၁၆၇။ ပါဲကၠေံမပ္တံပွမကရေက်ၜုန်
၂၇၉။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲဍုၚ်သာရဝှ် ဗွဲမမိပ်လဟိၚ်တုဲမ္ဂး က္ညစ္ဍးအာ ဍုၚ်ရာဇဂြိုဟ်ရ။ အတိုၚ်လၟေၚ်လၟေၚ် ဂေတ်ဂ္ၚေၚ်က္ညအာဒေသစာရိတ်မ္ဂး စိုပ်အာဍုၚ်ရာဇဂြိုဟ်တုဲ သ္ပဒတဴတန်ဒၟံၚ် ပ္ဍဲဘာဝေဠုဝန် မဒှ်ဒၞာဲကဵုစၞ ကုယန်လမ္စံက်ဂမၠိုၚ် ဇရေၚ်ဍုၚ်ရာဇဂြိုဟ်ဂှ်ရ။ ပ္ဍဲအခိၚ်ဂှ် ယဲဘဂန္ဒိုလ် (ယဲမၚ်သရိုဟ်၊ ယဲသၚ်ဂလုၚ်) ကတဵုဒှ် ကုခမဳမွဲဇကုရ၊ အ္စာသတ်အကာသဂေါတ္တ သ္ပတဴပွမကရေက်ၜုန်ရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ဂေတ်ဂ္ၚေၚ်က္ညအာဒေသစာရိတ် လၟေၚ်ဘာမ္ဂး ပြာပ်စိုပ်အာဘာခမဳဂှ်ရ။ အ္စာသဝ်အာကာသဂေါတ္တ ညာတ်ဒး တဳလမၞုံပိုဉ်ကျာ်တြဲ မက္ညကၠုၚ်နူဇမ္ၚောဲဟေၚ်တုဲ “တြနာဲဂေါတမ ဩဝ်က္ညကၠုၚ်ညိ၊ ဩဝ်သ္ၚေဝ်ဝစ္စမဂ် ခမဳဝွံညိ၊ တုပ်သၟဟ်ကေုာံပါၚ်ဟကောတ်ရ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ “တြုံမလ္ၚုသၟး (နူမဂ်ဖိုလ်) ဂှ် ဟီုသ္ပဂရိုၚ်စရဵုကဵုအဲရ” ရဴဝွံ (ပၠုပ်စိုတ်တုဲ) နူဌာန်ဂှ်ဟေၚ် ဂတးကလေၚ်တုဲ ဟိုတ်နူဟိုတ်အရာဝွံ ကဵုဂကောံခမဳကောံဓရီုတုဲမ္ဂး “ယွံခမဳတအ် ပ္ဍဲဘာမၞုံယၟုဝွံ ခမဳဂိယဲနွံဟာ” ရဴဝွံ သၟာန်တိုန် ခမဳဂမၠိုၚ်ဂှ်-
နွံဒၟံၚ်ရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ ယဲခမဳဂှ်တုန် မုယဲမွဲရော? ရဴဝွံ (သၟာန်တိုန်ပၠန်ဂှ်) ယွံကျာ်မၞုံပိုဉ် ယဲတဳလပိုဉ်ဂှ်တုန် ဒှ်ယဲဘန္ဒိုလ် (ယဲမၚ်သရိုဟ်) ရ၊ အ္စာသဝ်အာကာသဂေါတ္တ သ္ပတဴ ပွမကရေက်ၜုန်ရ ရဴဝွံ (ဂရၚ်ပတီအိုတ်ရ)။
တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ် ။ ပ ။ ယွံခမဳတအ် (ကမၠောန်ပွ) တြုံမလ္ၚုသၟး (နူမဂ်ဖိုလ်) ဂှ် ဟွံထေက် ကုခမဳဂမၠိုၚ်ရ၊ ဟွံဗဗွဲရ၊ ဟွံသပ္ပါယ်ရ၊ အာကာဲအရာခမဳတအ် ဟွံသေၚ်ရ၊ ဟဂပ်ဝ်ရ၊ ဟွံထေက်ကဵုသ္ပရ။
ယွံခမဳတအ် မုဟိုတ် တြုံမလ္ၚုသၟး (နူမဂ်ဖိုလ်) ဂှ် ကဵုသ္ပတဴ ပွမကရေက်ၜုန် ပ္ဍဲဌာန််မက္ဍန်ဂြက်ရော? ယွံခမဳတအ် ပ္ဍဲဌာန်မက္ဍန်ဂြက်ဂှ် စၞာံ ဍိုန်ဍောတ်ဇိပ်ဂၠိပ်ရ၊ သရ ဇြိုၚ်ကဵုဖျုန်တ္ၜတ်တိုန်ရ၊ ဇြိုၚ်ကဵုကရေက်ၜုန်ရ။
ယွံခမဳတအ် (ပွခမဳဝွံ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ဟီုဂရိုဟ်တုဲ တွံကဵုဂလာန်ဓရ်တုဲမ္ဂး “ယွံခမဳတအ် ပ္ဍဲဌာန်မက္ဍန်ဂြက် ဟဂပ်ဝ် ပွမကရေက်ၜုန်ရ၊ ကုခမဳမသ္ပဂှ် ဒးအာပတ်ထုလ္လစ္စယ်ရ” ရဴဝွံ သ္ဂးကဵုခမဳဂမၠိုၚ်ရ။
ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် “တဳလမၞုံပိုဉ်ကျာ်တြဲ ပါဲကၠေံ ပွမကရေက်ၜုန်ရ” ရဴဝွံ ကဵုသ္ပပွမဒက်ဂွဳပူသ္ၚိသၠိုက်အိုတ်ရ။ (သ္ၚိသၠိုက်ကဵုဟီုဂှ် စၞာံဂရောပ်၊ အဋ္ဌုပ်အၚ်္ဂဇာတ်ရ)။
ခမဳပၟိက်အောန်ဂမၠိုၚ်ဂှ် “မုဟိုတ် ခမဳဆဗ္ဗဂ္ဂဳဂမၠိုၚ် ကဵုသ္ပပွမဒက်ဂွဳပူသ္ၚိသၠိုက်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရရာဝွံ ကုတဳလမၞုံပိုဉ်ကျာ်တြဲအိုတ်ရ။ “ယွံခမဳတအ် ခမဳဆဗ္ဗဂ္ဂဳဂမၠိုၚ် ကဵုသ္ပပွမဒက်ပူဂွဳသ္ၚိသၠိုက်အိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။
ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ) ။ ပ ။ ဟီုဂရိုဟ်တုဲ တွံကဵုဂလာန်ဓရ်တုဲမ္ဂး “ယွံခမဳတအ် နူဌာန်ၜါလပုဟ်တဲ မဒှ်ဇရေၚ်မက္ဍန်ဂြက်ဂှ် ဟဂပ်ဝ်ကဵုသ္ပ ပွမကရေက်ၜုန်ကီု ပွမဒက်ဂွဳပူသ္ၚိသၠိုက်ကီုရ၊ ကုခမဳမကဵုသ္ပဂှ် ဒးအာပတ်ထုလ္လစ္စယ်ရ” ရဴဝွံ (သ္ဂးရ)။
