၁၇၃။ ဝတ္ထုပါဋလိဂါမ
၂၈၅။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲဍုၚ်ရာဇဂြိုဟ် ဗွဲမမိပ်လဟိၚ်တုဲမ္ဂး မွဲဟာန်ကေုာံခမဳသၚ်ဂမၠိုၚ် မဂၠိုၚ်ဂၠၚ် ဗၞတ်လ္ၚီၜါကၠံမသုန်စှော် က္ညဂ္ၚေၚ်အာဒေသစာရိတ် ကွာန်ပါဋလိရ။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ အတိုၚ်လၟေၚ်လၟေၚ် ဂေတ်ဂ္ၚေၚ်က္ညအာဒေသစာရိတ်မ္ဂး စိုပ်ကၠုၚ်ကွာန်ပါဋလိရ။ ဥပးပဒတဴ ပ္ဍဲကွာန်ပါဋလိဂမၠိုၚ် “တဳလမၞုံပိုဉ်ကျာ်တြဲ က္ညကၠုၚ်စိုပ် ကွာန်ပါဋလိရဂး” ရဴဝွံ သ္ဂောံမိၚ်ကေတ်အိုတ်ရ။
ပ္ဍဲအခိၚ်ဂှ် ပြာပ်အာဇရေၚ် တဳလမၞုံပိုဉ်ကျာ်တြဲ လ္ၚောဝ်သ္ပဝတ်တုဲ ဥပးကောန်ကွာန်ပါဋလိဂမၠိုၚ် မဂဇအ်ဒၟံၚ် ပ္ဍဲဒၞာဲအိုတ်ဂှ် တဳလမၞုံပိုဉ်ကျာ်တြဲဂှ် နကဵုဂလာန်ဓရ် ကဵုတီညာတ်ကေတ် (ဒတုဲဖဵုမြမောဝ်) ကဵုဒဂိုန်ဂိုၚ်ကေတ် (ဓရ်) (သွက်ဂွံဒ္ဂေတ်ဓရ်) ကဵုသကေက်သကာ ကဵုမြဟ်မြာရ။ ပ္ဍဲအခိၚ်ဂှ် ဥပးကောန်ကွာန် ပါဋလိဂမၠိုၚ်ဂှ် နကဵုဂလာန်ဓရ် တဳလမၞုံပိုဉ်ကျာ်တြဲ ကဵုတီညာတ်ကေတ် (ဒတုဲဖဵုမြမောဝ်) ကဵုဒဂိုန်ဂိုၚ်ကေတ် (ဓရ်) (သွက်ဂွံဒ္ဂေတ်ဓရ်) ကဵုသကေက်သကာ ကဵုမြဟ်မြာတုဲမ္ဂး “ယွံကျာ်မၞုံပိုဉ် တဳလမၞုံပိုဉ်ကျာ်တြဲ မွဲဟာန်ကေုာံခမဳသၚ် ဩဝ်ဒုၚ်တဲ ဇြပ်ကၟုဲဂမၠိုၚ်ဇူဒီု ပိုဲဍိက်တအ်ညိကျာ်” ရဴဝွံ ဂရၚ်ပတီ တဳလမၞုံပိုဉ်ကျာ်တြဲအိုတ်ရ။ တဳလမၞုံပိုဉ်ကျာ်တြဲ နမမံၚ်သ္ၚိတ်သ္ၚိတ် ဒုၚ်ကေတ်တဲရ။
ပ္ဍဲအခိၚ်ဂှ် ဥပးကောန်ကွာန်ပါဋလိဂမၠိုၚ် တီကေတ် တဳလမၞုံပိုဉ်ကျာ်တြဲ ဒုၚ်တဲတုဲ ဒၠိုက်ကတဵုနူဒၞာဲ လ္ၚောဝ်သ္ပဝတ် တဳလမၞုံပိုဉ်ကျာ် သ္ပရှ်ေသှ်ေရဴဂဴတုဲမ္ဂး ပြာပ်အာ ဇြပ်ကၟုဲဇူဒီုအိုတ်တုဲ ပ္ဍဲဇြပ်ကၟုဲဇူဒီုဂှ် ပွမလးစွံလဝ် သၞာလးပေၚ်ပေၚ် ပွမလးပဠေဝ်စွံလဝ် သၞာဂဇအ်ဂမၠိုၚ် ပွမစွံပတန်လဝ် ဍာ်နုၚ်ဇၞော်ပေၚ်ပေၚ် ပွမစံၚ်ဗဂဵုပၟတ် ကၠေၚ်သ္ဍဴဂမၠိုၚ် ပဠေဝ်ပဠေတ်လဝ်တုဲမ္ဂး ကလေၚ်ပြာပ်အာဇရေၚ်တဳလမၞုံပိုဉ်ကျာ်တြဲတုဲ လ္ၚောဝ်သ္ပဝတ်တဳလမၞုံပိုဉ်ကျာ်တြဲတုဲ တန်တဴပ္ဍဲဌာန်မဗဗွဲမွဲဒၞာဲတုဲမ္ဂး ဥပးကောန်ညးကွာန်ပါဋလိဂမၠိုၚ် ဂရၚ်ပတီ တဳလမၞုံပိုဉ်ကျာ်တြဲ ဂလာန်ဝွံအိုတ်ရ-
“ယွံကျာ်မၞုံပိုဉ် ပ္ဍဲဇြပ်ကၟုဲဇူဒီုဂှ် လးစွံလဝ် သၞးလးပေၚ်ပေၚ်တုဲရ၊ သၞာဂဇအ်ဂမၠိုၚ်ဂှ်လေဝ် ပဠေဝ်စွံလဝ်တုဲရ၊ ဍာ်နုၚ်ဇၞော်ပေၚ်ပေၚ်လေဝ် စွံပတန်လဝ်တုဲရ၊ ပၟတ်ကၠေၚ်သ္ဍဴလေဝ် စံၚ်ဗဂဵုလဝ်တုဲရ၊ ယွံကျာ်မၞုံပိုဉ် ပ္ဍဲကာလလၟုဟ်ဝွံ အခိၚ်သွက်ဂွံက္ညအာဂှ် တဳလမၞုံပိုဉ်ကျာ်တြဲ တီကေတ်ညိ၊ (သွက်ဂွံက္ညအာဂှ် ဒှ်အတိုၚ်လၟေၚ်ပၟိက် တဳလမၞုံပိုဉ်ကျာ်တြဲဟေၚ်ရ)” ရဴဝွံ (ဂရၚ်ပတီအိုတ်ရ)။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ဗိုက်ပဠေဝ်သ္ၚာဲတုဲ သီုမထ္ၜဂိုၚ်ရပ်ကေတ် ဗဗေၚ်သ္ၚာ ပြာပ်အာ ဇြပ်ကၟုဲဇူဒီု မွဲဟာန်ကေုာံခမဳသၚ်တုဲ ကြဴကြာတ်ဇိုၚ်တုဲ လုပ်အာ ဇြပ်ကၟုဲဇူဒီုတုဲမ္ဂး သီုမနိဿယ်ဒလာဲကေတ် ဒယိုၚ်လဒေါဝ် ဂတးဏာမုခ် လပါ်ဒိုဟ်ဗၟံက်တုဲ ဂဇအ်ဒၟံၚ်ရ။ ခမဳသၚ်လေဝ် ကြဴကြာတ်ဇိုၚ်တုဲ လုပ်အာဇြပ်ကၟုဲဇူဒီုတုဲမ္ဂး သီုမနိဿယ်ဒလာဲကေတ် ဗဒၚ်လပါ်ပလိုတ် ဂတးဏာမုခ် လပါ်ဒိုဟ်ဗၟံက် စွံလဝ်တဳလမၞုံပိုဉ်ကျာ်တြဲ ဂတဟေၚ်တုဲ ဂဇအ်ဒၟံၚ်ရ။ ဥပးကောန်ညးကွာန်ပါဋလိဂမၠိုၚ်လေဝ် ကြဴကြာတ်ဇိုၚ်အိုတ်တုဲ လုပ်အာဇြပ်ကၟုဲဒီုတုဲအိုတ်မ္ဂး သီုမနိဿယ်ဒလာဲကေတ် ဗဒၚ်လပါ်ဒိုဟ်ဗၟံက် ဂတးဏာမုခ် လပါ်ဒိုဟ်ပလိုတ် စွံလဝ် တဳလမၞုံပိုဉ်ကျာ်တြဲ ဂတဟေၚ် ဂဇအ်ဒၟံၚ်အိုတ်ရ။
