၁၇၀.၁။ ကဵုအခေါၚ်ယာဂု ကွာၚ်မြဳဗ္တဝ်သာဲ
၂၈၂။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲဍုၚ်ဗာရာဏသဳ ဗွဲမမိပ်လဟိၚ်တုဲမ္ဂး မွဲဟာန်ကေုာံခမဳသၚ်ဂမၠိုၚ်မဂၠိုၚ်ဂၠၚ် ဗၞတ်လ္ၚီၜါကၠံမသုန်စှော် က္ညဂ္ၚေၚ်အာဒေသစာရိတ် ကွာန်အန္ဓကဝိန္ဒရ။ ပ္ဍဲအခိၚ်ဂှ် မၞိဟ်ဂမၠိုၚ် မပဒတဴပ္ဍဲဇနးပိုဒ်ဂှ် ကဵုပတိုန် ၜဵုကၠေၚ်သ္ၚုစၞစဂမၠိုၚ် ပ္ဍဲကွဳဂမၠိုၚ် “ပ္ဍဲအခိၚ်ကလိဂွံအလန်ကဵုဒါန်ပိဏ္ဍပါတ်ဂှ် ကြက်စဳရေၚ်ပိဏ္ဍပါတ်အိုတ်ရ” ရဴဝွံ (ပၠုပ်စိုတ်တုဲ) ဗက်ကၠုၚ်စုက်စုက် နူလက်ကရဴ နူလက်ကရဴ ခမဳသၚ်မၞုံပဓာန်ကျာ်တြဲအိုတ်ရ။ ညးစစၞဇမ္ၚးမသုန်ကၠံဂမၠိုၚ်လေဝ် ဗက်ကၠုၚ်စုက်စုက်အိုတ်ရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ အတိုၚ်လၟေၚ်လၟေၚ် က္ညဂ္ၚေၚ်ဒေသစာရိတ်မ္ဂး ကၠုၚ်စိုပ် ကွာန်အန္ဓကဝိန္ဒရ။ ပ္ဍဲအခိၚ်ဂှ် ကုဗဗၞးမွဲ မဟွံကလိဂွံအလန်ကဵုဒါန်ပိဏ္ဍပါတ်ဂှ် “ပ္ဍဲအခိၚ်ကလိဂွံအလန် ကဵုဒါန်ပိဏ္ဍပါတ်ဂှ် ကြက်စဳရေၚ်ပိဏ္ဍပါတ်ရ’ ရဴဝွံ ကုအဲ မဗက်ကၠုၚ်စုက်စုက် နူလက်ကရဴ နူလက်ကရဴ ခမဳသၚ်မၞုံပဓာန်ကျာ်တြဲဂှ် လောန်အာၜါဂိတုတုဲရ၊ ကုအဲဂှ် ဟွံကလိဂွံအလန် ကဵုဒါန်ပိဏ္ဍပါတ်ရ၊ အဲလေဝ် ဒှ်ညးမွဲဓဝ်ဟေၚ်ရ၊ ဒတုဲဖဵုသ္ၚိကၟိန်လေဝ် ဟုတ်ယုတ်အာ ကုအဲ ဗွဲမဂၠိုၚ်ရ၊ အဲ ဂွံံမၠာ်သ္ၚေဝ်ရံၚ် ဇြပ်ကဵုပိုဉ်မ္ဂး ခိုဟ်ရ၊ သ္ဂောံစဳရေၚ်တဴ ဝတ္ထုမဟွံမွဲ ပ္ဍဲဇြပ်ကဵုပိုဉ်မ္ဂး ခိုဟ်ရ” ရဴဝွံ ကသပ်ဒှ်ရ။
ပ္ဍဲအခိၚ်ဂှ် ဗဗၞးဂှ် မၠာ်သ္ၚေဝ်ရံၚ် ဇြပ်ကဵုပိုဉ်မ္ဂး ဟွံညာတ်ကေတ် ယာဂုကေုာံကွာၚ်ကဠောံ မဍာတ်ကြိုအ် မစုတ်လဝ်ဍာ်သာဲသဂြာ (ကွာန်မြဳဗတဝ်သာဲ) ဂမၠိုၚ်ၜါဂကူရ။ ပ္ဍဲအခိၚ်ဂှ် ဗဗၞးဂှ် ပြာပ်အာဇရေၚ် တဳလပိုဉ်အာနန္ဒတုဲမ္ဂး "ယွံတဳလပိုဉ်အာနန္ဒ ပ္ဍဲအခိၚ်လၟုဟ် ကုအဲဍိက် မဟွံကလိဂွံအလန် ကဵုဒါန်ပိဏ္ဍပါတ်ဂှ် 'ပ္ဍဲအခိၚ်ကလိဂွံအလန် ကဵုဒါန်ပိဏ္ဍပါတ်ဂှ် ကြက်စဳရေၚ်ပိဏ္ဍပါတ်ရ' ရဴဝွံ ကုအဲ မဗက်ကၠုၚ်စုက်စုက် နူလက်ကရဴ နူလက်ကရဴ ခမဳသၚ်မၞုံပဓာန်ကျာ်တြဲဂှ် လောန်အာၜါဂိတုတုဲရ။ ကုအဲဂှ် ဟွံကလိဂွံအလန်ကဵုဒါန်ပိဏ္ဍပါတ်ရ၊ အဲလေဝ် ဒှ်ညးမွဲဓရ်ဟေၚ်ရ၊ ဒတုဲဖဵုသ္ၚိကၟိန်လေဝ် ဟုတ်ယုတ်အာ ကုအဲဗွဲမဂၠိုၚ်ရ၊ အဲ ဂွံမၠာ်သ္ၚေဝ်ရံၚ် ဇြပ်ကဵုပိုဉ်မ္ဂး ခိုဟ်ရ၊ သ္ဂောံစဳရေၚ်တဴ ဝတ္ထုမဟွံမွဲ ပ္ဍဲဇြပ်ကဵုပိုဉ်မ္ဂး ခိုဟ်ရ" ရဴဝွံ ကသပ်ဒှ်ရ။
ယွံတဳလပိုဉ်အာနန္ဒ အဲဍိက်ဂှ် မၠာ်သ္ၚေဝ် ဇြပ်ကဵုပိုဉ်မ္ဂး ဟွံညာတ်ကေတ် ယာဂုကေုာံကွာၚ်ကဠောံမဍာတ်ကြိုအ် မစုတ်လဝ်ဍာ်သာဲသဂြာ (ကွာၚ်မြဳဗတဝ်သာဲ) ဂမၠိုၚ်ၜါဂကူရ။ ယွံတဳလပိုဉ်အာနန္ဒ ယဝ်အဲဍိက်စဳရေၚ် ယာဂုကေုာံကွာၚ်မြဳဗတဝ်သာဲမ္ဂး၊ တြနာဲဂေါတမဂှ် ဒုၚ်ဂိုၚ်ကေတ် ယာဂုကေုာံကွာၚ်မြဳဗတဝ်သာဲဂှ်ဟာ" ရဴဝွံ ဂရၚ်ပတီရ။
ယွံဗဗၞး ဒှ်သာ်ဂှ်မ္ဂး သၟာန်တဳလမၞုံပိုဉ်ကျာ်တြဲရ ရဴဝွံ (သ္ဂးရ)။
ပ္ဍဲအခိၚ်ဂှ် တဳလပိုဉ်အာနန္ဒ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံအာနန္ဒ ဒှ်သာ်ဂှ်မ္ဂး ဩဝ်ကဵုစဳရေၚ်ညိ ရဴဝွံ (သ္ဂးရ)။ ဗဗၞးဂှ် ပ္ဍဲအခိၚ်ကလိလောန်အာဗ္တံဂှ် ကဵုစဳရေၚ်ယာဂု ကေုာံကွာၚ်မြဳဗတဝ်သာဲမဂၠိုၚ်ဂၠၚ်တုဲမ္ဂး "တြနာဲဂေါတမဂှ် ဩဝ်ဒုၚ်ဂိုၚ်ကေတ်ယာဂု ကေုာံကွာၚ်မြဳဗတဝ်သာဲ အဲဍိက်ညိ" ရဴဝွံ ဗဂိန်ကဵု ကုတဳလမၞုံပိုဉ်ကျာ်တြဲရ။ ယွံဗဗၞး ယဝ်ဒှ်သာ်ဂှ်မ္ဂး ဩဝ်ကဵုဒါန် ကုခမဳဂမၠိုၚ်ညိ ရဴဝွံ (သ္ဂးရ)။ ခမဳဂမၠိုၚ် မၞုံကဵု 'သံသယကုက္ကုစ္စ' ပွမချပ်သၠေဟ်ပၟာ ရဴဝွံမ္ဂး ဟွံဂပ်ဝ်ဒှ်တုဲ ဟွံဒုၚ်ဂိုၚ်ကေတ်အိုတ်ရ။ ယွံခမဳတအ် ဩဝ်ဒုၚ်ဂိုၚ်ကေတ်အိုတ်ညိ၊ ဩဝ်သ္ပပြဘိုဂ်အိုတ်ညိ ရဴဝွံ (သ္ဂးရ)။
ပ္ဍဲအခိၚ်ဂှ် ဗဗၞးဂှ် အလဵုဇကုကၠောန်ၜိုတ်ဥပကာ ဂကောံခမဳမၞုံပဓာန်ဍေံကျာ်တြဲ နကဵုယာဂုကီု နကဵုကွာၚ်မြဳဗတဝ်သာဲကီု စဵုကဵုတရိုပ်စိုတ် စဵုကဵုဒးဆေဝ်တာ ပဒေံါကၠေံတုဲမ္ဂး အခိၚ်တဳလမၞုံပိုဉ်ကျာ်တြဲ ပဲါကၠေံတဲ နူဗဗေၚ်တုဲဂှ် ဂဇအ်ဒၟံၚ် ပ္ဍဲဒၞာဲမွဲရ၊ ဗဗၞးမဂဇအ်ဒၟံၚ် ပ္ဍဲဒၞာဲမွဲဂှ် တဳလမၞုံပိုဉ်ကျာ်တြဲ သ္ဂးတိုန်ဂလာန်ဝွံရ−−
"ယွံဗဗၞး ဖဵုယာဂုဂမၠိုၚ် မၞုံစှ်သာ်အိုတ်ရ၊ ညးမ္ဂးစှ်သာ်အိုတ်ဂှ်ရောမ္ဂးတုန်−−
