၁၇၃.၂။ ဖဵုဍိုက်ပေၚ်ကဵုဓရ်သဳလ မသုန်သာ်
ယွံဥပးတအ် ဖဵုအာနိသံသ ပ္ဍဲပွမဍိုက်ပေၚ်တဴကေုာံသဳလ ပူဂိုလ်မၞုံကဵုသဳလဂမၠိုၚ် ဣဝွံမသုန်သာ်အိုတ်ရ။ ညးမ္ဂး မသုန်သာ်အိုတ်ဂှ်ရောမ္ဂးတုန်- ယွံဥပးတအ် ပ္ဍဲလောကဝွံ ပူဂိုလ်မၞုံကဵုသဳလ မဍိုက်ပေၚ်တဴကေုာံသဳလဂှ် ဟိုတ်ပွမဟွံဟိုတ်မာဲဂှ်ရ ကလိဂွံဗွဝ်ပိုဉ်ဟာန်ဘိုဂ်ဘဂ်မဂၠိုၚ်ရ။ ဣဝွံတုန် ဖဵုအာနိသံသ ပ္ဍဲပွမဍိုၚ်ပေၚ်တဴကေုာံသဳလ ပူဂိုလ်မၞုံကဵုသဳလ မဒှ်ကိုပ်ကၠာရ။
ယွံဥပးတအ် မွဲဂကူန်ပၠန်တုန် ပရိုၚ်ဗရုရမျာၚ်ဒယှ်တှ်ခိုဟ်ဆာဲ ပူဂိုလ်မၞုံကဵုသဳလ မဍိုက်ပေၚ်တဴကေုာံသဳလဂှ် ဗျာပ်တြးပြးတိတ်ရ။ ဣဝွံတုန် ဖဵုအာနိသံသ ပ္ဍဲပွမဍိုၚ်ပေၚ်တဴကေုာံသဳလ ပူဂိုလ်မၞုံကဵုသဳလ မရနုက်ကဵုၜါရ။
ယွံဥပးတအ် မွဲဂကူပၠန်တုန် ပူဂိုလ်မၞုံကဵုသဳလ မဍိုက်ပေၚ်တဴကေုာံသဳလဂှ် ပြာပ်အာပရိသာတ်သၟိၚ်ကဵုဒှ် ပရိသာတ်ဗဗၞးကဵုဒှ် ပရိသာတ်ခမဳကဵုဒှ် ပရိသာတ်လဵုမွဲဟွံဟီု ဂွံပြာပ်အာ သီုဟွံဖေက်ဟွံဂၟံက် မုက်ဟွံဍောတ် မတ်ဟွံသဝ်ရ။ ဣဝွံတုန် ဖဵုအာနိသံသ ပ္ဍဲပွမဍိုက်ပေၚ်တဴကေုာံသဳလ ပူဂိုလ်မၞုံသဳလ မရနုက်ကဵုပိရ။
ယွံဥပးတအ် မွဲဂကူပၠန်တုန် ပူဂိုလ်မၞုံကဵုသဳလ မဍိုက်ပေၚ်တဴကေုာံသဳလဂှ် ဂွံချိုတ် သီုဟွံဝိဝိၚ်ရ။ ဣဝွံတုန် ဖဵုအာနိသံသ ပ္ဍဲပွမဍိုက်ပေၚ်တဴကေုာံသဳလ ပူဂိုလ်မၞုံကဵုသဳလ မရနုက်ကဵုပန်ရ။
ယွံဥပးတအ် မွဲဂကူန်ပၠန်တုန် ပူဂိုလ်မၞုံကဵုသဳလ မဍိုက်ပေၚ်တဴကေုာံသဳလဂှ် ခန္ဓဇကုမလီုလာ်တုဲ ပ္ဍဲကြဴနူချိုတ်တုဲဂှ် ဂွံအာစိုပ်ဍုၚ်သွဝ် မဒှ်လအာဂတိ ဒးရးခိုဟ်ဆာဲရ။ ဣဝွံတုန် ဖဵုပ္ဍဲပွမဍိုက်ပေၚ်တဴကေုာံသဳလ ပူဂိုလ်မၞုံကဵုသဳလ မရနုက်ကဵုမသုန်ရ။ ယွံဥပးတအ် ဖဵုအာနိသံသ ပ္ဍဲပွမဍိုက်ပေၚ်တဴကေုာံသဳလ ပူဂိုလ်မၞုံကဵုသဳလဂမၠိုၚ် ဣဝွံ မသုန်သာ်အိုတ်ရ ရဴဝွံ (သ္ဂးရ)။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ လုကဴအခိၚ်ဗ္တံ မလအ်လကာဖာ (စဵုကဵုဗ္တံဂၠုအာ) နကဵုဂလာန်ဓရ် ကဵုဥပးကောန်ညးကွာန်ပါဋလိဂမၠိုၚ် တီညာတ်ကေတ် (ဒတုဲဖဵု) ကဵုဒဂိုန်ဂိုၚ်ကေတ် (ဓရ်) (သွက်ဂွံဒ္ဂေတ်ဓရ်) ကဵုသကေက်သကာ ကဵုမြဟ်မြဴတုဲမ္ဂး ကလေၚ်ဗလးဖျဴရ- “ယွံဥပးတအ် ကလိလောန်အာဇိုၚ်ဗ္တံတုဲရ၊ ပ္ဍဲကာလလၟုဟ်ဝွံ အခိၚ်သွက်ဂွံအာဂှ် မၞးတအ် တီကေတ်အိုတ်ညိ၊ (သွက်ဂွံအာဂှ် ဒှ်အတိုၚ်ပၟိက် မၞးတအ်ဟေၚ်ရ)” ရဴဝွံ (သ္ဂးရ)။
“ယွံကျာ်မၞုံပိုဉ် ခိုဟ်ရ” ရဴဝွံ ဥပးကောန်ညးကွာန်ပါဋလိဂမၠိုၚ် ဒုၚ်ဝန် ကုတဳလမၞုံပိုဉ်ကျာ်တြဲတုဲ ဒၠိုက်ကတဵုနူဒၞာဲ လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲ သ္ပရှ်ေသှ်ေရဴဂဴတုဲ ကလေၚ်စဴအာအိုတ်ရ၊ ပ္ဍဲအခိၚ်ဂှ် ဥပးကောန်ညးကွာန်ပါဋလိဂမၠိုၚ် ကလေၚ်စဴအာအိုတ်တုဲ ခြာဟွံလအ် တဳလမၞုံပိုဉ်ကျာ်တြဲ လုပ်အာဌာန်သ္ၚိတ်ဇြရ။
