၁၆၉။ ပါဲကၠေံမပ္တံဖျုန်စိၚ်

၂၈၁။ ပ္ဍဲကာလမွဲအခိၚ် စိၚ်သၟိၚ်ဂမၠိုၚ် ချိုတ်အိုတ်ရ။ မၞိဟ်ဂမၠိုၚ် ဟိုတ်မကၠောဝ်ဗျဵုဂှ်ရ စဖျုန်စိၚ်အိုတ်ရ။ ကုခမဳမဂေတ်ဂ္ၚေၚ်ပိဏ္ဍပါတ်ဂမၠိုၚ် ကဵုဒါန်ဖျုန်စိၚ်အိုတ်ရ၊ ခမဳဂမၠိုၚ် စဖျုန်စိၚ်အိုတ်ရ။ မၞိဟ်ဂမၠိုၚ် “မုဟိုတ် ခမဳဂမၠိုၚ် မဒှ်တၞောဝ်ကျာ်် ကောန်သၟိၚ်သာကျဝၚ် စဖျုန်စိၚ်အိုတ်ရော? စိၚ်ဂမၠိုၚ်ဂှ် အဝယ်အၚ်္ဂ ‘အရပ်စပ်’ သၟိၚ်ရ၊ ယဝ်သၟိၚ်တီမ္ဂး၊ ဟွံသ္ဍိုက်မၠိုက် ကုခမဳဂမၠိုၚ်ဒှ်ရ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ဟဂပ်ဝ်စဖျုန်စိၚ်ရ၊ ကုခမဳမစဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။

ပ္ဍဲကာလမွဲအခိၚ် ချေံသၟိၚ်ဂမၠိုၚ် ချိုတ်အိုတ်ရ။ မၞိဟ်ဂမၠိုၚ် ဟိုတ်မကၠောဝ်ဗျဵုဂှ်ရ စဖျုန်ချေံအိုတ်ရ။ ကုခမဳမဂေတ်ဂ္ၚေၚ်ပိဏ္ဍပါတ်ဂမၠိုၚ် ကဵုဒါန်ဖျုန်ချေံအိုတ်ရ၊ ခမဳဂမၠိုၚ် စဖျုန်ချေံအိုတ်ရ။ မၞိဟ်ဂမၠိုၚ် “မုဟိုတ် ခမဳဂမၠိုၚ် မဒှ်တၞောဝ်ကောန်သၟိၚ်သာကျဝၚ် စဖျုန်ချေံအိုတ်ရော? ချေံဂမၠိုၚ်ဂှ် အဝယ်အၚ်္ဂ ‘အရပ်အစပ်’ သၟိၚ်ရ၊ ယဝ်သၟိၚ်တီမ္ဂး၊ ဟွံသ္ဍိုက်မၠိုက် ကုခမဳဂမၠိုၚ်ဒှ်ရ” ရဴဝွံ ဟီုဂရိုဟ်အိုတ်ရ၊ ပျုက်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ဟဂပ်ဝ်စဖျုန်ချေံရ၊ ကုခမဳစဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။

ပ္ဍဲမွဲအခိၚ်တေံ မၞိဟ်ဂမၠိုၚ် ဟိုတ်မကၠောဝ်ဗျဵုဂှ်ရ စဖျုန်ကၠဵုအိုတ်ရ။ ကုခမဳမဂေတ်ဂ္ၚေၚ်ပိဏ္ဍပါတ်ဂမၠိုၚ် ကဵုဒါန်ဖျုန်ကၠဵုအိုတ်ရ၊ ခမဳဂမၠိုၚ်် စဖျုန်ကၠဵုအိုတ်ရ၊ မၞိဟ်ဂမၠိုၚ် “မုဟိုတ် ခမဳဂမၠိုၚ် မဒှ်တၞောဝ်ကောန်သၟိၚ်သာကျဝၚ် စဖျုန်ကၠဵုအိုတ်ရော? ကၠဵုဂှ် ထေက်ကဵုက္ဍုဟ်မၠေံရ၊ ထေက်ကဵုဇအိုန်ဇရရ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ဟဂပ်ဝ်စဖျုန်ကၠဵုရ၊ ကုခမဳမစဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။

ပ္ဍဲမွဲအခိၚ်တေံ မၞိဟ်ဂမၠိုၚ် ဟိုတ်မကၠောဝ်ဗျဵုဂှ်ရ စဖျုန်ဇြုံအိုတ်ရ။ ကုခမဳမဂေတ်ဂ္ၚေၚ်ပိဏ္ဍပါတ်ဂမၠိုၚ် ကဵုဒါန်ဖျုန််ဇြုံအိုတ်ရ၊ ခမဳဂမၠိုၚ် စဖျုန်ဇြုံအိုတ်ရ။ မၞိဟ်ဂမၠိုၚ် “မုဟိုတ် ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ် စဖျုန်ဇြုံအိုတ်ရော? ဇြုံဂှ် ထေက်ကဵုက္ဍုဟ်မၠေံရ၊ ထေက်ကဵုဇအိုတ်ဇရရ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ သၟိၚ်နာဂ်မၞုံယၟုသုပဿလေဝ် ပြာပ်အာဇရေၚ် တဳလမၞုံပိုဉ်ကျာ်တြဲတုဲမ္ဂး လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲ သီုမဂဇအ်ဒၟံၚ်ပ္ဍဲဒၞာဲမွဲဂှ် “ယွံကျာ်မၞုံပိုဉ် နာဂ်မဟွံမွဲကဵုဓရ်သဒ္ဓါ မဟွံမွဲကဵုပွမလျုၚ်ဇြုၚ်သ္ဍိုက်ဂမၠိုၚ် နွံအိုတ်ရ၊ နာဂ်ဂမၠိုၚ်ဂှ် နကဵုဟိုတ်ဂမၠိုၚ်ဗၞတ်ညိနာၚ်လေဝ် ပျဲပျာဲရာန်သကိုတ် ခမဳဂမၠိုၚ်အိုတ်ရ၊ ယွံကျာ်မၞုံပိုဉ် အာပတ်ပါန်အခေါၚ်ရ၊ တဳလပိုဉ်ဂမၠိုၚ် လ္ပစဖျုန်ဇြုံအိုတ်ညိ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။

ပ္ဍဲအခိၚ်ဂှ် တဳလမၞုံပိုဉ်ကျာ်တြဲဂှ် နကဵုဂလာန်ဓရ် စၞောန်ထ္ၜးကဵုသၟိၚ်နာဂ်မၞုံယၟုသုပဿ ဗွဲမ္ဂးရးရ ။ ပ ။ သ္ပရှ်ေသှ်ေရဴဂဴတုဲ ပါဲစ္ဍးအာရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲမ္ဂး “ယွံခမဳတအ် ဟဂပ်ဝ်စဖျုန်ဇြုံရ၊ ကုခမဳမစဂှ် ဒးအာပတ်ဒုက္ကဋ်ရ” ရဴဝွံ သ္ဂးကဵုခမဳဂမၠိုၚ်ရ။

ပ္ဍဲကာလမွဲအခိၚ် လၟသတ်ဂမၠိုၚ် ဂစိုတ်ဇာဒိသိုၚ်တုဲ စဖျုန်ဇာဒိသိုၚ်အိုတ်ရ။ ကုခမဳ မဂေတ်ဂ္ၚေၚ်ပိဏ္ဍပါတ်ဂမၠိုၚ် ကဵုဒါန်ဖျုန်ဇာဒိသိုၚ်အိုတ်ရ။ ခမဳဂမၠိုၚ် စဖျုန်ဇာဒိသိုၚ်တုဲ ပဒတဴ ပ္ဍဲဂြိုပ်အိုတ်ရ။ ဇာဒိသိုၚ်ဂမၠိုၚ် ဟိုတ်မပသသၟူဖျုန်ဇာဒိသိုၚ်ဂှ် ဗက်ထ္ဍေၚ်ခမဳဂမၠိုၚ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ဟဂပ်ဝ်စဖျုန်ဇာဒိသိုၚ်ရ၊ ကုခမဳမစဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။

ပ္ဍဲကာလမွဲအခိၚ် လၟသတ်ဂမၠိုၚ် ဂစိုတ်ကၠတုဲ ။ ပ ။ ဂစိုတ်ဗြန်တုဲ ။ ပ ။ ဂစိုတ်ကၟီတုဲ ။ ပ ။ ဂစိုတ်ဒိုဟ်ဒးတုဲ စဖျုန်ဒိုဟ်ဒးအိုတ်ရ။ ကုခမဳ မဂေတ်ဂ္ၚ်ေပိဏ္ဍပါတ်ဂမၠိုၚ် ကဵုဒါန်ဖျုန်ဒိုဟ်ဒးအိုတ်ရ၊ ခမဳဂမၠိုၚ် စဖျုန်ဒိုဟ်ဒးတုဲ ပဒတဴပ္ဍဲဂြိုပ်အိုတ်ရ။ ဒိုဟ်ဒးဂမၠိုၚ် ဟိုတ်မပသသၟူဖျုန်ဒိုဟ်ဒးဂှ် ဗက်ထ္ဍေၚ်ခမဳဂမၠိုၚ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ဟဂပ်ဝ်စဖျုန်ဒိုဟ်ဒးရ၊ ကုခမဳမစဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။

ခဏ်သုပ္ပိယဒုတိယတုဲရ။