၁၇၅။ တွံဓရ်သစ္စပန် ပ္ဍဲကွာန်ကောဋိ
၂၈၇။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ က္ညအာကွာန်ကောဋိရ၊ တဳလမၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲကွာန်ကောဋိရ။ တဳလမၞုံပိုဉ်ကျာ်တြဲ ကော်လၟိၚ်တိုန်ခဂမၠိုၚ်ရ-
“ယွံခမဳတအ် ဟိုတ်ပွမဟွံတီကေတ် ဗွဲမဗဗွဲကဵုဟိုတ် ဟိုတ်ပွမဟွံထပက်ခၠၚ် ဂြၚ်တီကေတ် အရိယသစ္စဂမၠိုၚ်ပန်ပြကာဂှ်ရ အဲကျာ်ကီု မၞးတအ်ညးဂမၠိုၚ်ကီု လုကဴကာလ သံသာမဂၠိၚ်သ္ၚောဲဝွံ ဒးဂြိပ်အာ ဂြိပ်ကၠုၚ်တုဲရ။ ဒးဂေတ်ဂ္ၚေၚ်ကၠုၚ်တုဲရ။
မုရဴ ပန်သာ်လဵုအိုတ်ဂှ်ရော?- ယွံခမဳတအ် ဟိုတ်ပွမဟွံတီကေတ် ဗွဲမဗဗွဲကဵုဟိုတ် ဟိုတ်ပွမဟွံထပက်ခၠၚ် ဂြၚ်တီကေတ် ‘ဒုက္ခအရိယသစ္စ’ ဒဒိုခ်ဍာ်စၟတ်ဂှ်ရ အဲကျာ်ကီု မၞးတအ်ညးဂမၠိုၚ်ကီု လုကဴကာလ သံသာမဂၠိၚ်သ္ၚောဲဝွံ ဒးဂြိပ်အာ ဂြိပ်ကၠုၚ်တုဲရ၊ ဒးဂေတ်ဂ္ၚေၚ်ကၠုၚ်တုဲရ။ ‘ဒုက္ခသမုဒယအရိယသစ္စ’ ဟိုတ်ဒဒိုခ်ကတဵုဒှ် ဍာံစၟတ် ။ ပ ။ ‘နိရောဓအရိယသစ္စ’ အရာဒဒိုခ်ပၠိုတ် ဍာံစၟတ် ။ ပ ။ ‘ဒုက္ခနိရောဓဂါမိနဳပဋိပဒါမဂ္ဂအရိယသစ္စ’ လၟေၚ်ဂၠံၚ်ဟိုတ်ဂွံအာစိုပ် အာရာဒဒိုခ်ပၠိုတ် ဍာံစၟတ်ဂှ် အဲကျာ်ကီု မၞးတအ်ညးဂမၠိုၚ်ကီု လုကဴကာလ သံသာမဂၠိၚ်သ္ၚောဲဝွံ ဒးဂြိပ်အာ ဂြိပ်ကၠုၚ်တုဲရ၊ ဒးဂေတ်ဂ္ၚေၚ်ကၠုၚ်တုဲရ။
ယွံခမဳတအ် အဲကျာ် တီကေတ် ဗွဲမဗဗွဲ ထပက်ခၠၚ်ဂြၚ်တီကေတ် ‘ဒုက္ခအရိယသစ္စ’ ဒဒိုခ်ဍာံစၟတ်ဂှ်တုဲရ၊ တီကေတ် ဗွဲမဗဗွဲ ထပက်ခၠၚ်ဂြၚ်တီကေတ် ‘ဒုက္ခသမုဒယအရိယသစ္စ’ ဟိုတ််ဒဒိုခ်ကတဵုဒှ် ဍာံစၟတ်ဂှ်တုဲရ၊ တီကေတ် ဗွဲမဗဗွဲ ထပက်ခၠၚ်ဂြၚ်တီကေတ် ‘နိရောဓအရိယသစ္စ’ အရာဒဒိုခ်ပၠိုတ် ဍာံစၟတ်ဂှ်တုဲရ၊ တီကေတ် ဗွဲမဗဗွဲ ထပက်ခၠၚ်ဂြၚ်တီကေတ် ‘ဒုက္ခနိရောဓ ဂါမိနဳပဋိပဒါမဂ္ဂအရိယစ္စ’ လၟေၚ်ဂၠံၚ် ဒှ်ဟိုတ်အာစိုပ် အရာဒဒိုခ်ပၠိုတ် ဍာံစၟတ်ဂှ်တုဲရ၊ သကုတ်ဗပိုတ်ကၠေံ ဘဝဝဏှာ ပွမထၞေန်စပ် ပ္ဍဲဘဝဂမၠိုၚ် ဗွဲမသက္ကုသၟေဟ်တုဲရ၊ ဘဝတဏှာ မတုပ်သၟဟ်ကဵုဇုက် မလေပ်တံၚ်ဂြဲဏာဘဝတၟိ အိုတ်အာတုဲရ၊ ပ္ဍဲကာလလၟုဟ်ဝွံ ပွမကတဵုဒှ် ပ္ဍဲဘဝတၟိမွဲလှ်ေပၠန် ဟွံမွဲရ” ရဴဝွံ (သ္ဂးရ)။
“ဟိုတ်ပွမဟွံတီညာတ်ကေတ် အရိယသစ္စဂမၠိုၚ်ပန်ပြကာ အတိုၚ်မဍာံစၟတ်ဂှ်ရ (အဲကျာ်ကီု မၞးတအ်ညးဂမၠိုၚ်ကီု) လုကဴကာလသံသာ မဂၠိၚ်သ္ၚောဲ ဒးဂေတ်ဂ္ၚေၚ်ကၠုၚ် ပ္ဍဲဘဝဂမၠိုၚ်ဂှ်ဂှ်ဟေၚ်တုဲရ။
(အဲကျာ်ကီု မၞးတအ်ညးဂမၠိုၚ်ကီု) ဂပ်ဝ်ညာတ်ကေတ် အရိယသစ္စဂမၠိုၚ်ဂှ်တုဲအိုတ်ရ၊ ပိုက်နုက်ပါဲကၠေံ ဘဝတဏှာ မတုပ်သၟဟ်ကဵုဖုက် မလေပ်တံၚ်ဂြဲဏာ ဘဝတၟိ ဗွဲမ္ဒးရးတုဲရ၊ သကုတ်ဗပိုတ်ကၠေံရိုဟ်ဒဒိုခ် ဗွဲမသက္ကုသၟေဟ်တုဲရ၊ ပ္ဍဲကာလလၟုဟ်ဝွံ ပွမကတဵုဒှ် ပ္ဍဲဘဝတၟိမွဲလှ်ေပၠန် ဟွံမွဲရ” ရဴဝွံ (သ္ဂးရ)။
