၁၇၀.၂။ ဖဵုကဵုဒါယာဂု စှ်သာ်
ညးကဵုဒါန်ယာဂုဂှ် ဒှ် ကဵုဒါန်အာယုက်ရ။
ဒှ် ကဵုဒါန်ရုပ်သာ်ရ။
ဒှ် ကဵုဒါန်တသိုခ်ရ။
ဒှ် ကဵုဒါန်ဇြဟတ်ရ။
ဒှ် ကဵုဒှ်ပညာရ။
ယာဂုမဂပ်ဝ်သုၚ်ဂှ် ပဲါပၠေၚ်ကဵုဗျဵုတဟၚ်ပုၚ်ရ။
ပဲါပၠေၚ်ကၠေံ ပွမထၚ်ဍာ်ရ။
လေပ်ကဵုကျာသဝ်ရ။
လေပ်ကဵုသ္ၚိထိုၚ်ပဿဴ သ္အးဇ္ၚးရ။
လေပ်ကဵုစၞတၟိသှ်ေသၟေဟ် စိန်ဝုန်လာဲရ။
ယွံဗဗၞး ဖဵုယာဂုဂမၠိုၚ် ဣဝွံစှ်သာ်ဂမၠိုၚ်ရ" ရဴဝွံ (သ္ဂးရ။)
ယွံဗဗၞး ယြဴညးမွဲ ပ္ဍဲအခိၚ်မဗဗွဲဂှ် ဗွဲမရှ်ေသှ်ေရဴဂဴ ကဵုဒါန်ယာဂု ကုခမဳဂမၠိုၚ်မသ္ၚဳလလမ် မၚ်မွဲဇကုပါၚ်စိုတ်တုဲ မသ္ပပြဘိုဂ်ဂြပ်ရတ်ညးသအာၚ်ကဵုဒါန်ရ။ (ညးဂှ်) ဒှ် ကဵုဒါန်အရာဂမၠိုၚ်စှ်သာ် ကုပူဂိုလ်ဒၟုၚ်ဒါန်ရ။ အာယုက် ရုပ်သာ် တသိုခ် ဇြဟတ် ပညာဂမၠိုၚ် ပူဂိုလ်မသ္ပပြဘိုဂ်ယာဂဂှ် ကတဵုဒှ်အိုတ်ရ။ သအာၚ်နူဂှ် ပွမဗျဵုတဟၚ် ပွမထၚ်ဍာ်ဂမၠိုၚ်လေဝ် လေပ်ပဲါပၠေၚ်ကၠေံရ။ သ္ၚိထိုၚ်ပဿဴလေဝ် လေပ်ကဵုသ္အးဇ္ၚးရ၊ စၞတၟိလေဝ် လေပ်ကဵုစိန်ဝုန်လာဲရ၊ ဂဥုဲမတွံဂးယာဂုဝွံ ကျာ်တြဲ ထိုၚ်သးရ။
ဟိုတ်ဂှ်ရ အခါကာလအိုတ်သီု ညးမၞုံပၟိက်ကဵုတသိုခ် မဒှ်ပ္ဍဲမၞိဟ်ကီု ညးမရာဒနာမိက်ကဵု တသိုခ်ဂမၠိုၚ် မဒှ်ပ္ဍဲဍုၚ်သွဝ်ကီု ညးမၞုံပၟိက်ကဵုဂုဏ်ကျာ်သြဳမၞိဟ်ဂမၠိုၚ်ကီု တၞဟ်နကဵုဒါန်ယာဂုဂှ် ဗဗွဲထေက်ကြိုက်ဟေၚ်ရ ရဴဝွံ (သ္ဂးရ။)
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ သ္ပအနုမောဒနာ ကဵုဗဗၞးဂှ် နကဵုဂါထာဝွံတုဲမ္ဂး ဒၠိုက်ကတဵုနူဒၞာဲတုဲ ပဲါစ္ဍးအာရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲမ္ဂး "ယွံခမဳတအ် ကဵုအခေါၚ်ယာဂု ကေုာံကွာၚ်မြဳကဠောံမဍာတ်ကြိုအ် မစုတ်လဝ်ဍာ်သာဲသဂြာ (ကွာၚ်မြဳဗတဝ်သာဲ)ဂမၠိုၚ်ရ ရဴဝွံ (သ္ဂးရ)။
