၁၆၆။ ကဵုအခေါၚ် မပ္တံပွမဒုၚ်ဗဂိန်
၂၇၇။ ပ္ဍဲအခိၚ်ဂှ် ဒကာကၠောန်ၜိုတ်ဥပကာ တဳလပိုဉ်ဥပနန္ဒ ကောန်သၟိၚ်သာကျဝၚ် “ထ္ၜးကဵုတဳလပိုဉ်ဥပနန္ဒတုဲ ဩဝ်ကဵုဒါန် ကုသၚ်ညိ” ဖအေဝ်ဗလံၚ်နၚ်စၞစ တၞဟ်နသွက်သၚ်ရ။ ပ္ဍဲအခိၚ်ဂှ် တဳလပိုဉ်ဥပနန္ဒ ကောန်သၟိၚ်သာကျဝၚ် ဒှ်အခိၚ်လုပ်ဂ္ၚေၚ်ဒၟံၚ်ပိဏ္ဍပါတ်အပ္ဍဲကွာန်ရ။ ပ္ဍဲအခိၚ်ဂှ် မၞိဟ်ဂမၠိုၚ် အာ အာရှာမ်တုဲ “ယွံတဳလပိုဉ်တအ် တဳလပိုဉ်ဥပနန္ဒဂှ် ဣလဵုရော?” ရဴဝွံ သၟာန်ခမဳဂမၠိုၚ်အိုတ်ရ။ ယွံဒကာတအ် တဳလပိုဉ်ဥပနန္ဒ ကောန်သၟိၚ်သာကျဝၚ်ဂှ် လုပ်ဂ္ၚေၚ်ဒၟံၚ်ပိဏ္ဍပါတ် အပ္ဍဲကွာန်ရ ရဴဝွံ (သ္ဂးအိုတ်ရ)။ ယွံတဳလပိုဉ်တအ် စၞစဝွံ ထ္ၜးကဵုတဳလပိုဉ်ဥပနန္ဒတုဲ ကဵုထောံဒါန် ကုသၚ်ညိ ရဴဝွံ (ဂရၚ်ပတီအိုတ်ရ)။
ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံဂလာန်ဓရ်တုဲ “ယွံခမဳတအ် ဒှ်သာ်ဂှ်မ္ဂး ဒုၚ်ဗဂိန်လဝ်တုဲ ဩဝ်စွံပတန်လဝ် စဵုကဵုဥပနန္ဒ ကၠုၚ်စိုပ်အိုတ်ညိ” ရဴဝွံ သ္ဂးကဵုခမဳဂမၠိုၚ်ရ။ ပ္ဍဲအခိၚ်ဂှ် တဳလပိုဉ်ဥပနန္ဒ ကောန်သၟိၚ်သာကျဝၚ် ပ္ဍဲအခိၚ်နူဂယး ပြာပ်စဴအာသ္ၚိတုဲ အခိၚ်တ္ၚဲသၠုၚ်မှ ကလေၚ်ကၠုၚ်ရ။
ပ္ဍဲအခိၚ်ဂှ် ခမဳဂမၠိုၚ် ပ္ဍဲအခိၚ်ဒှ်တၞောဝ်ကၠောဝ်ဗျဵု ဒုၚ်ဂိုၚ်ကေတ် ဗၞတ်ညိနာၚ်တုဲလေဝ် ဒေါံရ ရဴဝွံ ဆေဝ်ဒဝ်ကၠေံအိုတ်ရ၊ ဗ္စာရဏာတုဲလေဝ် ပါဲဒဝ်ကၠေံအိုတ်ရ၊ သၚ်အိုတ်သီုလေဝ် ဒေါံရ ရဴဝွံ ဆေဝ်ဒဝ်ကၠေံရ၊ ခမဳဂမၠိုၚ် မၞုံကဵု‘သံသယကုက္ကုစ္စ’ ပွမချပ်သၠေဟ်ပၟာ ရဴဝွံမ္ဂး ဟဂပ်ဝ်ဒှ်တုဲ ဟွံဒုၚ်ဂိုၚ်ကေတ်အိုတ်ရ။ ယွံခမဳတအ် ဩဝ်ဒုၚ်ဂိုၚ်ကေတ်အိုတ်ညိ၊ ဩဝ်သ္ပပြဘိုဂ်အိုတ်ညိ၊ ယွံခမဳတအ် ဃောကဵုပိုဉ် ခမဳမဆေဝ်ဒဝ်ဒး ရဴဝွံမ္ဂးဒေါံရဂှ် ဘောဇိုန်မဒုၚ်ဗဂိန်လဝ် ပ္ဍဲအခိၚ်နူဂယးဂှ် သီုဟွံသ္ပအတိရိတ်ဝိနယ်ကမ် တၞဟ်နသ္ပပြဘိုဂ် ကဵုအခေါၚ်ရ ရဴဝွံ (သ္ဂးရ)။
၂၇၈။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲဍုၚ်ရာဇဂြိုဟ် ဗွဲမမိပ်လဟိၚ်တုဲမ္ဂး က္ညဂ္ၚေၚ်အာဒေသစာရိတ် ဍုၚ်သာရဝှ်ရ။ အတိုၚ်လၟေၚ်လၟေၚ် က္ညဂ္ၚေၚ်အာဒေသစာရိတ်မ္ဂး စိုပ်ကၠုၚ်ဍုၚ်သာရဝှ်ဂှ်တုဲ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ်ရ။
ပ္ဍဲအခိၚ်ဂှ် ယဲဇကုဂမ္တဴ ကတဵုဒှ်ကုတဳလပိုဉ်သာရိပိုတ်ရ။ ပ္ဍဲအခိၚ်ဂှ် တဳလပိုဉ်မဟာမောဂ္ဂလာန် ပြာပ်အာဇရေၚ် တဳလပိုဉ်သာရိပိုတ်တုဲ “ယွံကောန်တၠသာရိပိုတ် ပ္ဍဲကိုပ်ကၠာတေံ ယဲဇကုဂမ္တဴ ဗၠးကၠေံအာ ကုတၠအဲ နကဵုဂဥုဲလဵုရော?” ရဴဝွံ သၟာန်တဳလပိုဉ်သာရိိပိုတ်ရ။
ယွံကောန်တၠ နကဵုလွာဒကှ်ဂမၠိုၚ်ကီု နကဵုတမ်လွာဒကှ်ဂမၠိုၚ်ကီု ကေၚ်ဗၠးကၠေံအာ ကုအဲရ ရဴဝွံ ဟီုသ္ဂးရ။ ပ္ဍဲအခိၚ်ဂှ် တဳလပိုဉ်မဟာမောဂ္ဂလာန် တြုံမၞုံကဵုဇြဟတ်ဂှ် သပါတဲမခ္ဍပ်လဝ် သၟဟ်ညံၚ်ရဴပၠးပတိတ်ကီု သပါတဲမပၠးလဝ် သၟဟ်ညံၚ်ရဴခ္ဍပ်ကၠေံကီု တုပ်သၟဟ်သာ်ဂှ်ဟေၚ် ကၠေံဗ္ဒန်အာ နူဘာဇေတဝန်တုဲ ဒှ်ပြာကဋ် ပ္ဍဲရေၚ်သြၚ်ကၟာမန္ဒာကိနဳရ။ စိၚ်ဇၟူမွဲ ညာတ်ဒးတဳလပိုဉ်မဟာမောဂ္ဂလာန် မက္ညကၠုၚ်ဒၟံၚ် နူဇမ္ၚောဲဟေၚ်တုဲ “ယွံတဳပိုဉ် တဳလပိုဉ်မဟာမောဂ္ဂလာန် ဩဝ်က္ညကၠုၚ်ညိ၊ ယွံတဳလပိုဉ် ပွမတဳလပိုဉ်မဟာမောဂ္ဂလာန် က္ညကၠုၚ်ဝွံ ဒှ်ပွမက္ညခိုဟ်ဆာဲရ၊ ယွံတဳလပိုဉ် တဳလပိုဉ်မဟာမောဂ္ဂလာန် နွံပၟိက်ကဵုမုဝတ္ထုမွဲရော? သ္ဂောံကဵုဒါန် မုဝတ္ထုမွဲရော?” ရဴဝွံ ဂရၚ်ပတီရ။
ယွံကောန်တၠ အဲနွံပၟိက်ကဵု လွာဒှ်ကှ် တမ်လွာဒကှ်ဂမၠိုၚ်ရ ရဴဝွံ ဟီုသ္ဂးရ။ ပ္ဍဲအခိၚ်ဂှ် စိၚ်ဇၟူဇၞော်ဂှ် “ယွံသကအ် ဩဝ်ကဵုဒါန်လွာဒကှ်ဂမၠိုၚ်ကီု တမ်လွာဒကှ်ဂမၠဒိၚ်ကီု ကုတဳလပိုဉ် အတိုၚ်နွံပၟိက်ညိ” ရဴဝွံ ဖအောဝ်စကာစိၚ်သအာၚ်မွဲရ။
ပ္ဍဲအခိၚ်ဂှ် စိၚ်ဂှ် တၞီစှ်ေအာကၟာဍာ်မန္ဒာကိနဳတတုဲ ပိုက်ၜေါတ် လွာဒကှ် တမ်လွာဒကှ်ဂမၠိုၚ် နကဵုလပှ်တုဲ လယှ်ကၠေံ နပွမလယှ်ဗွဲမ္ဒးရးတုဲမ္ဂး ဒက်ဂွဳကၠေံတုဲ ပြာပ်အာဇရေၚ် တဳလပိုဉ်မဟာမောဂ္ဂလာန်ရ၊ ပ္ဍဲအခိၚ်ဂှ် တဳလပိုဉ်မဟာမောဂ္ဂလာန် တြုံမၞုံကဵုဇြဟတ်ဂှ် သပါတဲမခ္ဍပ်လဝ် သၟဟ်ညံၚ်ရဴပၠးပတိတ်ကီု သပါတဲမပၠးလဝ် သၟဟ်ညံၚ်ရဴခ္ဍပ်ကၠေံကီု တုပ်သၟဟ်သာ်ဂှ်ဟေၚ် ကၠေံဗ္ဒန်အာ နူကၟာဍာ်မန္ဒာကိနဳတုဲ ဒှ်ပြာကဋ် ပ္ဍဲဘာဇတေဝန်ရ။ စိၚ်ဇၟူဇၞော်ဂှ်လေဝ် ကၠေံဗ္ဒန်အာ နူကၟာဍာ်မန္ဒာကိနဳတုဲ ဒှ်ပြာကဋ် ပ္ဍဲဘာဇေတဝန်ရ။
ပ္ဍဲအခိၚ်ဂှ် စိၚ်ဇၟူဇၞော်ဂှ် ဗဂိန်ကဵုဒါန် လွာဒကှ်ဂမၠိုၚ်ကီု တမ်လွာဒကှ်ဂမၠိုၚ်ကီု ကုတဳလပိုဉ်မဟာမောဂ္ဂလာန်တုဲပ္ဍဲကြဴ တဳလပိုဉ်မဟာမောဂ္ဂလာန် ဗဂိန်ကဵုလွာဒကှ် တမ်လွာဒကှ်ဂမၠိုၚ် ကုတဳလပိုဉ်သာရိပိုတ်ရ။
ပ္ဍဲအခိၚ်ဂှ် တဳလပိုဉ်သာရိပိုတ် စတဴ လွာဒကှ် တမ်လွာဒကှ်ဂမၠိုၚ်မ္ဂး ယဲဇကုဂမ္တဴလလမ်အာရ၊ လွာဒကှ် တမ်လွာဒကှ်ဂမၠိုၚ်မဂၠိုၚ်ဂၠၚ် သှ်ေသၟေဟ်ဒၟံၚ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ် ပ္ဍဲအခိၚ်ဂှ် ဒှ်ကၞောဝ်ကၠောဝ်ဗျဵု ဒုၚ်ဂိုၚ်ကေတ် ဗၞတ်ညိနာၚ်တုဲလေဝ် ဒေါံရ ရဴဝွံ ဆေဝ်ဒဝ်ကၠေံအိုတ်ရ၊ ဗ္စာရဏာတုဲလေဝ် ပါဲဒဝ်ကၠေံအိုတ်ရ၊ သၚ်အိုတ်သီုလေဝ် ဒေါံရ ရဴဝွံ ဆေဝ်ဒဝ်ကၠေံရ၊ ခမဳဂမၠိုၚ် မၞုံကဵု‘သံသယကုက္ကုစ္စ’ ပွမချပ်သၟေဟ်ပၟာ ရဴဝွံမ္ဂး ဟွံဂပ်ဝ်ဒှ်တုဲ ဟွံဒုၚ်ဂိုၚ်ကေတ်အိုတ်ရ။ ယွံခမဳတအ် ဩဝ်ဒုၚ်ဂိုၚ်ကေတ်အိုတ်ညိ၊ ဩဝ်သ္ပပြဘိုဂ်အိုတ်ညိ၊ ယွံခမဳတအ် ဃောကဵုပိုဉ် ခမဳမဆေဝ်ဒဝ်ဒး ရဴဝွံမ္ဂး ဒေါံရဂှ် အရာဝတ္ထုမဒှ်ပ္ဍဲဂြိုပ် အရာဝတ္ထုမဒှ်ပ္ဍဲဒကှ်ဂှ် သီုဟွံသ္ပအတိရိတ်ဝိနယ်ကမ် တၞဟ်နသ္ပပြဘိုဂ် ကဵုအခေါၚ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ပ္ဍဲဍုၚ်သာရဝှ် စၞစသတ်ဆုဂၠိုၚ်ကဵုဂကူ ဂၠိုၚ်ဂၠၚ်(လှေၚ်)ရ၊ ကပ္ပိယကာရကလေဝ် ဟွံမွဲရ၊ ခမဳဂမၠိုၚ် မၞုံကဵု‘သံသယကုက္ကုစ္စ’ ပွမချပ်သၠေဟ်ပွာ ရဴဝွံမ္ဂး ဟွံဂပ်ဝ်ဒှ်တုဲ ဟွံစသတ်ဆုအိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ၊ ယွံခမဳတအ် သတ်ဆုမတ္ၜတ် ပတိတ်ကၠေံမတုဲ မထေက်ကဵုစဂှ် သီုဟွံကဵု(ခရှ်သာမဏဳဂမၠိုၚ်)ကပ္ပဳဂှ် တၞဟ်နသ္ပပြဘိုဂ် ကဵုအခေါၚ်ရ ရဴဝွံ (သ္ဂးရး)
