၁၇၂။ ဝတ္ထုဗေလဋ္ဌကစ္စန
၂၈၄။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲကွာန်အန္ဓကဝိန္ဒ ဗွဲမမိပ်လဟိၚ်တုဲမ္ဂး မွဲဟာန်ကေုာံခမဳသၚ်ဂမၠိုၚ်မဂၠိုၚ်ဂၠၚ် ဗၞတ်လ္ၚီၜါကၠံမသုန်စှော် က္ညဂ္ၚေၚ်အာဒေသစာရိတ် ဍုၚ်ရာဇဂြိုဟ်ရ။ ပ္ဍဲအခိၚ်ဂှ် ဗေလဋ္ဌကစ္စာန နူဍုၚ်ရာဇဂြိုဟ် သွိုန်ဗပိုန်တရဴအဓာန်မဂၠိၚ်သ္ၚောဲ ကွာန်အန္ဓကဝိန္ဒ နကဵုကွဳမဂမၠိုၚ်မသုန်ကၠံ မပေၚ်တဴနကဵုနုၚ်တၚ်လာဲဂမၠိုၚ်အလုံအိုတ်သီုရ။ တဳလမၞုံပိုဉ်ကျာ်တြဲ ညာတ်ကေတ် ဗေလဋ္ဌကစ္စာန မကၠုၚ်ဒၟံၚ်နူဇမ္ၚောဲတုဲ တၞီစှ်ေနူဂၠံၚ်တရဴတုဲ ဂဇအ်ဒၟံၚ်ပ္ဍဲသၟဝ် တမ်ဆုမွဲရ။
ပ္ဍဲအခိၚ်ဂှ် ဗေလဋ္ဌဂှ် ပြာပ်အာဇရေၚ် တဳလမၞုံပိုဉ်ကျာ်တြဲတုဲမ္ဂး လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲ သီုမဂဇအ်ဒၟံၚ်ပ္ဍဲဒၞာဲမွဲဂှ် “ယွံကျာ်မၞုံပိုဉ် အဲဍိက် နွံပၟိက် တၞဟ်နကဵုဒါန် နုၚ်တၚ်လာဲမွဲမွဲမ ကုခမဳမွဲမွဲဇကုဇဳရ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။
ယွံကစ္စာန ဒှ်သာ်ဂှ်မ္ဂး တၠအဲ ဩဝ်ရၚ်တၠုၚ် နုၚ်တၚ်လာဲမွဲမဟေၚ်ညိ ရဴဝွံ (သ္ဂးရ)။ “ခိုဟ်သန်ရ ယွံကျာ်မၞုံပိုဉ်” ရဴဝွံ ဗေလဋ္ဌကစ္စာန ဒုၚ်ဝန် ကုတဳလမၞုံပိုဉ်ကျာ်တြဲတုဲမ္ဂး–
ဂိုၚ်ကေတ်နၚ် နုၚ်တၚ်လာဲမွဲမဟေၚ်တုဲ ပြာပ်ကၠုၚ်ဇရေၚ် တဳလမၞုံပိုဉ်ကျာ်တြဲတုဲမ္ဂး “ယွံကျာ်မၞုံပိုဉ် ရၚ်တၠုၚ်ကေတ်နၚ် နုၚ်တၚ်လာဲတုဲရ၊ ယွံတဳလမၞုံပိုဉ် အဲဍိက်မသာ်ဂွံဒ္ဂေတ်သ္ပရော?” ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။
ယွံကစ္စာန ဒှ်သာ်ဂှ်မ္ဂး တၠအဲ ဩဝ်ကဵုဒါန်တၚ်တလာဲ ကုခမဳဂမၠိုၚ်ညိ ရဴဝွံ (သ္ဂးရ)။ “ခိုဟ်သန်ရ ယွံကျာ်မၞုံပိုဉ်” ဗေလဋ္ဌကစ္စာန ဒုၚ်ဝန် ကုတဳလမၞုံပိုဉ်ကျာ်တြဲတုဲမ္ဂး ကဵုဒါန်တၚ်လာဲ ကုခမဳဂမၠိုၚ်တုဲ “ယွံတဳလမၞုံပိုဉ် ဂပ်ဝ်ကဵုဒါန်တၚ်လာဲ ကုခမဳဂမၠိုၚ်တုဲရ၊ တၚ်လာဲဝွံ သှ်ေသၟေဟ်ဒၟံၚ်ဗွဲမဂၠိုၚ်ဏီရ၊ ယွံတဳလမၞုံပိုဉ် အဲဍိက် ပသာ်ဂွံသ္ပဒ္ဂေတ်သ္ပရော?” ရဴဝွံ ဂရၚ်ပတီ တဳလမၞုံပိုည်ကျာ်တြဲရ။
ယွံကစ္စာန သှ်ေသၟေဟ်ဒၟံၚ်သာ်ဂှ်ဏီမ္ဂး တၠအဲ ဩဝ်ကဵုဒါန်တၚ်လာဲ ကုခမဳဂမၠိုၚ် အတိုၚ်နွံပၟိက်ညိ ရဴဝွံ (သ္ဂးရ)။ “ခိုဟ်သန်ရ ယွံကျာ်မၞုံပိုဉ်” ရဴဝွံ ဗေလဋ္ဌကစ္စာန ဒုၚ်ဝန် ကုတဳလမၞုံပိုဉ်ကျာ်တြဲတုဲမ္ဂး ကဵုဒါန်တၚ်လာဲ ကုခမဳဂမၠိုၚ် အတိုၚ်နွံပၟိက်တုဲပ္ဍဲကြဴ “ယွံတဳလမၞုံပိုဉ် ကဵုဒါန်တၚ်လာဲ ကုခမဳဂမၠိုၚ် အတိုၚ်ပၟိက်တုဲရ၊ တၚ်လာဲဝွံ သှ်ေသၟေဟ်ဒၟံၚ်ဗွဲမဂၠိုၚ်ဏီရ၊ ယွံတဳလမၞုံပိုဉ် အဲဍိက် ပသာ်ဂွံဒ္ဂေတ်သ္ပရော?” ရဴဝွံ ဂရၚ်ပတီ ကုတဳလမၞုံပိုဉ်ကျာ်တြဲရ။
ယွံကစ္စာန သှ်ေသၟေဟ်ဒၟံၚ်သာ်ဂှ်ဏီမ္ဂး ဩဝ်ကဵုခမဳဂမၠိုၚ် တရိုပ်စိုတ် နကဵုတၚ်လာဲဂမၠိုၚ်ညိ ရဴဝွံ (သ္ဂးရ)။ “ခိုဟ်သန်ရ ယွံကျာ်မၞုံပိုဉ်” ရဴဝွံ ဗေလဋ္ဌကစ္စာန ဒုၚ်ဝန် ကုတဳလမၞုံပိုဉ်ကျာ်တြဲတုဲမ္ဂး ကဵုဒါန်တၚ်လာဲ ကုခမဳဂမၠိုၚ် တရိုပ်စိုတ် နကဵုတၚ်လာဲဂမၠိုၚ်ရ။ ခမဳလ္ၚဵုဂမၠိုၚ် ကဵုဗပေၚ်တဴ ဗဗေၚ်ဂမၠိုၚ်အိုတ်ရ၊ ကဵုဗပေၚ်တဴ ခ္ဍိုဟ်ဍာ်ဂမၠိုၚ်ကီု ထိုၚ်ဂမၠိုၚ်ကီုအိုတ်ရ။
ပ္ဍဲကြဴနူဂှ် ဗေလဋ္ဌကစ္စာန ကဵုခမဳဂမၠိုၚ် တရိုပ်စိုတ် နကဵုတၚ်လာဲဂမၠိုၚ်တုဲမ္ဂး “ယွံတဳလမၞုံပိုဉ် ဂပ်ဝ်ကဵုခမဳဂမၠိုၚ် တရိုပ်စိုတ် နကဵုတၚ်လာဲဂမၠိုၚ်တုဲရ၊ တၚ်လာဲဝွံ သှ်ေသၟေဟ်ဒၟံၚ်ဗွဲမဂၠိုၚ်ဏီရ၊ ယွံတဳလမၞုံပိုဉ် အဲဍိက် ပသာ်ဂွံဒ္ဂေတ်သ္ပရော?” ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။
ယွံကစ္စာန သှ်ေသၟေဟ်ဒၟံၚ်သာ်ဂှ်ဏီမ္ဂး တၠအဲ ဩဝ်ကဵုဒါန်တၚ်လာဲ ကုညးစစၞဇမ္ၚးဂမၠိုၚ်ညိ ရဴဝွံ (သ္ဂးရ)။ “ခိုဟ်သန်ရ ယွံကျာ်မၞုံပိုဉ်” ရဴဝွံ ဗေလဋ္ဌကစ္စာန ဒုၚ်ဝန် ကုတဳလမၞုံပိုဉ်ကျာ်တြဲတုဲမ္ဂး ကဵုဒါန်တၚ်လာဲ ကုညးစစၞဇမ္ၚးဂမၠိုၚ်တုဲ “ယွံတဳလမၞုံပိုဉ် ဂပ်ဝ်ကဵုဒါန်တၚ်လာဲ ကုညးစစၞဇမ္ၚးဂမၠိုၚ်တုဲရ၊ တၚ်လာဲဝွံ သှ်ေသၟေဟ်ဒၟံၚ်ဗွဲမဂၠိုၚ်ဏီရ၊ ယွံတဳလမၞုံပိုဉ် အဲဍိက် ပသာ်ဂွံဒ္ဂေတ်သ္ပရော?” ရဴဝွံ ဂရၚ်ပတီ ကုတဳလမၞုံပိုဉ်ကျာ်တြဲရ။
ယွံကစ္စာန သှ်ေသၟေဟ်ဒၟံၚ်သာ်ဂှ်ဏီမ္ဂး တၠအဲ ဩဝ်ကဵုဒါန်တၚ်လာဲ ကုညးစစၞဇမ္ၚးဂမၠိုၚ် အတိုၚ်နွံပၟိက်ညိ ရဴဝွံ (သ္ဂးရ)။ “ခိုဟ်သန်ရ ယွံကျာ်မၞုံပိုဉ်” ရဴဝွံ ဗေလဋ္ဌကစ္စာန ဒုၚ်ဝန် ကုတဳလမၞုံပိုဉ်ကျာ်တြဲတုဲမ္ဂး ကဵုဒါန်တၚ်လာဲ ကုညးစစၞဇမ္ၚးဂမၠိုၚ် အတိုၚ်နွံပၟိက်တုဲပ္ဍဲကြဴ “ယွံတဳလမၞုံပိုဉ် ဂပ်ဝ်ကဵုဒါန်တၚ်လာဲ ကုညးစစၞဇမ္ၚးဂမၠိုၚ် အတိုၚ်ပၟိက်တုဲရ၊ တၚ်လာဲဝွံ သှ်ေသၟေဟ်ဒၟံၚ်ဗွဲမဂၠိုၚ်ဏီရ၊ ယွံတဳလမၞုံပိုဉ် အဲဍိက် ပသာ်ဂွံဒ္ဂေတ်သ္ပရော?” ရဴဝွံ ဂရၚ်ပတီ ကုတဳလမၞုံပိုဉ်ကျာ်တြဲရ။
ယွံကစ္စာန သှ်ေသၟေဟ်ဒၟံၚ်သာ်ဂှ်ဏီမ္ဂး တၠအဲ ဩဝ်ကဵုညးစစၞဇမ္ၚးဂမၠိုၚ် တရိုပ်စိုတ် နကဵုတၚ်လာဲဂမၠိုၚ်ညိ ရဴဝွံ (သ္ဂးရ)။ “ခိုဟ်သန်ရ ယွံကျာ်မၞုံပိုဉ်” ရဴဝွံ ဗေလဋ္ဌကစ္စာန ဒုၚ်ဝန် ကုတဳလမၞုံပိုည်ကျာ်တြဲတုဲမ္ဂး ကဵုညးစစၞဇမ္ၚးဂမၠိုၚ် တရိုပ်စိုတ် နကဵုတၚ်လာဲဂမၠိုၚ်ရ။ ညးစစၞဇမ္ၚးဂမၠိုၚ်လ္ၚဵု ကဵုဗပေၚ်တဴ ကၠာၚ်ဂမၠိုၚ်ကီု နုၚ်ကဵုကီုအိုတ်ရ၊ ကဵုဗပေၚ်တဴ န တိုၚ်ဂမၠိုၚ်ကီု ဆတ်ဂၞိၚ် (ထိုၚ်ဂၠိက်) ဂမၠိုၚ်ကီုအိုတ်ရ။
ပ္ဍဲကြဴနူဂှ် ဗေလဋ္ဌကစ္စာန ကဵုညးစစၞဇမ္ၚးဂမၠိုၚ် တရိုပ်စိုတ် နကဵုတၚ်လာဲဂမၠိုၚ်တုဲမ္ဂး “ယွံတဳလမၞုံပိုဉ် ဂပ်ဝ်ကဵုညးစစၞဇမ္ၚးဂမၠိုၚ် တရိုပ်စိုတ် နကဵုတၚ်လာဲဂမၠိုၚ်တုဲရ၊ တၚ်လာဲဝွံ သှ်ေသၟေဟ်ဒၟံၚ် ဗွဲမဂၠိုၚ်ဏီရ၊ ယွံတဳလမၞုံပိုဉ် အဲဍိက် ပသာ်ဂွံဒ္ဂေတ်သ္ပရော?” ရဴဝွံ ဂရၚ်ပတီ တဳလမၞုံပိုဉ်ကျာ်တြဲအိုတ်ရ။
ယွံကစ္စာန ပ္ဍဲလိုက်မၞိဟ် မဒှ်မွဲဟာန်ကေုာံဒေဝတဴ မဒှ်မွဲဟာန်ကေုာံဒေဝတဴမာရ မဒှ်မွဲဟာန်ကေုာံဗြီု မဒှ်မွဲဟာန်ကေုာံသမဏဗြာဟ္မဏဂမၠိုၚ် မဒှ်မွဲဟာန်ကေုာံသၟိၚ်မဂၠိုၚ် မၞိဟ်ဂမၠိုၚ်ဝွံ ဝေၚ်ပါဲကၠေံ ကျာ်တြဲကီု ကွးကျာ်တြဲကီုတုဲ ယြဴပူဂိုလ်မွဲ စတဴတၚ်လာဲဂှ်မ္ဂး အာစိုပ် ပွမလ္ၚတ်လာဲ ဗွဲမ္ဒးရးရ၊ ပူဂိုလ်ဂှ် အဲကျာ် ဟွံညာတ်ရ။
ယွံကစ္စာန ဟိုတ်ဂှ်ရ တၚ်လာဲဂှ် ပ္ဍဲဌာန်မဟွံမွဲကဵုတၞံဆုချောဲမလမ္စံက်ဍိုပ်ဍဴလေဝ် တၠအဲ ဩဝ်ထောံထောံညိ၊ ပ္ဍဲဍာ်မဟွံမွဲကဵုစၟလေဝ် ဩဝ်ကိုဟ်ချာဲထောံညိ ရဴဝွံ (သ္ဂးရ)။ “ခိုဟ်သန်ရ ယွံကျာ်မၞုံပိုဉ်” ရဴဝွံ ဗေလဋ္ဌကစ္စာန ဒုၚ်ဝန် ကုတဳလမၞုံပိုဉ်ကျာ်တြဲတုဲမ္ဂး ကိုဟ်ချာဲထောံ တၚ်လာဲဂှ် ပ္ဍဲဍာ်မဟွံမွဲကဵုစၟရ။
ပ္ဍဲအခိၚ်ဂှ် တၚ်လာဲဗိုဟ်ကၠဟ်ထောဲ ပ္ဍဲဍာ်ဂှ် ဗြုစိစ်စိစ်ရ၊ ဗြုစောဋ်စေဋ် (ဋေဋ်ဋာဋ်) ရ၊ ယက်တိတ်ရ၊ ယက်တိတ်မွဲဒမြိပ်ရ။ ဗွဲဥပမာမ္ဂး ၚေၚ်ထဲမဂမ္တဴဒၟံၚ်တ္ၚဲ လုကဴမွဲတ္ၚဲဂှ် ထောံဖျေံ ပ္ဍဲဍာ်မ္ဂး ညံၚ်ရဴဗြုစိစ်စိစ်ကီု ညံၚ်ရဴဗြုစောဋ်စေဋ်ဋေဋ်ဋာဋ်ကီု ညံၚ်ရဴယက်တိတ်ကီု ညံၚ်ရဴယက်တိတ်မွဲဒမြိပ်ကီု တုပ်သၟဟ်သာ်ဂှ်ဟေၚ် တၚ်လာဲ မဂပ်ဝ်ထောံစုတ် ပ္ဍဲဍာ်ဂှ် ဗြုစိစ်စိစ်ရ၊ ဗြုစောဋ်စေဋ် (ဋေဋ်ဋာဋ်) ရ၊ ယက်တိတ်ရ၊ ယက်တိတ်မွဲဒမြိပ်ရ။
ပ္ဍဲအခိၚ်ဂှ် သ္ၚံက်သမ္ၚာတ်ဒှ်တုဲ သော်ဇကုနရဴဒှ်တုဲ ပြာပ်အာဇရေၚ် တဳလမၞုံပိုဉ်ကျာ်တြဲတုဲမ္ဂး လ္ၚောဝ်သ္ပဝတ်တုဲ ကုဗေလဋ္ဌကစ္စာန မဂဇအ်ဒၟံၚ် ပ္ဍဲဒၞာဲမွဲဂှ် တဳလမၞုံပိုဉ်ကျာ်တြဲ တွံကဵုဂလာန်ဓရ် မဒှ်အတိုၚ်လၟေၚ်ရ၊ ဂလာန်ဓရ် ညးဍေံဂှ်ရော? ဂလာန်မစပ်ကဵုဒါနကီု ဂလာန်ဓရ်မစပ်ကဵုသဳလကီု ဂလာန်မစပ်ကဵုဍုၚ်သွဝ်ကီု ဒုဟ်ကီု ပွမယုတ်သဝ်ကီု ပွမကၠိခ္ဍက် ကာမဂုဏ်ဂမၠိုၚ်ကီု ဖဵုပ္ဍဲပွမတိတ်ဗၠး(နူကာမဂုဏ်ဂမၠိုၚ်)ကီု ထ္ၜးကဵုရ။
တဳလမၞုံပိုဉ်ကျာ်တြဲ ပ္ဍဲအခိၚ်မတီကေတ် မၞုံကဵုစိုတ်မဒုၚ်စရၚ် မၞုံကဵုစိုတ်မဍိုန်ညောန် မၞုံကဵုစိုတ်စာ်စ္ဍးနူ ‘နဳဝရဏ’ ကၟာတ်လဒဵု မၞုံကဵုစိုတ်မြဟ်တိုန် မၞုံကဵုစိုတ်မလျုၚ်သ္ဍိုက် ပ္ဍဲဗေလဋ္ဌကစ္စာနဂှ် ထ္ၜးကဵုဓရ်ဒေသနာ ‘သာမုက္ကံသိက’ မတီညာတ်ဓမံက်ပတိတ်အလဵုဇကုကျာ်ဂမၠိုၚ်ရ ။ ပ ။ တုပ်တဴသာ်ဂှ်ရ ပ္ဍဲဒၞာဲဂှ်ဟေၚ် “ဓရ်အိုတ်သီု မၞုံသဘဴပွမကတဵုဒှ်ဂှ် မၞုံသဘဴပၠိုတ်ရ” ရဴဝွံ ‘သောတာပတ္တိမဂ်ဉာဏ်’ မတ်ဓရ် မဟွံမွဲကဵုမၠိုက် မစာ်စ္ဍးနူကၠိုက်လ္ၚေၚ်ကိလေသဂှ် ကတဵုဒှ် ကုဗေလဋ္ဌကစ္စာနရ။
ပ္ဍဲကြဴနူဂှ် ဗေလဋ္ဌကစ္စာန ညာတ်ကေတ်ဓရ်တုဲဂှ်ဒှ်တုဲ အာစိုပ်ဓရ်တုဲဂှ်ဒှ်တုဲ တီကေတ်ဓရ်တုဲဂှ်ဒှ်တုဲ တၞီလုပ်အာဓရ်တုဲဂှ်ဒှ်တုဲ ကလိလောန်အာသၠေဟ်ပွာတုဲဂှ်ဒှ်တုဲ စာ်စ္ဍးနူချပ်သၠေဟ်ပၟာ သာ်တေံဟာ သာ်ဏအ်ဟာတုဲဂှ်ဒှ်တုဲ အာစိုပ်ဂံၚ်သကာ (သက်လှက်) ပ္ဍဲသာသနာကျာ်တြဲတုဲဂှ်ဒှ်တုဲ ဟွံမွဲကဵုညးလျုၚ်ပတှ်ေ မသအာၚ်နူကျာ်ဂှ်ဒှ်တုဲ-
“ယွံတဳလမၞုံပိုဉ် (ဓရ်ဂှ်) ထေက်ကဵုသ္ဍိုက်မၠိုက်လောန်ရ၊ ယွံတဳလမၞုံပိုဉ် (ဓရ်ဂှ်) ထေက်ကဵုသ္ဍိုက်မၠိုက်လောန်ရ၊ ဗွဲဥပမာမ္ဂးတုန် ဝတ္ထုဗကပ်စွံလဝ်ဂှ် သၟဟ်ညံၚ်ရဴဂတးလ္ၚာကဵုကီု ။ ပ ။ တုပ်သၟဟ်သာ်ဂှ်ဟေၚ်ရ တဳလမၞုံပိုဉ်ဂှ် နကဵုဟိုတ်တၞဟ်တၞဟ် တွံထ္ၜးကဵုဓရ်ရ၊ ယွံတဳလမၞုံပိုဉ် အဲဍိက်ဂှ် ပြာပ်ခသ္ပစ္ၜုဲစ္ၜော် သကအ်ဗ္ဒကဵု တဳလမၞုံပိုဉ်ကျာ်တြဲရ၊ ဓရ်ဂှ်လေဝ် ပြာပ်ခသ္ပစ္ၜုဲစ္ၜော်သကအ်ဗ္ဒရ၊ သၚ်ဂှ်လေဝ် ပြာပ်ခသ္ပစ္ၜုဲစ္ၜော်သကအ်ဗ္ဒရ၊ တဳလမၞုံပိုဉ်ဂှ် သ္ပတမ်နူတ္ၚဲဝွံတုဲ စဵုကဵုလအိတ်လမျီု အဲဍိက်ဂှ် ဥပးပြာပ်ခ သ္ပစ္ၜုဲစ္ၜော်သကအ်ဗ္ဒ ရဴဝွံ ဩဝ်ဂိုၚ်သမ္တီလဝ်ညိ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။
ပ္ဍဲကြဴနူဂှ် တဳလမၞုံပိုဉ်ကျာ်တြဲ အတိုၚ်လၟေၚ်လၟေၚ် ဂေတ်ဂ္ၚေၚ်က္ညအာဒေသစာရိတ်မ္ဂး စိုပ်အာဍုၚ်ရာဇဂြိုဟ်တုဲ သ္ပဒတဴတန်ဒၟံၚ် ပ္ဍဲဘာဝေဠုဝန် မဒှ်ဒၞာဲကဵုစၞ ကုယန်လမ္စံက်ဂမၠိုၚ် ဇရေၚ်ဍုၚ်ရာဇဂြိုဟ်ဂှ်ရ။
ပ္ဍဲအခိၚ်ဂှ် ပ္ဍဲဍုၚ်ရာဇဂြိုဟ် တၚ်လာဲဂၠိုၚ်ဂၠၚ်(လှေၚ်)ရ။ ခမဳဂမၠိုၚ် “တဳလမၞုံပိုဉ်ကျာ်တြဲဂှ် ကုခမဳမဂိယဲဟေၚ် ကဵုအခေါၚ်တၚ်လာဲရ၊ ကုခမဳဟွံဂိယဲဂှ် ဟွံကဵုအခေါၚ် တၚ်လာဲရ” ရဴဝွံ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာဒှ်တုဲ ဟွံသ္ပပြဘိုဂ် တၚ်လာဲအိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကုခမဳမဂိယဲဂှ် တၚ်လာဲ၊ ကုခမဳမဟွံဂိယဲဂှ် ကဵုအခေါၚ်တၚ်လာဲ မနှဴရဴကေုာံဍာ်ရ ရဴဝွံ (သ္ဂးရ)။
