကဵုယာန်တုဲ စှ်ေနူယာန်တုဲမ္ဂး နတရဴတိုက်ဟေၚ် ပြာပ်အာဇရေၚ် တဳလမၞုံပိုဉ်ကျာ်တြဲတုဲ လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲမ္ဂး ဂဇအ်ဒၟံၚ် ပ္ဍဲဌာန်မဗဗွဲမွဲဒၞာဲရ။
ဗြဴစရာဍုၚ်အမ္ဗပါလဳ မဂဇအ်ဒၟံၚ် ပ္ဍဲဌာန်မဗဗွဲမွဲဒၞာဲဂှ် နကဵုဂလာန်ဓရ် တဳလမၞုံပိုဉ်ကျာ်တြဲ ကဵုတီညာတ်ကေတ်ဒတုဲဖဵု ကဵုဒဂိုန်ဂိုၚ်ကေတ်ဓရ် သွက်ဂွံဒ္ဂေတ်ဓရ် ကဵုသကေက်သကာ ကဵုမြဟ်မြာရ။ ပ္ဍဲအခိၚ်ဂှ် နကဵုဂလာန်ဓရ် တဳလမၞုံပိုဉ်ကျာ်တြဲ ကဵုတီညာတ်ကေတ်ဒတုဲဖဵု ကဵုဒဂိုန်ဂိုၚ်ကေတ်ဓရ် သွက်ဂွံဒ္ဂေတ်ဓရ် ကဵုသကေက်သကာ ကဵုမြဟ်မြာတုဲမ္ဂး ဗြဴစရာဲဍုၚ်အမ္ဗပါလဳဂှ် ဂရၚ်ပတီတိုန် တဳလမၞုံပိုဉ်ကျာ်တြဲ ဂလာန်ဝွံရ- “ယွံကျာ်မၞုံပိုဉ် တဳလမၞုံပိုဉ်ကျာ်တြဲ မွဲဟာန်ကေုာံခမဳသၚ် သွက်တ္ၚဲယးတေံ ဩဝ်ဒုၚ်တဲ ပိဏ္ဍပါတ်အဲဍိက်ဗြဴညိကျာ်” ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ နမမံၚ်ဒၟံၚ်သ္ၚိတ်သ္ၚိတ်ဂှ် ဒုၚ်ကေတ်တဲရ။ ပ္ဍဲကာလဂှ် ဗြဴစရာဲဍုၚ်အမ္ဗပါလဳ တီကေတ် တဳလမၞုံပိုဉ်ကျာ်တြဲ ဒုၚ်တဲတုဲ ဒၠိုက်ကတဵုနူဒၞာဲ လ္ၚောဝ်သ္ပဝတ် တဳလမၞုံပိုဉ်ကျာ်တြဲ သ္ပရှ်ေသှ်ေရဴဂဴတုဲမ္ဂး ပါဲစ္ဍးအာရ။
