၁၇၄။ ခဏ်အမာတ်ဇၞော်သုနိဓ ကေုာံဝဿကာရ ဒက်ပတန်ဍုၚ်ပါဋလိပုတ်
၂၈၆။ ပ္ဍဲအခိၚ်ဂှ် အမာတ်ဇၞော်မဂဓရး ဗဗၞးသုနိဓ ကေုာံဗဗၞးဝဿကာရဂမၠိုၚ် တၞဟ်နကၟာတ်တာဒၞါကၠေံ သၟိၚ်ဝဇ္ဇဳဂမၠိုၚ် ဒက်ပတန်ဒၟံၚ်ဍုၚ် ပ္ဍဲကွာန်ပါဋလိအိုတ်ရ။ တဳလမၞုံပိုဉ်ကျာ်တြဲ ပ္ဍဲအခိၚ်ဖလာၚ်ယး လအိတ်ဗ္တံဂှ် ဒၠိုက်ကတဵုနူမသတၚ်ဒၟံၚ်တုဲ ညာတ်ကေတ်ဒေဝတဴဂမၠိုၚ်မဂၠိုၚ် မသီဂိုၚ်ကေတ်ဒၟံၚ် ဂအာၚ်သ္ၚိ ပ္ဍဲကွာန်ပါဋလိဂှ် နကဵုဒိဗ္ဗစက္ခုဉာဏ် မတုပ်သၟဟ်ကဵုမတ်ဒေဝတဴဂမၠိုၚ် မသ္အးဇ္ၚးဗွဲတၟေၚ် မလောန်လတူမတ်မၞိဟ်ဂမၠိုၚ်ရ။ ပ္ဍဲအရာပ် ဒေဝတဴ မၞုံကဵုကြဳဇှ်မဇၞော်ဂမၠိုၚ် မသီဂိုၚ်ကေတ်လဝ် ဂအာၚ်သ္ၚိဂှ် စိိုတ်ဂမၠိုၚ် လၟောဝ်အာသွက်ဂွံသိုၚ်ခၞံသ္ၚိသၟိၚ် ကေုာံသ္ၚိအမာတ်ဇၞော်ဂမၠိုၚ် မၞုံကဵုကြဳဇှ်မဇၞော်အိုတ်ရ။ ပ္ဍဲအရာပ် ဒေဝတဴမၞုံကဵုကြဳဇှ်တဲလဒေါဝ်ဂမၠိုၚ် မသီဂိုၚ်ကေတ်လဝ် ဂအာၚ်သ္ၚိဂှ် စိုတ်ဂမၠိုၚ် လၟောဝ်အာ သွက်ဂွံသိုၚ်ခၞံသ္ၚိသၟိၚ် ကေုာံသ္ၚိအမာတ်ဇၞော်ဂမၠိုၚ် မၞုံကဵုကြဳဇှ်တဲလဒေါဝ်အိုတ်ရ။ ပ္ဍဲအရာပ် ဒေဝတဴမၞုံကဵုကြဳဇှ်မအောန်ဂမၠဒိၚ် မသီဂိုၚ်ကေတ်လဝ် ဂအာၚ်သ္ၚိဂှ် စိုတ်ဂမၠိုၚ် လၟောဝ်အာသွက်ဂွံသိုၚ်ခၞံသ္ၚိသၟိၚ် ကေုာံသ္ၚိအမာတ်ဇၞော်ဂမၠိုၚ် မၞုံကဵုကြဳဇှ်မအောန်အိုတ်ရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲဂှ် “ယွံအာနန္ဒ မုရဴညးဂမၠိုၚ်လဵု ဒက်ပတန်ဒၟံၚ်ဍုၚ် ပ္ဍဲကွာန်ပါဋလိအိုတ်ဂှ်ရော?” ရဴဝွံ သၟာန်တဳလပိုဉ်အာနန္ဒရ။
ယွံကျာ်မၞုံပိုဉ် အမာတ်ဇၞော်မဂဓရး ဗဗၞးသုနိဓ ကေုာံဗဗၞးဝဿကာရဂမၠိုၚ် တၞဟ်နကၟာတ်တာဒၞါကၠေံ သၟိၚ်ဝဇ္ဇဳဂမၠိုၚ် ဒက်ပတန်ဒၟံၚ်ဍုၚ် ပ္ဍဲကွာန်ပါဋလိအိုတ်ရ ရဴဝွံ (ဂရၚ်ပတီရ)။
ယွံအာနန္ဒ အမာတ်ဇၞော်မဂဓရး ဗဗၞးသုနိဓ ကေုာံဗဗၞးဝဿကာရဂမၠိုၚ် တၞဟ်နကၟာတ်တာဒၞါကၠေံ သၟိၚ်ဝဇ္ဇဳဂမၠိုၚ် ဒက်ပတန်ဒၟံၚ်ဍုၚ် ပ္ဍဲကွာန်ပါဋလိအိုတ်ဂှ် ချပ်ဂၞန်ကဵု ဒေဝတဴတာဝတိံဂမၠိုၚ်ဂှ် ဒှ်ဒၟံၚ် သၟဟ်ညံၚ်ရဴဒက်ပတန်ရ။
ယွံအာနန္ဒ အဲကျာ် ပ္ဍဲအခိၚ်ဖလာၚ်ယး လအိတ်ဗ္တံဂှ် ဒၠိုက်ကတဵုနူမသတၚ်ဒၟံၚ်တုဲ ညာတ်ကေတ် ဒေဝတဴဂမၠိုၚ်မဂၠိုၚ် မသီဂိုၚ်ကေတ်ဒၟံၚ် ဂအာၚ်သ္ၚိ ပ္ဍဲကွာန်ပါဋလိဂှ် နကဵုဒီဗ္ဗစက္ခုဉာဏ် မတုပ်သၟဟ်ကဵုမတ်ဒေဝတဴဂမၠိုၚ် မသ္အးဇ္ၚးဗွဲတၟေၚ် မလောန်လတူမတ်မၞိဟ်ဂမၠိုၚ်ရ။
ယွံအာနန္ဒ ပ္ဍဲအရာပ် ဒေဝတဴမၞုံကဵုကြဳဇှ် မဇၞော်ဂမၠိုၚ် မသီဂိုၚ်ကေတ်လဝ် ဂအာၚ်သ္ၚိဂှ် စိုတ်ဂမၠိုၚ် လၟောဝ်အာ သွက်ဂွံသိုၚ်ခၞံသ္ၚိသၟိၚ် ကေုာံသ္ၚိအမာတ်ဇၞော်ဂမၠိုၚ် မၞုံကဵုကြဳဇှ်မဇၞော်အိုတ်ရ။ ပ္ဍဲအရာပ် ဒေဝတဴမၞုံကဵုကြဳဇှ်တဲလဒေါဝ်ဂမၠိုၚ် မသီဂိုၚ်ကေတ်လဝ် ဂအာၚ်သ္ၚိဂှ် စိုတ်ဂမၠိုၚ် လၟောဝ်အာ သွက်ဂွံသိုၚ်ခၞံသ္ၚိသၟိၚ် ကေုာံသ္ၚိအမာတ်ဇၞော်ဂမၠိုၚ် မၞုံကဵုကြဳဇှ်တဲလဒေါဝ်အိုတ်ရ။ ပ္ဍဲအရာပ် ဒေဝတဴမၞုံကဵုကြဳဇှ်မအောန်ဂမၠိုၚ် မသီဂိုၚ်ကေတ်လဝ် ဂအာၚ်သ္ၚိဂှ် စိုတ်ဂမၠိုၚ် လၟောဝ်အာသွက်ဂွံသိုၚ်ခၞံသ္ၚိသၟိၚ် ကေုာံသ္ၚိအမာတ်ဇၞော်ဂမၠိုၚ် မၞုံကဵုကြဳဇှ်မအောန်အိုတ်ရ။
ယွံအာနန္ဒ ပၞောဝ်ကဵုဍုၚ် ဒၞာဲဂကူအရိယတအ် မကောံဓရီုပဒတဴဂမၠိုၚ် ပၞောဝ်ကဵုဍုၚ် ဒၞာဲမကူသာန်သွံရာန်ဂမၠိုၚ်တအ်ဂှ် ဍုၚ်တၟိဝွံ ကြက်ဒှ်ဍုၚ်ဇၞော် မၞုံယၟုပါဋလိပုတ် ဒှ်ဒၞာဲဖံက်သွံ ဂွဳစိုက်ဂြပ်ရ။ ယွံအာနန္ဒ ဟိုတ်နူပၟတ်ကဵုဒှ် ဟိုတ်နူဍာ်ကဵုဒှ် ဟိုတ်နူစိုတ်ပါ်ဒကးကေုာံရၚ်သကအ်ကဵုဒှ် အန္တရာယ်ဂမၠိုၚ်ပိသာ်ဝွံ ကြက်ကတဵုဒှ် ကုဍုၚ်ပါဋလိပုတ်အိုတ်ရ” ရဴဝွံ (သ္ဂးရ)။
ပ္ဍဲအခိၚ်ဂှ် အမာတ်ဇၞော်မဂဓရး ဗဗၞးသုနိဓ ကေုာံဗဗၞးဝဿကာရဂမၠိုၚ် ပြာပ်အာဇရေၚ် တဳလမၞုံပိုဉ်ကျာ်တြဲတုဲ ဟီုဂလာန် အိုဟ်တၟိုဟ်မိပ်မြဟ် (ဆက်မိတ်) ကေုာံတဳလမၞုံပိုဉ်ကျာ်တြဲ မွဲစွံအိုတ်ရ၊ ဟီုပတုဲကၠေံ ဂလာန်အိုဟ်တၟိုဟ်မိပ်မြဟ် ထေက်ကဵုဗှ်ဗၞုဟ်တုဲ တန်တဴဒၟံၚ် ပ္ဍဲဌာန်မဗဗွဲမွဲဒၞာဲအိုတ်မ္ဂး အမာတ်ဇၞော်မဂဓရး ဗဗၞးသုနိဓ ကေုာံဗဗၞဝဿကာရဂမၠိုၚ်တအ်ဂှ် ဂရၚ်ပတီတိုန် တဳလပိုဉ်ကျာ်တြဲ ဂလာန်ဝွံအိုတ်ရ- “တြနာဲဂေါတမ မွဲဟာန်ကေုာံ ခမဳသၚ် သွက်တ္ၚဲဏအ် ဩဝ်ဒုၚ်တဲပိဏ္ဍပါတ် ပိုဲဍိက်တအ်ညိကျာ်” ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ နမမံၚ်သ္ၚိတ်သ္ၚိတ်ဂှ် ဒုၚ်ကေတ်တဲရ။
ပ္ဍဲအခိၚ်ဂှ် အမာတ်ဇၞော်မဂဓရး ဗဗၞးသုနိဓ ကေုာံဗဗၞးဝဿကာရဂမၠိုၚ် တီကေတ် တဳလမၞုံပိုဉ်ကျာ်တြဲဒုၚ်တဲတုဲ ပြာပ်အာသ္ၚိဇကုအိုတ်တုဲ ကဵုစဳရေၚ်ပိဏ္ဍပါတ် အာဟာရဘောဇိုန်မပြဲပြဲ ပ္ဍဲသ္ၚိဇကုအိုတ်တုဲ “ယွံတြနာဲဂေါတမ ဒးအခိၚ်ရ (ပဠေဝ်လဝ် ပိဏ္ဍပါတ်တုဲရ)” ရဴဝွံ ကဵုဂရၚ်ပတီ အခိၚ်ကဵုပိုဉ် ကုတဳလမၞုံပိုဉ်ကျာ်တြဲအိုတ်ရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ပ္ဍဲအခိၚ်ဂယး ဗိုက်ပဠေဝ်သ္ၚာတုဲ သီမထ္ၜဂိုၚ်ရပ်ကေတ်ဗဗေၚ်သ္ၚာ မွဲဟာန်ကေုာံခမဳသၚ် က္ညပြာပ်အာသ္ၚိ အမာတ်ဇၞော်မဂဓရး ဗဗၞးသုနိဓကေုာံဗဗၞးဝဿကာရဂမၠိုၚ်တုဲ ဂဇအ်စှ်ေ ပ္ဍဲသၞားမလးပညပ်လဝ်ရ။ ပ္ဍဲအခိၚ်ဂှ် အမာတ်ဇၞော်မဂဓရး ဗဗၞးသုနိဓ ကေုာံဗဗၞးဝဿကာရဂမၠိုၚ်တအ်ဂှ် အလဵုဇကုတအ်ဟေၚ် နကဵုအာဟာရဘောဇိုန်မပြဲပြဲ တြာပ်ဖာပ်ဗ္စခမဳသၚ် မၞုံပဓာန်ဍေံကျာ်တြဲ စဵုကဵုတရိုပ်ကဵုစိုတ် စဵုကဵုဒးဆေဝ်တာ ပဒေါံကၠေံအိုတ်ရ။ ပ္ဍဲအခိၚ်ဂှ် အမတ်ဇၞော်မဂဓရး ဗဗၞးသုနိဓ ကေုာံဗဗၞးဝဿကာရဂမၠိုၚ်တအ်ဂှ် ပ္ဍဲအခိၚ်ဂှ် တဳလမၞုံပိုဉ်ကျာ်တြဲကဵုပိုန်တုဲ ပါဲကၠေံတဲ နူဗဗေၚ်တုဲဂှ် ဂိုၚ်ကေတ်သၞားဂဇအ်သဝ်သဝ်မွဲတုဲ ဂဇအ်ဒၟံၚ် ပ္ဍဲဌာန်မဗဗွဲမွဲဒၞာဲအိုတ်ရ၊ အမာတ်ဇၞော်မဂဓရး ဗဗၞးသုနိဓ ကေုာံဗဗၞးဝဿကာရဂမၠိုၚ် မဂဇအ်ဒၟံၚ် ပ္ဍဲဌာန်မဗဗွဲ မွဲဒၞာဲတုဲတအ်ဂှ် တဳလမၞုံပိုဉ်ကျာ်တြဲ သ္ပအနုမောဒနာ နကဵုဂါထာဂမၠိုၚ်ဝွံရ-
“ယွံဗဗၞးတအ် တၠပညာဂှ် ယြဴပ္ဍဲဌာန်မွဲ သိုၚ်ခၞံသ္ၚိဒၟံၚ်ရ၊ ပ္ဍဲဌာန်ဂှ် တြာပ်ဖာပ်ဗ္စ ပူဂိုလ်ဂမၠိုၚ် မၞုံကဵုသဳလ မသ္ၚဳလလမ်မၚ်မွဲ ကာယပါၚ်စိုတ် မဒ္ဂေတ်လ္ၚတ် ဒ္ဂေတ်မပြဲဂှ်တုဲ ဇိုန်ပိုဉ်ပါ်ပရအ် သွက်ကုသိုလ်ဒါန် ကုဒေဝတဴဂမၠိုၚ် မၞုံပ္ဍဲဌာန်ဂှ်ရ။
ဇိုန်ပိုဉ်ပါ်ပရအ် ရဴဝွံမ္ဂး ဒေဝတဴဂမၠိုၚ် မဂွံဒၚ်သ္ပပူဇဴဂှ် ကလေၚ်ပူဇဴ ညးဇိုန်ပိုဉ်ပါ်ပရအ်ကုသိုလ်ဂှ်အိုတ်ရ၊ နမဂွံဒုၚ်သၞေအ်သၞဴဂှ်လေဝ် ကလေၚ်တုဲ သၞေအ်သၞဴအိုတ်ရ။
ဟိုတ်ဂှ်ရ မိဂှ် သၟဟ်ညံၚ်ရဴမၚ်မွဲလဝ် ကောန်ဖျုန်ဆီသြိုဟ်ကီု ဒေဝတဴဂမၠိုၚ် မၚ်မွဲညးဇိုန်ပိုဉ်ပါ်ပရအ် ကုသိုလ်ဂှ်အိုတ်ရ၊ ညးဂွံဒုၚ်မၚ်မွဲကဵုဒေဝတဴဂမၠိုၚ်ဂှ် အခါကာလအိုတ်သီု မ္ၚိုလ်ခိုဟ်ဆာဲဂမၠိုၚ်ဟေၚ် ဂွံညာတ်ကေတ်ရ” ရဴဝွံ (သ္ပအနုမောဒနာရ)။
ပ္ဍဲကြဴနူဂှ် တဳလမၞုံပိုဉ်ကျာ်တြဲ သ္ပအနုမောဒနာကဵု အမာတ်ဇၞော်မဂဓရး ဗဗၞးသုနိဓ ကေုာံဗဗၞးဝသဿကာရဂမၠိုၚ် နကဵုဂါထာဂမၠိုၚ်ဝွံတုဲ ဒၠိုက်ကတဵုနူဒၞာဲတုဲ ပါဲစ္ဍးအာရ။ ပ္ဍဲအခိၚ်ဂှ် အမာတ်ဇၞော်မဂဓရး ဗဗၞးသုနိဓ ကေုာံဗဗၞးဝဿကာရဂမၠိုၚ် “တ္ၚဲဏအ် ယြဴနတြၚ်မွဲ တြနာဲဂေါတမ တိတ်အာရ၊ တြၚ်ဂှ် ကဵုယၟုတြၚ်ဂေါတမရ၊ ယြဴနသၞေဟ်ၜဳဂၚ်္ဂါမွဲ တြနာဲဂေါတမတိတ်ကၠောံအာရ၊ သၞေဟ်ဂှ် ကဵုယၟုသၞေဟ်ဂေါတမရ” ချပ်သာ်ဝွံတုဲ ဗက်အာ နူလက်ကရဴ နူလက်ကရဴ တဳလမၞုံပိုဉ်ကျာ်တြဲအိုတ်ရ။
ပ္ဍဲအခိၚ်ဂှ် တြၚ် တဳလမၞုံပိုဉ်ကျာ်တြဲ မတိတ်အာဂှ် တြၚ်ဂေါတမ ရဴဝွံ ခုတ်ထောံယၟုရ။ ကြဴနူဂှ် တဳလမၞုံပိုဉ်ကျာ်တြဲ က္ညပြာပ်အာ ကြုၚ်ဂၚ်္ဂါရ။ ပ္ဍဲအခိၚ်ဂှ် (ဍုန်ဒၟံၚ် ပ္ဍဲသြၚ်တုဲ) စဵုကဵုခ္ဍာ်သုၚ်ကေတ်မာန် ကြုၚ်ဂၚ်္ဂါဂှ် ဍာ်ပေၚ်ညဳသၟဟ်ဒၟံၚ်သြၚ်ရ။ ညးဂမၠိုၚ်လ္ၚဵု နူသြၚ်မွဲလပါ် မိက်ဂွံအာ သြၚ်မွဲလပါ်ဂှ် ဂၠာဲသ္ၚေဝ်ဂၠုၚ်အိုတ်ရ၊ ညးဂမၠိုၚ်လ္ၚဵု ဂၠာဲသ္ၚေဝ် ဖံၚ်ဆုအိုတ်ရ၊ ညးဂမၠိုၚ်လ္ၚဵု ဒက်ဖံၚ်ဒုန်အိုတ်ရ၊ တဳလမၞုံပိုဉ်ကျာ်တြဲ သ္ဂောံညာတ်ကေတ် ညးဂမၠိုၚ် နူသြၚ်မွဲလပါ် မိက်ဂွံအာသြၚ်မွဲလပါ်ဂမၠိုၚ်တုဲ လ္ၚဵုဂၠာဲဒၟံၚ်ဂၠုၚ်၊ လ္ၚဵုဂၠာဲဒၟံၚ်ဖံၚ်ဆု၊ လ္ၚဵုဒက်ဒၟံၚ်ဖံၚ်ဒုန်ဂှ်ရ။ ညာတ်ကေတ်တုဲ တြုံမၞုံကဵုဇြဟတ်ဂှ် သပါတဲမခ္ဍပ်စွံလဝ်ဂှ် သၟဟ်ညံၚ်ရဴပၠးပတိတ်ကီု သပါတဲ မပၠးစွံလဝ်ဂှ် သၟဟ်ညံၚ်ရဴခ္ဍပ်ပၠုပ်ကီု၊ တုပ်တဴသာ်ဝွံဟေၚ် တဳလမၞုံပိုဉ်ကျာ်တြဲ ကၠေံဗ္ဒန်အာ နူသြၚ်ကြုၚ်ဂၚ်္ဂါလပါ်ဏအ်တုဲ မွဲဟာန်ကေုာံခမဳသၚ် ဒှ်ပြာကဋ် ပ္ဍဲသြၚ်လပါ်တေံရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ တီကေတ် ပရူပရာဂှ်တုဲ ပ္ဍဲအခိၚ်ဂှ် ကြီုဂအောတ်တိုန် ဂလာန်ဥဒါန်ဝွံရ-
“ပူဂိုလ်အရဳဂမၠိုၚ် မၜိၚ်ကၠောံ ၜဳတဏှာ မဇြိုဟ်နက်လှဲတြးဂှ် ကၠောန်ဒဒန်အရိယမဂ်တုဲ သီုမပါဲသၠးကၠေံ လၟက်သရီု ကိလေသဂမၠိုၚ်ဂှ် ၜိၚ်ကၠောံအာအိုတ်ရ၊ ဂကောံမၞိဟ်ဂှ်တုန် သွက်သ္ဂောံတ်ကၠောံၜဳ ဒးဒက်ဒၟံၚ်ဖံၚ်ရ၊ ပူဂိုလ်အရဳဂမၠိုၚ် မၞုံကဵုပညာ မၜိၚ်ကၠောံအာ ၜဳတဏှာတုဲတုန် ဟွံဒးဒက်ဖံၚ်အိုတ်ဟေၚ်ရ” ရဴဝွံ (ကြီုဂအောတ်တိုန်ရ)။
