၁၇၃.၁။ ဒုဟ်ဓရ်သဳလလီုလာ် မသုန်သာ်
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ကော်လၟိၚ်တိုန် ဥပးကောန်ညးကွာန်ပါဋလိဂမၠိုၚ်ရ- “ယွံဥပးတအ် ဒုဟ်ပ္ဍဲပွမသဳလလီုလာ် ညးဟွံမွဲကဵုသဳလဂမၠိုၚ် ဣဝွံ မသုန်သာ်အိုတ်ရ။ ညးမ္ဂးမသုန်သာ်အိုတ်ဂှ်ရောမ္ဂးတုန်- ယွံဥပးတအ် ပ္ဍဲလောကဝွံ ပူဂိုလ် မဟွံမွဲကဵုသဳလ သဳလမလီုလာ်ဂှ် ဟိုတ်ပွမဟိုတ်မာဲဂှ်ရ အာစိုပ်ပွမဟောံဗြောံ ပိုဉ်ဟာန်ဘိုဂ်ဘဂ်မဂၠိုၚ်ရ၊ ဣဝွံတုန် ဒုဟ်ပ္ဍဲပွမသဳလလီုလာ် ပူဂိုလ်မဟွံမွဲကဵုသဳလ မဒှ်ကိုပ်ကၠာရ။
ယွံဥပးတအ် မွဲဂကူပၠန်တုန် ဗရုရမျာၚ်ဒယှ်တှ်ဟွံခိုဟ်ဆာဲ ပူဂိုလ်မဟွံမွဲကဵုသဳလ သဳလမလီုလာ်ဂှ် ဗျာပ်တြးပြးတိတ်ရ။ ဣဝွံတုန် ဒုဟ်ပ္ဍဲပွမသဳလလီုလာ် ပူဂိုလ်မဟွံမွဲကဵုသဳလ မရနုက်ကဵုၜါရ။
ယွံဥပးတအ် မွဲဂကူပၠန်တုန် ပူဂိုလ်မဟွံမွဲကဵုသဳလ သဳလမလီုလာ်ဂှ် ပြာပ်အာပရိသာတ်သၟိၚ်ကဵုဒှ် ပရိသာတ်ဗဗၞးကဵုဒှ် ပရိသာတ်သမ္ၚေဟ်ကဵုဒှ် ပရိသာတ်ခမဳကဵုဒှ် ပရိသာတ်လဵုမွဲဟွံဟီု ဒးပြာပ်အာဇေက်ဖေက်ဂၠံက်ဂၟံက် မုက်ဍောတ်မတ်သဝ်ရ။ ဣဝွံတုန် ဒုဟ်ပ္ဍဲပွမသဳလမလီုလာ် ပူဂိုလ်မဟွံမွဲကဵုသဳလ မရနုက်ကဵုပိရ။
ယွံဥပးတအ် မွဲဂကူပၠန်တုန် ပူဂိုလ်မဟွံမွဲကဵုသဳလ သဳလမလီုလာ်ဂှ် ဒးချိုတ်သီုဂဝိဝိၚ်ရ။ ဣဝွံတုန် ဒုဟ်ပ္ဍဲပွမသဳလမလီုလာ် ပူဂိုလ်မဟွံမွဲကဵုသဳလ မရနုက်ကဵုပန်ရ။
ယွံဥပးတအ် မွဲဂကူပၠန်တုန် ပူဂိုလ်မဟွံမွဲကဵုသဳလ သဳလမလီုလာ်ဂှ် ခန္ဓဇကုလီုလာ်တုဲ ပ္ဍဲကြဴနူချိုတ်တုဲဂှ် ဒ:အာစိုပ်နရက် မဟွံမွဲကဵုတသိုခ် မဒှ်လအာဂတိ ဟွံဒးရးခိုဟ်ဆာဲ ဒှ်ဒၞာဲ ဒတုံစှ်ေလီုလာ်ရ။ ဣဝွံတုန် ဒုဟ်ပ္ဍဲပွမသဳလမလီုလာ် ပူဂိုလ်မဟွံမွဲကဵုသဳလ မရနုက်ကဵုမသုန်ရ။ ယွံဥပးတအ် ဒုဟ်ပ္ဍဲပွမသဳလမလီုလာ် ပူဂိုလ်မဟွံမွဲကဵုသဳလဂမၠိုၚ် ဣဝွံ မသုန်သာ်အိုတ်ရ။
